17
19 Yanvar – Şair, tərcüməçi Ələsgər Əlioğlunun 65 illiyi, (1953)
Ələsgər Əlioğlu 1953-cü il yanvarın 19-da Azərbaycanın Goranboy rayonunun
Xanqərvənd kəndində anadan olmuşdur. Burada kənd orta məktəbində təhsil almışdır
(1959-1969). H.Zərdabi adına Gəncə Dövlət Pedaqoji İnstitutunun dil-ədəbiyyat
fakültəsində təhsilini davam etdirmişdir (1970-1974). Kəlbəcər qəsəbə orta
məktəbində müəllim (1974-1976), Goranboy rayonundakı Yeniyol səkkizillik
məktəbində qrup tərbiyəçisi, kənd orta məktəbində isə dil-ədəbiyyat müəllimi
vəzifəsində çalışmışdır (1997-2001). “Əli Nəzmi” ədəbi birliyinə rəhbərlik edir. Ədəbi
aləmə 70-ci illərdə dövri mətbuatda çap etdirdiyi uşaq şeirləri ilə daxil olmuşdur.
Bundan sonra əsərləri “Azərbaycan”, “Pioner”, “Göyərçin” jurnallarında vaxtaşırı çap
olunur. “Goranboyun söz dünyası” kitabını tərtib edib nəşr etdirmişdir.
Kitabları: “Xortumsuz fil” (1982), “Şəhərin yoluna çıxdım” (1983), “Yeraltı keçid”
(1987), “Dəryada qəmim qaldı” (1989), “Haraylar...Cənglər...” (1996), “Vətən
ağrıları” (1996), “Kapitan kəpənək” (2002), “Sinəsində şir gəzdirən oğlan” (2002) və
s.
Ədəbiyyat: Əhmədov T. Azərbaycan yazıçıları (XX-XXI yüzillikdə) : Ensiklopedik məlumat
kitabı. – Bakı : Nurlar Nəşriyyat-Poliqrafiya Mərkəzi, 2011.
18
19 Yanvar – Azərbaycanın ilk maarifçi qadınlarından biri Həmidə xanım
Məmmədquluzadənin 145 illiyi, (1873-1955)
Həmidə xanım Məmmədquluzadə 1873-cü ildə Şuşa
qəzasının Kəhrizli kəndində dövrünün görkəmli maarifçi
ziyalısı, tarixçi Əhməd bəyin ocağında dünyaya gəlmiş, Cəlil
Məmmədquluzadənin
həyat
yoldaşı olmuşdur. Ailə
məktəbində təhsil alan Həmidə xanım hələ yeniyetmə
illərində rus dilini səlis qavrayaraq, o dövrün kənd qızları
üçün səciyyəvi olmayan yüksək intellektə, geniş dünyagörüşə
malik olmuşdu. İlk həyat yoldaşı zadəgan nəslindən olan
podpolkovnik İbrahim bəy Davatdarov cəbhədə həlak
olandan və atasını itirəndən sonra Həmidə xanım Cavanşir Kəhrizlidə ata mülkünü
idarə etmişdi. 1905-ci ildə Tiflisdə tanış olduğu Mirzə Cəlil Məmmədquluzadə ilə iki
il sonra ailə həyatı qurmuşdur. Həmidə xanım bütün maneələrə cəsarətlə sinə gərərək,
Mirzə Cəlilə vəfalı və fədakar ömür-gün yoldaşı olmaqla yanaşı, həm də ustad
sənətkarın ən yaxın maarifçi silahdaşı, ziyalı həmdəmi, “Molla Nəsrəddin”in isə
xeyirxah himayədarı olmuşdu. Tarix Həmidə xanım Məmmədquluzadəni böyük
xeyriyyəçi və cəfakeş insan kimi yaddaşlara həkk edib. Tək Kəhrizli kəndinin deyil,
cümlə Qarabağın ona kömək üçün pənah gətirən insanlarının əlindən tutan, qayğılarını
həll edən bu xanım həm də o dövrün yardıma ehtiyacı olan ziyalılarının da
problemlərini həll etmişdir. Ciddi xəstəliyi olan Mirzə Ələkbər Sabir məhz Həmidə
xanımın məsləhəti ilə Mirzə Cəlil tərəfindən Tiflisə müalicə üçün dəvət almışdır.
Həmidə xanım 1912-ci ildən Kəhrizlidə öz vəsaiti hesabına məktəb açmış və orada
dərs demişdir. Mirzə Cəlilin vəfatından sonra da ölkənin ictimai-ədəbi həyatında fəal
mövqe tutan Həmidə xanım Yazıçılar İttifaqına üzv seçilmiş, ömür-gün yoldaşının
əsərlərini tərcümə etməklə yanaşı, bu böyük sənətkarla bağlı kövrək xatirələrini böyük
ustalıqla qələmə almışdır. 1955-ci ildə vəfat edən Həmidə xanım Məmmədquluzadə
Fəxri Xiyabanda Mirzə Cəlilin məzarı yanında dəfn olunmuşdur. 2005-ci ildən
etibarən Ağcabədinin Kəhrizli kəndində Həmidə xanım Məmmədquluzadənin ev
muzeyi fəaliyyət göstərir. Muzeydə 210 eksponat sərgilənir.
Kitabları: “Mirzə Cəlil haqqında xatirələrim” (1967) və s.
Ədəbiyyat: Əhmədov T. Azərbaycan yazıçıları (XX-XXI yüzillikdə) : Ensiklopedik məlumat
kitabı. – Bakı : Nurlar Nəşriyyat-Poliqrafiya Mərkəzi, 2011.
19
20 Yanvar – Yazıçı, şair, etnoqraf Teymur Bünyadovun 90 illiyi, (1928)
Teymur Bünyadov 1928-ci il yanvarın 20-də Qazax
bölgəsinin II Şıxlı kəndində dünyaya göz açıb. T.Bünyadov orta
məktəbi qızıl medalla bitirmiş, 1946-1951-ci illərdə Azərbaycan
Dövlət Universitetinin tarix fakültəsində təhsil almışdır. 1968-ci ildə
o, “Azərbaycanın qədim və Orta əsrlərdə təsərrüfat həyatı”
mövzusunda doktorluq dissertasiyası müdafiə edərək, arxeologiya
və etnoqrafiya elmləri sahəsində respublikada ilk tarix elmləri
doktoru alimlik dərəcəsi almış, 1970-ci ildə isə professor adına layiq görülmüşdür.
Taleyini elmə bağlayan bu zəhmətkeş alim 1989-cu ildə Azərbaycan EA-nın müxbir
üzvü, 2001-ci ildə isə AMEA-nın həqiqi üzvü seçilmişdir. Azərbaycan arxeologiya və
etnoqrafiya elminə aid 29 monoqrafiyanın, 1000-ə yaxın məqalənin müəllifi olan
akademik T.Bünyadovun əsərləri təkcə respublikamızda deyil, onun hüdudlarından
uzaqlarda – Türkiyə, İran, Rusiya, Ukrayna, Norveç kimi ölkələrdə də çap edilmişdir.
İctimai elmlər sahəsində mühüm hadisə sayılan və 2007-ci ildə böyük tirajla ilk dəfə
çap edilən üçcildlik “Azərbaycan etnoqrafiyası” fundamental əsərinin təşkilatçısı, baş
redaktoru və böyük hissəsinin müəllifi T.Bünyadovdur. Görkəmli alimin son dövr
fəaliyyəti də çox maraqlıdır; onun bilavasitə rəhbərliyi ilə ümummilli lider Heydər
Əliyevin 90 illiyinə həsr olunmuş üçcildlik “Qəbələnin tarixi”, “Qəbələnin
etnoqrafiyası” və “Qəbələ folkloru” kitabları yazılaraq çapa hazırlanmış, rus və ingilis
dillərinə tərcümə edilmişdir. Akademik T.Ə.Bünyadov təkcə tarixçi-etnoqraf alim
deyil, həm də folklorşünas, nasir və şairdir. Onun 1991-ci ildə yüksək tirajla nəşr edilən
“Göz yaşları” romanı, “Xan çinar kölgəsində”, “Anam birdi, vətən tək”, “Başı çalmalı
dağlar” adlı üçcildlik bayatı kitabları oxucuların böyük sevgisi ilə qarşılanmışdır.
T.Bünyadov həm də ictimai-siyasi xadimdir. Elmi, pedaqoji və ictimai-siyasi
fəaliyyətinin nəticəsi olaraq akademik T.Bünyadov 2005-ci ildə Azərbaycan
Respublikası Prezidenti İlham Əliyevin sərəncamı ilə “Şöhrət” ordeni ilə təltif edilmiş,
2008-ci ildə isə “Azərbaycan Respublikasının Əməkdar elm xadimi” fəxri adına layiq
görülmüşdür.
Kitabları: “Ana Kürüm” (1979), “Qızıl Qaya” (1984), “Göz yaşları” (1991),
“Əsrlərdən gələn səslər” (1993), “Cavanşir” ((1993) və s.
Ədəbiyyat: Əhmədov T. Azərbaycan yazıçıları (XX-XXI yüzillikdə) : Ensiklopedik məlumat
kitabı. – Bakı : Nurlar Nəşriyyat-Poliqrafiya Mərkəzi, 2011.