OZAN DÜNYASI № 4(19), 2014
27
hər açan səhərə çevrilir. Zamanlar arasında sərhəd itir. Pənahın ömrünün
bir günü min aya, həftələrə, illərə dönür. Sənətkarın “mən”i çevril-
məkdən – tənasüx etməkdən doymur. O, dağlarda qartala, düzlərdə
aslana, dəryalara, göllərə dönür. “Mən” daha sonra od-ocaq, yanan işıq
olur. O, işıqdan aşığa dönüb bu tənasüx-təcəllalardan “hər yanda söz açır,
məclislərə sözü ilə yaraşıq verir”.
Sözlə yaradılış, çevrilmə başa çatır. Varlıq və onun tacı olan insan
Sözdən yarandığı kimi, sonda da Sözə çevrilir. Və Söz yaradılışın bütün
mahiyyətinin əsasında durur. Bu, Pənahın inandığı həqiqət idi. Pənah
bütün varlığı ilə sözə, onun ilahi mahiyyətinə inanmış, elə cismani
ömrünü bitirdikdən sonra məhz Sözə çevrilib, əbədi Söz ömrü yaşaya-
cağına inanmış, bu inamını uca səslə bəyan etmişdir: Bir gün köçsəm
mən həyatdan, // El çıxarmaz məni yaddan. // Aşıq Pənah, təmiz addan, //
Bu dünyada yaxşı nə var.
Fəlsəfi subyektivuizmin əsasında insan “mən”inin mütləqləşdirilməsi
durur: “Mən varam – dünya var, mən yoxamsa – dünya da yoxdur”. Təbii
ki, bu hökm öz həqiqətinə malikdir. Yəni bu aydındır ki, mən olmayan-
dan sonra da dünya mövcud olmaqda davam edir. Lakin burada dünya
dedikdə “mən”in subyektiv təcrübəsində gerçəkləşən dünya nəzərdə
tutulur. Yəni mən varamsa – dünyanın varlığından xəbər tuturam,
yoxamsa – demək, mənim xəbər tutacağım dünya da mənim üçün yox-
dur. Bu, bir fəlsəfi yanaşmadır, lakin biz burada fəlsəfə açmaq niyyətində
deyilik. Bizi maraqlandıran “Mən varam – dünya var, mən yoxamsa –
dünya da yoxdur” ehkamında “mən” subyektinin mövqeyidir. Bu
hökmdə “mən” idrakın fövqünə qaldırılır: gerçəklik “mən”dən keçərək
mənəvi hala, idraki təcrübəyə çevrilir. Bunu xüsusilə bədii ədəbiyyatda –
poeziyada bariz şəkildə müşahidə etmək mümkündür. Şair nədən
danışırsa-danışsın, bütün hallarda öz “mən”indən danışır. O nədən bəhs
açırsa-açsın, bütün hallarda “mən”in qavrayıb bədii təcrübəyə çevirdiyi
gerçəkləri nəql edir. Bu halda Aşıq Pənahın da yaradıcılığında gerçəkləş-
miş, təsvir olunmuş dünya onun sənətkar “mən”inin subyektiv
yaşantılarının təcrübəsidir. Elə buna görə də biz bir folklorşünas kimi hər
bir sənətkarın əsl bioqrafiyasının onun poeziyasında inikas olunduğu
qənaətindəyik. Aşıq Pənahın həyat – ömür yolu, bütün düşüncələri onun
yaradıcılığında əks olunmuşdur. Aşıq Pənah bir insan kimi, bir sənətkar
kimi kimdir sualına ən dolğun, ən ətraflı cavabı ilk növbədə onun
poeziyası verir. Bu böyük sənətkar müdrikcəsinə dərk etmişdir ki, bir gün
gələcək, tədqiqatçılar onun poeziyasında Aşıq Pənahın sənətkar kimliyi
haqqında suala cavab arayacaqlar. Bunu fəhm edən sənətkar özü bizlərə
üz tutaraq yol göstərmişdir:
OZAN DÜNYASI № 4(19), 2014
28
Uzaq eldən gələn qonaq,
El içində axtar məni.
İş üstündə – gah əkində,
Gah biçində axtar məni.
Bu şeir sənətkarla bizlər arasında bir körpüdür: ondan keçib Pənahın
poetik sehrlərlə dolu dünyasına daxil olmaq olar. Gəraylı üstündə qoşul-
muş şeirin hər bir misrası dərin məna yükünə malikdir. Burada, demək
olar ki, bütün sözlərin alt məna qatı var. Məsələn, birinci misrada
sənətkar “uzaq eldən gələn qonağ”a xitab edir. Burada “qonaq” əslində
məcazdır. Sənətkar burada “qonaq” sözünü iki mənada – həm həqiqi
mənada, həm də məcazi mənada işlətmişdir. Təbii ki, Pənahın qapısını
açan hər kəs onun qonağı idi. “Aşığın qapısı – elin qapısıdır” deyərlər.
Lakin Pənah “qonaq” sözünü məcazi mənada da işlətməklə onu bədii
fiqura – məna vahidinə çevirmişdir. Bu halda “qonaq” dedikdə sənətkarın
poetik dünyasının qapısını açıb, oraya daxil olmaq istəyən hər bir kəs
nəzərdə tutulur. Bu halda qonağın “uzaq eldən gəlməsinin” qabardılması
da diqqəti cəlb edir. Sənətkar “uzaq eldən gələn qonaq” dedikdə onun
poeziyasına nabələd olan, bu söz gülşənindən ilk dəfə xəbər tutan,
sorağını ilk dəfə alıb gələnləri nəzərdə tutur.
Bəs sənətkar onu arayanlara, axtaranlara öz yerini necə nişan verir?
Pənah bildirir ki, onu el içində, iş üstündə – əkənlərin-biçənlərin yanında
axtarmaq lazımdır. Bu ünvan da iki məna qatına malikdir:
Birincisi, şeirin üst qatı: burada hər şey aydındır. Ölkədə sosializm
quruculuğu gedirdi və Pənah da kənddə yaşayan sənətkar kimi, birbaşa
əkənlərin-biçənlərin yanında idi. O, zəhmətkeşləri, halal zəhmətlə həya-
tın firavanlığını təmin edənləri tərənnüm edirdi.
Ġkincisi, şeirin alt qatı: burada bütün mənalar “el içində” obrazında
cəmləşib. Aşığın varlığı elə bağlıdır. “Aşıq elin anasıdır” deyirlər. Bu
sözün mənası çox ağırdır. Ana övladlarından ötrü hər dərdə yanan, onlar-
dan ötrü öz varlığını qurban edən insandır. Övladlarsız anaya həyat yox-
dur. Aşıq da elin anası kimi, bütün varlığı ilə elə bağlıdır. Elsiz Pənahın
həyatı yoxdur. Lakin bu dediklərim məsələnin emosional tərəfidir. Məsə-
ləyə bədii yöndən nəzər saldıqda başqa bir mənzərənin şahidi oluruq.
Pənah “El içində axtar məni” deməklə öz poetik şəxsiyyətinin məşhur-
luğuna işarə edir. Yəni mənim sözlərim, sənətim xalq içində məşhurdur.
Mənim sözlərim dillərin əzbəridir.