37
salanda, onu müqqədəslik zirvəsinə qaldırır, bu qızı öz bəkarətlərini dini
toxunulmazlıq kimi qoruyan qədim Romadakı vestalkalara bənzədirdim.
Kimsə, mənim bu düşüncələrimə gülə, məni cinsimə xas olan hissdən
məhrum olmuş adam hesab edə bilər. Ancaq biz adi olan, həyatda gündə
qarşılaşdığımız bir şeyin üzərinə müqəddəslik haləsi çəkəndə, köhnə
bütpərəstlər kimi onlara sitiyaş göstərməyə başlayırıq. Bəzən bir ağac da,
orada kimin dəfn olunduğu bilinməyən tənha bir qəbir də adamların inam
bəslədikləri, kömək umduqları yerə çevrilir, bu qəbrin və ya ağacın
üstündən asılmış solğun lentlər, parça qalıqları buraya nə qədər adamın
dilək üçün gəldiyindən xəbər verir. Diləyi həyata keçməyənlər özlərinin
dinsizlikdə ittiham ediləcəyindən, naşükür, nankor sayılacağından qorxub,
bu barədə bir söz də demirlər, kiminsə hansısa başqa bir söbəbə görə
xəstəliyi sağalmağa başladısa, yaxud üstünə gələn bədbəxtlikdən başqa
amillərin təsiri ilə kimsə azad oldusa, car çəkib aləmə yayır ki, bəs filan
pir mənə belə kömək etdi, indi yenidən gedirəm ona qurban kəsməyə. Bu
nümunə olduqca təsirli olur və pirə getmək istəyənlərin, ondan möcuzə
gözləyənlərin sayı həndəsi silsilə ilə artmağa başlayır. Cavan gəlin yaxşı
anlayır ki, təbiət ona övlad doğmağa imkan verməmişdir, buna
baxmayaraq ərini də, qohumlarını da, anasını da aldadır ki, həkimə
müraciət etməyə ehtiyac yoxdur, mənə yalnız göydəki Allah və onun
yerdəki nişanələri kömək edə bilər. Bu yalanına bir az sonra özü də
inanmağa başlayar və artıq adətə çevrilən pirə ziyarətlərdən qəfil baş
verəcək bir möcüzəni gözləyir. Burada isə gözəllik mövcüzəsinə sitayiş
mövcud idi. Mən də bu qızı bir səcdəgaha çevirmişdim, onun real
cizgilərinin sirli şəfəqləri qalın örtüyü yarıb üzərimə işıq salırdı. Ona olan
məhəbbətimi ideallaşdırmışdım, bunun gücünə xüsusi inam bəsləyirdim.
Gizlətmirəm ki, ondan həm də kömək, yardım gözləyirdim, necə olursa-
olsun bu qıza qovuşmaq istəyirdim. Bir sözlə, düşünürdüm ki, Əminə
mənim üçün göylərdən enmiş bir mələkdir.
Lakin xəyallarımı da ovundura bilmirdim. Yaxşı tutalım ki, mənim
hisslərimə güzəştə gedib, bu ittifaqa razılıq verdi, mənə ərə gəldi. Axı mən
özüm ona ər olmaqdan qorxurdum, güman edirdim ki, bu baş versə
özümlə bərabər dünyanın pis üzünü görməmiş bu zərif məxluqu da ehtiyac
adlanan əjdahanın ağzına atacağam və fasilə verməyən, dayanmaq
bilməyən bu çətinliklər, bu əzablar bir müddət sonra mənə olan təkcə
sevgisini deyil, adicə hörmətini də yoxa çıxaracaq, bunun yerində nifrəti
andıran qaratikan kolu böyüməyə başlayacaqdır.
38
Mən o vaxtlar sonralar meydana çıxan Kolin Makkalounun məşhur
romanındakı keşiş Ralf ataya bənzəyirdim. O, varlı qadının mülkiyyətinə
sahib olmaq naminə, əslində bu sahiblik də şərti idi, var-dövlət Vatikanın
sərəncamına keçəcəkdi, canından artıq sevdiyi Meggiyə xəyanət etmişdi,
bu məhəbbətdən bir müddətə də olsa imtina etmişdi. Sonralar bu sakit qız
onlara məxsus olan yeganə səadəti, varlıqlarından uca tutduqları
məhəbbəti məhv etdiyinə görə, Ralfın xidmət etdiyi dinin, allahın
rəhimsizliyinə, qəddarlığına qarşı üsyan qaldırmış, həmin qaydaların
qranitdən möhkəm olan bütünü zərif dırnaqları ilə, hisslərinin, qəzəbinin,
ehtirasının, ən başlıcası sönməz məhəbbətinin gücü ilə qırıb dağıtmış,
xırda qum dənələrinə döndərmişdi. Ralf ölüm anında bütün ömrü boyu
hansısa inama görə, kardinal rütbəsinə çatmaq arzusu və həvəsinə görə
dəhşətli dərəcədə aldandığını, iki gənc ömrü, həm özünkünü, həm də
mələk kimi bu günahsız, bədbəxt qızın həyatını viran qoyduğunu
anlamışdı. Lakin artıq gec idi, xoşbətlik daim bu iki sevən varlığın
yanından keçmiş, onlara bəxş etdiyi anı, onun xatirəsinin izlərini silib,
yoxa çıxarmaq üçün həmin dəqiqələrin yeganə nişanəsini, bu qadının
bütün dünyasına hakim kəsilən və ömründəki bəxtəvərlik zirvəsini fəth
etdiyi günü daim yadına saldırmaqla ona təsəlli payı olan oğlunu da, elə
Ralfı ondan uzaqlaşdıran allah onun əlindən almışdı. Ralfa öz doğma
oğlunu itirdiyini bu qadın əvvəllər anlatmamaq üçün bulaq kimi axan göz
yaşlarını möhkəm iradəsi hesabına qurudaraq, təkcə cavan oğlunun deyil,
həm də bir dəfəlik itirilmiş, onun varlığında rəmzə çevrilmiş məhəbbətinin
matəmini saxlayır, dözülməz ağır itkiyə məruz qalmış ana qüssəsindən
əlavə, həm də səcdəgahı saydığı sevgisinə səsini çıxarmadan ağı deyirdi.
Bu ağı onun qəbirə qədər müşayiət edəcəkdi.
Mən öz aqibətimdə bu iki sevən insanı təmsil edirdim. Həm öz
məhəbbətimə xəyanət edir, ondan qaçır, həm də bu ağrıya, bu itkiyə
dözmək iqtidarında olmadığıma görə, öz zəifliyimi lənətləyirdim. Mən
nəyisə qazanmaq naminə deyil, heç nəyim olmadığına, yalnız çətinliklər
burulğanında boğulduğuma görə bu məhəbbətdən imtina edirdim ki, guya
qüssəm, kədərim az vaxtdan sonra yoxa çıxacaq, xatirələr yavaş-yavaş
sönəcək, hər şey unudulacaq və mən öz xoşbəxtliyimi başqa birisi ilə
tapacağam. Əminə də mənim kimi. Allah onu belə gözəl, həm də məlahətli
yaratmaqla, bu qız məndən də daha yaxşısına rast gələcək, mənim kimisi
ilə ailə qurmaq kimi ağılsız səhv addımdan vaxtında çəkindiyinə görə o,
özü də düzgün hərəkət etdiyi qənaətinə gəlib rahatlıq tapacaqdır.
Dostları ilə paylaş: |