Tanabay qaşları çatılmış halda, hirsli-hirsli kolxoz idarəsindən çıxanda,
yəhərin üstündə
qəzəblə oturub, yüyəni acıqla çəkəndə onun ürəyindən nələr keçdiyini at
bilmirdi. Bircə onu duyurdu ki, sahibinin kefi yaxşı deyil. Tanabay atı heç
vaxt döyməsə də, belə vaxtlarda Gülsarı ondan qorxurdu və yolda həmin qadını
görən kimi hiss eləyirdi ki, sahibinin kefi yaxşılaşacaq, bilirdi ki,
aramla gedə-gedə onlar nə haqdasa astadan söhbət eləyəcəklər; qadın öz balaca
əlini Gülsarının boyun-başında gəzdirəcək, onun boynunu, yalını
sığallayacaqdır. Görəsən, dünyada o cür mehriban əlləri olan ikinci bir adam
vardımı? O əllər qəşəng idi, isti idi, alnında ağ ulduzu olan qulanın
dodaqları kimi yumşaq idi, həssas idi. Dünyada heç kəsin gözləri o qadının
gözlərinə bənzəmirdi. Tanabay yəhərdən əyilib xısın-xısın danışanda o
gözlər gah gülür, gah da doluxsunurdu. Qadın başını silkələyib özünün nədənsə
narazı olduğunu bildirirdi; bu vaxtlar onun gözləri gah yanır, gah
sönür, gözlər aylı gecədə çay dibində görünən daşlar kimi rəng alıb, rəng
verirdi. Vidalaşıb gedəndə də qadın çevrilib geri baxırdı və yenə
əvvəlkitək başını bulayırdı.
Ondan ayrılandan sonra Tanabay fikirli olurdu. O, cilovu ehmalca əlində
saxlayır, öz löhrəm yerişi ilə at istədiyi kimi
çapıb gedirdi. Belə vaxtlarda Gülsarı üstündə adam oturduğunu hiss eləmirdi.
Hər kəs ayrılıqda, hər kəs öz aləmində, mahnı da öz-özünə qoşulub
gəlirdi. Astadan, əlaqəsiz, qarışıq sözlərlə, aram-aram yeriyən atın ayaq
səsləri altında Tanabay çoxdan ölüb gedənlərin qəmindən-qüssəsindən oxuyur,
atsa tanış yola çıxıb düzlər keçir, çaylar aşır, Tanabayı dağlara aparırdı...
Sahibinin bu qeyri-adi halını Gülsarı sevirdi, onu dəyişən,
başqalaşdıran qadına da atın özünə məxsus məhəbbəti vardı. Gülsarı o qadını
yerişindən tanıyırdı, onun görkəmini, boyunu-buxununu uzaqdan seçə
bilirdi; hətta öz həssas burnu ilə at o qadında hansı bir naməlum otunsa
qəribə, ecazkar ətrini duyurdu. O ətir mixək ətri idi. O qadının boynunda
mixək muncuğu vardı.
Atın qadına olan qəribə ünsiyyətini Tanabay da hiss eləyirdi.
– Görürsənmi, at sənə necə mehr salıb, Bübücan, – deyirdi. –
Görürsənmi, necə sevir səni. Sığalla, yaxşı-yaxşı sığalla. Bir gör necə
qulaqlarını sallayıb. Elə bil buzovdur dayanıb. Ancaq ilxıda bunun əlindən
atlar zara gəliblər. Aç burax gör nələr eləyir – it kimi didib tökür ilxını.
Elə buna görə yəhər altda saxlayıram, qorxuram atlar vurub şikəst eləyə.
Çünki çox cavandır hələ.
Qadınsa öz aləmində olurdu. Susurdu. Sonra fikirli-fikirli deyirdi:
– Bəli, at sevir.
– Demək istəyirsən ki, başqaları sevmir?
–
Onu demirəm. Bizim sevib-sevilmək vaxtımız keçib. Mənim sənə yazığım gəlir.
– Bu nə olan sözdür?
– Sən elə adam deyilsən, Tanabay, sonra çətin olacaq
sənin üçün.
– Bəs sənin üçün çətin olmayacaq?
– Mənə nə var ki? Dul arvadam, ərim davada ölüb. Ancaq sən...
Tanabay zarafata salırdı:
– Mən də Təftiş
Komissiyasının üzvüyəm. Səni görmüşəm, bir para vacib faktları
aydınlaşdırıram.
– Axır vaxtlar fakt aydınlaşdırmağa yaman girişmisən. Allah axırın
xeyir eləsin.
– Mən yazığın nə təqsiri var, canım? Yoldur da, sən də gedirsən, mən də.
– Mən öz yolumnan gedirəm. Bizim yolumuz başqa-başqadır. Yaxşı,
mən getdim. Tələsirəm.
– Dur görüm, Bübücan!
– Hə, durdum, nə deyirsən? Lazım deyil, Tanabay, nə mənası var? Sən ki ağıllı
adamsan. Bilirsən ki, mən nə
çəkirəm, sən də bir yandan başlamısan.
– Mən sənə düşmənəm, nəyəm?
– Sən özünə düşmənsən.
– İndi mən necə anlayım bunu?
– Necə istəyirsən anla.
Qadın
çıxıb gedirdi, Tanabaysa hər dəfə bir şeyi bəhanə eləyib at üstdə kəndin
küçələrini dolanır, dəyirmana girir, məktəbə baş çəkir və o qadını bir daha,
heç olmasa uzaqdan-uzağa görmək üçün dövrə vurub qayıdırdı. Hər səhər işə
gedəndə Bübücan uşağını qayınanasının yanında qoyurdu, işdən çıxandan sonra
o, uşağın əlindən yapışır və yavaş-yavaş onlar özlərinin kəndin lap
qurtaracağındakı evlərinə tərəf gedirdilər. Onun arxasınca baxa-baxa Tanabay
qadının hər bir hərəkətində nəhayətsiz doğmalıq duyurdu. Yerişi, duruşu,
hətta onun çevrilib arxaya baxmamaq üçün göstərdiyi səy də Tanabaya doğma
görünürdü. Belə vaxtlarda Tanabay qadının qara şal içində görünən ağ sifətinə
tamaşa eləməkdən doymurdu; onun yanınca gedən balaca qız, qızın dalınca
qaçan xırdaca köpək – hər şey, hər şey Tanabay üçün nəhayətsiz dərəcədə doğma
olurdu.
Sonra qadın həyətə girib gözdən itirdi və qalan şeyləri birbəbir
Tanabay at üstdə gedə-gedə öz-özünə təsəvvür eləyirdi: Bübücan indicə qapının
qıfılını açacaqdı, nimdaş sırıqlı pencəyini çıxarıb atacaq, bircə əyin
paltarında suya gedəcəkdi. O, ocaq qalayacaqdı, uşağı yuyundurub
yedizdirəcəkdi, axşamüstü naxırı qarşılayıb inəyi gətirəcək, gecə isə
qaranlıq
otaqda tək-tənha uzanıb özünü də, Tanabayı da inandıracaqdı ki, onlar bir-
birini sevə bilməzlər. Ona görə sevə bilməzlər ki, Tanabay evlidir, ona
görə sevə bilməzlər ki, onların sevişmək vaxtı keçib, ona görə sevə bilməzlər
ki, Tanabayın arvadı yaxşı arvaddır və belə bir arvadın ərinə yaraşmaz
ki, başqalarının dalınca düşsün.
Tanabay düşünürdü: “Deməli, qismət deyilmiş”, – bu fikirdən onun qanı
qaralırdı və sonsuz üfüqlərə baxa-baxa o, hər
şeyi unudub, qədim mahnılar oxumağa başlayırdı. Mahnı oxuya-oxuya Tanabay heç
vaxt qurtarmaq bilməyən kolxoz işlərini unudurdu, əyni-başı tökülmüş
uşaqlarını yaddan çıxarırdı; dostları, düşmənləri, neçə illərdən bəri onu
danışdırmayan ögey qardaşı Qulubayı, tez-tez yuxusuna girib canına üşütmə
salan davanı – hər şeyi, hər şeyi Tanabay unudurdu. Atsa gedirdi, çayları
sahibindən xəbərsiz keçirdi, təpələri sahibindən xəbərsiz aşırdı. Gülsarı
ilxının yanında olduğunu hiss eləyib, sürətini birdən-birə artıranda Tanabay
özünə gəlirdi.
– T-r-r, Gülsarı, hara qaçırsan?! – deyirdi və yüyəni
çəkib yığırdı.
5
Bütün çətinliklərə baxmayaraq, o çağlar Tanabay üçün də, at üçün də ən gözəl
çağlar idi. Atın şöhrəti futbolçunun şöhrətinə bənzəyir.
Dünən həyət-bacada top oynayan bir uşaq, bu gün birdən-birə hamının sevimlisi
olur, mahir futbol ustaları ondan danışırlar, minlərcə, milyonlarca
adam hər yerdə onun söhbətini eləyir. Vurduğu topların sayı ilə birgə
futbolçunun şöhrəti də artır. Sonra o, tədricən futbol meydanını tərk eləyir
və
büsbütün unudulub gedir. Dünən hamıdan çox əl çalıb, hamıdan bərk qışqıranlar
bu gün onu hamıdan tez yaddan çıxarırlar. Məşhur futbolçunun yerini
başqa birisi tutur. Atın da şöhrət yolu belədir. At da o vaxtacan məşhur olur
ki, cıdırlarda birinci gəlir, yarışlardan qalib çıxır. Fərq bircə
burasındadır ki, atın paxıllığını çəkən olmur. Atlar paxıllıq eləməyi
bacarmırlar, insanlar isə, şükür allaha, hələ ki, atların paxıllığını
çəkmirlər. Halbuki paxıllığın da, necə deyərlər, müxtəlif yolları var.
İnsandan qisas almaq üçün atın dırnağına mıx çalanlar da olub. Eh, paxıllıq,
paxıllıq!.. Nə isə, lənət şeytana!..
Qoca Torqayın dediyi düz çıxdı. O yaz Gülsarının şöhrəti dilə-ağıza düşdü.
Onu tanımayan yox idi, qoca da
tanıyırdı, cavan da: “Gülsarı!”. “Tanabayın atı”, “Kəndin yaraşığı”...
Hələ “r” hərfini deyə bilməyən uşaqlar da kəndin tozlu küçələrində “Gülsarı
Dostları ilə paylaş: |