www.kitabxana.net
– Milli Virtual Kitabxana
48
qanunlarını gözəl bilən Kamranın yazdığı ərizə və ifadələrdən elə görsənirdi ki, onların gizlin razılığa gəlib,
rayonda gizlənmələri, Kamrana edilən telefon zəngləri, şəhərdən kənarda görüşməyin - hamısının məqsədi
Kamrandan böyük məbləğdə pul qopartmaqdır. Əgər Əziz müqəssir deyilsə, bəs onda günahkar kimdir?
Zinyət?! Belə çıxır ki, Əziz özünü təmizə çıxarmaq istəsə, o halda Zinyət də iştirakçı kimi həbs olunmalıdır.
Zinyət atasının yazılı vəsiyyəti olmadığı halda,
necə sübut edə bilərdi ki, qardaşı ona pul borcludur?
Müstəntiq Zalıyevin incə eyhamlarla çatdırdığı mətləblər işin dola-şıqlığını artırırdı. Zinyətin yaxasını bu
qansızların əlinə vermək, onu kabinetlərə, məhkəməyə sürükləmək, əclaf qardaşına görə məhbəsə salmaq? Elə
olanda gərək Əziz yaşamayaydı. Daha Kamranla, onun nə fərqi? O da olardı Kamranın tayı. Zinyəti buna
görəmi sevmişdi? Ölməyə razı olardı, amma, Zalıyev kimi nadürüstlərin Zinyətə nəinki söz deməsinə, hətta
irişə-irişə baxmasına dözməzdi.
Zalıyev, elə Kamran da bütün bunları gözəl bilirdilər. Bilirdilər ki, Əziz çabalamaq nədir, heç
qımıldanmayacaq da. Zinyətə olan sevgisini dəyirman daşı kimi onun boynuna keçirib, yaratdıqları bataqlıqda
batıracaqlar. Dolaşıqdan çıxmağın bir yolu vardı: O da çöldən danışılmış qabiliyyətli vəkilin işə qarışması,
Kamranı ifşa etməsi. Məsələnin qəlizliyi də onda idi ki, o vəkili kim tapıb danışacaqdı? Bir həftəydi
tutulmuşdu, evlərindən, qohum-larından kimsə onu itirib-axtarmamışdı. Özgəsinin arvadını qaçıran, ad batıran
adam kimə lazım idi?
Zinyətin də əlindən gələn deyildi. Nə imkanı vardı, nə də savadı. Bildiyi iş qadın bərbərliyi idi, gördüyü
yer də gözəllik salonu.
Əziz sanki, qapanmış dairəyə düşmüşdü. Bütün ittihamları öz üstünə görtürməkdən başqa yolu görünmürdü.
Kamran torbanı elə nəfis hazırlamışdı ki, Əziz razı olmazdı onu kiməsə qıysın.
Ona görə də müstəntiq Zalıyevin işi rəvan gedirdi. Ayın tamamında məhkəmə quruldu. Əzizin
arzuladığı yeganə şey Zinyətin məhkəməyə gətirilməməsi idi. Onların məhkəmədə üzləşdirilməsi ona yaxşı heç
nə vəd etmirdi. Zinyətə arxayın deyildi. Bütün işləri korlaya bilərdi. Artıq hər şey həll olunmuşdu. Əlavə nə isə
demək, danışmaq Əzizə görə mənasız idi.
Hakimin kabinetində keçirilən məhkəmə iclasında zərərçəkmiş qiyafəsində Kamran qıp-qırmızı onun
üzünə durdu. İnsan necə də həyasız olarmış, İlahi! Nə yollasa Zinyəti məhkəmədən uzaqlaş-dırmışdı. Tək bu
işinə görə ondan razı olan Əziz, onun heç bir ira-dına etiraz etmədi. Son sözə də ehtiyac olmadı. O, sözünü
Kamrana vaxtı gələndə deyəcəkdi.
Yarım saatlıq iclasın nəticəsi olan iki səhifəlik hökümdə Əzizə beş il iş kəsildi.
Daha bir həftə keçdi, şikayət verilmədiyi üçün hökm qanuni qüvvəyə mindi. Səhəri gün onu on iki nəfər
məhkumun sırasına qatıb, konvoy maşınına mindirib, istintaq təcridxanasından İslah Əmək Müəssisəsinə yatab
etdilər. Canlarının bağlı kameralardan qur-tarıb, dustaqlığın “azadlığı” saydıqları cəzaçəkmə müəssisələrinə
göndərilmələri məhkumların sevincinə səbəb olmuşdu.
IV
www.kitabxana.net
– Milli Virtual Kitabxana
49
Konvoy maşını İslah Əmək Müəssisəsinin bədheybət əjdaha-ya oxşayan hündür, iri qalın dəmirdən olan
darvazasının qarşısındakı meydançada yarımdairə vurub dayandı. Hava isti olduğundan məh-kumlar daşınan
qaranlıq, havasız varanokda nəfəs almaq çətin-ləşmişdi. Maşının dayanmasına məhkumlar sevinməyə
bilmədilər. Nə yaxşı ki, uzaq yerə aparmadılar, leşləri çıxardı. Varanok o baş, bu başa o qədər məhkum
daşımışdı ki, içərinin divarlarına, künclərinə hopmuş kəsif, kif iyinə oxşayan dustaq iyi Əzizin burnunu
acışdırdı. Bu iy təzəcə canından çıxmışdı, yenə beş il doyunca ciyərlərinə çək-məli idi.
Qapıya nəzarət edən əsgərlər uzaqdan konvoy maşınını görcək daxili telefonla müəssisə rəisinin
növbətçi köməkçisinə yata-bın gəldiyini xəbər verdilər. Növbətçi köməkçi rəisə məruzə etdi. Rəis yatabın
qəbulunda iştirakı vacib əməkdaşların idarəyə yığılma-sını, ləngidilmədən yatabın qəbul edilməsini tapşırdı.
Əslində həftənin bu günü yatab günü olduğundan hamı hazır idi, varanokun gəlmə-sini gözləyirdilər.
Maşının dayanmasına sevinən məhkumlar az keçmədi peşman oldular. Maşın hərəkət edəndə bilinmirmiş,
dayananda dəlmə-deşikdən külək gəlmədiyi üçün bürkü daha dözülməz olmuşdu. Məhkumlardan biri tab
gətirməyib, çıxışda dayanmış əlisilahlı əsgərlərə şikayətləndi:
- Allah xatirinə, qapını açıq qoyun, hava gəlsin. Bizi burada qıracaqsız? Təhvil verin də düşək.
Əsgər qapını azacıq araladı.
- Səbrli olun, beş dəqiqədən sonra hamınızı təhvil veririk, istədiyiniz qədər zon havası alarsınız,
tələsməyin.
“Qəribə işdir, - Əziz düşündü, - insan ömrü boyu nə isə əldə etmək naminə tələsir. Əldə edə-edə, tələsə-
tələsə ölümünə yetişir. Yəqin ölüm də məqsədmiş. Dünyanın bütün qayğılarından, əzab-larından azad olmaq
məqsədi. İndi varanokdan düşməyə, kalona tələ-sirdilər. İki-üç saat sonra karantin korpusuna, yaşayış zonasına,
baraka, illər keçdikcə azadlığa tələsəcəklər.”
Beş dəqiqə keçdi. Növbətçi köməkçi əsgərlərə qapını açmaq, varanoku içəri salmaq göstərişi verdi.
Maşın müəssisənin qabağındakı həyətə daxil oldu. Varanokun qapıları açıldı. Əsgərlərin komandiri içəri
boylanıb ucadan səsləndi:
- Düşün! Hərə öz əşyasını götürsün, unudub maşında qoyma-sın.
Məhkumlar işığa çıxmış yarasalar kimi tənbəl-tənbəl vara-nokdan yerə tökülüşdülər. Aralıda dayanmış
xeyli zabit və nəzarətçi gendən onları müşahidə edirdi. Orta boylu, dolu bədənli, qolundakı qırmızı sarğıdan
rəisin növbətçi köməkçisi işlədiyini bildirən kapitan məhkumları və şəxsi iş qovluqlarını sayıb, təhvil alırdı.
Təhvil aldıq-larını dəqiqləşdirmək istəyən növbətçi üzünü təzə gələnlərə tərəf tutub, qışqırdı:
- Cəld olun. Sıraya düzlənin, bir sıra. Bazarda kartof növbəsi-nə durmamısınız.
Məhkumlar bir-birlərini itələyə-itələyə yan-yana düzüldülər.
- Əliyev.
- Burda.
- Burda yox, mən. Bunlara gərək dərs keçək kii... Məmmə-dov, Rzayev,.. - növbətçi qovluqları,
familyalarla da yoxladı.
Darvazanın qapıları bir də açıldı. Hamının diqqəti ora yönəl-di. Sağda və soldakı gözətçi vışkalarında,
çöldə əli silahlı əsgərlər əmrə müntəzir dayanmışdılar. Məhkumlardan biri yanındakının qula-ğına pıçıldadı:
- O qapıdan çölə nə çıxardım....
Söhbəti yox, salamat çıxmaz-dım.