OZAN DÜNYASI № 3, 2010
77
dağları, çayları, abu-havası və az zəhmət ilə bol məhsul götürən əhalisini cuşa
gətirib bu hala salır. Bir baxın aşıqlar toylarda oxuyanda onlara qulaq asanlara.
Bu zaman qulaq asanlar elə hala gəlirlər ki, bəistilahi-türk, ətin kəssən də xəbəri
olmaz. Elə ki, sonra toy qurtardı. Aşıqlar evlərinə getdi, beş-on gün uşaqlar
gecə-gündüz oxuya-oxuya gəzirlər və bir-birinin qələtlərini düzəldirlər".
Aşıq poeziyası folklorun başqa janrlarına nisbətən yazılı ədəbiyyatla daha
yaxındır. Xalq yazıçısı Mirzə İbrahimov doğru qeyd edir ki, aşıq poeziyası xalq
yaradıcılığı ilə yazılı ədəbiyyat arasında bir keçiddir, möhkəm bir körpüdür. O,
bir tərəfdən xalq yaradıcılığına bağlıdır, o biri tərəfdən yazılı ədəbiyyata, həm
bununla, həm də onunla qarşılıqlı əlaqə və təsirdə inkişaf etmişdir. Onun
kökləri, rişələri folklordan, xalq yaradıcılığından su içirsə, budaqlar, qol-
qanadları həmişə ədəbiyyatla qovuşur, ona təsir edir və ondan qüvvət alır.
Aşıq poeziyası həm forma, həm də məzmunca çox rəngarəngdir. Görkəmli
söz ustaları şifahi xalq şeirinin bütün növlərindən istifadə etdikləri kimi, eyni
zamanda klassik poeziyamızın müxəmməs, qəzəl və b. janrlarına
da müraciət et-
mişlər. Aşıqları əsasən üç qrupa ayırmaq olar: birinci qrupa ustad aşıqlar da-
xildir. Onlar aşıq sənətini yaşadan və inkişaf etdirən görkəmli sənət ustalarıdır.
Qədim ozanlarda və xalq aşıqlarında Tanrıdan gələn, buta ilə verilən
qamşamanlıq keyfiyyətlərilə yanaşı, qabaqcadan xəbər vermə qabiliyyəti də
olmuşdur. Dədə Qorqud ən böyük ozan olmaqla yanaşı, gələcəkdən xəbər ver-
mək qabiliyyəti ilə məşhur olmuşdur. Haqq aşıqlarına bu sənət Allah vergisi
kimi yuxuda, badə içməklə, ya da buta ilə verilir. Aşıq Allah vergisi kimi aldığı
bu sənəti təhsillə, şüur və fəhmlə daha da artırır və öz qabiliyyəti, zəhməti və
əxlaqi keyfiyyətləri ilə daha da zənginləşdirir.
Aşıqda Xıdır Nəbidən (Xızırdan), Dədə Qorquddan, şamandan, dərvişdən
gələn xüsusiyyətlər də cəmləşmişdir. Aşıq yeri gələndə Xızır kimi insanların
köməyinə çatır, Dədə Qorqud kimi məsləhət verir, insanları öyrədir, maariflən-
dirir, hətta xanlara vəzirlik edir. Yəni hələ yazılı qanunların olmadığı, ağaların,
bəylərin, padşahların cəmiyyəti idarəetmədə çətinlik çəkdikləri zamanlarda da
aşıqlar onlara məsləhət verib, dövlət qanunlarını xalqa çatdırıb. Cəmi işlərə
düzən vermə qabiliyyəti onu cəmiyyətdə, xalq içində "Dədəyə", yəni elin ağsaq-
qalına çevirib.
Aşıq yaşadığı cəmiyyətdə törələri, adət-ənənələri qoyan və qoruyandır.
Başqa idarəçilərdən onun fərqi cəmiyyəti zor gücünə deyil, sözlə, nəsihətlə,
öyüdlərlə idarə etməsidir. Aşıq sözlə, sazla, musiqi ilə, bəzən hayqırtı və nərə
çəkməklə, bəzən də zərif səslə insanın ruhuna təsir edəndir.
Uzun tarix boyu əxlaq meyarları aşığa görə müəyyənləşib, halal və haramın
tarazlığı pozulanda da, haqq-ədalət tapdalananda da söz aşığa verilib. Ən ağır
mübahisələri, qanlı davaları, anlaşılmazlıqları, düyünləri aşıq çözüb, aşıq həll
edib. Sözün, şeirin ən gözəli, keçərlisi aşığındır; musiqinin (sazın), səsli oxuma-
nın ən təsirlisi də aşığındır; kəlamların ən ağıllısı, müdrik olanı aşıqların sinə-
sində toplanıb.
Aşığın sinəsi kitablara sığmayan zəngin bir xəzinədir. Kitaba, yazıya ke-
çənlər onun az bir qismidir. Aşıq sənəti çoxtərəfli və çoxyönlü olduğundan ya-