Doğranarkən ətrafa formalin maddəsi səpələnib. Bu maddə toz şəklində
olduğundan küləkli havada böyük bir əraziyə yayılıb, hətta həyətlərə belə
tökülüb. Bunu görən işbazlar izi itirmək üçün əraziyə su buraxıblar.
Nəticədə həmin ərazini dəhşətli üfunət iyi bürüyüb. Yaxınlıqda yaşayanların
su quyuları sıradan çıxıb. Əməkdaşlarımız həmin ərazidə olub, sakinlərlə
söhbətləşdilər, hadisə yerinin şəkillərini çəkdilər. Orada işləyənlərsə, hətta
müxbirlərə pul təklif edərək gördüklərini qələmə almamalarını xahiş etdilər.
Sonradan qəsəbə sakinləri bildirdilər ki, bu günə kimi onların çağırışı ilə bir
neçə qəzetdən və televiziyadan buraya gələnlər olsa da, həmin şəxslərlə
görüşdükdən sonra hadisə barədə mətbuatda heç bir yazı işıq üzü görməyib.
Biz qərara aldıq ki, təcili reportaj hazırlayaq. Çünki müxbirlər hadisə
yerindən qayıdan kimi tanımadığımız şəxslər redaksiyaya zəng edərək
mənimlə görüşmək istədiklərini bildirmişdilər. Onların arasında D N-dən
olanlar da var idi. Zəng edənlərlə görüşü səhəri günə təyin etsəm də, reportaj
həmin gecə işıq üzü gördü. Səhər redaksiyanın telefonları susmaq bilmirdi.
Qəsəbə sakinləri bildirirdilər ki, səhər tezdən maddə tökülən ərazinin
torpağını maşınlara yığıb harasa aparır və yerinə başqa yerdən gətirilmiş
torpaq tökürlər. Onlar bizə təşəkkür edirdilər. Digər zəng vuranlarsa bizi
öldürəcəkləri ilə hədələyirdilər. Çünki quyruqlarını möhkəm tapdalamışdıq...
Nəticə əldə etdik. Lakin... Bu, jurnalist araşdırması üçün yetərli deyildi. Biz
həmin sexi işlədənlərin arxasında kimlər durduğunu, dəmir çənlərin hansı
yollarla əldə edildiyini, hansı ölkəyə satıldığını öyrənə bilmədik, suallar
cavabsız qaldı.
...Mənim tələblərim nədir, bildiniz. Güman edirəm ki, onlar sizin üçün
də maraqlı oldu.
Kriminal xəbərlər yazmaq istəyirsənsə, təşəbbüskar ol, təsviretmə və
tənqidi düşüncə qabiliyyətini artır, gərgin əməyə hazırlaş. Uğurlar olsun!
Bələdçi: kriminaldan yazırsansa...
Bələdçiləriniz Afaq Quliyeva, Esmira Cavadova, Könül Zərbəliyeva
bir fikirdə yekdildirlər: “Sensasiya xatirinə yazmaq olmaz”.
•
Faktı dönə-dönə dəqiqləşdirin. Rəsmi qurumların hər birində mətbuat xidməti
fəaliyyət göstərir. Çalışın aldığınız hər bir məlumatı əlaqədar orqanların mətbuat
xidmətləri ilə dəqiqləşdirəsiniz.
•
Təqsirsizlik prezumpsiyasını pozmayın. Bu o deməkdir ki, məhkəmə prosesini
qələmə alarkən bilməlisiniz ki, dəmir barmaqlıqlar arxasında oturan sadəcə
təqsirləndirilən şəxsdir. Hökm çıxarılmamış onu “qatil”, “cinayətkar”, “dələduz”,
“vətən xaini” və s. kimi təqdim etmək olmaz.
•
Ailə sirri ilə bağlı məlumatları qəzet səhifəsinə çıxarmayın. Bu cür faktların
açıqlandığı məhkəmə prosesi qapalı keçirilir. Əgər qapalı məhkəmə prosesindən
məlumat alsanız belə, onu yazmaqda maraqlı olmayın. Əks halda, Cinayət
Məcəlləsinin 156-cı maddəsi ilə (şəxsi həyatın toxunulmazlığını pozma)
barənizdə cinayət işi qaldırıla bilər.
Mənbələri necə tapmalı?
•
Kriminal olaylar haqqında yazıların mənbələrini güc strukturlarında və
xəstəxanalarda axtarın. Hər hansı polis idarəsinin növbətçi hissəsində əyləşən
polis serjantı ilə elə ünsiyyət qura bilərsən ki, o, sənə çalışdığın müddətdə üzünü
belə görmədən yaxşı mənbə ola bilər. Yaxud da əksinə, hər hansı bir məlumatı
dəqiqləşdirmək üçün zəng etdiyin polis serjantına elə müraciət edərsən ki, o, sənə
kobud cavab verə bilər. Belədə nömrəni təkrar yığıb səni acılayan polis serjantına
öyüd-nəsihət verib, mətbuat haqqında qanundan sitat gətirməkdənsə, bir anlığa
fikirləş ki, təqsir məndədir, sualı gərək belə mənasız qoymayaydım.
Hadisə yerində nədən başlamalı?
•
“Filan küçədə çoxlu insan vardı, polis maşınları gəlmişdi” xəbərini eşidəndə
rəhbərlikdən tapşırıq gözləmək vaxt itirmək deməkdir. Diktofon, fotoaparat və
qələm-kağız götürüb tez redaksiyadan çıx. Hadisə yerinə özünü tez çatdır ki,
oradakı rəsmi şəxslərdən (məs. rayonun prokurorundan, polis rəisindən, sahə
müvəkkilindən) məlumat əldə edə biləsən. Prokurorun, polis rəisinin yalnız
“faktla bağlı araşdırma aparılır” kəlməsi də kifayət edir. Əsas odur ki, hadisəyə
rəsmi münasibət səslənsin.
•
Məmurlara həmkarlarınla birlikdə yaxınlaşmaq məsləhətdir. Belə ki, onlar tək-tək
yaxınlaşan jurnalistlərə cavab verməyə meylli olmurlar.
•
Fotoları unutma. Onlar yazını canlandıracaq. Bu zaman keyfiyyət dalınca qaçma,
çalış çeşidlər çox olsun.
•
Hadisə yerini tərk etməyə tələsmə. Polis rəisindən aldığın məlumatlarla
kifayətlənmə. Şahidləri unutma. Onlarda məlumat daha çox olur. Bu zaman
ehtiyatlı ol. Şahidlər gördüklərinə “duz qatmağı” sevirlər. Şahidlərlə söhbət
edərkən rəsmiyyəti bir kənara qoy, müstəntiq yox, jurnalist kimi soruş.
•
Hadisə yerindən məlumat topladıqdan sonra işin ikinci hissəsi başlanır. Əgər
hadisə zamanı odlu silahdan yaralanan varsa, bu, o, deməkdir ki, xəstəxanaya
getmək lazım gələcək. Xəstəxananın ünvanını dəqiqləşdirin. Əgər xəstə
reanimasiya şöbəsindədirsə, adətən yaralının qohumları şöbənin qarşısında
yığışırlar. Onlara yaxınlaş, söhbət et. Bu zaman rəsmi şəkildə sual verməyin yeri
yoxdur. Qadınlarla söhbət etmək kişilərlə söhbətdən daha asandır. Çünki onların
təsəlliyə və həmdərdə daha çox ehtiyacları var. Mətləbə birbaşa keçmə. nsanlara
təsəlli ver, həyan ol. Sonra həmsöhbətinin kim olduğunu araşdır: ailə üzvü, yoxsa
qohum.
•
Tibbi personalla danış. Xəstənin durumu, xəstəxanaya nə vaxt, necə daxil olması
barədə məlumat topla.
•
Reanimasiya şöbəsinə daxil olub şəkil çəkməyin sənin fərasətindən asılıdır. Bu
işdə şöbənin müdirinə bel bağlamağa dəyməz. Qəzet müxbirlərini, televiziya
müxbirlərindən fərqli olaraq, adətən şöbəyə buraxmırlar .
•
Materialları tam topladıqdan sonra indi yazını qələmə almaq olar. Bu zaman
yalnız faktları qələmə al. Fərziyyələrə yer vermə.
Dostları ilə paylaş: |