351
Açıqdır ürəyim on bir iqlimə,
Nə istər?
Aşmağa uca dağ istər.
Butun əsrlərdə,
Səyyarələrdə
Səninlə qolboyun yaşamaq istər.
SAÇLARI ŞƏLALƏSƏN
İnanmıram gözümə,
Sən gəlmisən bu axşam.
Mən öz səadətimə
Özüm heyran qalmışam.
Zərli libasında sən
Sanki qızıl laləsən.
Gözləri bir cüt ulduz
Saçları şəlaləsən.
Balaca bir otaqda
Sonsuz göylər açılmış.
Gecənin qucağında
Sanki səhər açılmış.
Yanan dodaqlarımda
Bir sərin piyaləsən.
Gözləri bir cüt ulduz
Saçları şəlaləsən.
QƏZƏL
Sən incə çiçəklərdəki jaləm kimi gəldin,
Bir qan bahası, bağçama laləm kimi gəldin.
352
XƏLİL RZA ULUTÜRK
SEÇİLMİŞ ƏSƏRLƏRİ
Aldın da ucaltdın məni əflakə özünlə,
Endikdə, müqəddəs, yeni aləm kimi gəldin.
Doldum nəfəsindən saçılan rayihələrlə,
Getdikdə apardın fərəhi, qəm kimi gəldin.
Şahlar mənə qibtəylə baxır, ən ulu şah mən,
Çün sən ulu göydən ulu töhfəm kimi gəldin.
“Bir qanlı gül ağzında və mey kasəsi əldə”,
Bir cənnət ikən, ömrə cəhənnəm kimi gəldin.
Bircə telinə gözlərimin nuru da qurban,
Eşqim, fərəhim, ah ilə naləm kimi gəldin.
Dünya bağı qarlı, mən üzülmüş qoca bağban,
Ruhunda qərənfil, mənə həmdəm kimi gəldin.
Qüdrət də, məhəbbət də, mətanət də özünsən,
Yığdın dağınıq gülləri, bir cəm kimi gəldin.
Verdin... alıb içdim meyi... könlüm dağa döndü.
Dağdan tökülən nurlu şəlaləm kimi gəldin.
Aləmlərə bildir ki, Xəlil heç zaman ölməz,
Çün ovcuma əfsunlu piyaləm kimi gəldin!
1983
SƏN EŞQ ÜÇÜN YARANMISAN
Səni gördüm, xumar oldum,
Sevgi, sevinc umar oldum.
Gözlərin dan ulduzudur,
Bəs niyə göz yumar oldun?
353
Nə yaxşı ki, sən bizləri
Bu gecəyarı... anmısan.
Sən eşq üçün yaranmısan,
Sən mənimçün yaranmısan.
Yarı açıq, yarı bağlı
Düyməcəsən, tər qönçəsən.
Gözüm tutdu, könlüm sevdi,
Ürəyimcə, könlümcəsən.
Hörüklərin şüaşüa,
Gülablanıb daranmısan.
Sən eşq üçün yaranmısan,
Sən mənimçün yaranmısan.
Yönün düşsə bizə sarı,
Qapımızı Günəş açar.
Sənə mənim əlim dəysə,
Gülüşlərin güllər saçar.
Mən gözəllik təşnəsiyəm,
Sən bulaqsan, duru susan.
Sən mənimçün doğulmusan,
Sən eşq üçün yaranmısan.
1965
GƏL, SƏNİ SƏSLƏYİRƏM
Gəl, səni səsləyirəm
Ən gözəl bir həyata.
Bircə evin içində
Bütöv bir kainata.
354
XƏLİL RZA ULUTÜRK
SEÇİLMİŞ ƏSƏRLƏRİ
Ömrüm – bir dəstə reyhan,
Oxşayıb ətrini çək.
Sənin nəfəsin dəysə,
Nə gül solar, nə çiçək.
Bircə qədəh şərbətlə
Sərinlər yanan nəfəs.
Sənin dodağın dəysə,
Heç bir bulaq tükənməz.
Gəl, səni səsləyirəm
Ağ üzlü bir səhərə.
Bircə evin içində
Hüdudsuz üfüqlərə.
1965
HİCRAN ÇAĞLARINDA
Hicran günlərində kəşf elədim mən
Dünyanın yeni bir səadətini.
Səni yad etməyin, səni anmağın
Köksümü göynədən xoş ləzzətini.
İşığı söndürüb girdim yatağa,
Gördüm başdanbaşa cahan işıqdır.
Saçlar ağarmağa üz qoysa belə,
Könlüm südəmərdir, könlüm uşaqdır.
Gözüm çənəndəki kişmişi xalda,
Gözəldir gözündən gülümsəməyin.
İllah ki, dərdimdən “öldüyün” halda,
Başını bulayıb “yox, yox!” deməyin.
355
Dünyanın ən uca mərtəbəsində
Günəşə qərq olmuş qızıl otaqlar.
Hər şeyi: pərdəsi, pəncərəsi də
Sənin rayihəni canında saxlar.
Necə bəxtəvərdi o tül pərdələr,
Sənin əlin dəyir o pərdələrə.
Necə bəxtəvərdir o pəncərələr,
Sənin şölən düşür pəncərələrə.
Hər şeyin gözəldir. İllah ki, məni
Görəndə “yox!” deyə cilvələnməyin.
Gizli yan otağa qaçıb sevincək,
Ən gözəl donunu dərhal geyməyin.
1978
EŞQİM, VƏFADARIM MƏNİM
Sevincim, qəmxarım mənim,
Eşqim, vəfadarım mənim.
Bütün ömrüm, yarı canım,
Yarım mənim, yarım mənim.
Yarı böldük, ortaq olduq
Hər kədərə, hər sevincə.
Dərd azalar bölündükcə,
Sevinc artar bölündükcə.
Sevincim, qəmxarım mənim,
Eşqim, vəfadarım mənim.
Bütün ömrüm, yarı canım,
Yarım mənim, yarım mənim.
356
XƏLİL RZA ULUTÜRK
SEÇİLMİŞ ƏSƏRLƏRİ
Eşqimizin meyvəsidir
Şir balası – körpələrin.
Sən günəşli bir dənizsən,
Körpələrin – ləpələrin.
Sevincim, qəmxarım mənim,
Eşqim, vəfadarım mənim.
Bütün ömrüm, yarı canım,
Yarım mənim, yarım mənim.
1977
OCAQ MAHNISI
Üşüyürsən gülüm, sən,
Al, geyin pencəyimi.
İsinərsən indicə
Köksümdə canım kimi.
Quru çırpı yığmışam,
Ocaq indi yanacaq.
Bizim eşqimiz kimi
Ocaq alovlanacaq.
Bir bax, necə gurlayır
Şölə çəkir buxarı.
Alovu bəlkə qalxır
Ulduzlardan yuxarı.
Üşümürsən, deyəsən,
Ey odyanaq, gülnəfəs!
Sənə demədimmi bəs
Ev ocağı əzizdir,
Eşq ocağı müqəddəs.
1983