11.
Canım tısbağa,
Gözüm tısbağa,
Daha yoxdu sənə
Sözüm tısbağa...
12.
Sandıqdan çıxın, tısbağalar,
İnsafa gəlin, bağa ağalar!
Sındırın, ağalar, dar divarları,
Yerlə yeksan edin dər-divarları!
Allah necə sevsin qəlbi darları!
Dirəyin divara nərdivanları,
qlxın yuxarı...
Bəlkə Allah görə, amma ki, görmür
Hər tərəf qapalı, hər tərəf bağlı...
Hansı cəhənnəmdə gizlənib adam
Allah adam gəzir əliçıraqlı...
Yer şarından iri tısbağa hanı –
Başdan ayağa kef, məzə tısbağa.
Biz ki, içindəyik köhnə bir qının
Nəyimizə gərək təzə tısbağa?
Tısbağa dünyaya, bağa dünyaya
Nə qalır, nə qalır tısbağalardan?
Tısbağa-tısbağa səbrlər qalır,
Tısbağa-tısbağa colma-cocuqlar,
Tısbağa-tısbağa kinlər, acıqlar,
Tısbağa-tısbağa malikanələr,
Tısbağa-tısbağa QƏBRLƏR qalır...
13.
Dostlar, inciməyin bu zarafatdan;
Yetər nağılımız şığıyan atdan,
Yetər ki, yeritdik su altdan-altdan
Yetər göydən yazdıq, yeddinci qatdan...
Mən bir az bəhs etdim alçaq həyatdan,
bir az yalan, bir az gerçək həyatdan...
Şübhəylə yanaşıb mənim bağıma
Niyə fikir çəkib baş yorursunuz?
Durun, zəhmət çəkib gəlin bağıma
Mənvaram,
siz varsız,
tısbağa durur…
2008
GÜZGÜ
O yana keçib güzgüyə baxıram,
bu yana keçib güzgüyə baxıram,
dönə-dönə qayıdıb güzgüyə baxıram –
üstümdəki nizama,
üzümdəki düzgüyə baxıram.
Qaranlıq səngərə bənzər ağzımda
sıraları seyrələn əsgər dişlərimə,
döyüşkən alnımdakı çapığa,
hər xırda cizgiyə baxıram...
Güzgüyə baxıram –
özüm hanı,
canım hanı,
dostum,
düşmanım hanı? –
elə bil özgəyə baxıram...
nə kökdədi axırım!
Ruhsuz güzgülərə qarışdı başım –
əlimi qaldırıb dualar üçün
göyün güzgüsünə baxmaq yerinə,
aynaların anasına baxmaq yerinə
tərlətdi nəfəsim soyuq aynanı –
o da məni qoydu axmaq yerinə...
İllər boyu
üzümü əlləşdirən,
saçımı didişdirən,
düymələri ilgəklərə ilişdirən,
başımı qarışdıran
bu əclaf güzgü
kirli bir köynək kimi
çırpmaq istəyir deyəsən
məni mənim üzümə!
Düz eləyir güzgü –
düz, lap düzünə...
Gör neçə illərdi
çevrilib baxa-baxa
o üzümə, bu üzümə
yaşayıram şüşə qəfəsin
o üzündə –
div canı kimi,
şüşə ilğımında
kobra ilanı kimi...
Güzgünün sözü düzdü,
qocalıram, düzdü!
Vaxtdı ta... qopmaq gərəkdi
parıltılı,
hırıltılı,
kəkilli,
qırağı «nakleyka»
şəkilli
güzgülərdən...
Bütün gözlərdən uzaqlaşmaq
və kiçilmək gərəkdi
qum qədər,
tum qədər,
çətənə qədər!
Rədd olub
getmək gərəkdi
özüm öz gözümdən
itənə qədər...
2008
İYNƏ
Deyirdin:
– İynəni bu sapdan asın...
Yerə düşmədi heç bir dəfə sözün.
Nənə,
görüm sənin gorun çartlasın;
necə də dar imiş iynənin gözü!
İynəni darvaza bilirdim, əşi,
gözünü gen qapı, baca bilirdim.
Özümü hünərli iş bilən kişi,
səni də qocadan qoca bilirdim!..
Bir anda iynəni sapa keçirdib
Dərsimin dalınca qaçırdım sonra.
Dərsdən qayıdanda olurdum keçi,
Qayada min deşik açırdım sonra.
Demə «iynələnib» deyir özündən,
Allah da bəyənir şair gopunu.
Vaxt vardı, ay nənə, iynə gözündən
Rahat keçirdirdim futbol topunu.
İynə ucu boyda deşikdən keçib
Qonşu bostanına yol eləyirdim.
Güllü yaxalara iynələr sancıb
Qızları hal kimi qul eləyirdim.
İndi sap əlində girincəm özüm
Deşik gəzə-gəzə gözümü yordum.
Gözümə görünmür iynənin gözü
Nənə, fələk məni gözümdən vurdu!
Mindilər at oldum, döydülər eşşək,
Qanımı sağdılar, inəyə döndüm!
Məni ehmal-ehmal soydular qəşəng,
Nənə, gorun yansın, iynəyə döndüm!!!
Şığıyır, çözdənir, gəlir yadıma
İynə həvəsləri, sap həvəsləri.
Bəzən iynə canım yetir dadıma;
girirəm gözünə xayın kəslərin!
Haqq kişi hərəyə açır bir qapı –
Qapı dar, həvəs gen, dözüb keçirəm.
İynədən keçirə bilmirəm sapı,
İynənin gözündən özüm keçirəm.
İynəylə gor qazıb ucaltdığım dam,
qurduğum bu ev də, eşik də
qalmaz.
Hökm olar, iynə tək itib-bataram,
Baxmağa bir xırda deşik də qalmaz!..
2008
RUS OĞLU
O ayrı məsələ ki,
yalanam və ya doğruyam,
O ayrı məsələ ki,
Halalam və ya oğruyam...
Türkoğullarının
xoşuna gəlsə də,
xoşuna gəlməsə də
deməliyəm ki, mən
bir az
rus oğluyam...
Dərhal:
qulaqlara qurğuşun,– deməyin,–
cinli-şeytanlı budaqlara
qondu quşum,– deməyin!
Proletariatın dahi rəhbəri
Leninin saqqalına,
Ellər atası Stalinin
demisinə və bığına,
Brejnevin tökmə,
qalın qaşına,
Qorbaçovun
təpəsində xalına
və bir sürü medallı-medalsız
imperiya çaqqalına
“tfu” deməkdən
mənim də ağzımda
tüpürcək qalmayıb, düzdü,
Amma
mən deyən ayrı məsələ,
mən deyən, ayrı sözdü...
1905–də,
1918–də,
37 adlı keçməkeçdə,
Bunlardan da irəli
babam Pənah xanın
qocalığında,
və
Doxsanıncı il
Yanvar ayının on doqquzundan
Iyirmisinə keçən gecə,
və iki il sonra Xocalıda
rusoğullarından
it zülümü çəksəm də belə
rus oğluyam bir az!..
Belə düşünürəm indi
Qalsam o vaxta
yəqin ki,
düşünəcəyəm
yetmişdə,
səksəndə də belə!
Mən bir az
rus oğluyam...
Ata tərəfdən
tər-təmiz
bəy nəsliyik biz–
Aslan bəy,
Salman bəy...
Aslan bəy; atamın babası,
Salman bəy; atamın atası...
Babam,
yəni Salman bəy
axır macallarda
külqabı kimi
yanıb qaralmış
batıq ovurdlarını
bir az da çökürdə-çökürdə
uzun,
sarı müştüyə
filtirsiz papiros taxıb
sümürür
və
qoz-fındıq satırdı
Qaryagin bazarının ortasında.
Bəylikdən
yarımca ədəd neytron,
bircə ədəd atom
qalmamışdı onun
venasında,
aortasında...
Cuvarlı qohumlardan,
bir də
Dilbər nənəmdən eşitmişdim
haçansa onun bəy olduğunu.
Elə buna görə də
hərdən özümü bəy balası sanıb
şişirdirdim qoltuğumu...
Salman bəy –
cavan atamın yası düşəndə
çoxdan bizim babamız deyildi o.
Bir yaşı olar-olmaz
Dilbər xanımın
qucağına qoyub
Məşədi Səfəralının
ocağına qaytardığı
oğlunun öldüyünü
yeddi gündən sonra bildi o...
Məşədi Səfəralının qızı
Dilbər xanımın dost-doğma
xalası oğlu və
ikinci əri
Həsənqulu oğlu Qəbil idi
bizim babamız...
(torpağına xalqım qurban!)
Çəmənlikdəki
tabuta tərəf dartınaraq–
“ata”, “ata” deyib ağlayanda
gözümüzün
yaşını silirdi o!
Az-maz
rusca da bilirdi o!
“Dəli” deyirdik adına–
qul idi bizə,
nənəmizə–
Məşədi Səfəralının
hikkəli qızına.
O,
Həsənqulu oğlu Qəbil
Salyanda,
fəallar yığıncağından
qapıb aparmaq rahat olsun deyə
keçici qırmızı bayrağın
sapını qıraraq
zor gücünə gətirmişdi
Sabir adına kolxoza.
Kəndimizdə
qədim tarixdən bizə qalan
bir bağ adıdı Qızılbaş!
O bağdan qoşun-qoşun
ağ itburnu çiçəkləri
öldürsəm də
əlbəttə,
Qızılbaş deyiləm mən.
Mirzə Ələkbər Sabir demiş
Rusbaş da deyiləm mən –
Rus oğluyam amma bir az!...
Salman bəy
atamın adını
Sovet İttifaqının şərəfinə
İttifaq qoymuşdu –
O vaxta baxanda haqq qoymuşdu,
bu vaxta baxanda
nahaq qoymuşdu...
Çox zamanlar ötüb aradan,
çox küləklər əsibdi,
Şura gəlməzdən öncə
doğulub deyin
böyük əmimin adı
Nəsibdi.
Yaddaşlarda
tarix kimi
əziz qaldı,
Toxumçuluq idarəsinin
müdiri idi,
toxum qədər
təmiz qaldı...
Ondan sonrakı əmim
İnqilabdı,
Atamı dedim;
İttifaqdı,
balaca əmim İnzibatdı...
Gör siyasət
hardan hara endirib
bəy balalarının ləyaqətini?!
Həyat
belə həyatdı...
Bir dəfə
sinif yoldaşım Siyasətlə dərsə gedəndə eşitdik;
briqadir Sovet
sağıcı Şuraya deyir ki,
cidanı çuvalda gizlətmək olmaz...
Olmaz, olmaz, olmaz...
İndi bildinizmi
nədən deyirəm
mən rus oğluyam bir az.?!
Etiraf çətin olsa da,
ana babam
Asiya çöllərindən axan
oğuz nəhrinə məxsus
Məti olsa da
doğrudan-doğruya
mən bir az rus oğluyam.
Uydurmadı bütün dinlər,
Həyatdı ən böyük din!
Bunu mənə kim deyir?–
Dərisiz İmadəddin...
Sən get
minarəyə dırman!
Qorxmuram səndən, bəli,
Mənim ayrı dinim var–
dinsiz Mirzə Fətəli!
Tərkim mənim, dibim mənim
Haqqa bağlı
Üzülməyən ipim mənim,
Aldanaraq haqqa çatan
Aldanmış kəvakibim mənim!
Nə olsun ki, beşiyim
kənddə qurulub,
məzarım kənddə bitir,
Nə olsun ki,
rusca savadım
“da”-da başlayıb
“net”də bitir –
mən bir az
rus oğluyam.
Nə bəy,
nə İnqilab,
nə İttifaq,
nə İnzibat, canım,
təpədən dırnağa qədər
anamdan almışam
nəyim varsa
Vaqif Diləfruz oğluyam,
bir az da
rus oğluyam...
Dünyanın bu başını
o başına calayırdı
böyrümüzdən ötüb keçən
rus qatarları,
o qatarlar obamıza yetişəndə
görəydiniz necə sevinir
kəndimizin körpə-körpə
oğuzları,
səlcuqları,
tatarları...
İlk dəfə
rus hərfləriylə
rus kağızına yazdım
“ana”,
“ata”
“Vətən” sözünü.
Cibimdəki
rus rublunu
sonuncu
qəpiyinə qədər
xərcləmək istədim
rus qızına –
imkan vermədi,
xərcə-xəsərətə batmadan
təmənnasız
sevgilər gördüm.
“Çerez Moskva”–
ölkələr gördüm,
Göz açdım dünyaya;
kimlər gördüm,
nələr gördüm...
Qoqolun şinelinə büründüm
Peredelkino qarında!
Don, Dunay, Kerç sularında
babalarımı qan içində
əmilərimi,
dayılarımı
mələr gördüm...
Bunu deməsəm olmaz,
rus oğluyam mən bir az.
İlk dəfə Peterburqda,
Kazanda,
Qoridə
qara saqqalımı
rus ülgücüylə təraş etdim,
Nadanlığı görüb
partlamaq dərəcəsinə
gələndə
Kefli İskəndərə dönüb
rus şərabı nuş etdim...
Bunu deməsəm olmaz,
rus oğluyam mən bir az.
Üstümə alıram çox böyük risqi –
Sizin xətrinizə Anton Pavloviç,
Sizin xətrinizə Blok, Yesenin,
Sizin xətrinizə Dostoyevski...
Mənə satqın denən, lap gözümü oy
İçimdə yurd salıb
QrafTolstoy!
Xoşbəxt olmuşdum, bəli
ağ köynəyimin boynuna
Kəklik müəllim qumaş
pioner qalstukunu taxanda,
körpə ürəyimin təmiz başında
komsomol nişanı qızaranda.
Diplomum,
komsomol mükafatım kimi
partiya biletini də
zəhmət və
namusa görə qazanmışam!
Bəlkə siz deyəsiniz,
nəyi özümə görə,
nəyi
rusa görə qazanmışam?
Qoy bir söz də deyim
özümüzünkülər də şad olsun:
kürəyimdəki yaralarin bir çoxunu
milli
dəyyusa görə qazanmışam...
Allah bilir ki, yaram
bitişər, ya bitişməz?!
Fikrim kamalınıza
Yetişər, ya yetişməz...
Içimdəki tarixdən
qalxıb yüksəlir bu səs;
Türkmən,
qırğız,
qazağam,
Fars boğazı da vurur
hərdən oxuyanda
boğazım.
Ən dəhşətli istilərə
tavanım var
dəvə kimi,
əqrəb kimi,
Haçan ki, canım ağrıyır
qaralıram
ərəb kimi...
Bunu deməsəm olmaz,
Mən həm də rus oğluyam bir az –
Fikirlər üst-üstə
düşüncə eyni,
bir azca dərindən
düşünsək eyni;
əl-əldi,
göz gözdü,
çənə – bənzəyir,
Göylər bir,
kitab bir, din də ki,
dinə bənzəyir–
mən rus oğluyam bir az!
Lap sonda
bunu da deməsəm olmaz:
Rus oğlu da bir az
mənə bənzəyir...
2008
TƏYYARƏLƏR
Təyyarələr, keçməyin
Mənim başımın üstdən...
Qollarım odun oldu,
Qulağım batdı səsdən!
Üstümüz su yoludu,
Keçirsiz yoxsa, qəstən?
Təyyarələr, keçməyin
Mənim başımın üstdən –
Hürkütməyin atımı
Nə gündüz, nə də gecə!
Uçağan ümidimi
Döndərməyin bir heçə!
Təyyarələr, keçməyin
Mənim başımın üstdən –
Doğranır bıçaq-bıçaq,
göyüzüm yaralanır,
Ayağımdan yer qaçır,
qanadım aralanır...
Təyyarələr, keçməyin
Mənim başımın üstdən –
Dartmayın göy üzünə
Canini, başkəsəni,
Süd gölündə üzəni,
Ucalığa qalxanda
Titrəyəni, əsəni...
Təyyarələr, keçməyin
Mənim başımın üstdən –
Yeri, göyü yorurdum,
Həm də uçurdum bir vaxt!..
Qanadlarım qırıldı,
Üzümə gülmədi baxt!
Təyyarələr, keçməyin
Mənim başımın üstdən –
Dönmüsünüz şahinə;
Uçmaq mənim haqqımdı!
Allahın dərgahını
Qucmaq mənim haqqımdı...
Təyyarələr, keçməyin
Mənim başımın üstdən...
Söz içimdə sərgərdan –
Çəkirəm keşiyini...
Pərin yansın, tərpətsən
Balamın beşiyini!
Təyyarələr, keçməyin
Mənim başamın üstdən
sınıq-salxaq sətircə!..
Döşənin ayağıma,
Hünəriniz çatırsa
qonun dar otağıma...
Təyyarələr, keçməyin
mənim başımın üstdən –
Göydə mənim kimim var,
göydən qonaq kim gələr?
Xəyalıma son səfər,
əbədi köçüm gələr.
Təyyarələr, keçməyin
Mənim başımın üstdən –
Yer üzündə birtəhər
Girləyirəm başımı.
Yonuram axşam-səhər
Qanadsız baş daşımı...
Təyyarələr, keçməyin
mənim başımın üstdən –
Nə qədər ki, diriyəm
hündür təpə tutaram,
Mən dəlinin biriyəm,
sizi topa tutaram!
Təyyarələr, keçməyin
mənim başımın üstdən...
Sakit işimin üstdən,
qoca yaşımın üstdən,
dilsiz daşımın üstdən.
2008
TELEFON
Qız qalası qızlar, qalaça qızlar
Telefon xəstəsi olub, ay nənə!
Sifətdə qanmı var,
başda tükmü var
üz cırım,
saçımı yolum, ay nənə?
Oğlan heç...
qızlar da unudub əsli–
Necə deyim:
–Allah kərimdi, nənə?
Bakıda nə qədər qız var,
Xan Əsli,
O sayda telefon...
Kərəmdi, nənə!
Telefon söyləmək ona ,
azdı, az–
fanardı,
oyundu,
şəkilçəkəndi.
Daha tarlamıza dən əkən olmaz;
Əkinçi millətim mesaj əkəndi!
Him-cimlər, göz qaşlar–
telefon ilə,
xəlvəti görüşlər –
telefon ilə,
əttökən öpüşlər–
telefon ilə,
görülür hər işlər...
telefon ilə!..
Haçan ki, telefon dindi,
elə bil
qurbağa ilanın gözünə baxır.
Atanı,
ananı eşidən kimdi?–
Hamı telefonun sözünə baxır...
...Balaca əllərdə balaca qızlar
Elə bil, balaca can gəzdirirlər.
Haçan ana oldu halalca qızlar? –
Körpə telefonu əmizdirirlər…
“Salam”,
“eşidirəm”,
“baş üstə”,
“bəli”...
Gör nəyə əsirdi can üzən qızlar?!
Telefonla gəzir qumlu sahili,
Telefonla girir dənizə qızlar...
Nahaq ümidvarıq,
hər məlaikə
Yurddan qanadlanıb murad doğacaq.
Dəniz ayğırına zəng edib bəlkə? –
Qızlar sudan çıxıb Qırat doğacaq!
Söz dilə yerləşmir,
üyünür ton-ton,
Allah adamları qarğa eləyib.
Ana öyüdüdü bəlkə telefon,
Qızlar qulağında sırğa eləyib.
Qıza mesaj gəlir...
alışır qanı
O orda sallaşır, bu burda düşür.
Həris tünlüyündə marşurutkanın
“Sevirəm” kəlməsi abırdan düşür!
Çoxdan iş üstədi cibəgirənlər–
Üzünü çalarlar ağız qarışıq.
“sevirəm” sözünü əlləşdirirlər
Telefon qarışıq, o qız qarışıq.
Bu da dayanacaq...
qızlar səs-səsə...
Sevən oğlan hanı?
Görünmür sevən.
Telefon yollayır qızları dərsə,
Elə telefon da...
ötürür evə.
Qucur telefonu, çəkir yorğanı
İşıldaq düymələr,
boş otaq,
divar...
Hələ qurumayıb çarmıxda qanı,
Yoxsa Məryəm qızın İsa fikri var?
Mobildən göndərir şerini çapa
Şairlər
can atır kəlam tutmağa.
Qutuda ilan tək baxır kitaba,
Tüpürür birdibli
qələm tutmağa.
...Beləcə şığıyır əsrin gülləsi–
Nədən çox sevirik yad çıxardanı?
Girsin bəbəyinə Eyfell qülləsi,
Ürəyi çatlasın “çat” çıxardanın!
Qız qızdı,
düz sözü çətin ki, anlar…
İçimdən dərd adlı
mesaj sallaşır.
Xarab telefon tək susur oğlanlar,
Qızlar bala-bala qloballaşır...
2008
ZORAKILIQ ƏLAMƏTİ
Hadisə yerinə gələn həkim ölünü müayinə
edəndən sonra müstəntiqə dedi: “Meyitin
üstündə heç bir zorakılıq əlaməti yoxdur.”
Nə təhər həkimsən, ay çarxı dönmüş,
Bu gözün qırılmış şüşəsinə bax!
Zavallı qəlbinin, çırağı sönmüş
ən gizli, ən dərin guşəsinə bax!
Hamı bu dünyada xoşbəxt doğulur,
Körpənin alnında gor nişanı yox.
Yetər ki, edəsən hakimlə qurqur:
“Meyitin üstündə zor nişanı yox.”
Arılar sancanda bal zəhər olur,
Qəm oyan ürəyin yeri qalıbmı?
Həkim,
zorakılıq nə təhər olur,
Heç bunun salamat yeri qalıbmı?
Çalışın böyründən gizlincə çəkin
namərd gülləsinin gilizlərini.
Kor da görər bunun boğazındakı
Qatil zəmanənin əl izlərini.
Həkim, əməlli bax, nakam sevgisi
Qəhr olan qəlbinin para yeridi.
Ac qarnı qudurmuş qurdlar vadisi,
Boş cibi sağalmaz yara yeridi.
Bu odur...
göz yaşı aşa çevrilən...
Bu yazıq yeyəndən
yemədin, həkim?
Ehtiyac içməkdən daşa çevrilən
qara ciyərini demədin, həkim!
O nataraz gədə -
bunu ki dəlib
Bəlkə at boydadı,
ulaq boydadı.
Bu bədbaxt oğlunun canı didilib –
Ən böyük tikəsi qulaq boydadı.
Əlac quru sözə qalıb, ay həkim,
demə ki, tibbə ziddi yazdım yazımı.
Kim bunu bu hala salıb, ay həkim,
Ləçər arvadımı, oğlu, qızımı?
Gör necə əziblər dik çənəsini,
Necə öldürüblər öküz şəklində.
Bunun qolundakı qandal səsini
duyur Qobustanda öküz şəkli də...
Harda ki, həyatın pozulur səfi
Orda zorakılıq əlaməti var.
Tanrıdan qabağa düşən əclafı
Nə həkim tanıyar, nə bilgisayar.
Gərək gizli qalsın ləkə, ay həkim,
Bərəkallah, bizi az azdırırsan!
Qatil sən özünsən bəlkə, ay həkim,
İndi belə deyib iz azdırırsan?
2008
QƏRİBƏ AT
Təmiz saxlasanız əgər tövləmi,
o noğul tövləmi, şəkər tövləmi...
vaxtında versəniz ot, alafımı –
yaşıl alafımı, cod alafımı,
biryaşar olmamış yıxsanız, əgər
əzsəniz həyasız damarlarımı,
ağzımda noxtanı sıxsanız əgər,
həm də tumarlayıb yançaxlarımı,
hərdən də yalasa qamçı gözümü
mən sizə
könüldən vurğun olaram,
həm sizin,
həm də ki, elə özümün
üstünə zərli çul, yorğan oluram...
madyan həsrətiylə dalğın olaram!
Boynumdan assanız çadır torbanı
çaparı mənzilə çatdırmaqdan yox,
kişmiş gövşəməkdən yorğun olaram.
Sağrıma işıldaq muncuq taxsanız,
dizimi zavalda qırsanız əgər,
əgər ki, siz mənə yaxşı baxsanız,
nal üstdən bir nal da vursanız əgər,
dünyada hamıdan qanacaqlı və
ifallı atınız olaram sizin,
ananız, atanız olaram sizin;
namus daşıyaram hər axşam evə,
at nədi, itiniz olaram sizin...
Bax belə, şöhrətim tutub aləmi;
Qardaş,
Qır atıyam mən millətin
Quyruq bulayıram yal görən kimi,
Mənimçün fərqi yox
ot ilə ətin...
2008
ANA
Andım canıma qalıb –
and içirəm canıma,
Əlimə çiçək alıb,
molla salıb yanıma,
üç-dörd ağbirçək alıb
anamın qəbri üstə
getmirəm illər boyu...
İstəsən söy, ya pislə,
istəsən gözümü oy!
Adıma töhmət bəzə,
min yol qına, getmirəm!
Üstündə ilan gəzən
o məkana getmirəm...
Orda nə var? Tozlu daş,
məni vur öldür, qardaş,
gedə bilmirəm, anla –
orda nə gəzir anam?!
Hər vaxt ayaqda hazır,
gəlişmə müntəzir,
gedişimə müntəzir
anam, uyuya bilməz,
anam orda nə gəzir?
Yerin altı sükunət –
anam yer üzündədir,
anam göy üzündədir,
anam quyuya girməz!
Onunku ev-eşikdi;
paltardı, dəyişəkdi…
Nə olsun, bağrım başı
param-parça, deşikdi –
Deşik canım beşikdi...
Necə bir zaman mənim
açıq alnımdan öpüb
sərin beşiyə qoydu,
mən də onu öfkəmdə
dərin beşiyə qoydum...
Anam gorda nə gəzir? –
anam məndədi, qardaş!
Anam mənim içimdə –
Həmən ifallı üzdə,
Həmən həlim biçimdə...
Həmən taxta eyvanda,
Həmən çiçəkli donda...
Hər gün onun qabarlı
Əllərini öpürəm,
Tarladan dən gətirən
yollarını öpürəm,
Dərddən ucu qıvrılan
tellərini öpürəm,
Mənə alqış eləyən
dillərini öpürəm...
Anam orda nə gəzir? –
Anam məndədi, qardaş!
Birinə əl tutanda
tərpənir anam orda.
Atamı unudanda
tərpənir anam orda...
Anam mənə deyir ki,
dönə-dönə deyir ki,
namərd üstünə gəlsə
qamətini düz saxla,
Küsdün adam kimi küs,
barışmağa üz saxla.
Mətləbi siftə demə,
son ayağa söz saxla.
Anam mənə deyir ki,
Bunu tut, onu tutma,
Qardaşını, bacını,
kəndini, kəsəyini
heç vaxt, oğul, unutma!
Anama dünya qurban,
Qoymur küsüm dünyadan!
Bətnimdədi, bətnimdə
Sümüyümdə, ətimdə...
Huşumdan nə söz çıxır
mən ondan soruşuram,
Nə zaman payız bitir,
hansı gündə yaz çıxır,
mən ondan soruşuram.
Ruzumu kəsmir bir an,
qızardır kökəmizi
anam təndir başında.
Sürüyür təkəmizi
Qəzil kəndir, başında...
Süddaş, dovğa bulayır
Pörtmüş kömür peçində
Anam mənim içimdə,
Mən anamın içində...
Şipşirin layla çalır,
Süd də verir arada –
Məni xoşbəxt yaradıb
Vallah, billah, yaradan!
Anamın hesabına
gəlmişəm bu yaşa mən...
Qoca yaşda nə təhər
ana deyib üz sürtüm
torpağa mən, daşa mən?
... orda nə gəzir anam?
gorda nə gəzir anam?
Anam həyat dəftəri,
anam bir xəzinədi,
anam bir dəfinədi!
Siz də onu mənim tək
QƏLBİNİZDƏ
dəfn edin!
Ana deyib çağırın
duranda, yatanda da,
Dinclik verməyin ona
yerin alt qatında da...
2008
Dostları ilə paylaş: |