başı da şişib iriləşmiş burnu ilə birgə yoxa çıxdı; kürən at tamam gözdən
itdi. Ancaq boz at uzun müddət təslim olmaq istəmədi. Özünü tamam üzüb
əldən salanacan o, Gülsarı ilə yanaşı çapdı, yoruldu, geridə qaldı, ancaq
qəzəbi azalmadı! Beləcə boz at da məğlub oldu, ancaq özünün məğlub olduğunu
o, sonacan boynuna almaq istəmədi.
Rəqiblər geridə qalandan sonra Gülsarı üçün nəfəs almaq da bir növ asanlaşdı.
İndi o, adamların toplaşdığı göy
çəməni görürdü, oradakı çayın gümüş parıltısı Gülsarının gözünə düşməkdə idi;
orada adamlar var səsləri ilə qışqırırdılar və at son gücünü toplayıb o
səsə doğru çapırdı. Hələ yolda gözləyən azarkeşlər də vardı. Onlar at çapıb
yol üstdə vərdiş eləyirdilər, qışqırıb bir-birinə hay verirdilər. Gülsarı
birdən-birə zəiflədi. Yol gözünə durdu. Daha onun arxadan xəbəri yox idi, ona
çatan vardımı, yoxdumu – Gülsarı bilmirdi. Qaçmaq get-gedə
çətinləşirdi, atın qüvvəsi tükənirdi.
Qarşıda isə böyük bir izdiham vardı, atlı və piyadaların iki böyük dəstəsi
cərgə ilə qabağa yeriyirdi, səs get-
gedə güclənirdi. Birdən at öz adını açıq-aydın eşitdi: “Gülsarı! Gülsarı!
Gülsarı!..” İnsanların bu çağırış səsi ata qüvvət verdi və o, var gücünü
toplayıb bir daha irəli cumdu. Ah, insanlar, insanlar! Siz nəyə qadir
deyilsiniz!..
Arası kəsilməyən səs-küy və sevinc sədaları altında Gülsarı
cərgə-cərgə düzülmüş adamların arasından keçdi, addımlarını yavaşıdıb
çəmənlikdə dövrə vurdu.
Hələ bu harasıydı ki! Gülsarı azca nəfəs alıb özünə
gələn kimi, onu da, sahibini də dörd tərəfdən əhatə elədilər. Səslər yenidən
ucaldı: “Gülsarı, Gülsarı, Gülsarı!” Atın adı ilə birgə onun sahibinin
də adı eşidildi: “Tanabay! Tanabay! Tanabay!”
İnsanlar Gülsarıdan asanlıqla əl çəkmədilər. Bir təntənənin dalınca başqa bir
təntənə gəldi və sevincdən
gözləri parıldayan at başını dik tutub insanların qarşısında məğrur-məğrur
dolandı. Şöhrətdən məst olmuş Gülsarı meydanda qalib kimi rəqs elədi,
belini oynatdı, qıçlarını tərpətdi, özünün yenidən qaçmağa hazır olduğunu
insanların qarşısında nümayiş etdirdi. O anda Gülsarı gözəl idi, qüdrətli
idi, məşhur idi və bunu onun özü də yaxşı bilirdi.
Tanabay izdihamın qarşısından qalib sevinci ilə keçib xeyli vaxt atın üstündə
cövlan elədi və yenə
yüzlərcə adam eyni səslə “Amin!” – dedi, yüzlərcə əl alınlarda, üzlərdə
dolanıb salavat çevirdi.
Bu vaxt Gülsarı, saysız-hesabsız sifətlər içində o
tanış qadının sifətini gördü. Qadın əlini üzünə çəkib salavat çevirəndə at
onu əlbəəl tanıdı, halbuki bu dəfə Bübücan özünün həmişəki qara şalında
deyildi, başına ağ yaylıq bağlamışdı. Qadın qabaq cərgədə dayanıb sevinclə
onlara baxırdı və onun xoşbəxt, mehriban gözləri yenə də aylı gecədə çay
dibində görünən daşlar kimi rəng alıb rəng verirdi. Öz köhnə vərdişi ilə
Gülsarı birbaş qadına tərəf addımladı, o, qadının yanında dayanmaq
istəyirdi; istəyirdi ki, sahibi o qadınla söhbət eləsin, istəyirdi ki, yenə o
qadın öz mehriban əlləri ilə onun yalını sığallasın, boynunu-başını
qaşısın, axı, o qadının əlləri qəşəng idi, isti idi; o əllər alnında ağ
ulduzu olan qulanın dodaqları kimi yumşaq idi, həssas idi. Ancaq, nədənsə,
Tanabay atın yüyənini başqa səmtə çəkirdi və sahibinin hərəkətindən heç nə
başa düşməyən Gülsarı fırlanır, vurnuxur, tanış qadına sarı dartınırdı.
Görəsən, doğrudanmı Tanabay o qadının burada olduğunu görmürdü, axı bu tanış
qadınla danışmalı idi, mütləq danışmalı idi...
İkinci gün, yəni mayın
ikisi də yenə Gülsarının günü oldu. Həmin gün, günortadan sonra, çölün
düzündə keçiqapma oyunu başlandı. Bu oyun bir növ atüstə futbol oyununa
bənzəyir, fərq bircə burasındadır ki, bu oyunda oyunçular top yerinə, başı
kəsilmiş keçidən istifadə eləyirlər, çünki keçinin qəzili uzun olur,
davamlı olur və adamlar at üstdə çapa-çapa aşağı əyilib onun qəzilindən, ya
da qıçından yapışa bilirlər.
O gün də çöldə, ata-baba dövründən qalma
qədim sözlər eşidildi, nidalar ucaldı. Yenə atlar çapdılar – yer təbil kimi
çalındı. Atlı azarkeşlər yarışanların dalınca şığıdı, hay düşdü, haray
qopdu. O günün də qəhrəmanı Gülsarı oldu. Bu dəfə o, hələ oyun başlanmamışdan
diqqət mərkəzində idi, yarışda ən güclü at hesab olunurdu. Buna
baxmayaraq, Tanabay onu son çarpışma üçün qoruyub saxlayırdı, çünki savaş
hələ qabaqda idi. Bir azdan atlılara əlbəyaxa olmaq icazəsi veriləcəkdi:
kim daha cəld idisə, keçini qapıb öz kəndinə aparacaqdı. Son savaşa icazə
verilməsini hamı səbirsizliklə gözləyirdi, çünki oyunun bütün məğzi bunda
idi, üstəlik, son savaşda iştirak etməyə hamının ixtiyarı vardı, burada hər
kəs öz bəxtini sınaya bilərdi.
Hələlik atlılar keçi ilə məşq eləyirdilər.
Saralmış may günəşi isə uzaq qazax çöllərində ağır-ağır batmaqda idi. Batan
günəş eynən yumurta sarısına bənzəyirdi, yumurta sarısı kimi tox idi,
yumru idi və ona göz qırpmadan baxmaq olurdu.
Qazaxlar və qırğızlar, yəhərlərdən asılıb çapa-çapa, ta axşamacan keçinin
cəmdəyi ilə oynadılar, onu
bir-birlərinin əlindən qapdılar. Gah yığışıb hay-küylü bir dəstə oldular, gah
dağılışıb çölə-düzə səpələndilər.
Axşam düşəndə, uzun, ala-bula kölgələr
yerdə alay-alay qaçışmağa başlayanda, qocalar son savaşa icazə verdilər. Keçi
ortalığa qoyuldu. Savaş başlandı.
Atlılar hər tərəfdən keçinin üstünə
axışdı, cəmdəyi yerdən götürmək üçün onlar komalaşdılar, çarpışdılar. Ancaq
belə bir vurhavurda bu işin öhdəsindən gəlmək o qədər də asan deyildi.
Qızmış atlar bir-birini dişləyirdilər, onların heç biri o birinə aman vermək
istəmirdi. Nəfəsi daralmış Gülsarı inləyirdi, qaçıb asudəliyə çıxmaq
istəyirdi, ancaq Tanabay keçinin cəmdəyini heç cür ələ keçirə bilmirdi.
Birdən kimsə heybət-heybət qışqırdı: “Qoymayın, qazaxlar apardılar!” Köynəyi
cırılmış cavan bir qazax bir qızmış qara kəhərin üstündə sıçrayıb ortadan
çıxdı. Keçini üzənginin altında ayaqları ilə bərk-bərk tutaraq, birbaş
qaçmağa üz qoydu.
Atlılar yerbəyerdən qışqırdılar: – Qoymayın! Qara kəhəri qoymayın! Tez ol,
Tanabay, çatsan sən çata bilərsən!
Qara kəhər minmiş qazax
keçini üzəngidən sallada-sallada atını günbatan səmtə çapdı. Elə çapdı ki,
elə bil, günəşin özünə çatacaqdı, qarışıb günün şüasında əriyəcəkdi.
Ancaq
sahibi Gülsarını hələ də saxlamışdı, niyə saxlamışdı – at bilmirdi. Ancaq
Tanabay öz işini yaxşı bilirdi. Axı, böyük bir atlı dəstəsi qazax igidinin
dalınca çapırdı, atlılar öz həmyerlilərinin köməyinə gedirdilər, onlar qara
kəhərdən aralanınca gözləmək lazım idi. Bu boyda atlı dəstəsinin
əhatəsində əldən getmiş qəniməti heç bir qüvvə ilə ələ keçirmək olmayacaqdı.
Yenə ümid təkbətək savaşa qalırdı.
Münasib vaxt çatan kimi Tanabay atın
cilovunu buraxdı. Gülsarının irəli cummağı ilə axışıb köməyə gedən qazax
atlılarının geridə qalmağı bir oldu. Gülsarı ilə qara kəhərin arasındakı
məsafə o saatca qısaldı, çünki qara kəhərin ağır yükü vardı, ona çatmaq asan
idi. Tanabay Gülsarını qazax atlısının sağ cinahına yönəltdi. Keçi qara
kəhərin sağ yanında, qazax atlısının ayaqları arasında idi. Onlar lap
yaxınlaşdılar, keçinin qıçından yapışmaq üçün Tanabay əyilib əlini irəli
uzatdı. Ancaq qazax böyük cəldliklə ovu sağ yanından sol yanına aşırdı. Yenə
atlar günbatan tərəfə çapdılar. İndi Tanabay bir qədər aralanıb qazax
atlısına sol tərəfdən hücum etməli idi. Gülsarını qara kəhərdən ayırmaq çətin
olsa da, Tanabay bir qədər aralandı, qazağın soluna keçdi. Ancaq qazax
bu dəfə də çox cəld tərpəndi, keçini sağ cinahına aşırdı. Vəcdə gəlmiş
Tanabay qışqırıb:
– Əhsən! – dedi və atlar yenə də günəşə doğru səyirtdilər.
Tanabayın bu dəfəki rəqibi çox güclü rəqib idi. Ancaq daha vaxtı itirmək
olmazdı. Tanabay öz atını qonşu atın lap böyrünə dirədi, əyilib qara kəhərin
Dostları ilə paylaş: |