64
iyun, 26 iyun, 16 avqust, 3 oktyabr, 12 oktyabr, 14 oktyabr, 2 noyabr, 5 və 10 noyabr tarixlərində öz
iclaslarını keçirmişdi.
Yeni Konstitusiya layihəsinin hazırlanması üzrə Komissiyanın qərarı ilə layihə ümumxalq
müzakirəsi üçün 1995-ci il oktyabrın 15-də dərc edilmişdir. 1995-ci il noyabrın 4-dək olan vəziyyətə
görə layihə barədə Komissiyaya 2450 təklif daxil olmuşdu. Təkliflərin bir qismi Konstitusiya
layihəsinin 1995-ci il noyabrın 8-də keçirilən referendumdan bilavasitə əvvəl dərc edilmiş axırıncı
variantında nəzərə alınmışdı. Ümumxalq müzakirəsinə çıxarılan layihə 199 maddədən, referenduma
çıxarılan Konstitusiya layihəsi isə 158 maddədən ibarət idi.
Mərkəzi Seçki Komissiyasının referendum üzrə 20 noyabr 1995-ci il tarixli qərarına əsasən 4
milyona yaxın seçici korpusundan 12 noyabr 1995-ci il tarixli referendumda seçicilərin 86 faizi iştirak
etmişdi və səs verənlərin 94,8 faizi yeni Konstitusiyanın qəbulunun lehinə səs vermişdi.
Müstəqil Azərbaycanın ilk Konstitusiyası Azərbaycan Respublikasının dövlət quruculuğunun
əsaslarını qoymuşdur. Azərbaycan demokratik, hüquqi, dünyəvi bir dövlət kimi ilk dəfə olaraq insan
hüquqlarının prioritetini və hakimiyyətlər bölgüsünü özünün gələcək inkişaf yolu kimi seçmişdir.
Konstitusiyaya görə Azərbaycanda hakimiyyətin yeganə mənbəyi xalqdır. Azərbaycan xalqını yalnız
onun demokratik surətdə seçdiyi səlahiyyətli nümayəndələri təmsil edə bilər, digər heç kəsin Azərbaycan
xalqı adından danışmaq, onun adından müraciət etmək və xalqı təmsil etmək hüququ yoxdur.
Konstitusiya ilə müəyyən edilir ki, Azərbaycan xalqının heç bir hissəsi, sosial qrup, təşkilat və ya heç bir
şəxs hakimiyyətin həyata keçirilməsi səlahiyyətini mənimsəyə bilməz və hakimiyyətin mənimsənilməsi
xalqa qarşı ən ağır cinayətdir. Dövlətin əsaslarını müəyyən edərkən Konstitusiya ilk növbədə hər bir
demokratik dövlətin ayrılmaz atributları olan təsisatlara xüsusi yer ayırır. Söhbət insan və vətəndaş
hüquqlarının və azadlıqlarının dövlətin ali məqsədi olmasından, mülkiyyətin toxunulmazlığına təminat
verilməsindən, təbii ehtiyatların yalnız dövlətə mənsub olmasından, Azərbaycan Respublikası vətəndaş-
larının sosial müdafiəsinin dövlətin xüsusi diqqət mərkəzində olmasından, ailəyə və uşaqlara dövlət
tərəfindən qayğı göstərilməsindən və sair bu kimi məsələlərdən gedir. Dünyada çox az konstitusiya tapılar
ki, onun maddələrinin üçdə bir hissəsi insan hüquqlarına və onların təminatlarına həsr edilsin. Azərbaycan
Respublikası Konstitusiyasının 158 maddəsindən 48-i insan hüquq- larına həsr edilib.
Konstitusiyaya görə
insan və vətəndaş hüquqlarını və azadlıqlarını gözləmək və qorumaq qanunvericilik, icra və məhkəmə
hakimiyyətinin borcudur. İnsan və vətəndaş hüquqlarının və azadlıqlarının həyata keçirilməsini heç kəs
məhdudlaşdıra bilməz. Yalnız müharibə, hərbi vəziyyət və fövqəladə vəziyyət, habelə səfərbərlik elan
edilərkən insan və vətəndaş hüquqlarının və azadlıqlarının həyata keçirilməsi Azərbaycan
Respublikasının beynəlxalq öhdəliklərini nəzərə almaq şərti ilə qismən və müvəqqəti məhdudlaşdırıla
bilər. Həyata keçirilməsi məhdudlaşdırılan hüquq və azadlıqlar haqqında əhaliyə qabaqcadan məlumat
verilir.
Ənənəvi hakimiyyətlər bölgüsü konsepsiyasına uyğun olaraq Konstitusiya müəyyən edir ki, icra
hakimiyyəti Azərbaycan Respublikasının Prezidentinə mənsubdur, qanunvericilik hakimiyyətini
Azərbaycan Respublikasının Parlamenti - Azərbaycan Respublikasının Milli Məclisi, məhkəmə
hakimiyyətini isə müstəqil məhkəmələr həyata keçirirlər. Azərbaycan Respublikasının Prezidenti
təsisatının ikili hüquqi təbiəti vardır. Ali icra hakimiyyətinin ona mənsub olması ilə yanaşı, o, birinci
növbədə Azərbaycan dövlətinin başçısıdır və bu şəkildə bütün Azərbaycan xalqını bütövlükdə təmsil edir
və Azərbaycan xalqının vahidliyinin rəmzidir.
Azərbaycanın tarixində ilk dəfə olaraq Azərbaycan Respublikasının Konstitusiyası məhkəmələrin
müstəqilliyini təmin edən əsas prinsipləri özündə əks etdirmişdir. Konstitusiyaya görə hakimlər
müstəqildir, yalnız Azərbaycan Respublikasının Konstitusiyasına və qanunlarına tabedirlər və
səlahiyyətləri müddətində dəyişilməzdirlər. Hakimlər işlərə qərəzsiz, ədalətlə, tərəflərin hüquq
bərabərliyinə, faktlara əsasən və qanuna müvafiq baxırlar. Hər hansı bir şəxs tərəfindən və hər hansı bir
səbəbdən bilavasitə, yaxud dolayı yolla məhkəmə icraatına məhdudiyyət qoyulması, qanuna zidd təsir,
hədə və müdaxilə edilməsi yolverilməzdir. Ədalət mühakiməsi vətəndaşların qanun və məhkəmə
qarşısında bərabərliyi əsasında həyata keçirilir. Bütün məhkəmələrdə işlərin icraatı açıq aparılır. İşə
qapalı iclasda baxılmasına yalnız o halda icazə verilir ki, məhkəmə açıq icraatın dövlət, peşə və
kommersiya sirrinin açılmasına səbəb olacağını güman edir, ya da vətəndaşların şəxsi və ya ailə həyatının
məxfiliyini qorumaq zərurətinin mövcudluğunu müəyyən edir.
Qanunda nəzərdə tutulmuş hallar istisna olmaqla, cinayət işlərinin qiyabi məhkəmə icraatına yol
verilmir. Məhkəmə icraatı çəkişmə prinsipi əsasında həyata keçirilir. Məhkəmə icraatının istənilən
mərhələsində hər kəsin müdafiə hüququ təmin olunur. Ədalət mühakiməsi təqsirsizlik prezumpsiyasına
əsaslanır. Azərbaycan Respublikasında məhkəmə icraatı Azərbaycan Respublikasının dövlət dilində və ya
müvafiq yerin əhalisinin çoxluq təşkil edən hissəsinin dilində aparılır. İşin iştirakçısı olub məhkəmə