24
Bakıxanov onu ayağa qaldırır:
- Mən sənin günahından keçirəm. Amma ağılla iş görməyi unutmayın,
hər şeydən tez
qəzəbnak olmayın. Bəlkə mən general yox, adi adamam. Uşaqlarımı yetim, gözüyaşlı qoymağı
özünüzə necə rəva bilirdiniz?!
Bu, podpolkovnik Arnold Zissermandan düz yüz il sonra Abbasqulu ağa Bakıxanovun
general olmasını təsdiq edən ikinci faktdır.
Ensiklopedik biliyə malik olan Abbasqulu ağa Bakıxanov ötən əsrin əvvəllərində
Qafqazda yaşayan qabaqcıl ziyalılarla yaxın dost olmuşdur. A.S.Qriboyedov, V.K.Küxelbeker,
N.N.Muravyov, S.A.Sankovski, Şərq dillərinin, Şərq tarixinin bilicisi kimi tanınmış polkovnik
Abbasqulu ağadan fəxrlə söhbət açırlar.
Hələ 1829-cu ilin oktyabrında Ərzurum döyüşlərində A.Bakıxanovla birgə fəaliyyət
göstərən dekabrist yazıçı A.Bestucev-Marlinski Abbasqulu ağanın tatar (azərbaycanlı - Ş.N.)
süvarilərinin cəsarətli mayoru kimi öz ləyaqətinə görə bütün zabitlərdən qat-qat yüksəkdə
dayandığını “hərbi antikvar” hekayəsində məhəbbətlə təsvir edir:
“Bu an qapılar açıldı və bizim tatar süvarisinin cəsur mayoru Abbasqulu ağa daxil oldu.
O, yüksək dərəcədə savadlı və nəcib bir şəxsdir”.
Rus-türk müharibəsindən sonra mayor Abbasqulu ağa Bakıxanovun döyüş xidmətləri
layiqincə qiymətləndirilib. 1829-cu il iyunun 24-də Xorto kəndi ətrafında və həmin il sentyabrın
27-də Bayburt altındakı döyüşlərdə göstərdiyi igidliklərə görə Bakıxanov imperator tacı ilə
bəzədilmiş ikinci dərəcəli müqəddəs Anna ordeni ilə təltif olundu.
Onu da xatırladaq ki, Bakıxanov ordudakı iyirmi beş illik
nümunəvi xidmətində
imperiyanın ən yaxşı yeddi orden və medalı ilə təltif olunub. Müqəddəs Anna ordeninin ikinci
(iki dəfə) və üçüncü dərəcəsi ilə, üçüncü dərəcəli Stanislav ordeni ilə, müqəddəs Vladimir
ordeninin dördüncü dərəcəsi ilə və 1829-cu ildə İran hökumətinin ən yüksək “Şire-Xorşid”
ordeni ilə mükafatlandırılmışdır.
Abbasqulu ağa Bakıxanov 1835-ci ildə hərbi qulluqdan istefaya çıxıb Qubadakı doğma
kəndi Əmsarda elmi və bədii yaradıcılıqla məşğul olur. Altı il sonra Y.A.Qolovinin xahişi ilə
yenidən həqiqi xidmətə çağrılır. 1845-ci ildən isə Məkkə səfərinə yola düşür.
A.Bakıxanov Məkkə səfərinə yola düşməzdən əvvəl çarın qəbulunda olur. Tədqiqatçı
F.Qasımzadə, K.Məmmədov, Ə.Əhmədov və müxtəlif arxiv sənədləri də,
sübut edir ki,
Abbasqulu ağa Bakıxanovun hərbidən tərxis olunması haqqında ərizəsinə şəxsən imperator
birinci Nikolayın özü baxıb. İmperator ona ömürlük maaş verilməsinə və lazım gələrsə, yenidən
hərbi qulluğa geri çağrılmaq şərtilə hələlik məzuniyyətə çıxmasına sərəncam vermişdir.
Abbasqulu ağa Bakıxanov Peterburqda olarkən Dövlət Şurasında baş katib köməkçisi
kimi məsul vəzifədə işləyən Nikolay İvanoviç Pavlişşevlə dostlaşmışdı. Varşavada isə feldmarşal
qraf Paskeviçin şəxsi qonağı olmuşdu. Yenə Peterburqda Puşkinlər ailəsinin sevimli qonağı idi.
Bir sözlə, Bakıxanov hara səfərə gedirdisə, onu yüksək mədəniyyətinə,
ensiklopedik biliyinə
görə ali cəmiyyətlərdə çox hörmətlə qarşılayırdılar.
Bir neçə ay Varşavada qalmışam,
Hər cür eyşü-işrətdən kam almışam.
Çox adamla tanış oldum, mötəbər,
Həvəs əhli, hər bir işdən baxəbər
Şəxslərlə məclislərdə - oturdum,
Hər mədəni cəmiyyətə baş vurdum.
Eldə, obada ağız-ağız gəzən bir əhvalat da subut edir ki, Abbasqulu ağanı imperator
şəxsən tanıyıb.
... Bakıxanov Peterburqda olanda imperator birinci Nikolayın qonaqlıq məclisinə dəvət
olunur. Çara və arvadına çatdırırlar ki, Qafqazdan gələn qonağın ömründə dilinə içki dəyməyib.
İmperatorun arvadı qürrələnərək söyləyir ki, mən Abbasqulu ağaya şərab içirdərəm. O, bir qədəh
şərabı qızıl podnosa qoyur və özü gətirib Bakıxanova təqdim edir. Padşahın arvadının şərab
25
təqdim etməsi qonaq üçün ən yüksək hörmət sayılırmış. Abbasqulu ağa ayağa qalxıb podnosdan
qədəhi götürür və üzünü imperator birinci Nikolaya tutaraq deyir:
- Ey mənim həşəmətli hökmdarım, siz deyirsiniz bu şərabı için, allahım deyir içmə,
hansınızın sözünə baxım?
Çox dindar olan çar birinci Nikolay bir anın içində:
- Əlbəttə, allahın - söyləyir.
Abbasqulu ağa Bakıxanov qədəhi qaytarıb padşah arvadının əlindəki podnosa qoyur.
Çar üsul-idarələri qarşısında öz xalqını müdafiə etdiyinə, xüsusilə, 1837-ci il Quba
üsyanına görə Abbasqulu ağa Bakıxanovun başı çox ağrılar çəkdi. Qardaşı Cəfərqulu ağa
vəzifədən çıxarılıb Bakıya sürgün olundu, əmisi oğlu və qaynı Əlipaşa ağa qiyamçılar tərəfindən
öldürüldü, üsyançılar kütləvi həbs olundu. Onlardan 42 nəfəri hərbi-siyasi məhkəmədə
mühakimə olunmaq üçün Bakıya göndərildi. Həmin illərdə Əlahiddə Qafqaz ordusunun
komandanı baron Q.V.Rozenin fitvası ilə Bakıxanovun “qol-qabırğası” sındırıldı. 1837-ci ilin
oktyabrında usyan iştirakçılarını istintaq etmək üçün qraf Vasilçikov Qubaya ezam olundu.
Baron Rozen Peterburqa göndərdiyi tamamilə məxfi məktubunda yazırdı: “Bakıxanovlar
ailəsini Rusiya hökumətinə qarşı xainlikdə təqsirləndirmək üçün əlimizdə heç
bir sübut yoxdur,
amma nəinki Bakıxanovlar, hətta hər hansı bir müsəlman haqqında qəti demək olmaz ki, səmimi
qəlbdən bizə bağlıdır. Kim qəti deyə bilər ki, həmin bu ailə başqa bir şəraitdə düşmənlərə
qoşulub əleyhimizə çalışmayacaq?..”.
Quba üsyanında Bakıxanovlar ailəsini və şəxsən Abbasqulu ağanı günahlandırırdılar. Ona
görə də “Quba sakini, podpolkovnik Abbasqulu ağa bəzi izahatlar” üçün zati-alilər (baron Rozen
- Ş.N.) tərəfindən Tiflisə çağrılmışdı.
A.Bakıxanovu Qubadan, xalqdan belə uzaqlaşdırdılar. Abbasqulu ağa da bütün bu ağrı-
acıları unutmaq üçün dostu qraf feldmarşal Paskeviçin yanına, Varşavaya səfər etdi. Qafqaza
qayıtmaq istəmədiyini və onun nələr çəkdiyini yaxşı duyan Paskeviç dostuna kömək etmək üçün
təşəbbüs göstərdi. O, xarici işlər naziri qraf K.V.Nesselrodeyə rəsmi məktubla müraciət etdi:
“İran müharibəsində Abbasqulu ağanın fəaliyyətindən çox razı idim.
Fars dilində mükəmməl
biliyi və yorulmadan çalışmağı bizim üçün faydalı oldu. İran dövləti ilə məktublaşmamız onun
əlindən keçirdi və beləliklə, iranlılarla əlaqələrimizdən, İranda yürütdüyümüz siyasətdən
xəbərdar idi. Abbasqulu ağanı mütləq qulluğumuzda saxlayıb Qafqaz müsəlmanlarına
göstərməliyik ki, hökumətimiz bizə can-başla xidmət edənlərin qədrini bilir, bir daha qətiyyətlə
bildirirəm ki, Bakıxanov Xarici İşlər Nazirliyinin sərəncamında qalmalıdır.
Xarici İşlər Nazirliyində işə düzəlmək üçün yeddi ay Varşavada, iki ay da Peterburqda
gözləyən Abbasqulu ağa Bakıxanov uzunmüddətli məzuniyyət götürüb 1834-cü
ildə Qafqaza
qayıdır. O, vəzifənin puçluğuna, “hər yüksək mədəni cəmiyyətin saxtalığına” və müqəvva kimi
gəzən fraklı məmurların boş-boş danışıqlarına, ağlasığmaz vədlərinə nifrət edərək yazırdı: “Bir
çox qəribə işlər və saysız təəccüblü əsərlər gördüm. Hər bir ölkədə, hər bir işdən bilik və
təcrübəmi artırdım. Get-gedə cəhalətim azaldı. Yavaş-yavaş xəyalət və təsəvvüratımın puçluğu
aydınlaşdı və gördüm ki, dünyanın yüksək mənsəbləri çox alçaqdır və bizim əziz saydığımız
tədbirlər bir sərxoşun ağıl sınamasına bənzər; çünki mal və dövlət hər halda puç olacaq,
ixtiyar
və iqtidar əldən gedəcəkdir... Şəxsi ləyaqət olmadan, nəsəb və sülalə şərafəti qürbətdə naməlum,
Vətəndə isə məzəmmətə məruzdur. Bunları təkyə etmək mənasızdır, etibar ediləcək və
arxalanacaq bir dövlət varsa, o da hər halda elm və ədəbdən ibarətdir.”
Qalan ömrü keçirərəm firavan,
Şükr edərəm allahıma hər zaman.
Qüdsi, xoşdur Əmsar adlı məskənin,
Şəhərlərdən çox üstündür öz kəndin.