93
Zübeydə ayağa qalxıb otağa girdi, işığı yandırıb, azı, əlli-altmış yaşlı, amma
yaxşı qalmış, qoz ağacından düzəldilmiş və vaxtilə yəqin ki, evlər yaraşığı olmuş
hündür, enli və ağır dolabın (bu dolabı hələ müharibə vaxtı Qızıldiş Adil hansı bir
əsgər ailəsindənsə çox ucuz qiymətə Zübeydə üçün hədiyyə almışdı və Zübeydə də
bu dolabı gətirib qoymuşdu kənddəki bu evinə) lap alt gözünün açarını ayağının
altına kətil qoyub lap yuxarı gözdən tapdı, aşağı düşüb alt gözü açdı və yeşiyi irəli
çəkib köhnə şəkillər, cürbəcür köhnə «otkrıtka»lar (ürəkşəkilli güzgünün içində bir
qızla bir oğlan fotoobyektivə baxıb gülürdü; ürəyin hər tərəfinə güllər düzülmüşdü,
güzgünün ətrafındakı güllər də, qızın paltarı və dodaqları da qırmızı boyayla
boyanmışdı, aşağı tərəfdə bir bülbül dimdiyində çələng tutmuşdu və çələngdə bu
sözlər yazılmışdı:
Lyublyu vas i vı poverte
Koqda mne serdse qovorit.
Lyubit budu do samoy smerti
Poka oqon v qrudi qorit.
Bu sözlərdən sonra yenə kiçik bir ürək və kamanda tarım dartılmış bir ox şəkli
çəkilmişdi), kino artistlərinin, cavan Rəşid Behbudovun cürbəcür şəkilləri bükülmüş
və uzun illərdən bəri açılmayan bağlamanı açdı.
Bu bağlamadan, sapsarı saralmış köhnə qəzetə bükülü bağlamadan bir çürüntü
iyi gəlirdi və bütün qışı qarın altında qalıb yaza çıxmış, təzədən yarpaq açan,
çiçəkləyən ağacların dibindəki xəzəl, nədənsə, Zübeydənin yadına düşdü və birdən-
birə onun ağzına da bir cür təm gəldi, elə bil, çürük meyvə yeyirdi.
Bu çürüntü iyi, bu təm arvadı lap kövrəltdi və ümumiyyətlə, çox az-az
kövrələn Zübeydənin gözləri doldu.
Üçkünc əsgər məktubu burada idi, bu bağlamanın içində, Zakirin məktubu.
Zübeydə məktubu götürüb açdı və illərdən bəri saralıb-solmuş, tələsik
yazılmış o qısa məktubu oxumağa başladı; birnəfəsə oxudu, elə bil, illərin acı idi,
çörək tapmışdı birdən-birə, təpişdirirdi gözünə.
«Zübeydə!
Bu məktubu sənə ön cəbhədən yazıram. Atışma kəsib indi, bir azdan yenə
başlayacaq. Düzünü deyim ki, yazmaq istəmirdim sənə bu məktubu, amma yarım
saat bundan qabaq güllə yağış kimi üstümüzə yağanda, bildim ki, gərək yazam sənə
bu məktubu. Adam bu güllə yağışının altında olanda hər şeyi yaddan çıxarır, bütün
pisliklər yaddan çıxır, ancaq yaxşısı yadda qalır. Sən məni istəyə də bilərsən,
istəməyə də bilərsən, ancaq özünü istə. Mən müəllim deyiləm, sən də şagird
deyilsən. Nəsihət eləməyəcəyəm sənə, ancaq o evə gedib-gəlmə. Işə gir. Özünü
hayıf eləmə. Sən də bir kişinin qızısan. Həmin kişinin papağını yerə soxma. Yenə
başladı atışma. Xudahafiz. Sağ qalsam, yenə yazaram sənə. Sən də bir söz yaz.
Zakir. 12 yanvar 1942-ci il.»
Zakir birini də yazmışdı məktubun, ikisini bir yerdə almışdı Zübeydə; cavab
yazmadı Zakirə və bir də gedib mərkəzi poçta dəymədi ki, görsün təzə məktub var
ona, yoxsa yox? Bəlkə çox məktub yazmışdı Zakir və bu məktublar da Zübeydəni
gözləyib, gözləyib axırda qayıtmışdı Zakirin özünə? Bəlkə heç çatmamışdı Zakirə.
Qırx üçdə ölüm xəbəri gəlmişdi Zakirin... Yox, deyəsən, qırx dörd idi... Nə isə...
94
Görəsən yenə məktub yazmışdı Zakir? Niyə yazaydı axı, niyə yazaydı, ona
görə ki, həmin yaz günü aldatmışdı Zakiri ki, gələcəyəm görüşünə, getməmişdi?
Ona görə ki, Zakir gecə-gündüz çəkmə fabrikində işləyib, bacılarıyçün çörəkpulu
qazanırdı, Zübeydə də Qızıldiş Adil kimilərinin haram puluna qarnıtox, damağı da
ki, çağ, kef eləyirdi? Ona görə ki, o uzaq yaz axşamı Zakir Zübeydə ilə Qızıldiş
Adilin qabağına çıxıb ona hücum eləmək istəyən Qızıldişi bir yumruq ilə yerə
uzadanda, Zübeydə «Ay aman!..» eləyib Qızıldişin üstünə cummuşdu. Qızıldişi
yerdən qaldırmışdı. Qızıldişlə birgə getmişdi?
«Zübeydə! («Ay can!...»)
Bu məktubu sənə ön cəbhədən yazıram. («Yazan barmaqlarına qurban olum
sənin!..») Atışma kəsib indi («O atışma gətirənin ciyəri yansın, necə ki, yandı da,
qara yerə girəydi o, necə ki, girdi də...»), bir azdan yenə başlayacaq. Düzünü deyim
ki, yazmaq istəmirdim sənə bu məktubu («Əcəb eləyirdin, lap əlinin içindən gəlirdi,
yazmayaydın heç gərək... Niyə yazırdın mənim kimi ləçərə? Mən taydım sənə? Sən
təmizin, gözəlin, kişinin biriydin, mən vələdüznanın cövhəri, özü də çirkab içində,
xirtdəyə kimi... yazmayaydın gərək...»), amma yarım saat bundan qabaq güllə yağış
kimi üstümüzə yağanda («O güllə gərək mənim başıma yağaydı...») bildim ki, gərək
yazam sənə bu məktubu («Nahaq yerə, lap nahaq yerə...»). Adam bu güllə yağışının
altında olanda («Can-can...») hər şeyi yaddan çıxarır, bütün pisliklər, yaddan çıxır
(«Çünki özün təmiz idin, yaxşı idin...»), ancaq yaxşısı yadda qalır. Sən məni istəyə
də bilərsən, istəməyə də bilərsən (« Səni istəməyənin gözü çıxaydı, necə ki, işıqlı
dünya qaranlıq zülmət olub onunçun...»), ancaq özünü istə («Nəyimi istəyim
özümün, nəyimi?..»). Mən müəllim deyiləm («Müəllimdən də artıqsan...»), sən də
şagird deyilsən («Şagird professoruydu mənim yanımda...»). Nəsihət eləməyəcəyəm
sənə («Nə təsir eləyəcəkdi mənə nəsihət? Adamın gərək qanında olaydı, Zakir...»).
Ancaq o evə gedib-gəlmə («O evin nə təqsiri, təqsir özündədi adamın, ev
neyləsin?»). Işə gir («Ay işlədim mən, ha!..»). Özünü hayıf eləmə. («Elədim, ay
Zakir, ay qadası, yaman hayıf elədim özümü, iki qəpikdi mənim qiymətim, kül olub
mənim başıma, ay Zakir, ay qadası, ay canım, sənə qurban... zay elədim özümü. Zay
oldum getdim, ay Zakir...»). Sən də bir kişinin qızısan, həmin kişinin papağını yerə
soxma («Soxdum yerə o rəhmətliyin papağını, Zakir, lap quyunun dibinə soxdum.
Doğrayardı məni sağ olsaydı, öz əliylə doğrayardı...»). Yenə başladı atışma
(«Muğayat ol ay bala!..»)».
Zübeydə daha məktubun ardını oxuya bilmədi, saralıb-solmuş hərflər
gözlərinin qabağında yayıldı və elə bil ki, həmin bürkülü yay gecəsində bütün bu
otaq basma kağıza düşmüş mürəkkəb damcısı kimi ətrafa yayıldı, qaranlıqlaşdı,
havasızlaşdı; bütün bu otağa, bu otağın əşyalarına, divarlarına, döşəməsinə,
tavanına, elə bil, tünd bir örpək salındı və bu örpəyin o biri üzündə bir dumanlıq
arxasında on yeddi yaşlı cavan bir qız, gözəl bir qız kəndin camaatıyla bərabər
atasının cəsədi qoyulmuş mafənin ardınca gedirdi; günəşli bir gün idi və günəşli
ləpələr sahilə qaçışırdı, elə bil, dənizdə bir günəş sevinci var idi və on yeddi yaşlı
qız, meyitinin dalınca getdiyi atasının ölümünə yanmaqdan daha çox, dənizin
sevincinə sevinirdi; elə bil, bu saat bütün kənd camaatının dərdi-qəmi bu on yeddi
yaşlı qız üçün tamam yad bir şey idi, çünki o on yeddi yaşlı qız nə ölümü dərk
edirdi, nə də dərk etmək istəyirdi; o on yeddi yaşlı qız özü də bu günəşin bir
parçasıydı, bu dənizin bir parçasıydı və illər keçdikdən sonra da o qız, bax, eləcə,
Dostları ilə paylaş: |