olmuşdu...
Doğrudan, da uşaq ki, uşaq... Tanabay:
– Azmışdım, – dedi. Dili topuq vurdu. Ər-arvad beləcə görüşdülər. Arada özgə
bir söz olmadı. Uşaq
qaçdı, ilxını qayalıqdan çıxarmağa getdi və yalnız o qaçandan sonra qadın
dilləndi:
– Heç, deyəsən, paltarını geyməyə də vaxt tapmamısan. Yaxşı ki,
çəkmən, şalvarın yadından çıxmayıb. Heç utanmırsan? O boyda uşaqların
atasısan, ancaq...
Tanabay heç nə demədi. Axı, nə deyə bilərdi?
Bu vaxt ərzində
uşaq ilxını qovub gətirdi, atların hamısı sağ-salamat idi. Caydar uşağı
çağırdı:
– Gəl evə, Altıke! Bu gün sizdə də, bizdə də iş çoxdur. Külək
yurtları alt-üst eləyib. Gəl gedək yığışdıraq.
Sonra qadın lap astadan ərinə müraciət elədi:
– Dur burda, mən gedim yeməyə bir şey gətirim, bir şey də
tapım verim sal əyninə. Bu cür camaat arasına çıxmaq olmaz!
Tanabay:
– Mən aşağıda olacağam, – dedi.
O, atı aşağı sürdü. İlxını örüşə çıxarıb xeyli vaxt
qovdu. Gün düşmüşdü, hava qızmışdı. Çöl-çəmən buxarlanırdı, torpaq cana
gəlirdi. Havada təzə ot iyi vardı, yağış qoxusu vardı.
Atlar tələsmədən çayı
keçdilər, dərədən adlayıb döşə qalxdılar. Burada Tanabayın gözləri önündə
yeni aləm açıldı. Haradasa, lap uzaqlarda üfüq ağ buluda bürünmüşdü. Sanki,
göylər həmişəkindən də geniş idi, uca və təmiz idi. Uzaqda, çölün düzündə
parovoz tüstülənirdi.
Tanabay atdan düşüb, otun üstü ilə addımladı. Yanından
torağay uçdu, havaya qalxıb cikkildədi. Tanabay beləcə bir neçə addım yeridi,
birdən o, üzü-üstə yerə gəldi.
Gülsarı öz sahibini heç vaxt bu halda
görməmişdi. Tanabay üzüqoylu uzanmışdı, hönkürürdü, hönkürdükcə çiyinləri
titrəyirdi. O ağlayırdı, xəcalətdən ağlayırdı, bir də ona görə ağlayırdı
ki, həyatda bu son xoşbəxtliyi də itirmişdi...
Ertəsi gün ilxı dağa yollandı. Bir də onlar gələn il yaz açılanda buraya
qayıdacaqdılar. Köç çaydan-
çaylaqdan keçdi, kəndin yanından ötdü. Atlar ilxı-ilxı getdi, mal-qara sürü-
sürü getdi. Yollarda yüklü dəvələr, atlar, at üstdə arvad-uşaq; qıllı
köpəklər sürülərin yanınca qaçdılar. Səslər bir-birinə qarışdı: insan səsi,
at kişnəməsi, qoyun-quzu mələşməsi...
Tanabay öz ilxısı ilə birgə böyük
çəməni arxada qoydu, bir vaxt bayram şənliyi keçirilən döşə qalxdı və bütün
yolboyu o, aul səmtə baxmamağa çalışdı. Gülsarı birdən-birə çevrilib o
səmtə yönələndə, sahibi onu qamçı ilə geri qaytardı. Beləliklə də, onlar
kəndin ayağındakı həyətə girmədilər. Bu dəfə o əllər Gülsarının başını
tumarlamadı: o əllər ki, qəşəng idi, isti idi, alnında ağ ulduzu olan qulanın
dodaqları kimi həssas idi, yumşaq idi...
İlxı gedirdi.
Gülsarı istəyirdi
ki, sahibi mahnı oxusun, ancaq Tanabay oxumurdu. Aul arxada qalmışdı. Əlvida,
aul! Qarşıda dağlar dayanıb. Çöllər, gələn yazacan sağlıqla qalın!
6
Gecəyarıya az qalırdı. Daha burdan o yana getməyə Gülsarının halı yox idi.
Yollarda addımbaşı dura-dura Gülsarı birtəhər yarğanın yanınacan gəlib
çıxmışdı, ancaq at yarğanı keçə bilməyəcəkdi. Daha atı məcbur eləmək olmazdı
– bunu qoca Tanabay yaxşı başa düşürdü. At inləyirdi, insan kimi
zarıyırdı. Yenə atın qıçları bükülürdü, ancaq bu dəfə Tanabay onu qaldırmaq
fikrində deyildi.
Gülsarı yerə sərilib soyuq torpağın üstündə zarıdı, onun
başı bir yerdə qərar tutmurdu. At üşüyürdü, bədəni əsim-əsim əsirdi. Tanabay
kürkünü çıxarıb atın üstünə saldı.
– Hə, qardaş, halın xarabdır. Lap
xarabdır, eləmi? Nə yaman üşüyürsən, Gülsarı. Axı, sən heç vaxt üşüməzdin.
Tanabay daha nəsə dedi, ancaq at eşidə bilmədi. O, ancaq ürəyinin səsini
eşidirdi. O səs indi atın başına vurmuşdu, ürək partlayırdı, ürək yerindən
qopurdu: Tum-tap, tum-tap, tum-tap, tum... Sanki, haradasa qorxub hürkmüş
ilxı çapırdı.
Ay dağların dalından çıxıb, buludlar arasından dünyaya baxdı. Göydən bir
ulduz qopdu, axıb səssiz-səmirsiz söndü...
– Sən dur burda, mən
gedim çör-çöp gətirim.
Qoca dörd tərəfi dolanıb bildirki qanqalın qurularını sındırdı. Bir qucaq
çör-çöp yığanacan tikanlar əllərini didim-didim
elədi. Sonra o, hər ehtimala qarşı, bıçağı əlində tutub yarğana endi, oradakı
yulğun kollarından bir xeyli kəsib doğradı. Tanabay sevindi – yulğunun
yaxşı odu olacaqdı.
Həmişə Gülsarı oddan qorxardı. Bu dəfə qorxmadı, ocağın istisi də, tüstüsü də
ona xoş gəldi. Tanabay kisənin üstündə əyləşmişdi,
qanqalı yulğunun gözünə qatıb ocağa tullayır, oturub alova baxa-baxa əllərini
qızdırırdı. O, hərdən dururdu, atın üstündəki kürkü düzəldirdi və yenə
odun qırağında əyləşirdi.
Gülsarı qızındı, titrəməsi qoydu, ancaq atın gözlərinin sarısı get-gedə
artırdı, ürəyi daha bərk sıxılırdı, nəfəsi
təngiyirdi. Ocağın qırmızı alovu gah yatır, gah qalxırdı. Gülsarının yanında
oturmuş qoca gah görünür, gah qeyb olurdu. Qızdırmalı ata elə gəlirdi
ki, onlar tufanlı bir gecədə yol gedirlər, o kişnəyir, şahə qalxır, ilxını
axtarır, ancaq ilxı tapılmır... Şimşək çaxırdı, zülmət gecə ağarırdı,
qaralırdı.
İşıq, qaranlıq. İşıq, qaranlıq...
7
Qış qurtardı, müvəqqəti olsa da, çəkilib getdi ki, çobanlar dünyada yaşamağın
o qədər də çətin olmadığını
hiss eləsinlər. Qabaqda isti günlər gəlirdi, bir azdan mal-qara dirçələcəkdi,
bolluca ət olacaqdı, süd olacaqdı, bayramlarda igidlər at çapacaqdı,
adi günlərdə kəsiləsi mal-qara ət kombinatına sürüləcəkdi. Doğum, qırxın,
balaların bəslənməsi, bir yandan köç, bir yandan təhvil-təslim və bütün
bunlarla yanaşı hər kəsin öz həyatı, öz dərdi-səri. Sevgi və intizar, doğum
və ölüm; uşaqlarının yaxşı oxuduğunu eşidəndə çobanlar sevinəcəkdilər,
fəxr eləyəcəkdilər, internatdan gələn pis xəbərlər onları kədərləndirəcəkdi:
gözümün qabağında olsaydı, bəlkə də, pis oxumazdı... Bir yandan iş, bir
yandan ev dərdi, uşaq dərdi; qışın qarı, soyuğu, birillik olsa da, unudulub
gedəcəkdi.
Xəstəlik, mal tələfatı, şaxtalar, cır-cındır köçəbələr və
soyuq tövlələr gələn iləcən hesabatlarda, məlumatlarda qalacaqdı. Sonra qış
yenə də ağ dəvəsini minib gələcəkdi, çobanı yerin dibində olsa da,
axtarıb tapacaqdı, ona öz tərs üzünü göstərəcəkdi. Hər şey, hər şey təzədən
başlanacaqdı. Bizim iyirminci əsrdə də elə qış öz qışlığındadır...
O il də
qış sərt keçmişdi. Arana köç başlananda at-ilxı, mal-qara çox arıq idi, hər
halda çobanlar sevinirdilər, çünki yaz gəlmişdi və bu qışdan da onlar
sağ-salamat çıxmışdılar.
O yaz Tanabay Gülsarını ilxıya buraxmışdı. İndi o, çox nadir hallarda atın
belinə yəhər qoyurdu. Tanabayın ata yazığı
gəlirdi, bir də belə şey olmazdı – tezliklə cütləşmə dövrü başlanacaqdı.
Gülsarının yaxşı ayğır olacağı əvvəlcədən bilinirdi. Qulanlara və dayçalara
o, əsil ata kimi qayğı göstərirdi. Doğan atların yanında Gülsarı əlbəəl hazır
olurdu, balanın münasib olmayan yerə düşməyinə, yaxud onun ana atdan
uzaqlaşmasına imkan vermirdi. Üstəlik, Gülsarının başqa bir məziyyəti də
vardı: atların boş-boşuna narahat edilməyinə o heç cür dözə bilmirdi, belə
şeylər olanda Gülsarı ilxını qovub asudə yerə aparırdı.
Dostları ilə paylaş: |