321
SON
«XII-XV əsrlərdə Azərbaycan xalqının mənəvi mədəniyyəti»
adlı mövzunun etnoqrafik tədqiqat obyekti kimi seçilməsi XII-
XV əsrlər Azərbaycan xalqının mənəvi mədəniyyətinin öyrənil-
məsi baxımından əhəmiyyətlidir. Çünki, orta əsrlərin bu dövrü-
nün etnoqrafik cəhətdən araşdırılması Azərbaycan xalqının mənə-
vi mədəniyyətində baş verən dəyişiklikləri və dinamikanı
izləməyə imkan yaradır.
Araşdırdığımız XII-XV yüzillərdə Azərbaycan mədəniyyəti-
nin inkişaf xüsusiyyətlərini xarakterizə etsək, belə nəticəyə gəl-
mək olar ki, Azərbaycan mədəniyyəti ümumən yüksələn xətlə
inkişaf etmişdir. Baxmayaraq ki, monqol basqınları və talanları
mədəniyyətə də ağır zərbələr vurmuşdu. Bu, inkişafı şərtləndirən
əsas amillərdən biri Azərbaycanda “Atabəylər” və “Şirvanşahlar”
kimi möhkəm siyasi təsisatların yaranması, eləcə də Azərbay-
canın Hülakilər dövlətinin siyasi-inzibati mərkəzinə çevrilməsi ilə
bağlı idi. Bu siyasi təsisatların yaranması təsərrüfat-mədəni həya-
tın inkişafına təkan verməklə yanaşı, böyük dağıntılara səbəb
olan ara müharibələrinin aradan qaldırılmasına, şəhərlərin dirçəli-
şinə və yüksəlişinə səbəb oldu. Nəticədə Azərbaycan mədəniy-
yətinin hərtərəfli inkişafı üçün əlverişli şərait yaranmış oldu.
XII-XV əsrlərdə Azərbaycan mədəniyyətinin, o cümlədən də
mənəvi mədəniyyətinin inkişafını şərtləndirən amillərdən biri də
Azərbaycanın böyük islam dünyasının tərkib hissəsi olmaqla
bərabər, yüksəlişdə olan islam mədəniyyətinin nailiyyətlərindən
yararlana bilməsində idi. İslam mədəniyyətinin təsiri ilə Azərbay-
can memarlığında, ədəbiyyatında, miniatür sənətində, musiqisin-
də, fəlsəfəsində və s. yeni ənənələr, cərəyanlar və janrlar yarandı.
İslam özü ilə bərabər yeni düşüncə tərzi, yeni mənəvi norma və
ideallar, yeni psixologiya, yeni ictimai təsisatlar, yeni davranış
modelləri və s. gətirdi.
XII-XV əsrlərdə Azərbaycan mədəniyyətini zənginləşdirən
amillərdən biri də Azərbaycan mədəniyyəti üçün qonşu və daha
uzaq ölkələrlə qarşılıqlı əlaqələrin əhəmiyyətli dərəcədə
322
genişlənməsi ilə bağlıdır. Bu, bir tərəfdən Azərbaycanın Şərqlə
Qərbi, Şimalla Cənubu birləşdirən mərkəzi ticarət yollarının
qovşağında yerləşməsi ilə bağlı idisə, digər tərəfdən Səlcuqlardan
başlayan və monqol-tatar basqınları ilə davam edən müxtəlif
xarakterli miqrasiyalar və yerdəyişmələr və onların gətirdikləri
yeniliklərlə də bağlı idi.
Araşdırdığımız dövrdə Azərbaycan mədəniyyətinin zənginlə-
şməsinə səbəb olan amillərdən biri də, ayrı-ayrı hökmdarların elm
və mədəniyyəti himayə etməsi ilə bağlı idi. Müxtəlif xarakterli
mədəniyyət nümunələrinin hökmdarlar tərəfindən dəyərləndiril-
məsi müəlliflərə stimullaşdırıcı təsir göstərərək, yeni daha yaxşı
əsərlərin meydana çıxmasını şərtləndirirdi. Digər tərəfdən yeni
təhsil müəssisələrinin açılması və onların saxlama xərclərinin
hökmdarlar tərəfindən çəkilməsi savadlı adamların sayının
artmasına səbəb olurdu.
Dövrün intellektuallarını daha yaxşı əsərlər yaratmağa sövq
edən amillərdən biri də, bu əsərlərə cəmiyyətdə tələbatın arması,
eyni zamanda xalq tərəfindən həmin əsərlərin dəyərləndirilməsi
və intellektuallara yüksək hörmət göstərməsi ilə bağlı idi.
Mədəniyyətin inkişafını şərtləndirən amillərdən biri də cə-
miyyətin elmi-mədəni yeniliklərə olan tələbatı ilə bağlı idi. Bir
tərəfdən ictimai-iqtisadi və hərbi sahədə yüksəliş birbaşa elmi
yeniliklərin tətbiqini tələb edirdi. Digər tərəfdən, cəmiyyət inkişaf
etdikcə, onların mədəni səviyyəsi yüksəldikcə, maddi və mənəvi
tələbatlarının ödənilməsi üçün yeni və daha keyfiyyətli məhsullar
tələb olunurdu.
Təqdim olunan monoqrafiyada XII-XV əsrlərə aid mənəvi
mədəniyyət məsələləri öz əksini tapmışdır. Burada təqdim olunan
geniş materiallarda xalqımızın çoxəsrlik mənəvi mədəniyyət
məsələləri tədqiqata cəlb olunaraq araşdırılmışdır. Bununla yana-
şı, tədqiqatda etnoqrafiya elminin nailiyyətlərinə də geniş yer
verilmiş, onun tədqiqat obyektinə daxil olan mühüm məsələlərin
əks olunduğu mənbələr araşdırılmışdır.
Dövrün bir sıra yenilikləri özünü müxtəlif sahələrdə büruzə
verirdi ki, bütün bunlar da tədqiqat boyunca araşdırılmışdır.
323
Problem məsələlər üzrə tədqiqatın gedişində nəticələr əsasən
aşağıdakılardan ibarətdir:
Təqdim olunan monoqrafiyada xalq bayramları ətraflı tədqi-
qata cəlb olunaraq XII-XV əsrlər mənbələri əsasında araşdırılır.
Burada Novruz bayramının, eləcə də Orucluq və Qurban bayram-
larının XII-XV əsrlərdə xalqımız tərəfindən necə keçirilməsi,
bayramda hansı ayin və adətlərdən istifadə olunması məsələləri
və s. tədqiqat işində öz əksini tapır. Ümumiyyətlə, qeyd etmək
lazımdır ki, bütün bayramlar, o cümlədən də tədqiqata cəlb olu-
nan bayramlar insanların mənəvi sərvətlərinin məişətdə təntənəli
şəkildə inikası olub, onların mənəvi tələbatlarının ödənməsi va-
sitələrindən biridir. Bu, bayramlar insanlarda xeyirxah duyğu-
ların, təmizlik, dostluq, əmin-amanlıq kimi ülvi hisslərin təntənə-
sini təmin edir. Eyni zamanda, xalq bayramları əsrlərin uzun
məsafəsini qət edərək zəmanəmizə qədər gəlib çatan müxtəlif
adətlərin icrasını zəruri etmişdir.
Mənəvi mədəniyyət elementlərindən biri kimi din insanların
həyatında mühüm yer tutur. Araşdırdığımız dövrdə islam dini
Azərbaycan cəmiyyətinin həyatında mühüm rol oynamaqla yana-
şı, demək olar ki, ictimai həyatın bütün sferalarına nüfuz edə bil-
mişdi. Hətta, əxlaq və hüquq normaları da dini prinsiplər əsasında
tənzimlənirdi. Şəriət qaydalarına əməl etmək birgəyaşayış və dav-
ranış normalarının meyarına çevrilmişdi. Təbii ki, islamın azər-
baycanlıların həyatında bu cür möhkəmlənməsi xalqın mədəniy-
yətində də dərin iz buraxmışdı. İslamın VIII yüzillikdən başlayan
mədəni yüksəliş dövrü XII-XIII əsrlərdə özünün daha yüksək
mərhələsinə qədəm qoymuşdu. Bu dövrlərdə bəşər mədəniyyəti-
nin inkişafında ön mövqelərə çıxmış islam mədəniyyətinin Azər-
baycan xalqının mədəni yüksəlişində də mühüm rol oynamışdır.
Ancaq özünün çiçəklənən dövrünü yaşayan Azərbaycan mədə-
niyyəti də öz növbəsində islam mədəniyyətinin zənginləşməsinə
çox dəyərli töhfələr vermişdi. XII-XV əsrlərdə Azərbaycanda dini
münasibətlərin etnoqrafik cəhətdən araşdırılmasında orta yüzillik-
lərdə islam aləmində, o cümlədən Azərbaycanda geniş yayılmış
dini cərəyanlardan biri ideya-nəzəri baxımdan zəngin, eləcə də
Dostları ilə paylaş: |