44
Sədr çəkməsini ayağına çəkib qalxdı. Onlar bağçanın içi ilə ötüb,
çəpərdən aşıb vağzala keçdilər.
Zəng səsləndi, səsi ilə də hamını hərəkətə gətirdi. Kimi adamları basa-
basa əlini kassanın pəncərəsinə yetirməyə can atır, kimi çamadan əlində
növbətçiyə güc gəlib, dal qapıdan platformaya çıxmaq istəyirdi.
Dəqiqələr keçdikcə hay-küy artırdı. Adamlar bir-birinə qarışmışdı.
Ümumi gurultu içində vağzal, istilahları eşidilirdi:
- Plaskart!
- Sürət qatarı.
- Tranzit.
- Birbaşa.
- Hara soxulursan?
Bufetin sağ kənarında balaca bağın qabağındakı vağzal bazarı minikləri,
çağırılmış qonaq kimi aramsız gözləyirdi. Üzümü səbətlərə düzən, almanı
yüngül-yüngül çəkib, kağız torbaya dolduran, stəkanı təmizləyən kim,
bişmiş kotleti stola düzən, yemişi dilimləyən kim...
Qələndər sədrin qolundan tutub, bağın qırağına gətirdi. Barmağı ilə
nişan verdi:
- Bax, mən ölüm, bir yaxşı bax!
Tapdıq iki tay Carco yemişini yerə düzməkdə nökərinə kömək edir,
göstəriş verir, o yan-bu yana baxıb, nökərinə nə isə deyirdi.
Qaynar su budkasının solunda isə Durmuş qabağına yaylıq üzüm ilə
dolu balaca bir səbət qoyub, kisəni qılçası arasına almışdı, qorxa-qorxa
səbətin ağzını bəzəyirdi.
Sədr baxdı, baxdı, yandı, töküldü:
- Yazıq Danqır Abas, binəva Ağcanın oğlu!..
- Çaqqal baş qopardır, qurdun adı bədnamdır, - deyə Qələndər onun
sözünü təsdiqlədi.
Qatar gəldi. Adamlar vaqondan töküldülər, qırılmış boyunbağı kimi yerə
səpələndilər. Yeyənə, içənə, aldığını qoltuğuna vurana, vaqonda gözləyənə,
sevgilisinə meyvə aparana bax! Pullular alır, mallılar satır, aralıqda qalanlar
tamaşa edirdilər.
Tapdıq on iki-on üç yemiş xırıda vermişdi ki, müştəri azaldı. Üçüncü
zəng vurulandan sonra qatar yola düşdü. Yemiş alan olmadı. Boylanıb
budka tərəfə baxanda Durmuşun əlində yaylıq üzümü gördü, yerindəcə
donub qaldı.
45
Onların gözü bir-birinə sataşdı: atışan adamlar kimi özlərini
yığışdırdılar. Diqqətlə bir-birinin üzünə və matahına baxdılar.
Durmuş səbəti yerə qoyub, özünü ağacların arasına verdi. Kərbəlayı
Tapdıq nökərə him elədi:
- Gəldilər..
Özü isə divardan hoppanmaq istəyərkən, bir əlin biləyindən yapışdığını
gördü. Bu, sovət sədri idi.
Qələndər isə Durmuşu yaxalayıb gətirirdi.
Onlar bu iki qardaşı üzləşdirməyə və məsuliyyətə almağa gətirirdilər.
1935
DOSTUMUN QONAQLIĞI
TƏSADÜF
Kənddə, tanışlarımdan birinin evində Mirzə Qulamla tanış oldum. O,
şəhərdən gəlmişdi. Deməyinə görə, istəkli dostunun ailəsilə bir yaylaq
yerinə getmək istəyirdi. Onu vəkil eləmişdi ki: "Get, yer seç, ev tut, mənə
xəbər ver!"
Nədənsə Mirzə Qulam mənə çox hörmət eləyirdi. İlk tanışlığımız olsa
da, uzun illərin dostu, yaxın qohum kimi danışırdı. Mən onun hər sözünə
"bəli" deyirdim, lakin söhbətimizi uzatmaq istəmirdim. O, yəqin bunu hiss
etmişdi. Səsini dəyişdi, mənə yaxınlaşıb, yavaşcadan dedi:
- Qardaşoğluma başağrısı vermirəm ki?
- Yox, - dedim, - xoşdur, söhbətinizə qulaq asıram.
Mənim bu sözüm ona cəsarət verdi; özünə xam məclis tapmış
hoqqabazlar kimi sevinə-sevinə danışdı, böyük bir müqəddimə ilə başladı:
- Sizləri görəndə, sizin kimi irəli gedən cavanları görəndə elə bilırəm öz
oğlumu, öz kiçik qardaşımı görürəm. Qardaşoğlunun canına and olsun,
sənin canına yalandan and içmərəm, məni qəbrə öz əlinlə qoyasan, əgər
yalan deyirəmsə, sənin kimi müəllimləri görəndə ürəyım dağlar boyda
böyüyür. Çünki görürəm siz qultura barəsində, maa
46
rif barəsində, elm-ürfan barəsində doğrudan da mərhaba çalışırsınız. Halal
olsun Sovət hökumətinin sizə verdiyi çörək! Halal olsun sizə çəkilən
zəhmət!
Mirzə Qulam danışırdı. Ev yiyəsi bizi bostana, yemiş-qarpız yeməyə
çağırdı.
Mən ev yiyəsinin əkdiyi, becərib yetirdiyi dirriyə tamaşa edirdim.
Gömgöy kəvər, nanə, reyhan ləklərini, uzun yemiş tağlarını, tağlardakı
yemişləri gördükcə baxmağım gəlirdi. Mənim fikrim zəhmət sevən, səliqə
sevən təsərrüfatçı kəndlilərdə idi. Mirzə Qulam isə danışırdı. O, elmin
xeyirli şey olduğundan, oxumağın lüzumundan, özünün qocalmağına
baxmayaraq dərsə artan həvəsindən, çoxdan mənim kimi bir dost
axtarmağından deyirdi. Ev yiyəsi, görünür, onun xasiyyətini bilirdi,
səsləndi:
- Mirzə, qonağı yorma! Sənin çənənə hər adam dözə bilməz axı!
Mirzə ev yiyəsinin sözünü zarafat sayıb güldü.
- Ələkbər, - dedi, - sənin bu qonağın lap mənim ürəyimə yatan oğlanmış.
A sağ olmuş, bizi nə üçün indiyəcən tanış eləməmisən?
Söhbətimiz elə tutur ki, gəl gör!
Ev yiyəsinin başqa qonaqları da vardı. Hamı evin qabağında qoyulan və
üstünə xalça salınan taxda əyləşdi, yemişi kəsib dilimlədilər.
Qonaqlar yemiş yeyirdi. Mirzə Qulam danışırdı. Ancaq indi onun
sözünə qulaq asan azdı. Ona görə də danışanda mənim üzümə baxırdı. Mən
başımı aşağı salırdım.
Mən tələsirdim. Qalxıb gedəndə, Mirzə Qulam ev yiyəsi ilə bərabər bir
qırx-əlli addım məni poçt yoluna qədər ötürdü. Addımbaşı elmdən,
mərifətdən, səxavətdən, sədaqətdən dəm vururdu. Əlimi sıxıb ayrılanda,
söhbətinin yarımçıq qaldığına heyifsiləndi, çox xahiş etdi ki, şəhərə
gedəndə mütləq onu axtarıb tapım. Adresini də dedi. Xahiş elədi ki,
dəftərimin qulağına yazım.
- Yadımda qalar, - dedim, - arxayın olun.
Ayrılandan sonra daha mən Mirzə Qulamı görmürdüm və tamamilə
unutmuşdum. 1930-cu ilin yayında təzəcə tətilə çıxmışdım. Yay maaşını da
almışdım. Cibim dolu, kefim saz idi. Gürcüstan kurortlarından birinə
istirahətə getməyə hazırlaşırdım. Şəhərə gəlmişdim. Balaca, səliqəli, sulu,
ağaclı, bağlı-bağçalı rayon şəhəri yay vaxtı yaxşı olur. Dost-aşna hər
tərəfdən məzuniyyət alıb gəlir. Yar-yoldaşla
Dostları ilə paylaş: |