Yadında qalsın
Yüklə 2,8 Mb. Pdf görüntüsü
|
| Səkkizinci fəsil
Eşq – yəni Allahla tanışlıq, İmam Mehdinin (ə) razılığı Çox geçikmişdim. Hamıdan tez çatıb avtobusa lazım olan bayraqları və digər əşyaları təhvil almalıydım. Həmidlə cənubun əməliyyat bölgələrinə getmək qərarına gəlmişdik. Ancaq getməyə üç gün qalmış Həmidi ezamiyyətə göndərdilər və bizimlə gələ bilmədi. Çantamı götürüb motosikletin tərkində oturdum. Mənim tələsməyimə baxmayaraq, Həmid həmişə olduğu kimi, səbirlə sürürdü. Son zamanlar o, tək olanda da belə yavaş sürürdü. O qədər sakit sürürdü ki, dostları onun motosikletinə minməyib deyirdilər: “Sənin motosikletinə minsək, heç axşama da çatmarıq”. 181 Motosikletdə gedə-gedə müxtəlif növhələr oxuyurduq. Həmid məddahlıq edir, mən də adam olmayan yerlərə çatanda cənub səfərində əzbərlədiyim şeirlərdən deyirdim: Salam olsun sənə, ey Allah ətrinə boyanmış torpaq! Sən pak qədəmlərin toxunduğu məkansan, ey Şələmçə! Sən şəhidlər diyarısan, Kərbəlanın xoş ətrinə qərq olmusan... Biz işıqforun qırmızı işığında dayananda bəzi sürücülər keçib-gedirdilər. Həmid dedi: -Bu, yaxşı iş deyil! Bəziləri yol polisinin yoxluğundan istifadə edib qanunu tapdayırlar. Qanun hamı üçündür. Qanunun səhər-axşamı olmaz. Yüksək məmurdan tutmuş fəhləyə kimi hamı qanuna əməl etməlidir. -Bunların hamısı sivilizasiyaya qayıdır. Duruxub baxdığını görüb dedim: -Yəni mədəniyyət, ictimai əxlaq. Ailə qurmazdan qabaq TOEFL imtahanından bir az aşağı mərhələyə qədər ingilis dili kursuna getmişdim. Həmid ingilis lüğətlərini birlikdə çalışmağımızı istəyirdi. Məni yola salandan sonra “sivilizasiya” sözünün mənasını axtarmışdı. O gündən sonra nə zaman işıqforda dayansaydıq, mənə “sivilayzed xanım” deyirdi. 2015-ci ildə getdiyim Nur yolçuları səfəri mənimçün Həmidsiz getdiyim ən çətin səfər oldu. Bəxtimdən telefonum xarab olmuşdu. Zəng edəndə Həmidin səsini eşitsəm də, o məni eşitmirdi. Beş gün yalnız mesaj yazdım. Mənə yazmışdı: “Mənim Nasir Xosrovum hardadır görən?” O qədər çox səfərə gedirdim ki, bəzən mənə Nasir Xosrov və Marko Polo deyirdi. Qayıdan kimi ilk iş telefonumu alıb zarafatla onu tenbeh etməsi oldu. 182 -Sən bilmirsən mən bu beş gündə nələr çəkmişəm! Səsini eşidə bilməyəndə istəyirdim ki, başımı götürüb çöllərə qaçım. Bu sözləri deyəndə onun necə darıxdığını bütün vücudumla hiss edirdim. Bu halını görəndə bir az rahatlaşırdım ki, Allah səsimi eşidib, şəhadət istəyini onun ürəyindən çıxarıb. Mənə olan eşqini yanımda qalmasına yeganə səbəb kimi görürdüm. Öz-özümə deyirdim: “Həmid yanımdadır. Onun məndən sarı darıxmağından daha dəyərli bir şeyin ortaya çıxıb bizi ayıracağını güman etmirəm. Ən azından ayrılıq bu tezliklə baş tutmaz”. Evə çatanda dedi: “Sən şəhidlərin zəvvarısan. Çadranı evin içində çırp ki, evimiz şəhidlərin ətrinə qərq olsun”. Gəldiyim günün səhərisi bayram bazarlığına getdik. Həmidin sıxlıq olan yerlərdən, böyük ticarət mərkəzlərindən heç xoşu gəlmirdi. Hicaba yaxşı riayət olunmayan yerlərə getməyi də qətiyyən sevmirdi. Ancaq buna məcbur olanda təmiz gözləri yalnız yerə baxardı. Satıcı ilə qiymət üstündə heç vaxt çənə vurmazdı. “Niyə qiyməti aşağı salmırsan?” -deyə soruşanda cavab verirdi: “Qiymət üstə çənə vurmaq məkruhdur. Yaxşı olar ki, satıcının sözünə inanaq”. Onun nə vaxtsa çənə vurduğu yadıma gəlmir. Amma satıcının özü endirim təklif etsəydi, qəbul edirdi. Bazarda telefonuma zəng gəldi. Həmidə işarə verdim ki, üzbəüz dükandan özünə corab alsın. Ancaq getməyi ilə qayıtmağı bir oldu. Söhbəti bitirəndə soruşdum: -Nə oldu? Niyə tez qayıtdın? Corab almadın? Çiyinlərini çəkib dedi: -Satıcı xanımın geyimi çox da yaxşı deyildi. Yaxşı olar ki, sən gedib alasan. Corabı alıb çıxanda dedim: 183 -Əyyami Fatimiyyə də qurtarıb. İstəyirəm bayrama paxlava bişirim, özü də dadlı Qəzvin paxlavasından. Paxlavanı çox dadlı bişirirdim. Elə oradaca lazım olanları almağa getdik. İki gün ancaq paxlava bişirməklə məşğul oldum. Xəmir yaymaqdan qollarım ağrıyırdı. Həmid bişən paxlavalardan bir neçəsini elə sobanın qabında yeyirdi. Şirniyyatı çox sevirdi. Bişirdiyim tort və ya şirinçörəyin şəkəri az olanda uşaq kimi deyinirdi: “Deyəsən, çörək bişirmisən. Bu, şirniyyata oxşamır”. Sonra şirinçörəyə mürəbbə və ya bal yaxıb çayla içirdi. Bütün paxlava qablarına əl vurduğunu görəndə zarafata dedim: -Belə getsə, qonaqlara bir şey qalmayacaq. Səhərdən bəri iki sini paxlava yemisən. Bu qədər yesən, axırda səpəcəksən. Yeməyi burax, gəl, kömək elə. -Oldu! Gözüm üstə! Kömək etməyə başladı, amma iş görə-görə paxlava yeməkdən də qalmırdı. Sonrakı günlərdə də məndən gizli soyuducunu açıb paxlavalardan yeyirdi. Şirniyyat bişirməkdən fərqli olaraq, ev təmizliyində mənə çox kömək etdi. Pəncərələri silməkdən tutmuş çəkməcələrə qədər hər yeri təmizlədi. İşi bitən kimi yorğunluqdan divanda uzanıb gözlərini yumdu. Ona meyvə doğrayıb dedim: -Həmid can, həqiqətən, çox kömək etdin. Yorulmayasan! Gözlərini bir az aralayıb dedi: -“Yorulmayasan” demək yerinə de ki, Allah qüvvət versin! “Allah qüvvət versin” deyən kimi oturub dedi: 184 -Bir qadın həyat yoldaşı üçün hər şeyin ən yaxşısını diləməlidir. İndi isə “Allah qüvvət versin” demək yerinə, “Alllah səni şəhid etsin” de. Bir az sükut etdikdən sonra dedim: -Allah səni yüz ildən sonra şəhid etsin! 2015-ci ilin novruzunda hicri-şəmsi ili gecənin yarısı girirdi. Həmid həmin saatda yatmışdı. Mənə bayram hədiyyəsi olaraq, kənarları bəzəkli hicab almışdı. Özü də mənim Məşhəddən aldığım köynəyi geyinmişdi. Qonaqlıqların çoxunda onu geyinirdi. Səid xanımı və qızı Nərgizlə birgə il dəyişəndən bir neçə saat sonra bizə gəldilər ki, birlikdə qohumlara baş çəkməyə gedək. Həmid fürsət tapan kimi qardaşı qızı ilə oynayırdı. Onu çox sevirdi. Həmid çox az hallarda hansısa körpəni qucağına götürürdü. O deyirdi: -Uşaqlar o qədər balacadırlar ki, qucağıma götürəndə əzməkdən qorxuram. Ancaq Nərgizi hər görəndə qucağına götürürdü. Bu əlaqə qarşılıqlı idi. Nərgiz də Həmidi çox istəyirdi. Həmidlə atası bir-birinə çox bənzəsələr də, Nərgiz onları ayırd edə bilirdi. Həmidin qucağına gedəndə ayrılmaq istəmirdi. Həmid Nərgizi qucağına götürüb dedi: -Gözəlim, məni çağır, görüm. “Əmi” de görüm! Mən dedim: -Həmid, uşaqdan əl çək. Axı bir neçə aylıq uşaq necə danışsın?! Həmin gün bütün qohum-əqrəbanı ziyarət etdik. Bayramdan iki-üç gün sonra bekarçılıqdan darıxırdıq. Dedim: -Bütün qohum-əqrəbanı bir gündə ziyarət etməkdə böyük səhvə yol verdik. 185 Biz yaşda kiçik olduğumuzdan, adətə görə, böyüklər iki-üç gündən sonra bizə gələcəkdilər. Yavaş-yavaş qonaqlarımız gəlməyə başladı. Qonaqlara qulluq etmək, həmişə olduğu kimi, yenə də Həmidin işi idi. Gələn hər bir qonaqla oturub paxlava yeyirdi. Yenə paxlava yeyə bilsin deyə, qonaqlara ikinci dəfə paxlava gətirirdi. Tətil günlərinin birində Sünbülabada getdik. Həmid atasına kömək etmək üçün əlinə bel alıb bağa yollandı. Mən də evə getdim. Küçədə qonşulardan birinin xoruzu məni görüb arxamca düşdü. Qorxumdan cin vurmuş adam kimi qaçmağa başladım. Həmid səsimi eşidən kimi həyətə sarı qaçdı, elə bildi ki, pis bir hadisə baş verib. Çox nigaran qalmışdı. Məsələnin nə yerdə olduğunu anlayanda əlindəki beli divara söykəyib yerə oturdu, gülməkdən uğundu. Mən çox hirsləndim. Həyətdə o tərəf-bu tərəfə qaçırdım, xoruzsa əl çəkmək bilmirdi. Bir-iki saat Həmidlə küsülü qaldım. Ona dedim: -Sən məni xoruzun əlindən qurtarmadın. Həmid ağzını açıb bir söz demək isəyəndə gülməyi tuturdu. -Sən hərbçi yoldaşısan, hərbçi qızısan, özünün də qara kəmərin var. Yaxşı ki dalına düşən xoruz idi, ayı deyildi. Zarafat edib gülür, məni əsəbiləşdirmək istəyirdi. Nə zaman Sünbülabada gedirdimsə, Fatihə oxumaq üçün bibimlə birgə babamın qəbri üstə gedirdik. Babam, atamın iki yaşı olanda dünyasını dəyişsə də, qəbri üstə gedəndə qəlbimdə ona dərin məhəbbət hiss edirdim. Kəndin qəbiristanlığı böyük bir bağın ortasında yerləşirdi. Həmid təpənin başında oturub bizə əl yelləyirdi. Sünbülabaddan qayıdanda yolda Nəsrin xalam zəng vurub bizi şam yeməyinə dəvət etdi. Həmidin qohum evlərində başıaşağı və sakit olduğunu bilib xalama dedim: 186 “Xala can, zəhmət çəkmənizə razı deyildik, amma mümkünsə, ata-anamı da çağırın. Çünki sənin də, mənim yoldaşım sakit və azdanışan adamlardır. Atam gəlsin ki, ən azından arabir bir söz desin, ikisi də qulaq assın”. Həmidin xasiyyəti belə idi. Dostları ilə bir yerə yığışanda danışıb-gülər, zarafat edərdi. Ancaq qohumlarla bir yerə yığışanda bir küncə çəkilib ancaq qulaq asardı. Anamgillə birgə xalamgilə şam yeməyinə getdik. Şam süfrəsini yenicə yığışdırmışdıq ki, Həmidin telefonuna zəng gəldi. Salam verib, hal-əhval tutduqdan sonra rahat danışmaq üçün dəhlizə keçdi. Danışığı bir neçə dəqiqə çəkdi. Qayıdanda üzündə sevinc hiss olunurdu. Elə mətbəxdən başımın işarəsilə soruşdum ki, düzəldi? Təbəssüm edib, dodaqaltı dedi: “Çox şükür Allaha, düzəldi”. Neçə gün idi, icazə almağa çalışırdı, ancaq nədənsə alınmırdı. Keçən il olduğu kimi, bu il də birlikdə Nur yolçuları səfərində xidmətçi kimi cənuba getmək istəyirdi. Xalamgildən çıxan kimi soruşdum: -Nə oldu, Həmid? İcazə ala bildin? -Şəhid Hüseynpurun niyyətinə nəzir etdim ki, işimiz alınsın. Komandirimiz zəng vurub dedi ki, bir həftəlik gedə bilərsiz. -Bəs nə zaman çıxırıq? -Sən hazırlaş, günü sabah çıxaq. Aprelin yeddisi axşam saat onda Əhvaza çatdıq. Hacı Səbbağian demişdi ki, Həmid Meracüş-şühəda xidmətçisi olsun, mən də Şəhid Məsudian düşərgəsinin xidmətçilərinə köməkçi kimi gedim. Həmid məni düşərgəyə kimi apardı. Həmin bir neçə gündə hər gün danışsaq da, bir-birimizi görə bilmirdik. Üçüncü gün axşam saat 11-də zəng edib dedi: “İndi Meracüş-şühədaya 187 qayıdan yolun üstündəki Hüveyzə bölgəsindəyəm. Səni görməyə gəlirəm”. Sevindiyimdən qanad çalıb uçmağa qalmışdım. Termosdakı təzədəm çayı götürdüm, həzrət Zəhra (ə) hüseyniyyəsinin qapısından bir neçə metr aralıda oturub Həmidi gözləməyə başladım. Şəhid Məsudian düşərgəsinin özünəməxsus ab-havası var idi. Düşərgədə yerləşən hər zal bir vilayətə aid idi. Müharibə vaxtı onlardan yaralıları müalicə etmək üçün və yuyucuxana kimi istifadə edilirdi. Allah bilir, orada nə qədər döyüşçü ağır yaraların acısına dözmüş, şəhadətə qovuşmuşdu. Düşərgənin qarşısında uca bir təpə görünürdü. Təpədə çoxlu sayda yaşıl bayraqlar dalğalanırdı. Həmidin məsum baxışları üçün darıxmışdım. Tək istədiyim onun tezliklə yanımda əyləşməsi, yalnız və yalnız onun danışması və beləcə bir neçə günlük yorğunluğumu çıxarması idi. Gecə saat biri keçmişdi. Öz- özümə dedim ki, yəqin, keçən dəfəki kimi işi çıxıb, gələ bilməyib. Termosu götürüb otağa yola düşdüm. Bir neçə addım gedəndən sonra asfalta sürtünən çəkələklərin səsini eşitdim. Hələ baxmamış bildim ki, Həmiddir. Yorğun olanda başmaqlarını yerə sürtə-sürtə gedirdi. Üzümü döndərən kimi onu gördüm. Qəşəng xidmətçi paltarındaydı, başında İmad Müğniyənin qoyduğu yaşıl papaqdan, əynində komandos şalvarı vardı, yorğundu, ancaq gülərüzlə gəlirdi. Həmidin gəlişi mənə elə enerji verdi ki, bütün düşərgəni səhərə qədər onunla gəzmək istəyirdim. O gecə bir saat birlikdə olduq və bütün bir saatı ancaq söhbət etdik. Növbəti dəfə Həmidi görmək üçün Meracüş- şühədaya getdim. Başı o qədər qarışmışdı ki, hətta mənim gəldiyimi belə anlamamışdı. Xidmətçi paltarı əynində 188 olanda yalnız şəhid ziyarətçilərinə xidmət barədə düşünürdü. Düşərgənin həyətində gözlədim ki, fürsət tapsa, bir neçə dəqiqə birlikdə danışaq. Ancaq bu əsnada düşərgənin mikrofonundan şəhidlərdən birinin həyat yoldaşının çıxış edəcəyini elan etdilər. Həmid o anda məni gördü, ancaq bir anın içində gözdən itdi. Məclisdən sonra bir anda yoxa çıxmasının səbəbini soruşanda dedi: “Ürəyisınıq şəhid yoldaşı danışan yerdə bir yerdə olmaq istəmədim”. *** Aprel ayı mənə ən sevimli və ən fərqli bir ay olmuşdu. Həmid bu ayın 24-də dünyaya gəlmişdi. Xudmani bir ad günü keçirdik. Səhər tezdən tort bişirməyə başladım. Həmidin dondurmanı hədsiz sevdiyini bilirdim. Buna görə də, təzə süd və vanildən çoxlu dondurma hazırladım. Gözləyirdim ki, Həmid gəlsin, birlikdə yemək yeyək. Hava yağışlı idi. Saat üçü keçsə də, Həmiddən xəbər yox idi. Öz-özümə fikirləşdim ki, yəqin, kiminsə işi düyünə düşüb, ona kömək edir. Qapının zəngini basanda həmişə olduğu kimi, qarşılamağa getdim. Üst-başını görəndə gözlərimə inana bilmədim. Başdan-ayağa toz-torpaq içində idi. Anladım ki, qəza törədib. Şalvarının dizləri cırılmışdı. Gödəkçəsinin arxasında asfaltın izi qalmışdı. Dözməyib halsızlaşdım, elə oradaca, qapının ağzında yerə oturdum. Həmidi bu halda görməyə taqətim yox idi. Mənə ürək-dirək verib dedi: -Narahat olma, inan, heç nə olmayıb. Bax, özüm öz ayağımla gəlmişəm evə. Hər şey yaxşı qurtardı. Nə qədər desə də, inanmırdım. Nə baş verdiyini anlamaq üçün sorğu-suala tutdum. 189 -Harda qəza törətdin, Həmid? Düzünü de görüm, nə baş verib? Gərək xəstəxanaya gedək, səni başdan-ayağa rentgenə salmaq lazımdır. Həmid suyu başına çəkə-çəkə dedi: -Meysəm və Nəbiyullahla birgə motosikletlə gəlirdik. Birdən Qiyasabadın ortasında bizi bir maşın vurdu. Üçümüz də yerə yıxıldıq. Bəxtim gətirdi ki, kaska taxmışdım. Həmidin yaraları çox da dərin deyildi. Hadisəni bütün xırdalığına kimi danışdı. Harda yerə yıxıldılar, dostları necədirlər və s. Bu kimi şeyləri heç vaxt gizlətməzdi. Mən də ancaq danlayıb deyirdim: “Maşının sürücüsü niyə elə sürürdü? Fikri hardaydı?..” Sonra da tez gedib üzərlik yandırdım. Mənim üzərlik yandırmağımın özü bir müsibət olmuşdu. Hər evdən çıxanda üzərliyi götürüb Həmidin başına fırladırdım. Həmid də üzərliyi alıb qoltuğunun altına, belinə, ayaqlarının arasına fırladaraq gülürdü. Hətta paltarını yuxarı çəkib, üzərliyi qarnının üstünə qoyur, deyirdi: “Paxılın gözü çıxsın!” Bu, Həmidin ilk qəzası deyildi. Bundan öncə də, dəfələrlə o vəziyyətdə gəlmişdi. Ancaq hər dəfə onu qan içində, paltarları cırıq halda görəndə əl-ayağım əsirdi və heç bir iş görə bilmirdim. Ələlxüsus da bir dəfə Sünbülabaddan qayıdanda motosikleti yolda nissan markalı maşına çırpılmışdı. Qəza o qədər şiddətli olmuşdu ki, Həmid motosikletlə yolun ortasına düşmüşdü. Ələmut magistralının hər iki tərəfi təhlükəli uçurumlardan ibarət idi. Bəxti gətirib yolun ortasına çırpılmışdı. Onda da bu vəziyyətdə idi və evə gec gəlmişdi. Paltarları cırılmışdı, əl- ayağı qan içində idi. Onun bu hadisələri məni daha da əsəbiləşdirirdi. Düşünürdüm ki, ona qarşı həssaslığımı 190 bildiyi halda niyə diqqətli olmur? Bu fikirlə onunla dalaşmağa başladım. -Axı gündüzü qoyub niyə gecə yola çıxdın? Niyə diqqətli olmursan axı? Gərək motosikleti ataq getsin, bir daha sürməyəsən. Bu qəzalardan o qədər görmüşdüm ki, artıq gözüm qorxurdu. O qədər həssas olmuşdum ki, məni sakitləşdirəcək bir adama çox ehtiyacım var idi. Həmid cırılmış, qanlı paltarlarını dəyişib axşama qədər yatdı. Ancaq gecə belindən güclü ağrı tutdu. Ağrının şiddətindən gözlərini yuma bilmirdi. Səhərə qədər ayaqlarını suya qoydum, alnına yaş parça sərdim, başının üstə Quran oxudum. Tibbi yardımları öyrəndiyimdən serum qoşmaq kimi bəzi işləri özüm görürdüm. Səhərə qədər başının üstündə oyaq qaldığımı görüb dedi: -Mən ana məhəbbəti eşitmişdim, ancaq həyat yoldaşı məhəbbətini eşitməmişdim. Buna öz gözlərimlə şahid oldum. Əgər nə vaxtsa mehribanlıq yarışı keçirilsə, əminəm ki, birinci yeri tutarsan. Səhər tezdən hazırlaşıb xəstəxanaya getdik. Rentgen çəkəndən sonra anladıq ki, bel diskində yırtıq əmələ gəlib. Həkim on gün istirahət etməsini məsləhət gördü. İstirahətin birinci günündə hamı məsələni öyrəndi. Hər yerdən qonaq gəlirdi. Ev bir an belə boşalmırdı. Dost, qohum, qonşu, əza dəstəsi və məscid əhli, idman yoldaşları, bir sözlə, hamı gəlirdi. Öz-özümə dedim ki, yüngülcə qəza keçirib, bu qədər gələn-gedəni var. Əgər Allah eləməmiş, yaralansa, mən gərək Qəzvinin yarısını qonaq qarşılayıb yola salım. Bu müddət ərzində “xoş gəldiniz” deyib xidmət göstərmək üçün həmişə ayaq üstəydim. Qonaq o qədər çox idi ki, gecələr yorğunluqdan Həmiddən tez yatırdım. 191 Beli ağrıdığına görə ev işlərinə kömək edə bilmirdi. Ancaq məni işlərimlə baş-başa da buraxmırdı. Mətbəxdə oturub mənə Hafizin şeirlərindən, Sədinin dastanlarından oxuyurdu. Məni yorğun görəndə deyirdi: “Səni and verirəm Xanım Zəhraya (ə), məni bağışla, sənə kömək edə bilmirəm. Bu günlərdə çox əziyyət çəkdin. On gün istirahətdən sonra gərək bir neçə gün icazə alım, sənə xidmət edim. Bir az da mən işləyim, sən istirahət edəsən”. Bəzi işlər onun üçün adətə çevrilmişdi, ən çətin anlarda belə, əməl edirdi. Qürub çağından sonra suyu mütləq oturub içirdi. Deyirdi: “İmam Sadiqdən (ə) nəql olunub ki, qürubdan sonra kim suyu oturub içsə, ruzisi çoxalar”. Bu on gün ərzində əlamətdar günlərdən biri də Xanım Zəhranın (ə) mövludu və Qadınlar bayramı idi. Vəziyyətinə görə, mənə hədiyyə almasını ağlımdan belə keçirmirdim. Korpusda xanımlar üçün proqram təşkil olunmuşdu. Həmidin israrıyla orada iştirak etdim. Evə tez qayıtmaq üçün səhər tezdən məclisə getdim. Məclis boyu bütün fikrim-zikrim Həmiddə qalmışdı. Evə qayıdanda başımdan tüstü çıxdı; o halda gedib mənə gül dəstəsi və hədiyyə almışdı. Bu mənə həyatım boyu verilən ən gözəl Qadınlar günü hədiyyəsi idi. Maddi dəyərinə görə deyil, gözlənilməz olduğuna, məni qafil haqladığına görə çox dəyərli idi. Onun belə bir vəziyyətdə və bazarın ən sıx vaxtında pilləkəndən düşüb mənə hədiyyə alacağını ağlımın ucundan belə keçirməmişdim. Həmin gün mənə dedi: “Belim çox ağrıyırdı deyə, anama və qayınanama bir şey ala bilmədim. Onların zəhmətini sən çəkərsən”. Həmid hər il belə edərdi. Xanım Zəhranın (ə) doğum günündə, həm mənə, həm də analarımıza hədiyyə alardı. Anaya qarşı çox həssas idi. Ananın razılığı, hətta bir təbəssümü onun üçün dünyaya dəyərdi. Anasını görəndə 192 əyilib alnından öpərdi. Bu adətini heç vaxt tərk etmədi. Həmin on gün ərzində anası nə zaman zəng vurub halını soruşurdusa, üzü gülürdü, uzanmış olsaydı, cəld oturardı, oturmuş olsaydı, ayağa durardı. Onun bu rəftarları mənə çox qəribə gəlirdi. Ona dedim: -Həmid can! Axı anan sənin oturduğunu, ya da uzandığını görmür. Elə uzandığın yerdə, istirahət edə-edə də danışa bilərsən. -Düzdür, anam yanımda deyil, məni görmür, bəs Allah necə? Allah yanımdadır və məni görür. Şəban ayının üçü, İmam Hüseynin (ə) mövludu və Pasdar günü idi. Həmid dedi: “Bəlkə İmamzadə Hüseynə gedək? Briqada hərbçilərinə ətir almaq istəyirəm. Elə namazı da orda qılıb, qayıdarıq”. İmamzadənin mağazasına çatanda bir neçə ətrə baxdıq. Yetmiş ədəd ətir almaq istəyirdi. Axırda birini bəyəndi. Başqa bir ətri də mən alıb dedim: “Ağa can, Pasdar günü münasibətilə bu da məndən sənə hədiyyə olsun”. İki gün ancaq mənim aldığım ətri vurdu. İki gündən sonra gördüm ki, ətir yoxa çıxıb. Bir neçə dəfə soruşsam da, hər dəfəsində söhbətdən qaçırdı. Öz-özümə dedim ki, yəqin xoşu gəlməyib, amma deməyə utanır. Bir dəfə də onu sual yağışına tutandan sonra məcbur qalıb dedi: “Əsgərlərdən birinin xoşu gəldi, mən də dura bilmədim, ona verdim”. Həmid bir gün işdən birbaş idman zalına getmişdi. Evə çatanda o qədər yorğun idi ki, saat on olmamış yatdı. Yarım saatdan sonra telefonuna zəng gəldi. İş yerindən idi. Bilmirdim ki, onu oyadım, ya yox. Axırda bəlkə mühüm iş olduğunu düşünüb oyatdım. Telefonla danışanda bildim ki, onu iş yerinə çağırırlar. Tez hazırlaşdı. Sağollaşanda dedim: “Nə vaxt 193 qayıdarsan?” Dedi: “Məlum deyil”. Gecə saat on ikiyə kimi gözlədim, gəlib çıxmadı. Yavaş-yavaş yuxuya daldım. Gecə saat ikidə oyandım. Hələ qayıtmamışdı. Narahat olmağa başladım. Telefona baxdım. Belə bir mesaj yazmışdı: “Xanım, mən Bəndər-Abbasa gedirəm. Nə vaxt qayıdacağım bəlli deyil. Özündən muğayat ol!” Çox təəccüb etdim. Özüylə bir şey aparmamışdı; nə paltar, nə də başqa bir şey. Adətən, ezamiyyətə gedəndə öncədən xəbər verirdi və mən lazım olan əşyaları bir çantaya yığırdım. Çox qorxdum. Tez televizoru açdım ki, görüm, Bəndər-Abbasda bir hadisə baş verib, ya yox. Altyazı xəbərlərində orada təlim keçirildiyi yazılmışdı. Bir az rahatlaşdım, düşündüm ki, yəqin, bir neçə günlük təlimlərdir, iştirak edib, qayıdacaq. Ancaq yenə də həyəcanlı idim. Dözə bilməyib, zəng vurdum. Avtobusda idi. İş yoldaşlarının gülmək səsi gəlirdi. Dedim: -Həmid, niyə belə xəbərsiz getdin? Gecənin yarısı Bəndər-Abbasa getmək hardan çıxdı? Özünlə heç nə aparmamısan. Daha artıq izah etmək istəmirdi, ya da edə blmirdi. Dedi: -Burda bizə hər şey verirlər, xanım! Sən yat, səhər də gedərsən atangilə. Bütün bədənimi qəribə həyəcan bürümüşdü. Səhərə qədər neçə dəfə yuxudan oyandığımı unutmuşam. Günəş çıxan kimi universitetə getdim. Günortaya qədər dərsim var idi. Mən dərsdə olanda atam zəng vurdu. -Həmid Sərdəştə gedib, sən də gəl bizim yanımıza. Telefonda donub qaldım. -Sərdəşt? Axı mənə Bəndər-Abbas dedi. 194 Atam bildi ki, Həmid nigaran qalmamağım üçün həqiqəti gizlədib. Dedi: -Sərdəştə gediblər, amma nigaran qalma, heç nə olmayıb, tez qayıdacaqlar. Atamın bu sözlərindən sonra narahatlığım daha da çoxaldı. Evə gələndə gördüm ki, ağlamaqdan anamın gözləri qıpqırmızı olub. Ürəyim əsdi və daha çox qorxmağa başladım. Dedim: -Nəsə olub, məndən gizlədirsiz? Atam dedi: -Yox, qızım, narahat olma. Sadəcə, bir neçə günlük ezamiyyətdir. İnşallah, sağ-salamat qayıdar. Anam başımı qarışdırmaqdan ötrü bazara getməyimizi təklif etdi. Alış-veriş boyunca bütün fikrim Həmiddə qalmışdı. Nə aldığımı, hara getdiyimi bilmədim. Anamla bazarı gəzdiyimiz yerdə atam zəng vurdu. -Qızım, muştuluğumu verərsən, Həmid qayıdıb. Tez gəlin evə! Doğru-düzgün alış-veriş etmədən tez taksiyə minib evə yollandıq. Həmidi görən kimi rahat nəfəs aldım. Narahat halda, divanda oturmuşdu. Mən də zarafata dedim: -Bəndər-Abbasdan girib Sərdəştdən çıxırsan! Sonra da bir günün içində qayıdırsan. Heç bilirsən nə edirsən, ağa?! Atam gülüb dedi: -Heç biri deyildi; nə Bəndər-Abbas, nə də Sərdəşt. Samirraya getmək istəyirdilər, uçuşları ləğv olundu. Bu da təbii haldır. Düşmən uçuşdan xəbər tutub vurmasın deyə, belə gecikmələr olur. Bu xəbəri eşitmək mənə çox ağır idi. Çox narahat oldum. -Həmid, sənin getdiyin heç bir ezamiyyətə qarşı çıxmamışam. Məgər xarici bir ölkəyə getməni 195 bilməməliyəm?! Mən gözləyirdim ki, ikigünlük təlimin bitər, evə qayıdarsan. Ancaq sən Samirraya getmək istəyirmişsən, özü də bir neçə aylıq. Məgər hara getdiyini bilmək mənim haqqım deyil?! Uçuşun ləğv olunduğuna görə o qədər narahat idi ki, ağzını açıb bir kəlmə də danışmırdı. Ancaq mən ürəyimdə sevinirdim. Motosikletə minəndə belə bir kəlmə də danışmadı. Bir neçə gün halı yaxşı deyildi. Ölkədaxili ezamiyyətlərə çox gedirdi; birgünlük ezamiyyətdən tutmuş ongünlüyə qədər. Narahat olmasınlar deyə, çox vaxt valideynlərinə demirdi. Ancaq ilk dəfə idi ki, uzunmüddətli xarici ezamiyyət barədə bu qədər ciddi söhbət gedirdi. Özü İraqı seçmişdi. İstəyirdi ki, Samirrada İmam Mehdinin (ə) atasının hərəminin müdafiəçisi olsun. *** Ev tikmək üçün bir qədər pul yığmışdıq. Həmid israrla deyirdi ki, bankda öz adıma hesab açdırım, pulları orada saxlayım. Bir gün səhər yeməyi yeyəndə dedi: -Bu gün işə gec gedəcəm. Birlikdə banka gedək, sənə hesab açaq və pulları ora köçürək. Birdən başıma bir iş gələr, pullar sənin hesabında qalsa, yaxşıdır. Razı olmayıb dedim: -Necə yəni başıma bir iş gələr?! Mən o işin baş verməməsi üçün deyirəm ki, gedək, pulları sənin hesabına yatıraq. Yenə israr edincə küsdüm. Tərslik etdim ki, bir də bu sözləri dilinə gətirməsin. Sonra pulları öz hesabına yatırmağa razı oldu. Səhər tezdən banka hesab açmağa getdi. Bütün bank kartlarının, hətta telefonunun koduna da mənim şəxsiyyət vəsiqəmin seriya nömrəsini qoymuşdu. Mayın ortalarında Suriyadan çox pis xəbər gəldi. Həmidin əvvəlki komandiri Həmid Məhəmmədrzayi 196 ezamiyyətdə idi. Ezamiyyət müddəti bitsə də, hələ ondan xəbər çıxmamışdı; şəhid olması və ya əsir düşməsi barədə heç bir məlumat yox idi. Bu vəziyyət həm ailəsi, həm də Həmid üçün çox ağır idi. Həmid Məhəmmədrzayinin yoldaşını nişanlı vaxtımda müqəddəs müdafiə barədə sərgidə görmüşdüm. O, atamın iş yoldaşı olduğuna görə həyat yoldaşı ilə bir-birimizi yaxşı tanıyırdıq. Yoldaşı o vaxt məndən soruşmuşdu: “Nişanlının adı nədir?” Mən “Həmid” deyəndə belə demişdi: “Nə maraqlı! Mənim də yoldaşımın adı Həmiddir. Mən Həmidi çox sevirəm. O özü də çox sevimlidir”. Bu kimi aşiqanə sözləri mənim kimi yeni evlənmiş birisinin dilindən eşitmək çox da qəribə olmazdı. Ancaq illərlə evli olan, yoldaşıyla illərlə ömür yaşamış üç uşaq anasının dilindən eşitmək mənə qəribə gəlmişdi. Nə gözəl olardı ki, bütün ailələr illərdən sonra da bir-birini bu şəkildə sevib-sevilərdilər! Həmid bu xəbəri eşitdiyi gündən narahat idi. Məhəmmədrzayidən bir xəbər alması üçün bütün iş yoldaşları ilə birlikdə Yasin surəsini xətm etməyi nəzərdə tutmuşdu. Evə gələndə Yasin surəsini oxuyacağını demiş hər kəsə bir-bir mesaj yazır, günbatana qədər oxumalı olduqlarını yada salırdı. Yasin surəsinin 9-cu ayəsini çox oxuyardı ki, Məhəmmədrzayinin özü, ya da pak cəsədi İŞİD-in əlinə keçməsin. Məhəmmədrzayinin bir qardaşı da müqəddəs müdafiədə itkin düşmüşdü. Bu baxımdan, bu itkinlik bütün əzizləri üçün həqiqətən, çox çətin idi. *** Hər il olduğu kimi, builki ramazan ayında da müntəzəm olaraq, kitab oxumağa başlamışdıq. Mənim axırıncı semestr imtahanlarım ramazan ayından dərhal sonra başlayırdı. Birinci imtahan gecəsi Həmidə dedim: 197 “Əzizim, bu axşama yemək bişirmək sənlikdir. Gör nə edirsən! Sən bişirənə qədər mən bir neçə səhifə dərs oxuyaram”. Bunu deyib, yemək bişənə qədər acqarına dərs oxumağa başladım. Bir saat keçdi, iki saat keçdi, ancaq yeməkdən xəbər olmadı. Mətbəxə keçəndə gördüm ki, kartofları sanki xətkeşlə doğrayıb qızartmağa başlayıb. Ancaq qazın şöləsi o qədər az idi ki, tavanın özü güclə qızırdı. Dedim: -Həmid can, acından böyük bağırsağım kiçik bağırsağı yeməyə başlayıb. O qazın şöləsini artır. Sakit bir tonla dedi: -Əzizim, məni tələsdirmə. Gərək kartoflar yaxşı bişsin. -Həmid can, lazım olmadı. Bura qədər çəkdiyin ikisaatlıq zəhmətə görə minnətdaram. Get otur, özüm bişirərəm. İsrar etdi. -Ağlına belə gətirmə. Bu axşam yemək mənlikdir. Sən get, dərslərinlə məşğul ol, yemək 15 dəqiqəyə hazırdır. Həmidin on beş dəqiqəsi bir saat oldu. Otaqdan qışqırdım: -Yemək nə oldu, aşpaz? Acından əldən düşdüm, gözlərim heç nə görmür. O qədər etirazdan sonra nəhayət, kartoflar hazır oldu. Dedi: -Baş aşpazın yeməyi hazırdır. Gəl, gör nə bişirmişəm?! Kartof qızartması bişirmiş, üstünə yumurta vurmuşdu. Mətbəxə girəndə gördüm ki, artıq süfrə də hazırdır. Hər dəfə süfrəni düzəndə adətən, nəyisə unudurdu. Süfrəyə diqqətlə baxıb dedim: -Həmid, özün bilirsən ki, bu yemək nə ilə yaxşı yeyilir. Bəs niyə xiyar turşusu qoymamısan? 198 -Vay-vay! Gördün də, baş azpazı o qədər tələsdirdin ki, yadımdan çıxdı. Bu saat gətirirəm. Gülüb dedim: -Allah saxlamış, dörd saatdır yemək gözləyirəm. Yaxşı ki, restoran aşpazı olmamısan. Yoxsa, yeməyi gecə saat on ikiyə hazırlayardın. Sən otur, mən gətirərəm. Əlini çiynimə qoyub ayağa durmağıma imkan vermədi. O, xiyarı diqqətlə doğrayıb gətirənə qədər mən yeməyin yarsını yedim. *** İmtahanlarım bitən kimi şam yeməyinə atamgilə dəvət olunduq. Həmidin motosikleti çox çirklənmişdi. Bizim həyətdə də motosiklet yumağa yer yox idi. Motosikleti atamgildə yumaq üçün bir az tez yola düşdük. Evə çatanda pilləkənin ağzında dayanıb “ya Allah” deməyə başladı. Bununla ev adamlarına gəldiyini xəbər verirdi ki, əgər naməhrəm varsa, başını bağlaya bilsin. Motosikleti tək yumağa utanırdı. Mənə dedi: -Əzizim, gəl, yanımda dayan. Həmid bizdə həddən artıq həyalı idi. Atam dayısı olsa da, ona olduqca hörmət edirdi. Motosikleti yenicə yumuşduq ki, Həmidə zəng gəldi. Yenə işə çağırırdılar. İş o həddə çatmışdı ki, nə zaman işə çağırırdılarsa, halım pisləşirdi, təhlükənin olduğunu kilometrlərlə uzaqlıqdan hiss edirdim. Həmid hazırlaşıb getdi. Anama dedim: “Bu dəfə Suriyaya gedəcək. Mən əminəm”. Bir neçə saat keçdi. Gecə saat on radələrində evə qayıtdı. Çox narahat idi, özünə qapılmışdı. Arada atamla pıçıldaşırdı, elə danışırdılar ki, mən eşitməyim. Həmidə meyvə aparıb dedim: -Aranızda nə danışırsız elə? Suriyaya gedirsən? Atam gülüb dedi: 199 -Həmid can, mənim qızım düşündüyündən də ağıllıdır. Ondan bir şey gizlətmək mümkün deyil. Həmid başı ilə təsdiqləyib dedi: -Bəli, düz tapdın. Suriyaya gedəcəyik. Mənim bütün dostlarım getmək istəyirlər, ancaq püşkatmada adım çıxmadı. Təəccüblə dedim: -Məgər Suriyaya getmək üçün püşk atırlar? Atam dedi: -Könüllü getmək istəyənlərin sayı çox olduğundan hər dəfə bir qrup aparırlar. Həmid atamla danışmışdı ki, getməyinə kömək etsin. Deyirdi: -İndi qalmaq vaxtı deyil. Əgər qalsam, bir ömür həzrət Zəhra (ə) yanında xəcalətli olaram. Gedə bilmədiyi üçün o qədər narahat idi ki, hətta yanına yaxınlaşmağa belə cürət etmirdim. Bu kimi vəziyyətdə xəlvətə çəkilib tək qalmaq istəyini anlayışla qarşılayırdım. Televizora baxanda birdən anamın mətbəxdən qışqırıq səsi gəldi. Əlinə qaynar yağ tökülmüşdü. Yerimdən bir az gec qalxdım. Ciddi bir şey olmamışdı. Otağa qayıdanda Həmid həddən artıq narahat idi. Evimizə qayıdanda dəfələrlə dedi: “Axı niyə ananın köməyə ehtiyacı olanda yerindən gec qalxdın? Mətbəxə gec getməyin çox pis iş idi. Əgər bir qadının köməyə ehtiyacı varsa, gərək tez qaçasan. Üstəlik, sənin anan idi. Gərək bir saniyə belə itirməzdin”. 2015-ci ilin oktyabr ayında nənəm xəstələndi. Həmidlə birlikdə ziyarətinə getdik. Halı çox pis idi. Çox narahat olmuşdum. Nənəmi ziyarət edəndən sonra bibimgilə getdik. Otağa girib doyunca ağladım. Həmid gəlib dedi: 200 -Əzizim, olar ağlamayasan? Sən ağlayanda anamı qəhər boğur. Mən sizin heç birinizin ağlamağına dözə bilmirəm. Əlimdə deyildi, ağlamaya bilmirdim. Həmidin Suriyaya getmək məsələsi ortaya çıxdığı gündən daha kövrək olmuşdum. Həmid halımın dəyişdiyini görüb zarafata dedi: “Dur, gedək. Deyəsən, qan təzyiqin düşüb. Motosikletə minən kimi düzələcək”. Bibimi daha artıq narahat etmək istəmədiyimdən, tez çıxdıq. Həmid halımı yaxşılaşdırmaqdan ötrü yolda çoxlu qarğıdalı aldı. Biz evə çatanda ev sahibinin nəvələri qapının ağzında dayanmışdılar. Həmid qarğıdalıdan onlara da verdi. Həmişə əliaçıq idi. Onları görəndə əlində olanlardan verirdi. Evdə sup və ya əriştə aşı bişirəndə deyirdi ki, bir kasa ev yiyəsinə verək, bir kasa da hazırla, anama aparım. Əlimizdə olanın yarısını ev yiyəsinin nəvələrinə verib yuxarı qalxanda dedi: -Mən əməl dəftərimdən çox qorxuram. Ola bilsin, Allah bu məsum uşaqların duasını eşidib, bizi bağışladı. Bu hadisələrdən bir həftə keçməmiş televizordan Hacı Hüseyn Həmədaninin Suriyada şəhid olduğunu eşitdik. Həmid televizorun qabağında ağlamağa başladı. General Həmədanini çox yaxşı tanıyırdı. Bir neçə dəfə Tehranda keçirilən təlimlərdə görüşmüşdülər. Həsrətlə dedi: -Heyf o cür şəhiddən! Bizim ona ehtiyacımız var idi. Həmin gün bibim bizi nahara dəvət etmişdi. Göyərti təmizləyəndə ona dedim: -General Həmədani şəhid oldu. Həmid bu xəbəri eşidəndə çox ağladı. Həmid mənim sözlərimi eşidib qaşlarını çatdı. Demək istəyirdi ki, bu sözləri anama demə. Mən də çiynimi çəkdim. Anasının narahat olmasını istəmirdi. Buna görə də, otağa keçib bacısı uşaqlarıyla top oynamağa başladı. 201 Uşaqlardan çox Həmidin səsi gəlirdi. Artıq onlar da deyirdilər ki, kaş dayımız bizimlə qalaydı, top-top oynayaydıq. *** Suriyaya getmək üçün püşkatmada adı çıxanlar tez-tez təlimlərdə iştirak edirdilər. Həmin günlər dünya Həmidə zindan kimi gəlirdi, heç bir iş görməyə həvəsi yox idi. Bütün dostları getmiş, özü qalmışdı. Hərbçilərin uçuşu bir neçə dəfə təxirə salındı. Həmid evə gələn kimi dostlarının gedib-getməməsi barədə soruşurdum. O da gülə-gülə deyirdi: “Maraqlısı budur ki, hər gün səhər onlarla sağollaşır, sabahısı yenə iş yerində görüşürəm. Bəziləri deyirlər ki, daha evə getməyə üzümüz gəlmir. Hər gün səhər bizi göz yaşlarıyla yola salırlar, ancaq axşam yenə evə qayıdırıq”. Oktyabrın səkkizində evə narahat gəldi. -Nəhayət, getdilər və biz qaldıq. Onlar gedəndə atan çox ağladı. Hamısını bir-bir qucaqlayıb halallıq istədi. Sonra da Quranın altından keçirib yola saldı. Atam bu kimi məsələlərə qarşı çox həssas idi. Çox tez təsirə düşürdü. Bu səhnələr ona müqəddəs müdafiə dövrünü və şəhid yoldaşlarını xatırladırdı. Həmin günlərdə Üfüq kanalından hərəm müdafiəçilərinin həyat yoldaşlarının çıxışları yayımlanırdı. Atam Həmidə zəng vurub deyirdi: “Fərzanəni bu verilişə baxmağa qoyma”. Bir müddət evimizdə Üfüq kanalına baxmaq qadağan olundu. O günlər hamımıza çox çətin keçdi. Həmid deyirdi ki, bütün hərbi hissəni qəm-kədər bürüyüb. Özü də çox dözümsüz olmuşdu. Gecə namazlarındakı halı da dəyişmişdi. Nə zaman universitetdən gəlirdimsə, qapı arxasından dualarını eşidir, evə girəndə yaşlı gözləri ilə rastlaşırdım. Bir an belə qalmaq istəmirdi. 202 Bir az sonra Həmid Suriyaya gedən dostları ilə telefon əlaqəsi qurmağa başladı. Dostları zəng vurub oradakı vəziyyət barədə məlumat verirdilər. Həmid onların əhval- ruhiyyəsini gücləndirməyə çalışırdı. Telefonda da deyib- gülməkdən qalmırdılar. Meysəm deyirdi: “Sən gələnə qədər burda qalacam, səninlə görüşüb, sonra qayıdacam”. O, gedəndə də Həmidi qucaqlayıb demişdi: “Həmid, mənim iki oğlum var: biri Əbülfəz, digəri Abbas. Əgər Suriyadan qayıda bilsəm, heç, ancaq şəhid olsam, onlara doğru yolu göstərərsən”. Həmid evə gələndə deyirdi: “Suriyaya gedən dostlarımın xanımlarına zəng elə, hallarını soruş! De ki, bir şeyə ehtiyacları olsa, mütləq desinlər”. Bəzən Həmiddən xəbərsiz kompüter qarşısında oturub, kollektiv çəkdirdikləri şəkillərə baxırdım. Övladlarını qoyub Suriyaya gedənləri görəndə ürəyim yanırdı. Göz yaşları içində dua edir, Allaha belə deyirdim: “İlahi! Səni and verirəm Əhli-beytin haqqına! Həmidin övladı olan dostlarını sağ-salamat evlərinə qaytar!” O günlərdə heç ağlımdan belə keçməzdi ki, bir neçə həftədən sonra bu şəkillərə yenə baxacam, Həmidin yoxluğu üçün gecə- gündüz ağlayacam. |