32
sayılan Orest və Pilad həm də yaxın qohum idilərsə, tələbə yoldaşımız tam yad
adamlarla dostluq edirdi, əgər Pilad dayısı oğlu Orestə görə, o, məhkəməyə gəlib
çıxmasa, edama məhkum edilməyə hazır idisə, mərhum dostumuz başqaları naminə öz
üzərinə olduqca ağır yükü də götürməkdən çəkinmirdi. Nələrdən agah olsaq da, onun
xatirəsi qarşısındakı qəbahətimizi heç cür özümüzə bağışlaya bilməyəcəyik.
Azacıq dərinə nüfuz etdikdə görürsən ki, təkcə dərk edilən, sistemləşdirilən və
müalicə yolları, qismən də olsa bilinən xəstəliklər deyil, həyatın gözə görünməyən
ziddiyyətləri kimi, elə amillər mövcuddur ki, biz bunu nəzərə almasaq da, onlar öz
fəaliyyətlərini dayandırmır, insanın sağlamlığına, həyat tərzinə bu və ya digər dərəcədə
mühüm təsir göstərmək fürsətini əldən vermirlər.
Təbabət XXI əsrin başlanğıcında görünməmiş zirvələrə yüksəlmişdir,
xəstəliklərin daha dərindən öyrənilməsi, müayinə edilməsi imkanları yaranmışdır,
müalicə sahəsindəki bilik, vasitələr, texniki imkanlar xəstəliklərə qarşı mübarizə
arealının genişlənməsinə, müalicənin effektliliyinin artmasına şərait yaratmışdır.
Cərrahiyyə, transplantasiya sahəsindəki yeniliklər, terapiyanın zənginləşməsi bu
mübarizədə yaxşı qələbələrlə əlamətdar olmuşdur. İndi bədnam xəstəliklər ordusuna
qarşı elmi cəhətdən sınaqdan çıxmış, ən mükəmməl texnoloji vasitələrlə silahlanmış
təbabət çıxır. Və onun istedadlı nümayəndələrinə ünvanlanan, mühafizəçi mələklərə
olan kimi, minnətdarlıq hissi nəcib adamların yaddaşını heç vaxt tərk etmir, bunların
çoxluğu isə az sayda olan nankorların etinasızlığını da kompensasiya edir. Elə həkimlər
vardır ki, öz uzun müddətli praktikası dövründə üç nəsli müalicə etmələri ilə öyünə
bilər, vaxtilə xilas etdiyi uşaqlar sonra ata-anaya, baba-nənəyə çevrilərək, öz
övladlarının və nəvələrinin səhhəti ilə əlaqədar olaraq yenə də həmin həkimə müraciət
edirlər.
Lakin bu o demək deyildir ki, xəstəliklərə qarşı olan qüvvələr öz qəti zəfərini
bayram edə bilər. Əlbəttə, vaxtilə dəhşətli bəla kimi qiymətləndirilən bir sıra infeksion
xəstəliklərin yayılmasının qarşısı alınmış, onların müalicəsi daha böyük səmərə
verməyə başlamışdır. İndi köhnə epidemiyaların yerini yeni meydana gələn növlər
tutur. AİDS və ya qazanılmış immunodefisit sindromu adlanan xəstəlik Afrikanın bəzi
ölkələrində az qala XVI əsrdə Avropada «Qara ölümün» - taunun yaratdığına bərabər
olan bir qorxu haləsi meydana gətirmişdir. Toyuq və ya donuz qripi adlandırılan,
vaxtaşırı yeniləşən və həm də başqa xüsusiyyətli viruslar geniş miqyaslı epidemiya
təhlükəsi yaradır. Qloballaşma və adamların geniş kontaktları da öz növbəsində
pandemiyanın yarnmasına gətirib çıxara bilər.
Biz öz yaşayışımızda və taleyimizdə baş verən dəyişikliklərə görə məlum olan,
dərk etməyə qadir olduğumuz dünyanın təsirlərini nəzərə alırıq. Əgər kənd təsərrüfatı
bitkiləri və onların məhsuldarlığı hər şeydən əvvəl təbiətin təsirinə məruz qalırsa,
insanlar təkcə təbiətin deyil, həm də cəmiyyətin, dövrün, mühitin təsirindən kənarda
qala bilmir. İnsan orqanizmi çox mürəkkəb olduğu kimi, əslində ayrıca planeti andırır
və ona təsir edən amillər də saysız-hesabsızdır. Əgər Günəşdə baş verən bir partlayış
insanın sağlamlığını müəyyən edən cəhətlərə, onun əhval-ruhiyyəsinə təsir göstərirsə,
bizim hələ də bütünlüklə dərk edə bilmədiyimiz amillərin, digər canlı orqanizmlərin
təsirini heç cür yaddan çıxarmaq, ən başlıcası, inkar etmək mümkün deyildir. İnsan
orqanizmi təkcə hüceyrələrdən – əzələlərdən, oynaqlardan, sümüklərdən, həmçinin
33
bədəni qidalandıran qan damarlarından və onların daşıdığı həyatverici mayedən ibarət
deyildir. Əgər hüceyrələrdəki fermentlərin və ya enzimlərin fəaliyyəti dayansaydı,
onda metabolizm adlanan maddələr mübadiləsi kəsilərdi. Dar mənada götürdükdə,
hüceyrə daxilində müəyyən maddələr ona daxil olan andan son məhsulların, məsələn,
zülalların, qlükozaların və sairənin əmələ gəlməsini təmin edən aralıq mübadiləsi
mümkün olmazdı. Bu bioloji katalizator orqanizmdə maddələrin çevrilməsini həyata
keçirməklə, maddələr mübadiləsini istiqamətləndirir və nizamlayır. Ona görə də
hüceyrələrdə olan çox saydakı biokimyəvi reaksiyaları nəhəng sayda müxtəlif
fermentlər həyata keçirir. Fermentlərin çoxu canlı hüceyrələrdən alındığına görə
ferment preparatlar təbabətdə, yeyinti və yüngül sənaye sahələrində tətbiq olunur.
Bəzi alimlərə görə dünyada həyat dörd milyard il bundan əvvəl yaranmışdır
və bu Marsda baş vermişdir. Həmin vaxt Marsda oksigen çox idi, Yer səthində isə
oksigen çox az idi və həm də quru hissə Yer səthinin 2-3 faizini təşkil edirdi, qalan hissə
isə su ilə örtülü idi. Yer üzərində həyatın başlanğıcı kosmosun köməyi ilə baş
vermişdir. Kosmosdan gələn meteoritlər özlərilə həytın başlanğıcı hesab edilən
mikroorqanizmləri də gətirmişlər. Bu günlərrdə( 29 avqust 2013-cü ildə) amerikan
biokimyaçısı Stiven Bennerin tədqiqatının belə bir nəticəsi elan olunmuşdur ki, Yer
üzərində həyatın mənbəyi rolunu Mars planeti oynamışdır. Marsdan gələn meteoritlər
özləri ilə Yer səthinə həyat üçün lazım olan “tikinti materiallarını” gətirmişlər. Üç
milyard il əvvəl Marsda mövcud olan həyat hüceyrələri meteoritlər vasitəsi ilə Yer
üzərinə gəlib düşmüşlər. Həmin hüceyrələr Yer üzərindəki bütün canlıların, o
cümlədən insanın özünün mənşəyinə çevrilmişdir.
Canlıların bədənindəki kiçik hüceyrələr molekulları saxlayan kisəciklərdir.
Hüceyrənin nüvəsindəki molekula amin turşularından ibarətdir. Bu nuklein turşusu və
ya bizə DNK ( DNA yaxd da DNT) kimi məlumdur, bu isə dezoksiribonuklein turşusu
deməkdir. Nüvə iki yerə bölünür, sonra da hüceyrə özü bölünür. Nüvədəki çöpcüklər
xromosomlar adlanır, onlar irsiyyət daşıyıcılarına, başqa sözlə genlərə malikdirlər.
DNK insan genomu olmaqla irsiyyət ötürücülüyündə mühüm rol oynayır. Hüceyrənin
tarixi əslində həyatın təkamülünün tarixidir.
İnsan bədəni adlanan meşə, həm də onun ətrafı mikroorqanizmlər adlanan
«bitkilərlə» doludur, onlar əsasən bir hüceyrəli orqanizmlər olmaqla, bakteriyalardan,
mikroskopik göbələklərdən və viruslardan ibarətdir. Mikroorqnazimlər növlərinin
nəhəng müxtəlifliyi ilə seçilir. Ağlasığmauan miqdarın tiraniyasının öhdəsindən
gəlmək də çox çətindir. Onlar ümumiyyətlə, təbiətdəki maddələrin dövriyyəsində
böyük rol oynayır, həm də fermentlər kimi yeyinti və mikrobiologiya sənayesində
istifadə olunurlar. Patogen mikroorqanizmlər isə bitkilərin, heyvanların və insanların
xəstəliklərini əmələ gətirir. Göründüyü kimi, mikroorqanizmlər insan bədəni üçün heç
də hüceyrələrdən geri qalmayan əhəmiyyətə malikdir, lakin həm də bədəndə müəyyən
xəstəliklərin yaranmasında rol oynamaqla, onlar müəyyən bir bəla mənbəyi hesab
olunur. Buradan belə nəticəyə gəlmək olur ki, mikroorqanizmlər ambivalet – ikili
xüsusiyyətə malikdir, insan bədəni üçün həm dostdur, həm də düşməndir
Ümumiyyətlə, insan bədəni uzun müddət bir sirli aləm olaraq qalmışdı və
təbabət sahəsində çalışan dahilər öz təlimləri, icadları ilə bu naməlum dünyanın bir sıra
cəhətlərini kəşf edə bilmiş və bu biliklər müalicə işinin sərəncamına verilmişdir.