265
ALTINCI FƏSİL
ORTA ƏSRLƏR
Xristianlıq və fəlsəfə
Bizim eranın dördüncü əsrinin sonunda Roma imperiyası iki
hissəyə bölündü və bundan bir qədər öncə isə xristianlıq aparıcı dövlət
dini oldu. Bu zaman (375-568) german tayfalarının yerdəyişməsi baş
vermişdi ki, bu da qərbi Roma imperiyasının tənəzzülünə gətirib
çıxardı. Antik dövr başa çatdı, Orta əsrlər başladı
112
.
Öncə xristianlığın Roma imperiyasının aparıcı dininə
çevrilməsindən sonra baş verən bəzi dəyişiklikləri nəzərdən keçirək və
sonra Roma imperiyasının orta əsr cəmiyyətinə keçidi ilə bağlı
dəyişikliklər üzərində dayanaq.
Artıq o barədə danışılmışdır ki, ellinist-Roma dövrünün sosial
şəraiti, görünür ki, siyasətdən müəyyən dərəcədə ayrılmanı və nəzəri
fəlsəfəyə marağın itirilməsini şərtləndirmişdir. Mənafelər əsasən etik
məsələlərlə məhdudlaşırdı, onların da mərkəzində fərd dururdu.
Amma Son antik dövr ərzində bu "həyati fəlsəfə" də getdikcə daha
çox məyusluq doğururdu. İnsanlar öz daxili dünyalarında fövqəltəbii
başlanğıcın axtarışına üz tuturdular. Onlar müstəsna dərəcədə ağır
həyati problemlərinin həllini dini sferada axtarırdılar. Neoplatonizm
(və müəyyən dərəcədə son stoisizm) oyanmış bu dini yönümün ifadəsi
oldu, xristianlıq burada xalq içərisində yayılmaq üçün əlverişli zəmin
tapdı.
Xristianlıq hər bir kəsə müraciət edirdi. O, hər bir kəsə ümid
verirdi. Siyasi hüquqsuzluğun, maddi rifah halının olmamasının və
fiziki əzabların əksinə olaraq, zülmün, qüvvənin zəifliyinin, xarakterin
zəifliyinin əksinə olaraq, ümid hər bir kəs üçün mövcuddur.
Xristianlıq bəyan edir ki, yerdəki həyat dramatik tarixi prosesin tərkib
hissəsidir, onun sonunda isə hər bir kəsi əzabların və bu həyatın
ədalətsizliklərinin müqabilində ədalətli mükafat gözləyir. Hər şeydən
yüksəkdə Tanrı-Ata durur, o, dünyanın yaradıcısıdır, mərhəmətli,
həmişə ədalətli və həmişə haqlı olan ruhdur.
Bəs, ilk xristianların ellinistik intellektual həyatla münasibəti
necə idi? İntellektuallar yunan və ellinistik fəlsəfə ruhunda tərbiyə
112
"Orta əsrlər", medium aevum, adı retrospektiv olaraq o kəslər tərəfindən
verilmişdir ki, onlar Antik dövr ("qədim dövr") və Renessans (antik
mədəniyyətin "dirçəlişi") arasındakı zaman intervalını Qaranlıq zəmanə
olaraq nəzərdən keçirmişlər.
266
olunmuşdular və Bibliyada təsvir olunandan tamamilə fərqli bir
dünyada yaşayırdılar. Xristian teoloqları bu intellektuallara necə cavab
verməli idilər? Onlar onları xristianlığa gətirmək üçün Bibliyanı
onların dilinə "tərcümə etməyə" çalışmalıdırlarmı? və ya onlar bütün
yunan fəlsəfəsini bir bütpərəst yanılma kimi mühakimə etməli və
intellektuallarla Bibliyanın dilində danışmalı idilərmi?
İki strategiya göz qarşısında idi. Birincini müəyyən anaxronizm
qarışığı ilə "katolik" adlandırmaq olar - bütpərəst fəlsəfi ənənə də
həmçinin Tanrı tərəfindən yaradılmışdır. Elə buna görə də, ona
müsbət yanaşmaq və xristian təlimini fəlsəfənin köməyi ilə şərh
etməkdən çəkinməmək gərəkdir. İkinci strategiyanı "protestant" (və ya
"fundamentalist") adlandırmaq olar - xristian həqiqəti yalnız
Bibliyada, xüsusən Yeni Vəsiyətdədir. Bu həqiqət yunan fəlsəfəsi
kimi bütpərəst ənənə ilə təhrif olunmamalıdır.
Birinci strategiya daha effektiv oldu və İncilin mənasını yunan
və ellinistik fəlsəfənin köməyi ilə daha anlaşıqlı etmək səyləri
nəticəsində xristian teologiyasının yaranmasına gətirib çıxardı.
Xristian teologiyası apologetika, yəni xristianlığı o günlərin əsasən
qeyri-xristian intellektualları tərəfindən irəli sürülən etirazlardan
müdafiə kimi başladı. Öncə xristianlığın və neoplatonizmin sintezi baş
verdi, baxmayaraq ki, son stoisizm də müəyyən əhəmiyyətə malik idi.
Bu teoloji sintez təqribən III əsrdən XII əsrə kimi, yəni demək olar ki,
bütün Orta əsrlər boyunca üstünlük təşkil etmişdir. XIII əsrdə qərb
xristian dünyasında Aristotel məşhurluq qazanır və xristian təlimi
aristotelizm ilə sintez olunur. O zamandan da bu sintez Roma katolik
kilsəsinin fəlsəfəsi olur.
Orta əsrlərdə məhz fəlsəfə və teologiya həqiqi idraka iddialı
olan fəaliyyətin intellektual formaları idilər. (Təbiətşünaslıq bu sözün
müasir mənasında son Orta əsrlərə qədər Avropanın mədəni həyatında
çətin ki, mövcud ola bilərdi). Elə buna görə də, mərkəzi mövzulardan
biri, təbii ki, inamın və zəkanın qarşılıqlı münasibətləri mövzusu oldu.
Mənəvi və intellektual fəaliyyətin bu iki növü bir-birinə münasibətdə
müəyyənləşməli idilər. Hansı məsələlər fəlsəfəyə və hansı məsələlər
teologiyaya aiddir? Qeyd edək ki, Renessansdan sonra təbiətşünaslığın
və fəlsəfənin (və teologiyanın) fəaliyyət sferalarının ayrılmasının
analoji problemi yarandı.
Orta əsr fəlsəfəsinin və teologiyanın sıx əlaqəsi çox zaman belə
təsəvvür edilir ki, sanki teologiya fəlsəfəni, obrazlı deyilsə, öz buzlu
qucağına sığır. Fəlsəfə sanki "əziyyət çəkən" tərəf kimi təqdim olunur.
Lakin eyni ilə təsdiq etmək olar ki, məhz yunan və ellinistik fəlsəfə
xristian teologiyasına "zərər vurmuşdur". Axı teoloji müddəalar
(doqmatika) ellinistik (neoplatonçu) filosofların istifadə etdikləri dillə