146
Mündəricat
Giriş ............................................................................................................................................147
1.Dinamik Stoxastik Ümumi Tarazlıq yanaşması ..................................................................147
2.Siyasət qurucusunun nəzərə almalı olduğu tədqiqat ..........................................................150
3.İ
qtisadi modellərin siyasət quruculuğunda rolu..................................................................151
3.1.İqtisadi modelin məqsədi ...................................................................................................151
3.2.DSÜT modelləri həqiqətən nəzəriyyəyə uyğundurmu?......................................................152
3.3.DSÜT modeli aydınlaşdırıla və hesablana bilərmi?..........................................................152
3.4.DSÜT və SVAR modelləri ..................................................................................................152
3.5.Siyasət prosesində DSÜT modellərinin praktiki tətbiqi.....................................................152
4.Nəticə........................................................................................................................................153
Ə
dəbiyyat....................................................................................................................................154
147
Giriş
Son dövrlər monetar siyasətin formalaşdırılması və implementasiyası istiqamətində
nəzəri və empirik modellərdən istifadə akademik dairələrdə və siyasət qurucuları arasında geniş
müzakirə obyektinə çevrilmişdir. Mövcud modellər əsasında formalaşan yeni baxışlar müxtəlif
dövrlərdə siyasət müzakirələrinin və adekvat monetar siyasətinin dizaynına təkan vermişdir.
Xüsusilə son qlobal iqtisadi bohrandan sonra riyazi modellərin riskləri əvvəlcədən aşkar etmək
qabiliyyətlərinin artırılması dünya beyin mərkəzlərində aktuallaşan ən mühüm məsələlərdən
biridir.
Müasir fundamental tədqiqatlar əsasən inflyasiyanın və biznes tsikllərinin yaratdığı
itkilərin öyrənilməsinə yönəlir. Burada əsas məqsəd monetar siyasətin dizaynına və
diaqnostikasına töhfə verməkdir. Son zamanlar siyasət qaydaları və sistemli siyasət davranışları
sahəsində aparılan araşdırmalar əslində Lukas və Sarjent tərəfindən monetar iqtisadiyyat
haqqında irəli sürülən ideyalara söykənir. Lukas və Sarjent (Lukas və Sarjent, 1978) öz
tədqiqatlarında aşağıdakı nəticəyə gəlmişlər:
“....hökumətin kontr-tsiklik siyasəti özəl agentlər tərəfindən yalnız təxmin edilməməlidir...
həm də o, (siyasət) iqtisadiyyatın vəziyyəti ilə sistematik asılılıqda olmalıdır. Beləliklə,
siyasətin effektivliyi iqtisadi agentlərin monetar və fiskal siyasətdəki sistem meyilləri
fərqləndirə bilməmələri ilə bağlıdır.”
Siyasətin effektivliyi “iqtisadi agentlərin iqtisadi meylləri müəyyən edə bilməməsi” ilə
əlaqəli olduğundan, optimal siyasətlərin iqtisadçılar tərəfindən tədqiq edilməsinə heç bir zərurət
qalmır. Lakin, bunun əksinə olaraq Vudford (Woodford, 2003) yeni baxışları nəzərə alaraq qeyd
edirdi:
“...mərkəzi bankların fəaliyyət istiqaməti həm də özəl sektor tərəfindən anlaşıldıqda onun
stabilləşdirmə hədəfi effektiv olur. Belə ki, özəl sektorda gözləntilərin effektiv idarə
olunması qaydalara əsaslanan qərar prosedurları ilə dəstəklənir. Yalnız bu halda
mərkəzi bankın fəaliyyətinin sistematik xarakter daşıması ictimaiyyətə aşılana bilər.”
Vudfordun qaydaları vurğulamasına baxmayaraq, o, həm də sistemli siyasət fəaliyyətinin
iqtisadi agentlər tərəfindən müəyyənləşdirilməsini monetar siyasətin effektivliyinə töhfə verən
əsas amil olduğunu vurğulayır. Deməli, siyasətin effektiv olması üçün o, yalnız Lukas və
Sarjentin iddia etdiyi kimi, qabaqcadan müəyyənləşdirilə bilən deyil, həm də sistematik, anlaşıla
bilən və şəffaf olmalıdır.
Belə yeni yanaşma sistematik siyasətin öyrənilməsinə təkan verməklə yanaşı həm də
akademik dairələrin və mərkəzi bankların tədqiqat baxışlarını uzlaşdırır. Bu səbəbdən monetar
nəzəriyyənin monetar siyasət üçün əhəmiyyəti yenidən artmışdır. Monetar nəzəriyyənin Lukas
və Sarjent tərəfindən irəli sürülən səviyyədən Vudfordun müdafiə etdiyi mövqeyə qədər
evolyusiyası son 15 ildə nəzəriyyənin praktika üzərində əvvəlkindən daha çox təsirə malik
olmasını göstərir.
1. Dinamik stoxastik ümumi tarazlıq yanaşması
90-cı illərdə monetar tədqiqatlarda sadə, xətti rasional gözləntilər modelindən geniş
istifadə edilirdi. Modelin əsas komponentləri kimi Lukasın məcmu buraxılış kəsirini inflyasiyaya
bağlayan təklif funksiyası təşkil edirdi. Bu zaman pul kütləsinin tələb ilə əlaqəsi siyasət aləti
kimi IS-LM modeli daxilində verilirdi.
148
Ekzogen stoxastik şoklar həm təklif, həm də tələb funksiyasına daxil edilirdi. Bu
modellərin empirik uyğunluğu hamı tərəfindən qəbul edilmişdi və onlar mərkəzi banklarda
siyasət qərarları üçün istifadə edilən modellərdən fərqli idi. Siyasət qurucuları bu modellərə
yararsız, elmi dairələr isə mərkəzi bankların istifadə etdikləri modelləri “Lukas tənqidi”ndən asılı
modellər kimi təsvir edirdilər.
Müasir fundamental tədqiqatlar isə Dinamik Stoxastik Ümumi Tarazlıq (DSÜT)
modelinə əsaslanır. Burada optimallaşdırma aparan agentlərin qarşılıqlı əlaqəsi nominal
friksionlarla xarakterizə olunan mühitdə baş verir. Nəticədə siyasətlə bağlı tədqiqatların sayının
sürətlə artmasında həm akademik iqtisadçıların, həm də mərkəzi bank tədqiqatçılarının fəal
iştirakı mühüm rol oynadı.
Klarida, Qali və Qertlerə görə (1999) DSÜT modelinin geniş yayılmasına təsir edən
amillərdən biri nominal friksionlar, digəri isə iqtisadi fluktuasiyaların mənbəyi olan yeni monetar
amillərdir. Biz burada üçüncü amil kimi siyasət aləti qismində pul kütləsi əvəzinə faiz
dərəcəsindən istifadə olunmasını da qeyd edərdik. Nəticədə monetar nəzəriyyəni siyasət
qurucularının baxışlarına daha da uyğunlaşdırmış oluruq.
Yeni nəsil DSÜT modelləri siyasətin formalaşmasına müxtəlif istiqamətlərdə dəstək
vermişdir. Birinci, onlar monetar siyasətin transmissiyası ilə bağlı yeni ideyalara aydınlıq
gətirmişdir. İkinci, iqtisadçıları iqtisadi şokların mənbələri haqqında daha ehtiyatla düşünməyə
təşviq etmişdir. Əslində biz siyasət təhlilləri üçün tələb və təklif şoklarının təbiətini anlamalı,
onların səmərəsiz fluktuasiyalara səbəb olub-olmaması kimi məsələləri aydınlaşdırmalıyıq.
Üçüncü, bu modellər məcmu buraxılış kəsirinin kəmiyyətcə ölçülməsinə imkan vermişdir.
Dördüncü, DSÜT modelləri rifah əsaslı siyasətlər üçün zəmin yaradır. Nəticədə inflyasiya və
stabilləşmə siyasəti zamanı müvafiq hədəflərə dair yeni baxışların formalaşmasına köməklik
göstərir.
Hazırda mərkəzi banklar tərəfindən geniş istifadə olunan DSÜT modelləri özəl sektora
təsir edən iqtisadi mühiti tam xarakterizə edir. İqtisadiyyatda struktur dəyişiklikləri baş verdikdə
isə, modellər kalibrasiya edilməklə siyasət qiymətləndirmələri sahəsindəki çətinlikləri aradan
qaldırır. Lakin, bu modellər artıq elə bir mərhələyə çatmışdır ki, statistik zaman sıraları əsasında
da onları qiymətləndirmək mümkündür. Bu zaman qiymətləndirilən rüblük biznes tsiklləri
monetar siyasətdə qərarvermə prosesi üçün vacib olan qısamüddətli proyeksiyaların yaradılması
baxımından mühüm əhəmiyyət kəsb edir.
Eyni zamanda gözləntilərin monetar transmissiya prosesinə təsir imkanları, siyasət
dizaynı və mərkəzi bankların kommunikasiyasına dair aparılan tədqiqatlar bu sahədə yeni
baxışların formalaşmasına səbəb olmuşdur.
50-ci illərdən başlayaraq, Fridman, Modilyani və Brumbergin tədqiqatlarında
gözləntilərin əhəmiyyəti xüsusi vurğulanmışdır. Bu modellərdə gözləntilərin qiymət və əmək
haqqlarının tənzimlənməsində mühüm rol oynaması əsas yeniliklərdəndir. Belə ki, mərkəzi
bankın davranışı əsasında formalaşan gözləntilər monetar siyasətin real effektlərinin müəyyən
olunmasında əhəmiyyətli rola malikdir. Həmçinin siyasətin yalnız sistematik hissəsi gələcəklə
bağlı gözləntilərə təsir edə bildiyindən, bu fikirlər əslində mərkəzi bankın monetar siyasət
haqqında düşüncələrini ifadə etmiş olur.
Mervin Kinqin (2005) qeyd etdiyi kimi, “İnflyasiya gözləntiləri ev təsərrüfatlarının və
firmaların davranışları üçün əsasdır və mərkəzi bankın qərarlarının gözləntilərə necə təsir etməsi
Dostları ilə paylaş: |