118
qayığı okeanın dağıdıcı gücündən mühafizə edən laqunda qalmaq
istəyirdim, lakin gözləmədiyim halda buradan qovuldum və başa düşdüm
ki, məskunluğum artıq lazım sayılmır.
Ancaq onu da etiraf edim ki, üzməyə də taqətim qalmamışdır. Mən
buzların arasında qalan gəmi kimi yalnız onların hərəkətinə uyğun olaraq
dreyf etməliyəm və bu o vaxta qədər davam edəcəkdir ki, bu buzlar
gəminin korpusunu əzib sıradan çıxartmaqla onu birdəfəlik məhv etsin.
İndi sən məni ürək hərarəti, sevgi hiss etmədiyim halda həyat adlanan
buzlu dənizdə üzməyə göndərirsən və yəqin sonluğun nə ilə
nəticələnəcəyini də yaxşı bilirsən. Mən sənin barəndə nə qədər haqsız
fikirlərə düşsəm də, mənə qarşı rəhmsiz olacağına inanmaq istəməzdim,
bunu ağlıma da gətirməzdim. Lakin fakt göz qabağındadır, həyatda məni
öz qalxanı ilə müdafiə edən, məhv olmaqdan xilas edən insan indi məni
hansı fəlakətli səfərə yola saldığını anlamırmı? Ona görə də hadisələri
başa düşməkdə, təhlil etməkdə çətinlik çəkirəm, texniki dillə desəm,
mənim dərketmə aparatım da deyəsən xarab olmuşdur, sazlığını itirmişdir.
Buradan belə bir qənaətə gəlirdim ki, mənim ruhi sazlığım da Əminədən
asılı imiş, mən div yox, lap qarışqa olsam da, canım bu şüşədə imiş. Bu
şüşədə xırda çat əmələ gəlməsi isə məni məhvə aparan yolun başlanğıc
nöqtəsi rolunu oynaya bilər.
İndi mən Əminənin mənim üçün, həyatım üçün nə demək olduğunu
anladım və dərk etdim, bir daha yəqinlik tapdım ki, o mənim üçün heç
kəslə əvəz olunmayan alter-ego-dur, ikinci «mən»imdir və bir az dərinə
getsəm görürəm ki, o, yoxdursa, heç birinci «mən» də yoxdur, deməli
bütün varlığım ondan asılıdır. Çox götür-qoy etdikdən sonra özümü
məzəmmət etməyə başladım. Çünki Əminənin, hansısa dini idarə
tərəfindən deyil, Tanrının özü tərəfindən verilən indulgensiyası var idi və
mən bunu pozmağa qadir deyildim. İnsanpərvərlik məsələlərində heç kəs
onunla müqayisə oluna bilməzdi, başqa sözlə dedikdə, bu müstəvidə o,
Sezarın arvadı kimi bütün şübhələrdən xali idi.
Beləliklə, dairə yenə öz başlanğıcına qayıtdı, günahın hamısı mənim
üstümdə qaldı və indi ümidimi yalnız ona bağlayırdım ki, hökm çox sərt
olmayacaq, ən azı mənim bacarıqsızlığımı, həyati işlərdən lazımınca baş
çıxarmadığımı nəzərə alıb, mənə azacıq da olsa mərhəmətlə
yanaşılacaqdır.
Son aylarda biz görüşmürdük, adətən istək olmayanda istənilən
bəhanə köməyə gəlir. Hərdən bir telefonla danışırdıq və onun səsi də mənə
119
əvvəlki kimi doğma görünmürdü, hər sözündə bir eyham, kinayə
axtarırdım. Nə qədər bayağı olsa da, az qala kitablardan kitablara,
filmlərdən-filmlərə keçən: «məhəbbət ancaq ağrı yaradır» fikri tez-tez
beynimdə dolaşır, belə sağalmaz xəstəliyə mübtəla olduğuma görə özümü
danlayırdım və əvvəldən yoluna düşməyən taleyimə acıyırdım. Lakin
gözlərim önündə gəlib dayanan Əminənin obrazı bu fikri də məndən
uzaqlaşdırır və mənə təlqin edirdi ki, məhəbbətin nə qədər ağrısı olsa da, o
arzu ediləndir, dözüləndir, çünki eşq, sevgi könül qübbəsinə işıq salan ən
güclü səma cisimidir, günəşdir. Burada başqa ulduzlar da mövcud ola
bilər. Lakin onların heç biri günəş qədər gur işıq və hərarət verə bilməz və
həm də yadıma salırdım ki, ulduzların işığında heç vaxt hərarət
olmur,onlar da, ay da yalnız yolçuya və dənizçiyə gecə səfərində kömək
etməyə, azmaqdan qorumağa yarayırlar. Digər tərəfdən düşünürdüm ki,
axı qızıl gül də tikansız olmur. Məgər onu sevənlər heç tikan barədə
düşünürlərmi?
Mən inanmağa başlayırdım ki, bu məhəbbət olmasa, artıq dünyada
yoxam, hətta yaşamaqda davam etsəm də, bu, yalnız kabus varlığı, sadəcə
mövcudluq olacaqdı, dünyadakı ruhi və fiziki həzzin heç birini
dadmayacaqdım. Məhəbbət adlanan ilahi qüvvə yaranmamışdan əvvəl
dünyaya gələn və heyvandan o qədər də fərqlənməyən ibtidai insanın
obrazı gözlərim önünə gəlirdi. Axı ibtidai insan da heyvanlar kimi əsasən
ot yeyir, quru yerdə yarpaqları özünə yorğan-döşək etməklə yatır, nəsli
artırmağın da qayğısına qalırdı. Yalnız məhəbbət onları həqiqi insana
çevirdi. Bu hiss həm də onları Allaha yaxınlaşdırdı, Allaha bənzərliklərini
unutmağa qoymadı.
Əminə Tanrının mənə göndərdiyi bir ömür payı idi, borcum isə bu
qiymətli hədiyyəni qoruyub əzizləmək idi. Hətta elə cansız əşyalar da
vardır ki, onlarla ehtiyatla davranmaq, onların təyinatını nəzərə almaq
hökmən lazımdır. Bu qaydaya etinasızlıq göstərsən, riayət etməsən həmin
qiymətli əşyanı bir andaca itirə bilərsən. Zərif büllur güldan çiçəyi, gülü
saxlamaq üçündür, bu həm də onların görünüşünə bir cazibədarlıq verir.
Onun içinə palıd ağacı əkmək fikrinə düşsən, bir az sonra atılacaq köklər
güldanı qırıb, varlığına xitam verəcəkdir. İnsanlar da belədir, onlara
münasibətdə ürəyinin, könlünün duyumunu, dərinliyini nəzərə almalısan,
bu canlı varlıqlara sənin üçün hansısa lazım olan əmtəəni istehsal edən
dəzgah kimi yanaşmamalısan. İnsan qəlbinə nüfuz etmədən onu
qiymətləndirmək mümkün deyildir, sevdiyin insanın qəlbinə bələd
120
olmasan, onu hərtərəfli öyrənməsən, aza bilərsən. Çox sayda səyyahların
hansısa bir xırda amili, cəhəti nəzərə almamaları nəticəsində özlərini də,
ekspedisiyalarını da ölüm girdabına yuvarladıqları kimi, uğursuzluğa
düçar olarsan. Deyəsən mən özümü elə həmin özündən razı, lovğa
səyyahlar kimi aparmışdım, yaddan çıxarmışdım ki, Ceyms Kuk kimi
nadir ağıl, qabiliyyət və cəsarət sahibi, hansısa yerli oğrunu cəzalandırmaq
həvəsinə düşəndə, Havay adalarında həmin hiddətlənmiş tuzemlərin
hücumuna məruz qalaraq həyatını qurban verməli olmuşdu. Ondan az qala
üç əsr əvvəl Filippin adalarına gəlib çatan və komandası ilə birlikdə yerli
əhalinin alicənablığı hesabına aclıqdan xilas olan Fernando Magellan Yer
ətrafına ilk dəfə səyahət kimi görünməmiş ağır bir işin məsuliyyətini öz
üzərinə götürdüyü halda, tuzemlərin yaxşılığının əvəzi kimi münaqişə
etdikləri qonşu adadakı digər tayfa ilə vuruşmaqda onlara kömək etmək
xahişini qəbul edib, oraya yollandıqda, bu səhvinin qurbanı oldu və həmin
düşmən tayfadan birinin zəhərli nizəsi ilə yaralanıb, əsir düşdü və həlak
oldu. Həm Magellan, həm də Kuk dünyanın ən məşhur səyyahları,
dənizçiləri idi və planetin naməlum ərazilərinin kəşfində onlar bəşəriyyət
qarşısında insan təxəyyülünə sığmayan xidmət və şücaət göstərmişdilər.
İnsan qəlbi isə Yerin özündən də böyük və mürəkkəb planetdir. Onu kəşf
etmək, fəth etmək olduqca çətin bir işdir, hətta bu ərazini tutduqdan sonra
da kiçik bir səhv həmin qəlbin cəbbəxanasında olan digər hissləri oyadır
və mifik Kadmın torpağa səpdiyi dişlərdən silahlanmış əsgərlər cücərdiyi,
torpağın üzərinə çıxdığı kimi, onlar silahlanıb səni qəsbkar hesab edərək
üstünə hücum çəkir, az müddətdən sonra görürsən ki, oradan biabırçı
qaydada qovulmusan. Deyəsən, mən gözləmədiyim halda belə hadisə ilə
üzləşmişdim. Ona görə də çalışmalıydım ki, cənnət saydığım, səcdəgah
bildiyim bu ərazini tamamilə tərk etməyim, xırda bir güşəsində də olsa
hindu viqvamına, eskimos iqlusuna bənzəyən kiçik bir koma tikim. Axı
bolşeviklər də rəhimləri gələndə mülklərini əlindən aldıqları adamın
ailəsinə elə həmin binada xırda bir mənzil verirdilər. Bax bu fikirlər məni
dəli etmək dərəcəsinə gətirirdi.
Xeyli vaxtdan sonra biz yenə bir toyda görüşdük. Bizim yerlimiz
olan cavan oğlan evlənirdi. Atası məni də dəvət etmişdi, gəlin isə
Əminənin iş yerindən olan bir rəfiqəsinin bacısı qızı imiş. Mən bizim
rayondan olub, indi şəhərdə yaşayan adamların əhatəsində idim. Onların
içərisində mərhum arvadımın qohumları da var idi, onların qəzəbli, nifrət
Dostları ilə paylaş: |