115
Hərbi nazir Mehmandarovun vəziyyət haqqındakı məlumatından və
mövqeyindən də çox şey asılı idi. Amma təcrübəli general bütün imkanlarından
istifadə etmişdi. Bakıda qalan cüzi bir qüvvə ilə 60 minlik düşmən ordusunun
qarşısını almaq olmazdı. Hərbi nazir açıqca elan etdi ki, onun ordusu müqavimət
göstərmək imkanına malik deyil.
«Sosialist» və «İttihad» partiyaları açıq şəkildə hökumətin sovetlərə
verilməsini müdafiə etdilər. «Əhrar» partiyası da bolşeviklərə etirazı olmadığını
söylədi.
Vəziyyət başqalaşmışdı. Yaxınlaşan təhlükə adamların möhkəmliyini
sarsıtmış, fikirlərini dəyişmişdi. Həmin matəm libasına bürünmüş Demokratik
hökumətin son iclasında yalnız o sərt mövqe tutdu. Hamı inandı ki, Məmməd
Əmin Rəsulzadə mübarizə yolundan dönmək fikrində deyil, əksinə, son nəfəsinə
kimi döyüşmək əzmindədir. Adamlar şahidi oldular ki, həyatını Azərbaycanın
istiqlaliyyəti yolunda qurban verməyə hazır olan hökumət başçısı təslim olmaq
istəmir. Həmin o məşum gündə, yurdunun düşmən həmləsinə məruz qaldığı
ərəfədə qorxmadan, çəkinmədən yaxınlaşmaqda olan bolşeviklərə nifrətini və
mövqeyini belə bildirdi:
«Əfəndilər, mötəcazir bir ultumatum qarşısında qalmışıq. Burada təslimdən
bəhs edirlər. Fəqət əfəndilər, təslim nə demək? ...Kimə tərki mövqe edirik?... Bizə
deyirlər ki, hüdudunuzu keçən ordunun başında Nicati adında bir türk komandanı
durmuşdur. Rusiyadan gələn bu mötəcaviz ordu təmin edirlər ki, həyat və məmat
müğadiləsində qalan Türkiyəni xilas üçün gedir.
Əfəndilər, Türkiyə Azərbaycanın xilaskarıdır. Amali milliyyətimizin təbcil
eylədiyi müqəddəs bir məmləkətdir. Onun xilasına gedən qüvvəti biz
məmnuniyyətlə istiqbal və teşyi edərik. Fəqət bir şərtlə ki, bu qüvvət bizim
hürriyyətimizi, istiqlalımızı çeynəməsin. Halbuki, əfəndilər, bizə sormadan
hüdudumuzu keçən hər hansı bir qüvvət, dostumuz deyil, düşmənimizdir!
Duyduğumuz bu propaqanda düşmən propaqandasıdır. Bizi iğfal ediyorlar.
Yalandır. Gələn ordu rus ordusudur. Fərzən komandanı bir türk olsa da yenə
rusdur. İstila ordusudur. Onun istədiyi 1914-cü il hüduduna qayıtmaqdır. Anadolu
imdadına gedəcək bəhanisiylə yurdumuza girən bu işğal ordusu buradan bir daha
çıxmaq istəməyəcəkdir. Qızıl Rusiya ilə anlaşmaq üçün hökuməti mütləq
bolşeviklərə təslim, ultumatumu qəbul etmək zillətinə qatlanmağa ehtiyac yoxdur.
Bu mötəcaziranə ultumatumu rədd etməliyik...
İstiqlalımızı göz bəbəyi kimi müdafiəyə qərar verən bir məclisə dinlədiyi bu
ultimatumu qəbul etmək, hökuməti öz əliylə dost kisvəsinə bürünmüş düşmənə
təslim etməkdir. Biz buraya millətin iradə və arzusuyla gəldik, bizi buradan yalnız
qüvvət və süngü çıxarmalıdır…
...Dediyin sözlər hamının ürəyindən idi. Adamlar yenə səni sevir, inanır,
arxanca da gəlməyə hazır idilər. Çünki görürdülər ki, başı bəlalı Vətənin yolunda
necə həlak edirsən özünü. Ondan qeyri bir idealın, səadətin yoxdur. Vətən istiqlalı
116
ilə yaşayıb nəfəs alırsan. Elə buna görə hamının məhəbbəti vardı sənə. Amma
dövran dəyişmişdi. Dəyişən şərait insanı çox şeyə məcbur edir...
Məmməd Əmin Rəsulzadə çıxışında açıqca bildirirdi ki, son nəfəsinə kimi
bolşeviklərlə vuruşmağa hazırdır, lakin o biri partiyaların imtina etdiyi şəraitdə
«müsavat» partiyası bu çətin vəzifənin məsuliyyətini üzərindən götürür.
İndi son ümid, vətəni bu bəladan qurtarmağın son çıxış yolu Azərbaycanlı
bolşeviklərin göndərdiyi ultimatuma qalırdı. Onlar göstərirdi ki, hakimiyyət ruslara
deyil, azərbaycanlı kommunistlərin ixtiyarına keçir. Bu məsələni dəqiqləşdirmək,
bolşeviklərlə görüşmək üçün bir «komissiya» yaradıldı. Bolşeviklər isə Behbud
bəy Cavanşirin mənzilində oturub cavab gözləyirdilər. Azərbaycanlı bolşeviklər
tez-tez Behbud bəyin evinin pəncərəsindən çölə boylanaraq «xoşbəxt» dəqiqələrin
başlanması intizarında idilər. Hamısının içərisindən qəribə sevinc hissləri keçirdi.
Onlara isə xalqın malını, sərvətini çapıb-talayıb Rusiyaya göndərdiklərinə görə
Lenin bir ötəri «pay» verəcəkdi. Yəni göndərdiyi təşəkkür məktubunun sonunda
yazacaqdı: «Kommunist salamı ilə». Bu «kommunist salamı» sözünü isə
azərbaycanlı bolşeviklər müqəddəs yerdən göndərilən quran kimi qarşılayacaqlar.
Başqa çıxış yolu qalmamışdı. Parlamentdə yaradılan «komissiya»
bolşeviklərlə görüşüb aşağıdakı şərtlərlə hakimiyyəti onlara v e r d i :
1. Rus ordusu Bakıya girmədən dəmir yolu ilə Anadolu imdadına gedəcək.
2. Azərbaycan istiqlal və təmamiyyəti-mülkiyyəsi hər növ, təərrüz və
qüyuddan məsun qalacaq.
3. Azərbaycan ordusu olduğu kimi qalıb inhilal etdirilməyəcək.
4. Azərbaycan firqəsi siyasiyyəsi-hürriyyət və sərbəstlərini mühafizə
edəcəklər.
5. Sabiq rical, əzayi-hökumət və məbusandan kimsə cürmisiyası ilə ittiham
edilməyəcək.
6. Kəmali-sərbəsti ilə toplanacaq Azərbaycan şuraları hökumətinin şəkli-
idarəsini təyin qılacaq idi.
..Sonradan bolşeviklər bu şərtlərin heç birinə əməl etmədilər.
XI ordu Bakıya girirdi. Yolda hərbi nazir Mehmandarovun göndərdiyi bir
teleqramı tutub saxladılar. Bu azad Azərbaycanın paytaxtı Bakıdan göndərilən son
hökumət teleqramı idi. Bu teleqram göndəriləndə hələ Bakı işğal olunmamışdı,
ümid işığı tam sönməmişdi.
Hərbi nazirin milli ordumuza son ümidini yaşadan t e l e q r a m :
«Hərbi sənəddir. Növbədən kənar. Birinci diviziyanın rəisinə. Gəncə.
Bolşeviklər Yalama stansiyasına hücum edib irəliləyirlər. Xudatı tutublar.
Vəziyyət gərgindir. Əmr edirəm: Elə bu gün Qızılburuna Qazaxdan bir, Gəncədən
də bir batalyon göndərin... Sabah batalyonların gələcəyini gözləyəcəyəm.
№ 1417. 1920-ci il, 27 aprel.
G E N E R A L MEHMANDAROV».
Dostları ilə paylaş: |