kimi” qaçırdılar: “Mən Gülsalıyam... Yox, Gülsalı mənəm... Ana, buna deynən
ki, mən Gülsalıyam... Çu, iləli, a-i-i-y, mən Gülsalıyam”...
Şöhrətin mə
demək olduğunu Gülsarı özünün ilk yarışındaca hiss elədi. O yarış mayin
birində oldu.
Geniş çəməndəki mitinqdən sonra çay kənarında oyun başlandı.
Orada adam əlindən iynə salmağa yer yox idi. Adamlar dağlardan axışıb
gəlmişdi. Qonşu sovxozdan, hətta Qazaxıstandan da gələnlər vardı. Qazaxlar öz
atlarını nümayiş etdirirdilər.
Camaat deyirdi ki, müharibədən sonra belə şənlik olmayıb.
Həmin gün, hələ səhər tezdən Tanabay üzəngini, tapqırı
diqqətlə yoxlayıb atı yəhərləyəndə onun gözlərinin parıltısından, əllərinin
titrəməsindən Gülsarı hiss eləmişdi ki, nəsə qeyri-adi bir iş olacaq.
Tanabay bərk həyəcan keçirirdi, o, atın yalını, telini darayıb sığallayır,
elə hey pıçıldayırdı:
– Bura bax, Gülsarı, bizi xəcalətdə qoymayasan. Özünü
biabır eləməyəsən ha, eşidirsənmi? Belə şey bizə yaraşmaz, aç qulağını eşit!
O günün qeyri-adi bir gün olacağı, sanki, havadan da bilinirdi, adamlar
ucadan danışırdılar, hamı əl-ayağa düşmüşdü. Qonşu köçəbələrin ilxıçıları
atları yəhərləyirdilər. Ata minmiş uşaqlar fasiləsiz bağırışır, çapıb
ətrafda cövlan eləyirdilər.
Sonra ilxıçılar tökülüşüb gəldilər, hamı bir yerə yığışıb çaya sarı axışdı.
Çəmənlikdə gördüyü mənzərə Gülsarını büsbütün
çaşdırmışdı. Burada saysız-hesabsız at vardı, adam vardı. Çəmənlikdə, çayda,
çaylaq yaxınlığındakı təpənin üstündə səs-küydən qulaq batırdı.
Əyinlərdəki paltarlar, başlardakı yaylıqlar, qırmızı bayraqlar və ağ qadın
çalmaları adamın gözlərini qamaşdırırdı. Atların belinə ən yaxşı yəhərlər
qoyulmuşdu. Dəhnələr, üzəngilər, atların boyun-boğazını bəzəyən gümüş pullar
cingildəyirdi.
Qaçmağa hazır dayanmış atlar bir-birinin böyrünə düzülüb,
həvəsdən ayaqlarını yerə döyür, dırnaqları ilə torpağı qazaraq yürüşə
tələsirdilər. Oyuna rəhbərlik eləyən qocalar dörd bir yanda at çapırdılar.
Gülsarı hiss eləyirdi ki, get-gedə səbri tükənir, öz gücünün, qüvvəsinin
əlində aciz qalır. Ona elə gəlir ki, içinə alov doldurulub və o alovdan
xilas olmaq üçün tezliklə irəli cummalı, harasa çapdıqca çapmalıdır.
Buna görə də hakimlər hazırlıq işarəsi verəndə və Tanabay yüyəni buraxanda at
sürətlə irəli çapdı, ortalıqda fırlanıb hansı səmtə qaçacağını müəyyən eləmək
istədi. Dörd bir tərəfdən səslər ucaldı: “Gülsarı! Gülsarı!..”
Bu böyük
təntənədə iştirak etmək istəyənlər hər yandan yığılıb gəlmişdilər. Cıdırda
əlliyəcən atlı vardı.
Oyunun baş hakimi əlini yuxarı qaldırdı, təntənəli
surətdə elan elədi:
– Qoy camaat sizə xeyir-dua versin!
Başlarını ülgüclə qırxdırıb, alınlarını bərk-bərk sarımış atlılar açıq
əllərini yuxarı
qaldıraraq, cərgə ilə ətrafa toplaşan adamların qarşısından keçdilər,
yüzlərcə adam eyni səslə: “Amin!” – dedi və yüzlərcə əl alınlarda, üzlərdə
dolanıb salavat çevirdi.
Sonra atlar asta-asta çəmənliyin doqquz verstliyində olan starta doğru
axışdılar. Çəməndə isə başqa atlar hərəkətə gəldilər –
piyadalarla süvarilərin cəngi başlandı; yəhərdənsalma, çapa-çapa pulqapma və
başqa yarışlar qızışdı. Ancaq bütün bunlar hələ giriş idi, əsas şənlik,
əsas məsələ orada – atların çapdığı yerdə olacaqdı. Gülsarı qaça-qaça
hiddətlənirdi. Görəsən, sahibi niyə onu saxlayırdı, niyə Gülsarını var gücü
ilə
qaçmağa qoymurdu? Ətrafda başqa atlar çaxnaşırdılar. Onların bu qədər çox
olmağı və hamısının qaçmağa tələsməyi Gülsarını qəzəbləndirirdi; o,
hirsindən zəncir gəmirir, tələsdiyindən tir-tir əsirdi.
Nəhayət, start yerində atlar cərgə ilə baş-başa düzüldü, o cərgənin boyunca
hakim at çapıb
boya-boy gəzindi və dayanıb ağ yaylığını yuxarı qaldırdı. Hamının gözü o
yaylıqda idi. Nəhayət, yaylıq havada yelləndi. Atlar hərəkətə gəldi və
onlarla birgə Gülsarı da od içində irəli cumdu. Atların ayaqları altında
torpaq təbil kimi çalındı, toz havaya qalxdı. Süvarilərin hay-küyü,
çığırtısı ətrafı bürüdü, qızışmış, havalanmış atları irəli səyirtdilər. Təkcə
Gülsarı dördnala çapa bilmirdi, öz löhrəm yerişi ilə gedirdi. Onun gücü
də bunda idi, gücsüzlüyü də.
Əvvəl atlar dəstə ilə qaçırdılar, ancaq bir neçə dəqiqə keçməmiş bir-birindən
aralandılar. Atların nə vaxt aralandığını
Gülsarı görmədi, bircə onu gördü ki, öyrənişli qaçağan atlar onu ötüb
keçirlər, ondan irəlidə gedirlər, yola çıxırlar. İrəlidə gedən atların ayağı
altından qalxan isti çınqıl və gil parçaları Gülsarının üz-gözünə dəyirdi.
Ətrafda başqa atlar çapırdılar, atlılar çığırışırdılar, açılan tatarı
səsindən qulaq batırdı və toz get-gedə artıb düzü-dünyanı bürüyürdü. Toz
bulud kimi havaya qalxırdı, atlıların başı üzərində duman süzürdü. Havadan
tər iyi, qızışmış daş iyi, ayaqlanmış yovşan qoxusu gəlirdi.
Yolun az qala yarısınacan atlar beləcə çapdılar. İrəlidə onacan at dəhşətli
bir sürətlə
çapırdı, onları ötüb keçmək mümkün deyildi. Ətrafdakı atlıların səsi get-gedə
uzaqlaşırdı, daldakılar get-gedə daha da dalda qalırdılar, ancaq
Gülsarının hiddəti azalmırdı, çünki başqa atlar hələ də irəlidə gedirdilər və
boynundakı yüyən onu istədiyi kimi çapmağa qoymurdu. Küləkdən və
qəzəbdən Gülsarının gözləri qaralırdı, yer ayaqları altında sürətlə süzür,
sürətlə uzaqlaşırdı. O çapdıqca, sanki, Günəş də ona doğru çapır, göydən
od-alov tökülürdü. Gülsarı başdan-ayağa isti tər içində idi və canından tər
axdıqca o, daha da yüngülləşir, daha da qıvraqlaşırdı.
Nəhayət, elə bir
vaxt gəlib yetişdi ki, öyrənişli qaçağan atlar gücdən düşüb yavaşıdılar,
Gülsarı isə hələ təzə-təzə qızışırdı. O öz sahibinin səsini eşidirdi: “Çu,
Gülsarı, çu!” və at var qüvvəsi ilə irəli cumduqca ona doğru çapan Günəşin də
sürəti artırdı. Gülsarı özündən qabaqdakı atlara çatır, onları bir-bir
ötüb keçir, at sahiblərinin qəzəbli sifəti, havaya qaldırılmış qamçılar,
tövşüyən, dişləri ağaran atlar arxada qalırdı. Daha dəhnə və yüyən Gülsarıya
mane olmurdu, indi onun belində, sanki, nə yəhər, nə də adam vardı; atda
yalnız qaçmaq həvəsi qalmışdı, bu həvəslə Gülsarı od tutub yanırdı.
Buna
baxmayaraq, Gülsarıdan qabaqda iki at hələ də yanaşı çapırdı, birinin bomboz
rəngi vardı, o biri kürən at idi. Sahiblərinin çığırtısı və qamçı
zərbələri altında onlar bir-birinə aman vermədən çapırdılar.
Bu qüdrətli atlara çatmaq üçün Gülsarı çox çapdı və nəhayət, yolun yoxuş bir
yerində
onları geridə qoydu. Təpəciyin üstündən Gülsarı dalğa üstdən aşanlar kimi
aşdı və elə bil bir anlığa o, havadan asılı qaldı. Gülsarının ürəyi
yerindən oynadı, günün işığı atın gözlərini daha bərk qamaşdırdı və sürətlə
üzüyenişə çaparkən Gülsarı arxadan gələn atların ayaq səsini eşitdi.
Həmin atlar idilər – boz və kürən. İkisi də qabağa çıxmaqda idi. Onlar
Gülsarını hər iki tərəfdən haqlayıb onunla az qala çiyin-çiyinə dayandılar və
bir addım da geri qalmadan Gülsarı ilə yan-yana çapmağa başladılar.
Beləcə xeyli vaxt atlar eyni sürət və eyni yerişlə baş-başa çapdılar və bütün
bu
vaxt ərzində Gülsarıya elə gəldi ki, onlar tərpənmirlər, yerimirlər, hansı
naməlum bir qüvvəsə onları hərəkət etməyə qoymur. Yoxsa atlar bir-birini
bu qədər yaxından görə bilərdimi? Gülsarı yanınca çapan hər iki atın
gözündəki odu-alovu görürdü, onların irəli uzanmış başları, çeynənmiş,
didilmiş
dəhnə və yüyənləri Gülsarının gözü qabağında idi. Boz at olduqca qəzəbli
görünürdü; o, inadla qabağa baxırdı, ancaq kürən özünü itirmişdi, çaşqın
halda yan-yörəsinə göz gəzdirirdi. Birinci geridə qalan da elə o oldu. Kürən
atın əvvəlcə çaşqın və müqəssir gözləri arxada qaldı, sonra onun iri
Dostları ilə paylaş: |