39
Bütün eqoistlərə xas olan qaydadan yenə əl çəkmirdim. Öz
fikirlərimi onun adına yazırdım, öz hisslərimi onunkulaşdırıb, guya mənə
vurulduğunu xatırlatmaq istəyirdim. Bəlkə də mən yanılırdım, başqaları
kimi mənə də olan xoş münasibətini təcrübəsizliyimin, həm də
ambitsiyalarımın ucbatından özümə sərf edən qaydada yozmağa,
uydurduğum dəlillərlə öz arzuladığım cəhətləri möhkəmləndirməyə
çalışırdım.
Yəqin ki, bu çoxlarına xasdır, yaxşı olan nə varsa özünə aid etmək.
Bu fikirlərin təsiri altında Əminə ilə birdəfəlik vidalaşmağa haqq
qazandırır, özümü az qala müdriklik zirvəsinə qaldırırdım. Dante
vurulduğu Beaatriça ilə görüşməkdən qaçdığı kimi, mən də ondan
uzaqlaşmağı bir igidlik hesab edirdim. Şairin heç olmasa bir təsəllisi var
idi: Beatriçanı vəsf etməyi özünün xoşbəxtlik mənbəyi sayırdı. Məndə isə
belə bir istedad, ilham yox idi. Bu saxta müdriklik, qorxaqlıq adlanmalı
olan igidlik mənə çox baha başa gəldi. Ağlıma da gətirə bilməzdim ki,
həyatda bədbəxtliklər və onlardan azacıq da olsa azad olma bir-birini əvəz
etsə də, gəncliyimdə yaranan bu hiss heç vaxt məni tərk etməyəcəkdir,
döyüşdən sinəsindəki qəlpə ilə qayıdan və ömrü boyu onun ağrısını hiss
edən əsgər kimi mən illər keçsə də ölçüsünü dəyişməyən, pas atmayan yad
cismi ürəyimdə gəzdirəcək, fasilə verməyən qəlb sızıltıları onun varlığını
daimi xatırladacaqdı. Bir şeyi anlamağa başladım ki, mən onu olduğu kimi
dərk etmişdim, başa düşməmişdim. Dahi Rafaelin gözəl ifadəsinə görə,
başa düşmək bərabər olmaq deməkdir, deməli mən ona bərabər deyildim.
Həyatda sonralar nəyəsə nail oldum, müəyyən hörmət qazandım,
lakin zaman keçdikcə bunların hamısının ötəri olduğunu, elə bir ciddi
əhəmiyyət kəsb etmədiyini anladım, gəncliyimdə itirdiyimin dərdi isə
zaman keçdikcə qar topası kimi böyüyüb həyat fəlsəfəmə, xoşbəxtlik
barədəki düşüncələrimə öz təsirini göstərməmiş qalmadı. Mənə belə
gəlirdi ki, bu maddi olan nəyinsə, qiymətli, əvəzedilməyən bir şeyin
itirilməsi olmayıb, varlığımın bir hissəsinin, ruhumun canlılığının yoxa
çıxması, qeybə çəkilməsidir. Bu itki dünyamın kasıblaşmasına, ruhumun
miskinləşməsinə, bəsitləşməsinə səbəb olmuşdur. Artıq mən ruhən tam
sağlam deyiləm, çünki könlümə, ürəyimə dəyən bir ağır zərbə nəinki izsiz
qalmadı, addımbaşı özünü hiss etdirməklə bu yaranın, bu çapığın dərin
olduğunu yada saldı, onun heç vaxt qaysaq bağlamayacağını,
sağalmayacağını bildirməklə mənəvi qüvvələrimi zəiflətdi, daha dəqiq
deyilsə, əlil etdi. Əvvəllər güman edirdim ki, təbiətin qəddarlığı duyğusu
40
zəlzələ və ya digər təbii fəlakətlər vaxtı baş verir, çünki onları ram edə
bilmirsən, gücsüzlüyünü görməli, etiraf etməli olursan. İndi bu qəddarlığı
başqa şəkildə görürdüm, onun vurduğu zərbə mənim gözümdə heç də
stixiyanın gətirdiyi bəladan az qorxulu deyildi.
Lakin mən artıq bu məşum qərarı vermişdim, indi onun zəmisinin
zəhərli məhsulunu biçməliydim. Mən göyərən, çiçək açmağa, bar verməyə
tələsən, bunun üçün günəşə tərəf boy atan görpə ağacı kökündən
kəsmişdim. Bəzən beynimdən təkcə bir ümid dalğası keçirdi ki, İerixon
qızıl gülü kimi bu ağac da illər keçdikdən sonra yenə pöhrə verməyə
başlayacaq, diriləcəkdir. İvan Buninin yazdığına görə, yəhudilərin İerixon
qızıl gülü adlanan bir kolları vardır, onun tikanlı budaqları kəsildikdən
sonra quruyur və illər keçdikdən sonra bu çöpü suya qoyduqda onlar
canlanmağa, həyata qayıtmağa başlayır. Bəlkə də həmin bitkidə belə bir
qüdrət vardır. Mən isə bu ağacı təkcə kəsməklə kifayətlənməmişdim, onu
bir dəfəlik qəbirə gömmüşdüm. Öz əlinlə basdırdığın ölü bir daha dirilib,
yanına qayıda bilməz. Mən möcüzələrə çox inanmaq istəsəm də, buna
bənzərinin meydana gələcəyini heç ağlıma da gətirə bilməzdim.
Onu da deyim ki, bəziləri sevginin, eşqin ləzzətindən dəm vurur, can
həzzlərini, şəhvəti ön plana çəməklə, həmin məhəbbətin qiymətini,
dəyərini azaltmış olurlar. Mənim aləmimdə platonik məhəbbət daha
yüksəkdir. Axı nə Dante Beatriça ilə, nə Petrarka Laura ilə yaxınlıq
etməmişdilər, lakin onlar bu qadınlara olan hisslərini təkcə qoruyub
saxlamamış, həm də qeyri-adi, məftunluqdan yaranan poetik ifadələrlə
vəsf etmişdilər. Bu məhəbbətlərin güzgüsündə intim yaxınlıq deyil, ilahi
hisslər əks olunur, öz müqəddəs təsvirini tapır. Heç Məcnunla Leylinin
sevgisində də sevincdən, şadlıqdan xəbər verən bir ana rast gəlinmir,
Romeo ilə Culyetta isə bir gecənin şirinliyindən daha çox öz ilahi
hisslərinin təsiri altında biri digəri olmadan yaşamağın mümkünsüzlüyünə
inam bəslədiklərinə görə belə fədəkarlıq göstərdilər, bəkarət çiçəyi, bunu
lap qədim romalıların dili ilə dedim, defloratio virginitatis, qoparıldıqdan
az sonra həyatla, dünya ilə vidalaşdılar. Onların çox gənc ikən həyatdan
getmələri qəmgin hisslər yaratsa da, bu iki yeniyetmə əslində məhəbbət
adlanan ilahi varlığın ölümsüzlük, ədəbilik himnini yazdılar, məhəbbətin
heç vaxt ölməyəcəyinə həsr olunan şərqini əsrlər boyu oxumaqda davam
etdilər.
Mən indi platonik, mücərrəd, şəhvət qarışığından kənar məhəbbətin
daşıyıcısına çevrildim, daha doğrusu, ömrüm boyu bu ağır yükü daşımağa
41
hazır idim. Bunu cəzaya məhkum edilmiş Sizifin əzablarına bənzətmək
olardı. Sizif daşı təpənin zirvəsinə sürüyüb çıxardanda, daş aşağı
yuvarlanır, o taqətdən düşə-düşə allahların hökmünə uğun olaraq eyni
cansıxıcı işi təkrar-təkrar görürdü. Onun üçün kiçik də olsa bir təsəlli
əlaməti, azacıq da olsa sevinc mənbəyi qalırdı. O, daşı təpəyə çıxarmağı
bacarırdı, bu hansı əzablarla başa gəlsə də, bununla öyünə bilərdi. Mənim
üçün isə öyünüləsi heç nə yox idi, əksinə mən özümü xoşbəxtlikdən
məhrum etmişdim, öz ürəyimi ardı-arası kəsilməyən ağrılara meydan
etmişdim, əvəzində isə Sizifdən fərqli olaraq heç təpənin yamacına da
yaxınlaşa bilməmişdim. Biz Əminə ilə daim söz mübadiləsi etmişdik. Çox
vaxt elə bir məna yükü daşımadığından onlardan da heç bir iz qalmamışdı.
Axırıncı söhbətimiz də mənim ucbatımdan uğursuz alınmışdı. Mən bir
daha öz cılızlığımı, miskinliyimi nümayiş etdirmişdim. Belə məcraya
yönələn söhbətin digər iştirakçısı da həmin axınla hərəkət etməyə məcbur
olur. Ona görə də biz daha çox bir-birimizə eyham vurmağa girişdik,
deyəsən bu sənəti də yazıq Əminə məndən öyrənməyə başlayırdı.
Bu məsələdə məndən də pis xasiyyəti olan adamlara sonralar çox
rast gəldim. Son vaxtlar tanış olduğum bir adam daim döyüşdə ağır
yaralanmış və hospitalda yatan əsgər kimi ufuldayır, hər şeydən
şikayətlənirdi. Bu adamın dilində xoş söz yara kimi nadir hallarda
meydana gəlirdi. Evdə arvadı da, uşaqları da onun deyinməyindən,
şikayətlənməyindən, hər şeydən narazı qalmağından zara gəlmişdilər, cana
doymuşdular. Daim irad tutmaq üçün özünə «təmizkar adam» qiyafəsini
seçmişdi, aranı qızışdırmaq, dava almaq üçün otaqdan nəsə pis iy
gəldiyini, özü də toz iyinə oxşadığını deyib, haray-həşir salırdı.Ünsiyyətdə
olduğu adamlarla tez-tez sözləşir, bəzən hətta təhqiramiz ifadələrə yol
verirdi. Yaxşı xasiyyətləri də az deyildi, dost yolunda özünü fəda etməyə
hazır idi, dostluq etmək onun ruhunun şəraiti idi. Ancaq deyingənliyi,
söhbətində hamıya sataşmaq meyli, yersiz ifadələri onu gözdən salırdı,
bütün yaxşı cəhətlərini də yuyub aparırdı. Sonradan müqayisə etdikdə
gördüm ki, xasiyyətini bəyənmədiyim, hərəkətlərini təqdir etmədiyim
adamın qüsurlarınını hamısı olmasa da, bir hisəssi məndə də var imiş və
Əminə öz məlahətinə, təmkininə uyğun olaraq mənim kimi yonulmamış,
diqqətsizliyi əlverişli silah sayan insanla da ünsiyyətdə olmağı,
nöqsanlarımı açıq-aşkar görə-görə onlara dözməyi bacarırmış.
Bizim cəmi, bir-iki səhifədən ibarət olan və əslində maraqsız
ünsiyyət kitabımız beləcə bağlandı. Açığını deyim ki, vəsf etməyə,
Dostları ilə paylaş: |