naqqallıq və qeybət edirlər. Meşşanlar özlərini
xeyirxah kimi qələmə verir, öz
lovğa nəsihətlərindən əl çəkmirlər, nahar süfrəsindəki hər şeyi tıxıb özlərini elə
göstərirlər ki, guya, bunlar tanınmış adamların tərbiyəsiz hərəkətlərindən narahat
olurlar, özləri də, guya, mötəbər cəmiyyətdə yaşayırlar və elə öz dairələrindən
olan qara yaxdıqları adamları yaxından tanıyır, elə onlar barədə də dedi-qodular
yaradırlar. Bilirsiniz, bizim ölkədə ağlına və başqa keyfiyyətlərinə görə bir adam
ki qabağa getdi, dərhal ağzıgöyçəklər başlayırlar onun barəsində dedi-qodulara.
Bəs özləri? Özlərini əxlaqlı kimi qələmə verənlər necə?
Bəs bu adamlar özlərini
necə aparırlar? Əzizim, yaddan çıxarmayın ki, biz riyakarlar ölkəsində yaşayırıq.
– Dorian, – Holvard səsini ucaltdı, – məsələ bunda deyil! Bilirəm, İngiltərə çox
pisdir və ingilis cəmiyyəti də doğru yolda deyil. Elə buna görə də istəyirəm ki, siz
bu cəmiyyətdən yüksəkdə durasınız. Amma siz yüksəkdə olmadınız. O adam ki
öz dostlarına pis təsir edir, pis nümunə göstərir, onu mühakimə etməyə bizim
haqqımız var. Görünür, sizin dostlarınız bütün şərəf və ləyaqətlərini itirmişlər,
tərbiyə, namus, əxlaq barədə anlayışlardan xəbərləri belə yoxdur. Siz onların
beynini ehtiras, şəhvət ləzzətləri ilə doldurmusunuz. Onlar
uçuruma
yuvarlanmışlar. Onları siz sürükləmisiniz oraya! Bəli, siz onları uçuruma
itələmisiniz, hələ bir heç nə olmayıbmış kimi gülürsünüz də! Mən daha dəhşətli
şeylər bilirəm! Bilirəm ki, siz və Henri ayrılmaz dostlarsınız. Heç olmasa, buna
görə siz gərək onun bacısının təmiz adına ləkə gətirməyəsiniz! Onun gülüş və
qeybət predmetinə çevrilib, dilə-dişə düşməyini rəva görməyəsiniz!
– Bazil, susun! Çox dərinə gedirsiniz!
– Mən bunları söyləməliyəm və siz də qulaq asmalısınız! Hə, hə, qulaq
asmalısınız mənə! Sizinlə tanışlığa qədər ledi Qvendolen haqqında heç bir söz-
söhbət gəzmirdi, heç kəs cürət edib bu qadın barəsində bir
kəlmə belə pis söz
danışmazdı. Bəs indi? Baxın görün, Londonda özünə hörmət edən bir qadın varmı
ki, onunla birgə parka gəzməyə çıxsın? Yox! Hətta onun uşaqlarına da onunla
yaşamağa icazə vermədilər! Bu, hələ harasıdır? Sizin haqqınızda hələ çox şey
danışırlar: sizi əxlaqsız pritonlardan səhərə yaxın xəlvəti-xəlvəti çıxan görüblər;
siz paltarlarınızı dəyişib Londonun ən mənfur küçələri ilə, gizli yollarla evinizə
gəlirsiniz... Doğrudanmı bütün bunlar həqiqətdir? Bunlar nə dərəcədə real ola
bilər? Mən birinci dəfə bunları eşidəndə bərk güldüm. Lakin indi... bu barədə tez-
tez eşidirəm və dəhşətə gəlirəm. Hələ sizin bağ evinizdə nələr baş verir? Dorian,
sizin barənizdə nələr deyirlər, bilirsiniz? Vallah, mən sizə moizə oxumuram, belə
fikirləşirsinizsə, özünüz bilərsiniz! Yadımdadır,
Harri deyirdi ki, özgəsinə öyüd-
nəsihət verməyi xoşlayan hər hansı bir adam belə bir vədlə başlayır: bu, birinci və
sonuncu olacaq. Lakin hər dəfə də öz vədinə xilaf çıxır. Bəli, mən sizə nəsihət
vermək istəyirəm. İstəyirəm ki, elə bir həyat sürəsiniz ki, sizə hörmət eləsinlər.
İstəyirəm ki, siz ləkəsiz olasınız, nüfuzunuza, adınıza xələl gəlməsin. Alçaq və
əclaf işlərdən uzaq olasınız! Çiyinlərinizi çəkməyin! Belə laqeyd-laqeyd də
baxmayın! Siz adamlara güclü təsir göstərirsiniz. Qoy bu, yaxşı mənada baş
versin!
Adamlara xeyir gətirsin, bəla yox! Danışırlar ki, siz adamlarla intim
münasibətdə olduqdan sonra onları yoluxdurur, pozur, pis yola çəkirsiniz. Həmin
adamın evinə daxil olub ona, onun evinə rüsvayçılıq gətirirsiniz. Bilmirəm bu
düzdür, ya yox. Haradan bilim axı? Amma hər halda, bunu sizin barənizdə
danışırlar.
Bundan başqa, sizin barənizdə danışılan bəzi şeylərə inanmaya da
bilmirəm. Lord Qlosester Oksfordda oxuyarkən mənim ən yaxın dostum idi. O,
mənə bir məktub göstərdi; bu məktubu ölümündən qabaq onun arvadı yazıbmış.
Arvadı Mentondakı villasında yalqız keçinibmiş. Bu, dəhşətli və qorxunc bir
etiraf idi; beləsini heç vaxt eşitməmişdim. O qadın sizi günahlandırırdı. Mən
dostuma dedim ki, bu, ola bilməz, yalandır! Mən Dorianı tanıyıram, o, belə
alçaqlıqlar eləməz! Amma... Mən doğrudanmı, sizi tanıyıram? Artıq bu sualları
öz-özümə verməyə başlamışam və bu suala da cavab tapmaq üçün mən sizin
qəlbinizə girməliyəm, görüm orada nə var!
– Qəlbimi görmək istəyirsiniz! – Dorian Qrey astaca pıçıldadı, dərhal ayağa
durdu; onun rəngi qorxudan ağarmışdı.
– Bəli, – Holvard
kədərlə dilləndi, səsində ağır təəssüf hissi duyuldu. – Sizin
qəlbinizi görmək istəyirəm! Amma bunu yalnız Allah bacarar!
Birdən Dorian acı-acı güldü.
– Elə bu gecə mənim qəlbimi siz də görəcəksiniz! – deyib qışqırdı, sonra cəld
stolun üstündəki lampanı qapıb əlavə etdi: – Gəlin! Gedək göstərim, bu, elə sizin
öz əl işinizdir! Gedək, gedək, ona baxın! Sonra da hamıya car çəkib söyləyərsiniz!
Əgər istəsəniz, əlbəttə! Onsuz da, sizə heç kəs inanmaz! Lap elə inansaydılar belə,
mənə daha çox vurulardılar! Bilirəm, bizim zəmanə sizdən daha yaxşıdır; siz bu
zəmanə barədə zəhlətökən, pis-pis sözlər danışsanız da, o, sizdən yaxşıdır! Gəlin
gedək, bəsdir əxlaq pozğunluğu barədə çərənlədiniz!
Bu saat siz onunla üz-üzə
gələcəksiniz! Onu açıq-aşkar görəcəksiniz!
Onun səsində dəli bir qürur duyulurdu. O lap şıltaq yeniyetmə kimi ayaqlarını
yerə vurur, inadkarlıq göstərirdi. Dorian müdhiş sevinc hissi keçirirdi: nəhayət, o,
öz sirrini kiminləsə bölüşə biləcəkdi. Bu adam elə onun portretini çəkən adam idi;
elə onun bütün rüsvayçılığına və əxlaqsız hərəkətlərinə səbəbkar da o idi, bu
rəssam idi! Elə bu adam da ömrünün qalan illərini bu portreti çəkdiyinə görə əzab
çəkəcəkdi, mənfur xatirələri onu dinc yaşamağa qoymayacaqdı!
– Hə, hə, – deyən Dorian Holvarda sarı gəldi və gözlərini onun sərt baxışlarına
zillədi, – mən indi öz qəlbimi sizə göstərərəm! Siz bu saat yalnız Allahın görə
biləcəyi şeyi görəcəksiniz!
Holvard geri çəkildi. Dedi:
– Bu ki təhqirdir, Dorian! Mənə hörmətsizlik etməyin! Ah, gör mən necə dəhşətli
və cəfəng sözlər eşidirəm?!
– Deməli, belə düşünürsünüz, hə? – yenə bərkdən güldü.