2. Müqavilədə və ya icbari sığorta haqqında qanunda başqa hal nəzərdə tutulmamışdırsa,
sığorta müqaviləsi sığorta hadisəsinin baş verdiyinə görə sığorta məbləğinin tam verildiyi andan
qüvvədən düşür.
Maddə 28. Sığorta müqaviləsinə xitam verilməsi
1. Sığorta müqaviləsinə aşağıdakı hallarda xitam verilir:
1.1. əmlak sığortası obyekti sığortaçının razılığı olmadan özgəninkiləşdirildikdə. Bu halda
sığortaçı ilə sığortalı və ya əmlak sığortası obyekti xeyrinə özgəninkiləşdirilən şəxs arasında yeni
sığorta müqaviləsi bağlanıla bilər;
1.2. müqavilənin qüvvədə olduğu müddət bitdikdə;
1.3. sığortaçı sığortalı qarşısında öz öhdəliklərini tamamilə yerinə yetirdikdə;
1.4. sığortalı sığorta haqqını müqavilədə müəyyən edilən qaydada ödəmədikdə;
1.5. bu Qanunun 36-cı maddəsində nəzərdə tutulmuş hallar istisna olmaqla, hüquqi şəxs ləğv
edildikdə və ya fiziki şəxs vəfat etdikdə;
1.6. məhkəmə sığorta müqaviləsinin etibarsız olduğu barədə qərar verdikdə;
1.7. sığorta obyektinin mövcudluğu bitdikdə (yox olduqda);
1.8. qanunvericiliklə nəzərdə tutulmuş qaydada sığortaçı ləğv edildikdə;
1.9. qanunvericiliklə nəzərdə tutulmuş digər hallarda.
2. Sığorta müqaviləsində nəzərdə tutulmuş hallarda, habelə tərəflərin razılaşmasına əsasən
müqaviləyə sığortalının və ya sığortaçının tələbi ilə vaxtından əvvəl xitam verilə bilər. Bu barədə
tərəflər bir-birini, qanunla müəyyən edilən hallar istisna olmaqla, azı 30 gün əvvəl yazılı şəkildə
xəbərdar etməlidirlər.
3. Sığorta müqaviləsinə sığortalının tələbi ilə vaxtından əvvəl xitam verildikdə, sığortaçı
çəkilmiş xərclər çıxılmaqla müqavilənin qurtarmamış müddəti üçün sığorta haqlarını ona qaytarır;
əgər bu tələb sığortaçının sığorta qaydalarını pozması ilə bağlıdırsa o, sığorta haqlarını sığortalıya
bütünlüklə qaytarır.
Sığorta müqaviləsinə sığortaçının tələbi ilə vaxtından əvvəl xitam verildikdə o, sığortalının
sığorta haqlarını bütünlüklə qaytarır; əgər bu tələb sığortalının sığorta qaydalarını yerinə
yetirməməsi ilə bağlıdırsa, sığortaçı çəkilmiş xərclər çıxılmaqla müqavilənin qurtarmamış müddəti
üçün sığorta haqlarını qaytarır.
Bu bəndin birinci və ikinci abzaslarında nəzərdə tutulmuş hallarda sığorta haqlarının
qaytarılması qaydası sığorta qaydalarında göstərilir.
4. Sığortalının ölümü ilə əlaqədar sığorta müqaviləsinə xitam verildikdə, sığortaçı müqavilə
müddətinin qalmış hissəsi üçün əvvəlcədən ödənilmiş sığorta haqlarını vəfat etmiş sığortalının
qanuni vərəsəsinə qaytarır.
Maddə 29. Sığorta müqaviləsinin etibarsız sayılması
1. Mülki Məcəllə ilə nəzərdə tutulmuş əqdlərin etibarsızlığının ümumi əsasları ilə yanaşı,
sığorta müqaviləsi bağlandığı andan aşağıdakı hallarda etibarsız sayılır:
1.1. sığorta obyekti məhkəmənin qüvvəyə minmiş hökmünə əsasən müsadirə edilməli əmlak
olduqda;
1.2. sığorta hadisəsindən sonra bağlandıqda;
1.3. sığortaçının adından müqavilə bağlamağa ixtiyarı olmayan şəxslərlə bağlandıqda;
1.4. sığorta müqaviləsi bağlandığı anda sığorta obyekti mövcud olmadıqda;
1.5. sığorta obyekti sığortalının qeyri-qanuni mənafeləri ilə bağlı olduqda;
1.6. sığorta müqaviləsi və ya bir neçə sığorta müqaviləsi ilə əmlak onun həqiqi dəyərindən
artıq sığortalandıqda (sığorta məbləğinin artıq hissəsində);
1.7. xüsusi razılığı olmayan sığortaçı ilə sığorta müqaviləsi bağlandıqda (bu halda ödənilmiş
sığorta haqları tam həcmdə sığortalıya qaytarılır).
Maddə 30. Sığorta haqları və tarifləri
1. İcbari sığorta növləri üzrə sığorta haqları və tarifləri qanunlara uyğun olaraq müəyyən
edilir, digər sığorta növləri üzrə isə onları sığortaçı müəyyən edir.
2. Zəruri hallarda haqsız rəqabətin qarşısını almaq məqsədilə müvafiq icra hakimiyyəti
orqanı minimum sığorta tariflərini müəyyən edə bilər.
3. Sığortalının ödədiyi sığorta haqları məhsulun (işlərin, xidmətlərin) maya dəyərinə aid
edilir.
Maddə 31. Sığorta ödənişinin verilməsi
1. Sığortaçı sığorta ödənişini müqaviləyə və ya qanuna müvafiq surətdə sığortalının ərizəsinə
və sığorta hadisəsi haqqında akta əsasən verir. Sığorta aktını sığortaçı və ya onun vəkil etdiyi şəxs
(ekspert) tərtib edir. Sığortaçı sığorta hadisəsinin səbəblərini və təfsilatını aydınlaşdırmaq hüququna
malikdir.
2. Müəssisələr, idarələr, təşkilatlar və hüquq-mühafizə orqanları, sığorta hadisəsi ilə əlaqədar
sığortaçının sorğusuna əsasən tələb olunan məlumatı verməlidirlər.
3. Sığorta ödənişlərdən rüsumlar tutulmur.
Maddə 32. Sığorta ödənişini verməkdən imtina
1. Sığortaçının sığorta ödənişi verməkdən imtina etməsi üçün əsaslar aşağıdakılardır:
1.1. sığortalının sığorta hadisəsi yaranmasına yönəldilən qərəzli hərəkətləri və ya sığorta
hadisəsi ilə birbaşa səbəb əlaqəsində olan qəsdən cinayətlər törətməsi;
1.2. müqavilə və ya qanunla hərbi risklərin sığortalanması nəzərdə tutulmamışdırsa, normativ
hüquqi aktlarla müəyyən edilmiş qaydada sayılan hərbi əməliyyatları və ya əlaqədar olan hərbi
xarakterli tədbirlər;
1.3. sığortalının sığortalanmış əmlaka dəymiş zərərin qarşısını almaq və ya həcmini azaltmaq
üçün lazımi və mümkün tədbirləri görmək iqtidarında olduğu halda həmin tədbirləri qəsdən
görməməsi;
1.4. sığortaçının sığorta hadisəsinin baş verməsi səbəblərini araşdırmasına sığortalı tərəfindən
maneçilik törədilməsi;
1.5. sığorta obyekti və hadisəsi barəsində sığortalının sığortaçıya qəsdən yanlış məlumat
verməsi;
1.6. sığortalının əmlak sığortası üzrə zərərin əvəzini zərər dəyməsində təqsiri olan şəxsdən
alması.
1.7. sığorta hadisəsinin olmaması.
2. Sığorta məbləği əmlakın sığorta dəyərindən az olduqda, müqavilədə başqa qayda nəzərdə
tutulmamışdırsa, sığorta ödənişi sığorta məbləğinin əmlakın sığorta dəyərinə mütənasib surətdə
azaldılır.