40
miqyaslı şedevrlər “Kitabi-Dədə Qorqud” və “Koroğlu” kimi eposlar, XII-XVI əsrlər Azərbaycan
ədəbiyyatı və onun parlaq zirvələri olan N.Gəncəvi, Nəsimi, Füzuli, zəngin aşıq poeziyası, son orta
əsrlərin ədəbi həyatı, yeni milli ədəbiyyatın inkişafında görkəmli rol oynayan M.F.Axundov,
A.Bakıxanov, M.Ş.Vazeh, X.Natəvan, N.Nərimanov, H.Cavid, C.Məmmədquluzadə və başqa
yazıçılarımızın həyat və yaradıcılığı öz əksini tapmışdır.
Azərbaycan yeni dövr ədəbiyyatının Ə.Əbülhəsən, S.Rəhimov, R.Rza, M.Müşfiq,
Naxçıvanlı şair və yazıçıları, dramaturqları, tənqidçiləri müasir ədəbi prosesdə fəal iştirak edən bir
çox yazıçılarımız muzeyin ekspozisiyasına daxil olmuşdur.
Muxtar respublikamızdakı hər bir muzeyin öz tarixi, özünün səciyyəvi xüsusiyyətləri, öz
siması vardır. Bütün bunlar muzeyin yerləşdiyi binanın, həm də şəxsiyyətin dövrünün təsviri ilə
bağlıdır. Xatirə muzeyləri mümkün olduqca görkəmli şəxsiyyətin yaşadığı ərazidə həmin şəxsin
evində təşkil edilməli, xüsusən ekspozisiyanın təşkilində sənətkarın yaradıcılığının hər hansı bir
cəhətini açdığı
üçün mənzilin quruluşu, interyeri saxlanmalıdır. (4 səh.80).
Xalqımızın ümummilli lideri, müasir Azərbaycan Respublikamızın və dövlətimizim
qurucusu və memarı Heydər Əlirza oğlu Əliyev Azərbaycanımızın ayrılmaz tərkib hissəsi qədim
Naxçıvan diyarının yetişdirdiyi görkəmli şəxsiyyətlər haqqında demişdir:
“Naxçıvan böyük şəxsiyyətlər yetirmiş bir torpaqdır. Naxçıvan həmişə böyük şəxsiyyətlərlə
fərqlənmiş və bu şəxsiyyətlər, alimlər, münəccimlər, şairlər, memarlar, dövlət xadimləri olmuşlar.
Naxçıvan həmişə Azərbaycanın yüksək ziyalı yetişdirən bir diyarı olmuşdur.” Xalqımızın
ümummilli lideri Heydər Əliyevin bilavasitə rəhbərliyi, qayğı və göstərişləri sayəsində Naxçıvanda
görkəmli şəxsiyyətlərin adlarının əbədiləşdirilməsi məqsədilə xatirə muzeyləri, ev-mənzil
muzeyləri, xatirə ansamblları və kompleksləri yaradılmışdır (1. səh.9).
Böyük Mirzə Cəlil irsinin toplanması, öyrənilməsi, təbliği məqsədilə Naxçıvan şəhərində
C.Məmmədquluzadənin ev muzeyi, Cəlilkənddə və Nehrəm kəndində C.Məmmədquluzadənin
xatirə muzeyi yaradılmışdır.
Naxçıvanda C.Məmmədquluzadənin ev muzeyi də ekspozisiya rəngarəngliyi ilə seçilir.
Muzeyin ekspozisiyasında böyük ədibin həyat və yaradıcılığının əsas dövrləri, Naxçıvan teatrında
onun iştirakı ilə tamaşaya qoyulan tamaşalar haqqında sənədlər, materiallar, Azərbaycan
demokratik maarifçiliyindən bəhs edən bir çox foto-sənədlər, “Molla Nəsrəddin” jurnalının
nüsxələri və digər eksponatlar vitrinlərdə, guşələrdə nümayiş olunur.
Cəlilkənddə C.Məmmədquluzadə xatirə muzeyində ədibə aid çox qiymətli əşya və
eksponatlar toplanmışdır. Bu muzeylər Mirzə Cəlilə həsr olunsa da ekspozisiyanın quruluşu
baxımından çox yüksək şəkildə qurulmuşdur.Yəni tamaşaçı bu muzeylərdə çox maraqlı, fərqli
ekspozisiya quruluşları ilə rastlaşır ki, bu da muzey işçilərinin yüksək peşəkarlığını təsdiq edir.
C.Məmmədquluzadənin həyatı və yaradıcılığı, nəsil şəcərəsi, pedaqoji fəaliyyəti və s. zəngin
materiallar əsasında bədii tərtibatla əks olunur.
C.Məmmədquluzadənin tədqiqatçıları Əli Nazim, Mirzə İbrahimov, Əziz Şərif, Abbas Zamanov,
Əziz Mirəhmədov, İsa Həbibbəyli və başqalarının da fotoları ekspozisiyada öz əksini tapmışdır.
Nehrəm kəndində C.Məmmədquluzadə xatirə muzeyinin ekspozisiyası ədibin pedaqoji
fəaliyyəti, həyat və yaradıcılığının əsas dövrləri, kənddə maarifçilik və təhsil illərinə, ailə həyatına
aid zəngin materiallarla tərtib edilmişdir. Muzeydə 1000-dək eksponat mühafizə olunaraq
ekspozisiyalar vasitəsilə nümayiş etdirilir.
“Memorial” sözünün əsasını təşkil edən “memoria” latın sözüdür. Azərbaycan dilində
“xatirə” sözünə uyğun gəlir. Xatirə muzeyinin əşyaları da, təbii ki, həmin şəxsiyyətin həyatı və
fəaliyyəti ilə bağlı olur. Buraya ilk növbədə muzeyin yaradıldığı yer (ev, mənzil, malikanə, iş otağı
və s.) daxildir. Təcrübə göstərir ki, yaşadığı müddətdən asılı olmayaraq həmin yerdə xatirə muzeyi
yaradılır və tamaşaçılar tərəfindən rəğbətlə qarşılanır. Ona görə ki, mənsub olduğu xalqa başucalığı
gətirən, öz xalqının tarixində və taleyində önəmli
rol oynayan, elminin və mədəniyyətinin inkişafına
dəyərli töhfələr verən şəxsiyyətlərin adı ilə bağlı hər bir məkan müqəddəs tutulur. Buraya gələn hər
bir tamaşaçıda
xoş hisslər, duyğular yaranır, şəxsiyyətin xatirəsi böyük ehtiramla yad edilir.
Belə ədəbiyyat profilli muzeylərdən biri də dahi Azərbaycan şairi, görkəmli dramaturq,
ədəbiyyat və mədəniyyət xadimi Hüseyn Cavidin ev muzeyidir. Şairin anadan olmasının 100 illiyi
41
haqqında 1981-ci ildə xüsusi qərar imzalanmışdır. Həmin qərarda Bakı və Naxçıvan şəhərlərində
Hüseyn Cavidə heykəl-abidələr ucadılması, xatirə-ev muzeylərinin yaradılması və digər tədbirlərin
həyata keçirilməsi öz əksini tapmışdır. (1. səh.17)
1984-cü ildə Naxçıvanda Hüseyn Cavidin ev muzeyinin təntənəli açılışı oldu. Muzey
açıldığı gündən müvəffəqiyyətlə fəaliyyət göstərir və ekspozisiyası zənginləşdirilir.
Ekspozisiyanın tərtib prinsiplərindən danışarkən qeyd etmək lazımdır ki, şairin fəaliyyəti
xronoloji ardıcıllığı, müəyyən mövzular üzrə ayrı-ayrı bölmələrdə əyaniləşdirilmişdir.
Həmin bölmələrin əyaniləşdirilməsində orijinal fotolardan, Hüseyn Cavidin şəxsiyyəti və
yaradıcılığı haqqında görkəmli alim və sənətşünasların mülahizələrindən, əsərlərindən götürülmüş
bədii parçalardan, təsviri və tətbiqi sənət nümunələrindən yerli-yerində istifadə olunduğundan,
şairin həyat və yaradıcılığı dolğunluqla göz önündə canlanır.
Hüseyn Cavidin dərin mənalı, hikmətli əsərələri ilə ətraflı tanış olan tamaşaçı, həm də onun
sələfləri, müəllimləri, qələm yoldaşları, sənət dostları, həmçinin dövrünün mühüm hadisələri
haqqında ətraflı məlumat alır.
İstedadlı, qüdrətli qələmi və ardıcıl ictimai fəaliyyəti ilə yarım əsrdən artıq bir dövrdə xalqımızın
azadlığı, səadəti, tərəqqisi yolunda çalışan Ordubadinin adı yaddaşlarda əbədi həkk olunmuşdur.
M.S.Ordubadinin yaradıcılığı son dərəcə zəngin, müxtəlif və rəngarəngdir. Ordubadi şairdir,
publisistdir, tərçüməçidir, libretto və ədəbi-tənqidi məqalələr müəllifidir. O, Azərbaycan ədəbiyyatı
tarixinə ilk növbədə tarixi roman janrının banisi, cəmiyyətimizin keçdiyi bütöv bir ictimai inkişaf
dövrünü epik lövhələrlə canlandıran monumental romanların müəllifi kimi daxil olmuşdur.
M.S.Ordubadinin xatirə muzeyi 1972-ci ildə Ordubadda yaradılmışdır. Muzey
M.S.Ordubadinin yaradıcılıq irsini mühafizə edir.
Muzey M.S.Ordubadinin həyat və yaradıcılığını dərindən öyrənir, tematik və səyyar sərgilər
təşkil edir, elmi-kütləvi iş aparır.
Tarixi dövrlərdə baş verən hadisələri əks etdirən nümunə və məlumatlar, faktlar, incəsənətin
müxtəlif növləri, ədəbiyyat, musiqi, təsviri incəsnət, dekorativ-tətbiqi sənət nümunələrinin əyani
illüstrativ vasitələrlə təbliği çox güclü hisslərin yaranmasına, biliklərin təsdiqinə, bacarıqların
inkişafına, formalaşmasına səbəb olur. (3 səh.284).
Xatirə muzeyləri bir tərəfdən görkəmli şəxsiyyətlərin xatirəsini əbədiləşdirir, digər tərəfdən
ideoloji-siyasi müəssisə kimi gənc nəslin vətənpərvərlik və beynəlmiləlçilik ruhunda tərbiyə
edilməsində xüsusi rol oynayır. Belə mədəniyyət ocaqlarından biri Ordubadda M.T.Sidqinin və
Şahbuz rayonunun Nursu kəndində yeni yaradılmış xalq şairi M.Arazın ev muzeyləridir.
Muzey Naxçıvan Muxtar Respublikası Ali Məclisi sədrinin “Məhəmməd Tağı Sidqinin ev
muzeyinin yaradılması haqqında” 2014-cü il 17 sentyabr tarixli sərəncamına əsasən yaradılmışdır.
Bu muzeyin yaradılması görkəmli pedaqoqun xatirəsinin əbədiləşdirilməsinə, yaradıcılığının daha
dərindən öyrənilməsinə və təbliğinə xidmət edir.
Muzey girişdən, 3 ekspozisiya və 3 iş otağından ibarətdir. Ümummilli lider Heydər Əliyev
Məhəmməd Tağı Sidqinin təhsil və mədəniyyətin inkişafındakı xidmətlərini yüksək
qiymətləndirmişdir. Muzeyin ekspozisiyası ümummilli liderin bu fikirləri ilə başlayır: “Naxçıvanda
təhsilin, ümumiyyətlə, mədəniyyətin inkişafında mütəfəkkir Məhəmməd Tağı Sidqinin böyük rolu
olmuşdur.
Ekspozisiyada M.T.Sidqinin yaratdığı “Əxtər” və “Tərbiyə” məktəblərinin fotoşəkilləri, bu
böyük maarifçinin məktəb haqqında fikirləri nümayiş olunur.
M.T.Sidqinin məktəb və şagirdlər haqqında yazdığı hekayə və şerlərdən nümunələrdən də
məlumat verilir. Onu da qeyd edək ki, M.T.Sidqinin açdığı məktəblər böyük ziyalı nəsli
yetişdirmişdir. Burada M.T.Sidqinin yetirmələri H.Cavid, Ə.Şərif. Ə.Qəmküsar, R.Təhmasib,
M.S.Ordubadi, İ.Əbilov kimi görkəmli şəxsiyyətlərin fotoşəkilləri nümayiş olunur. Bəli bütün
eksponatlar M.T.Sidqi yaradıcılığını göz önündə canlandırır.
Beləliklə, xatirə muzeylərinin yaranması bir daha göstərir ki, Azərbaycan xalqı özünün
mədəni keçmişinə böyük qayğı ilə yanaşır, ən yaxşı, ən qabaqcıl ənənələrini qoruyub saxlayır.
Xatirə muzeyləri doğrudan da mədəniyyətimizi, görkəmli şəxsiyyətlərimizin həyat və
yaradıcılığını nümayiş etdirən
mühüm təbliğat vasitəsi, təbliğat ocağıdır.