123
ölkədə, yad adətlər ağuşunda yaşamış bir qız milli rəqsi elə ifa edirdi ki,
onu bura elə bil ki, oynamağa yox, bu milli hisslərin, milli təbiətin
nəhayətsizliyini, böyüklüyünü nümayiş etdirməyə, təbliğ etməyə dəvət
etmişdilər. Bəlkə də Nuridə, milli rus rəqsini xüsusi ilhamla ifa etməklə
kübarları təəccübləndirən Nataşa Rostovanı da bu müsabiqədə geridə
qoymuşdu. Toy sahibləri Nuridənin rəqsinə xüsusən sevinirdilər, çünki bu
qız onların şadlığına təravət, bir coşqunluq gətirmişdi. Başqaları kimlərisə
təqlid edərək, rəqs əvəzinə kobud qaydada tullanıb, düşdükləri, bəzən
hətta əcayib səs çıxardıqları halda, bu qız qu quşu göldə məğrur-məğrur
üzən kimi meydançada süzürdü, onun əllərinin hərəkəti də çoxlarınınkı
kimi yuxarı-aşağı qalxıb, sadəcə qanad vurmaqdan ibarət deyildi, elə bil
ki, onlar dil açmışdı, nəsə sirrli olan bir şey danışırdı və bu sehrli dil
hamının ağlını əlindən almışdı. Rəqsdə onun bədən quruluşunun
mütənasibliyi, gözəlliyi xüsusən nəzərə çarpırdı, bu güzgüdə onun adi
həyatda görünməyən, sezilməyən çox məziyyətləri dolğun şəkildə əks
olunurdu. Təkcə həmin rəqs kifayət idi ki, onun köməyi ilə bu qız yaşlı
adamların, öz sevgi qalıqlarını necə yoluna qoymağı bilməyən qocaların
da diqqətini özünə cəlb etsin. Zaldakı bütün kişilər-təkcə cavanlar yox,
qocalar da bu kəpənəyi əlləri ilə yoxlamaq, onun real varlığına inanmaq,
pəri olmadığına əmin olmaq üçün, çox şey verərdilər ki, mənim yerimdə
olsunlar, bir anlığa da olsa onunla birbaşa ünsiyyətə girmək xoşbəxtliyinə
çatsınlar. Yəqin ki, mənə həm gülür, həm də yazıqları gəlirdi,
düşünürdülər ki, bu cür gözəl kraliçaya belə miskin svita yaraşmır. Amma
hamının məftun gözlərlə baxdığını deyəndə, yalnız mən öz cinsimizi
nəzərdə tuturam, qadınların çoxu isə paxıllıqla, qısqanclıqla Nuridəyə
tamaşa edir, onu özünü satmaq üçün medyan axtaran, reklam etdirən,
yüngül əxlaqlı qız timsalında görürdülər. Bədbəxt cins, niyə onlar
başqasının gözəlliyinə qarşı belə qəddardılar, onlardan olsaydı, qadınlar
çirkin növ olardı, heç olmazsa, heyvanlarda və quşlarda erkəklər
dişilərdən daha iri, daha gövdəli, daha gözəl və cazibədar olduğu kimi. Bu
məsələdə kişilərə uduzsaydılar, onda yəqin ki, onlardakı qısqanclıq bir
qədər azalardı, bütün fikir-zikir sadəcə olaraq yalnız kişiləri ovlamaq
üzərində cəmlənərdi, başqaları ilə, daha gözəl saydıqları ilə rəqabət,
yarışma bir qədər unudulardı.
Mən Nuridənin rəqsinə mane olmamaq, bu möcüzənin yaratdığı
təəccübün və məftunluğun üzərinə kölgə salmamaq üçün kənara
çəkilmişdim. Nəhayət, durnaların nigah rəqsini andıran bu sehrli tamaşa
124
başa çatanda, zalı alqış səsləri bürüdü, toydakıların çoxu şamanın sehrinə
düşmüş adamlar kimi, elə bil ki, hipnozdan ayılıb əl çalmağa başladı.
Musiqiçilər də, orkestrdəki spripkaçılardan fərqli olaraq, alətlərini
oturduqları stulların, üstünə qoyub, eyni çılğınlıqla əl çalırdılar. Alqışlar
səngiyəndə, müğənni-tamada mikrofonu əlinə alıb, silahı saydıqı bayağı
cümlələri bu arada işlətməyin faydasız olduğunu başa düşdüyündən, nəsə
orijinal bir söz demək istədi. Lakin bu da alınmadığından qırıq-qırıq
sözlərlə, özünün dediyi kimi «gözəl rəqqasə xanımı» tərifləmyə başladı.
Lakin bu tərif həmin ecazkar hadisənin yaratdığı təsirə uyğun gəlmirdi,
naşı qəzəlxanların gözəllik haqqında yazdıqları bəsit, mənasız beytlərə
bənzəyirdi. Belə qiymətli daş-qaşa ucuz sağanaq yaramırdı, onun yaratdığı
sevinc, təəccüb və heyrət hissini bir qədər öldürürdü. Özünün də
qüsurunu, yəqin ki, başa düşüb, hamını mat qoyan rəqqasənin şərəfinə –
bu da onun öz sözləri idi, «Sən gəlməz oldun» mahnısını oxumağa başladı.
Mən Əminə ilə azacıq söhbət etdikdən sonra öz stolumuza
yaxınlaşdıqda, bizim məclisin xeyli seyrəldiyini gördüm. Qalanlar bir
ağızdan rəqs edən qızı tərifləməyə, onun kim olduğunu, məni haradan
tanıdığını soruşmağa başladılar. Kənd adamları məşhur adamla tanış
olmağa, əlini sıxmağa can atırlar ki, özlərinin də elə-belə adam
olmadıqlarını göstərə bilsinlər. Ona görə də onların söhbətlərində yeri
düşdü-düşmədi mütləq hansısa bir şair, müğənni, ya alim nəql etdikləri
hekayətin qəhrəmanlarına çevrilirdi. Mənim bir məktəb yoldaşım
səkkizinci sinifdə oxuyanda tələbə qardaşının yanına Bakıya getmişdi.
Orada təsadüfən Musiqili Komediya Teatrında tamaşaya baxan Süleyman
Rüstəmi görmüşdü, institutda tələbələrin şair Zeynal Xəlillə görüşünə
qardaşı onu da aparıbmış. Sonralar qulağımız getmişdi, ədəbiyyatdan,
poeziyadan söhbət düşən kimi yuyulmamış qaşıq tək guya şəxsən tanıdığı
bu adamları ortalığa atırdı. Bir zonanın adamları istedadlı camaat
olduqlarını göstərmək üçün söhbəti muğamatın üstünə gətirməyi xoşlayan
kimi, digər bölgədən olanlar öz həmyerlilərini tərif etmək fürsətini heç
vaxt əldən qaçırmaq istəmirlər. Yaxşı qələm sahibi, hətta Moskvada
əsərləri böyük tirajla çap olunan bir yazıçı Şekspirdən, ya Hotedən söhbət
düşəndə onların tərkinə Səməd Vurğunu, ya da Hüseyn Arifi mindirməmiş
əl çəkmirdi və əlavə edirdi ki, əgər dünyada ədalət olsaydı, o ingilis və
alman bizim elin dahilərinin səmənd atının tərkində gəzməli idilər, bu
şərəf üçün əvvəlcə onlardan mərhəmət diləməliydilər.
Dostları ilə paylaş: |