218
Yoldaşlar, Azərbaycan fəhlə-kəndliləri rəhbərimiz Leninin göndərdiyi Qızıl
Ordu ilə əl-ələ verib müsavat quruluşunu tarmar elədi.
Aprelin iyirmi səkkizində,
yəni beş gün bundan qabaq, Bakıda Şura hökuməti – fəhlə-kəndli hökuməti
yarandı. Bundan sonra bəy, xan, mülkədar, pristav olmayacaq. Bundan sonra biri
ağa, biri nökər olmayacaq. Bundan sonra kəndlilər əkib-biçib bəhrəni bəylərə
verməyəcəklər. Torpaq, su, meşə, bağ-bağça –
hər şey, hər şey sizin öz
ixtiyarınızda olacaq.
Yoldaşlar, qardaşlar! Bu gün hamı sevinməlidir, gülməlidir. Bu gün bizim
bayram günümüzdür. Elin, obanın azadlığa çıxdığı gündür! Var olsun öz fəhlə-
kəndli hökumətimiz. Var olsun yoldaş Lenin!
Üstü yamaqlı, çarığı yırtıq, arıq, ucaboy bir kəndli dərhal ayağa qalxıb
ürəkdən gülə-gülə, əl vura-vura dedi:
- Yaşasın fəhlə-kəndli hökuməti!
Hamı çəpik çaldı. İnqilab və azadlıq naminə, Leninin şərəfinə bir neçə
dəqiqə arası kəsilməyən sürəkli alqış səsləri meydanı, kəndi götürdü. Baharın xoş
nəsimi dalğa-dalğa ucalan bu alqış səslərini dağlara, köyşənlərə yaydı.
Sevincinin həddi-hüdudu olmayan Comərd kənara çəkildi. Vahan üzünü
kəndlilərə tutub dedi:
- Müsəlman qardaşlar! Bu gün təkcə müsəlmanların bayramı, şad günü deyil.
Ermənilərin,
gürcülərin, elə bizim Zaqafqaziyada yaşayan hamı millətlərin bayram
günüdür. Biz sevinirik ki, siz uzun zillətdən sonra azadlığa çıxdınız. Lenin deyir ki,
gərək hamı millətlər bərabər olsun. Aralıqda düşmənçilik olmasın, qan tökülməsin.
Amma Nikolay, ondan sonra da daşnaklar və müsavatçılar millətləri bir-birinin
canına salışdırmışdılar. Daha bundan sonra elə şeylər olmayacaq. Bizim qonşu
millətlər qardaş kimi yaşayacaq. Çünki onların arasını vuran müsavat hökuməti
yıxıldı. Bu gün-sabah da daşnak hökuməti yıxılacaq.
Müsəlmanlar demişkən,
bundan sonra başına qızıl al, gəz.
Qardaşlar, sizin inqilab bayramınızı burdakı ermənilərin adından təbrik
eləyirəm. Yaşasın müsəlman və erməni xalqlarının qardaşlığı, dostluğu!
Alqış səsləri yenə ucaldı.
- Bəlkə sualı-zadı olan var? – deyə Mürsəl camaata müraciət elədi.
Gödək boylu bir kəndli ayağa qalxdı. Yekə saçaqlı papağını gözünün
üstündən geri itələyib dedi:
- O musurman oğlan burda yaxşı sözlər dedi. Amma gərək haqq üçün
danışsın, o çeşməkli erməni də pis danışmadı. Bəli, sözüm onda deyil, mən bir az
türk adamam. Bir məni yaxşı-yaxşı başa salın görüm təzə hökumətin vaxtında biz
kəndlilərin çulu-çuxası düzələcək, qarnı heç olmasa yavan çörəklə doyacaq, ya
əvvəlki təkin, həmin daş, həmin dibək olacaq?.. Bağışlayın e,
avam adamam də,
bəlkə köntöy danışıram…
- Bundan sonra hamının güzəranı yaxşılaşacaq, - deyə Comərd cavab verdi.
- Başına dönüm, bir sualım da var, - deyə həmin kəndli yenə dilləndi. –
Qənd, çay, çit-mit necə, üzünü görəcəyikmi? Vallah, kəndlilər batıb gedirlər.
- Bəli, bəli, onlar da olacaq.
- Çox sağ ol. Allah atana rəhmət eləsin. Onda varam belə hökumətə!
Başqa bir kəndli ayağa qalxdı:
219
- Siz dediniz ki, erməni ilə musurman arasında dava-şava olmayacaq. Yaxşı,
olmasın, elə kəndlilər də əvvəldən bunu istəyirdilər. Ancaq mənim oğlumu
aparmışdılar Gorus davasına. Orda vurulub şikəst olub, indi də yıxılıb evin
bucağına. Mən nə eləyim? Qisasımı kimdən alım?
- Oğlunu zorla əsgərliyə aparanlardan, - deyə Şahmərdan cavab verdi.
- Allah Sultan bəyin evini yıxsın. Mənə nə elədi, o elədi,
- deyə kəndli
oturmaq istədi, ancaq nə fikirləşdisə, yenə dedi: - Qardaş oğlu, deyir ilan vuran ala
çatıdan qorxar. Biz bəylərdən, ağalardan o qədər qorxmuşuq, o qədər qamçı
yemişik ki, indi də sözümüzü açıq deməyə ehtiyat eləyirik. Amma yenə
deyəcəyəm.
Mən gedib o Sultan bəyi tapsam, oğlumun qisasını alsam, divan-dərə
məni tutmaz ki? Təzə hökumət dalımda durarmı?
- İndi kəndlilər heç kəsdən qorxmamalıdırlar. Şura hökuməti bəylərin,
ağaların qənimidir.
Kəndli keçib yerində oturanda, qırmızı yanaq, peysəri yoğun bir adam onun
qulağına pıçıldadı:
- Ə, Şirastan, niyə ağzının sözünü bilmirsən? Bəylərlə, ağalarla nə işin var?
Adam hər atılan daşın dalınca getməz. Özünü heç kəsin yanında pis eləmə. Nə
bilirsən ki, Bakıya təzə gələn Şura hökuməti çox yaşayacaq? Bundan sonra belə-
belə sözlər danışma. Sən öl, bəylərin qulağına çatar, dərini soyarlar. Hələ suyun
şırıltısına
qulaq asaq, görək axırı nə olur…
Şirastan onun üzünə dik baxdı. Ancaq mütərəddid olduğundan, nə cavab
verəcəyini bilmədi. Özü də şübhəli halda düşündü: «Bəlkə təzə hökumət doğrudan
çox yaşamayacaq…».
Camal danışdı. Ona zülm eləyən bəylərdən və pristav Əli Sadiqidən intiqam
alacağını dedi.
Meydanın aşağı başında adamların sıx yerində çöməltmə oturmuş bir adam
Camalın sözlərindən sonra çiyinlərini qısıb belini əydi. Nədənsə üzünü
göstərməmək üçün qıllı papağını gözünün üstünə çəkdi və tez başını aşağı dikdi.
Beli bükülmüş, qulaqlarını, üz-gözünü ağ tük basmış bir
kişi çəliyinə dirənə-
dirənə bayrağın yanına gəldi. Əlini, qıyılıb balacalanmış, ətrafı qırış-qırış olmuş
gözlərinin üstünə qoyub şəklə baxdı, sonra bərkdən Mürsələ müraciət elədi.
- Qardaş oğlu, a qardaş oğlu, mənim də danışmağa ixtiyarım var, ya çıxım
gedim?
- Var, Aydın əmi, var! Nə istəyirsən de!
- Hə, deyim, başına dönüm… Onu deyirəm ki, mənim doxsan yaşım var.
Çox divan adamları görmüşəm. Bir zaman eşitdik ki, Nikolay padşahı vurub qıçını
boynundan aşırıblar, onun taxtına… - adı nə idi? Kərənskiydi, nəydi – hə, adı
cəhənnəm, o çıxıb; o da tez tünbətün oldu. Bir-iki il bundan qabaq da eşitdik ki,
bizim padşahımız olacaq osmanlı. Elə o da oldu. Amma nə təhər oldu? Birini dar
ağacından asdı, birini dama basdı, birinin malını əlindən aldı, birini qapazladı. Ə,
uşaqlar, belədir, ya yox? Hə, o da günün birində yabısını minib, haydı, getdi.
Sonra,
atam sizə qurban, eşitdik ki, yerinə müsavat gəlib. Müsavatın qulluqçuları
bir ilan olub düşdülər camaatın canına. Vergi ver, at ver, taxıl ver, əsgər ver, sonra
da erməni-musurman qırğınını saldılar ortalığa. İndi də deyirsiniz ki, müsavat
gedib, yerinə fəhlə-kəndli hökuməti gəlib. Neynək gəlsin. Amma bilmirik bu