254
bütün hər şey özünü təkrar edirsə, onda dünyanı yaxşılaşdırmaq
mümkün deyildir. Bizim edə biləcəyimiz ən yaxşı şey – səbir ilə
dözməkdir. Biri imperatordur, başqası isə kölədir və bununla heç nə
etmək olmaz. Biz yalnız bizim üçün ayrılmış rolu ləyaqətlə oynaya
bilərik. Tarixin oxşar tsiklik fəlsəfəsi fatalistik və antiinqilabi ola
bilər. Lakin bu, heç də məcburi deyildir. Bəs, əgər bu özünü
təkrarlayan dövran onu nəzərdə tutursa ki, onun müəyyən
mərhələsində biz üsyan edirik və ya ictimai reformaları həyata
keçiririk?
Roma stoiklərinin bəzilərində biz, ən azı, sosial reformaları
həyata keçirmək arzusunu görürük. İnsanların sadəcə olaraq bərabər
olduqlarını və bununla heç nə etməyin mümkün olmadığını düşünən
kiniklərin əksinə olaraq, Roma stoikləri güman edirdilər ki, hamı,
prinsipcə əslində deyil, qanun qarşısında bərabərdir. Bərabərlik yalnız
məqsəd olaraq mövcuddur. İnsani qanunvericilik və insani siyasət bu
idealın mümkün ölçüdə reallaşma vasitəsidir.
Ədalətli təbii qanunla Roma imperiyasının qanunlarının aşkar
bir surətdə qeyri-identikliyi sosial tənqidin rüşeymini özündə
daşıyırdı. Sonradan biz görəcəyik ki, real olaraq mövcud olan
ümuminin (imperiya qanunlarının) və ideal ümuminin (təbii qanunun)
qarşı-qarşıya qoyulması imperator və papa hakimiyyətlərinin bölgüsü
üçün nəzəri əsas olacaqdır.
Roma hüquqşünasları stoiklərə, ümumiyyətlə yaxın idilər və
qanunların və hüququn tədqiqatı kimi hüquq elminin əsaslarını
qoydular.
Bizim tərəfimizdən xatırlanan fəlsəfi təlimləri bəzən sokratik
məktəblər adlandırırlar, belə ki, onlardan hər biri öz üsuluna malik
olsa da, Sokrat irsindən çıxış edir. Onlar üçün ümumi olan - Sokratın
fəziləti xoşbəxtlik kimi şərh edən baxışı və «fəziləti müəyyən mənada
öyrənmək olar» inamı idi.
Yuxarıdakı şərhin xarakteristikasına söykənsək bu cərəyanlar
belə bir suala cavab verməyə çalışmışlar ki, fərdin şəxsi xoşbəxtliyi
necə təmin oluna bilər? Əgər belə isə, onda biz, görünür, belə bir
nəticəyə gələrik ki, təklif olunan "həyati-fəlsəfi" cavablardan heç biri
qənaətbəxş deyildir. Cavabların bəzilərində güman olunur ki, maddi
anlamda xoşbəxt fərd rifah halına malikdir, amma belələri antik
dövrdə nisbətən az idi. Bütün cavabları birləşdirən o idi ki, onlar heç
də həmişə bədbəxtliyin qarşısını almağa qabil deyildilər. Hətta ən
əqidəli stoik belə heç də həmişə özünü məcbur edə bilməzdi ki, ağır
və ölümcül təhlükəli xəstəlik halında özünü xoşbəxt hiss etsin. Həyat
fəlsəfəsinin bu təlimlərindən heç biri hər bir kəsin şəxsi xoşbəxtliyini
təmin etmək iqtidarında deyildi. Antik dövrün sonlarına doğru belə bir
255
nəticəyə gəldilər ki, insanlar üçün insanlar tərəfindən yaradılan bu
təlimlər vəd etdiklərini yerinə yetirə bilmir.
Belə olduğu halda xoşbəxt həyatı necə təmin etmək olar?
Cavab lap bizim yanımızdadır: fövqəltəbii vasitələrin köməyi ilə,
dinin köməyi ilə. Antik dövrün sonunda ehtiraslı dindarlıq bütün
dünyanı sardı.
Neoplatonizm
Neoplatonizm (Plotin, Plotinus 205-270) dindarlığı ifadə
etdiyinə iddia edir. Bu təlimdə fərd nəhəng kosmoloji nizama
yerləşdirilir, şər varlığın nöqsanı olaraq, onun iştiraksızlığı, yoxluğu
olaraq başa düşülür, cisim (materiya) qeyri-varlıq olaraq, ruh isə
varlıq olaraq anlaşılır. Burada məqsəd ruhun dünya ruhu ilə vəhdətinə
(unio mystica) nail olmaq üçün özünün ölümə məhkum olan
qabığından (bədəndən) xilas olmasıdır.
Neoplatonizm həyat üslubu barədə nəsihət deyildir, fövqəltəbii
qüvvələr haqqında təlimdir, baxmayaraq ki, bəziləri, onu görünür ki,
həyat haqqında konkret dini təlim kimi nəzərdən keçirirdilər.
Bu dini ehtiras özünün qaneedici ifadəsini ilk dəfə olaraq
xristianlıqda, onun canlı şəxsləndirilmiş tanrı və səmavi cənnət
ideyalarında tapdı. Dördüncü əsrdən başlayaraq xristianlıq Roma
imperiyasının rəsmi dini oldu. Antik dövr keçmişə döndü, astanada isə
xristian Orta əsrləri idi.
Antik elmlər
Biz artıq qeyd etmişik ki, antik dövrdə fəlsəfə və elm
arasındakı fərqləndirici, ayırıcı xətt kifayət qədər dəyişkən idi. Buna
baxmayaraq biz bu vaxta qədər əsas diqqəti fəlsəfi ideyalara vermişik.
İndi isə biz, praktik mülahizələr ucbatından yalnız qısa xülasə ilə
məhdudlaşmalı olsaq da, antik elmin bir sıra əsas sahələrinin
yaranması və inkişafı üzərində dayanaq.
Tarixşünaslıq
Ölçüyəgəlməzi axtarmağa meylli olan spekulyativ kosmoloji
ənənələrin əksinə olaraq tarixçilər Herodot (Herodotus, təqribən, 484-
425 b.e.ə.) və Fukidid (Thucydides, 460- 400 b.e.ə.) kosmoloji
spekulyasiyadan daha çox təcrübəyə istinad edirdilər və dəyişiləni
özlərinin tədqiqat obyekti etdilər.
Onlar zaman və coğrafi bağlardan məhrum mifoloji
hadisələrdən fərqli ("... Lap çoxdan... ") olan, müəyyən zamanda və
256
müəyyən yerdə baş verən hadisələr barədə danışırdılar. Herodot və
Fukidid keçmişdə baş verən hadisələrin izahını psixoloji amillər və
dövlətlər arasında güc münasibətləri kimi nisbətən aşkar səbəblərin
köməyi ilə axtarırdılar. Əlbəttə ki, Herodotun dünyaanlamında ilahi
qüvvə də müəyyən bir yer tuturdu, amma həmin o ilahi qüvvə, tarixi
hadisələrin nəzərdən keçirilməsi zamanı nəzərə alınması zəruri olan ,
qabaqcadan söylənməsi mümkün ola bilməyən tale olaraq çıxış
edirdi.
Bu tarixçilərin əsərlərində elmi təfəkkür üsuluna keçid
müşahidə olunur. Yunan naturfilosofların əksəriyyətinin əksinə olaraq
Herodot və Fukidid keçici və dəyişkən olanı tədqiqatın vacib obyekti
kimi nəzərdən keçirirdilər. Bununla da, onlar elmi tədqiqatın empirik
idealına faktiki olaraq yaxın idilər, bu ideal isə mövcud dəyişkən
reallığın müşahidə və təsvir olunmasından ibarətdir. Bu tarixçilər
dəyişilən şeylərin arxasında gizlənən daimi elementlə bağlı olan
rasional və çox zaman yoxlanılmayan spekulyasiyalarla isə məşğul
olmamışdılar.
Təbabət
Sokrataqədərki filosofların nəzəri spekulyasiyalarının əksinə
olaraq Hippokrat (Hippocrates, təqribən, 460-375 b.e.ə.) Herodotun və
Fukididin tarixin təsviri sahəsinə tətbiq etdikləri empirik-elmi idealı
təbabətə tətbiq etdi. İnsan spekulyasiyalara deyil, müşahidələrə və
praktik təcrübəyə əsaslanmalıdır. Hippokrat o antik ənənəyə məxsus
idi ki, o, təcrübəyə, faktlara oriyentirli idi.
İndi Hippokrat, ehtimal ki, daha çox etik təbabət kodeksinin
Hippokrat Andı adlanan formulirovkası ilə məşhurdur.
"Apollona, Asklepiyə, Gigiyenaya və Panakeyaya və bütün
tanrılara və ilahələrə AND İÇİRƏM, onları şahid gətirirəm ki, öz
gücümə və düşüncələrimə uyğun olaraq aşağıdakı vədimi və yazılı
öhdəliklərimi vicdanla yerinə yetirəcəyəm: mənə həkimlik sənətini
öyrədəni valideynlərimlə bir hesab edəcəyəm, əlimdə olan nemətləri
onunla bölüşəcəyəm və zərurət olduğu halda ona onun ehtiyaclarıni
ödəyəcəyəm; onun nəslini öz qardaşlarım hesab edəcəyəm və əgər
onlar istəsələr, bu sənəti onlara heç bir qarşılıq gözləmədən və heç bir
müqavilə olmadan öyrədəcəyəm; nəsihətləri, şifahi dərsləri və təlimdə
olan hər bir şeyi öz oğullarıma, öz müəllimimin oğullarına və tibbi
qanunla və andla öhdəlik götürdüyüm şagirdlərə öyrədəcəyəm, amma
qalan heç bir kəsə. Mən öz gücüm və ağlım yetdiyi qədər xəstələrə
faydalı olacağam, heç bir zərərə və ədalətsizliyə yol verməyəcəyəm.
Mən məndən öldürücü vasitələr istəyənlərə bunu verməyəcəyəm və
Dostları ilə paylaş: |