95
altından aşağa sürüşdü. Onun nəfəsi də dördnala qaçan atın
nəfəsi kimi fışıldayırdı. Böyümüş gözlərindəki ifadə Qəzənfərin
elə bu dəqiqə huşunu itirmiş adam kimi qışqırıb yıxılacağını
xəbər verirdi. O özünü büsbütün unutmuşdu. Cəsarətini toplaya
bilmirdi; elə hey udqunur, irəli, geri, sağa, sola əyilən bədənini
qılçaları üzərinə zorla çəkib düzəldirdi. Birdən ona haradansa
ilahi bir fərasət gəldi. O əlləri içində istilik, alnında hərarət
duydu, qulaqlarının açıldığını, ürəyinin yavaş döyüldüyünü,
baldırlarının çimilləşdiyini, kürəklərini titrəyib qızışmağa
başladığını hiss etdi. Qəzənfər dəmiri iki əlli göyə qaldırdı.
Lakin ona bir anda hakim olan gücsüzlük, süstlük Qəzənfərin
qollarını üsulluca qatlayıb başı üzərinə, sonra isə önünə endirdi.
Bu dəfə ki, taqətsizlik onu əldən elə saldı ki, o ayaq üstə belə
durmağı bacarmayıb döşəməyəmi, yaxud Əmirin üstünə
yıxılacağından dəhşətə gəldi. Qəzənfər öz mətanətini son dəfə
köməyə çağırdı. Onun canı yenə buz kimi soyudu. Bədəni onu
dala dartdı, ayaqları yerdən qopdu. Qəzənfər divaradək dalı-dalı
geri getdi. Kürəklərini divara dayayandan sonra özü ilə cəsarət
gətirən bayaqkı istilik onun canını yenidən bürüdü. O yeni
qüvvət, yeni cəsarətlə irəli gəldi. Yerdə yastılanmış ədyalı bir
əlilə götürüb dəmiri başı üzərinə qaldırdı. Əmirin gərnəşib üzü
üstə çevrilməsi Qəzənfərin əlini havada saxladı. Qəzənfər geri
çəkildi: «Mən onu niyə öldürürəm? Sevdiyinə görəmi? Sevənlər
ölməli, öldürülməlidir? Bəs, məni niyə öldürən yoxdur? Əmir
mənə neynəyib? Namusuma sataşıb? Mən nə qədər
ağılsızammış! Aliyə mənim nəyimdir? Heç nəyim! Nolsun ki,
sevirəm. Məyər təkcə bununla iş bitir?! Onu danışdırmışammı,
ona ürəyimi açmışammı, ondan «hə» cavabı almışammı? Yox!
O da məni sevirmi? Bilmirəm. Əmirin təqsiri nədir? Heç nə!»
Qəzənfər Əmirin kayutundan çox ehtiyatla çıxdı. Lülə dəmiri və
ədyalı öz çarpayısının üstünə atıb Aliyənin qapısına yaxınlaşdı:
«Yatmış olar. Gecənin bu vaxtı onun yuxusuna haram
qatmayım, səhər danışaram.» deyib göyərtəyə qalxdı. Qəzənfər
göyərtədə təzəcə gəzişirdi ki, dalğaların şappıltı və guppultusuna
96
qarışıb gələn zəif bir səs eşitdi, bu, taqətdən düşmüş insan səsi
idi. Səs ikinci dəfə xırıltılı çıxdı. Elə bil kimsə boğulurdu.
Gəmidən yıxılanmı oldu? Ola bilməz!, Bəs açıq dənizdəki bu
fəryad, bu çağrış nədir? Axşam çağı matorsuz qayıqla limandan
az aralı dalğasındıran bərənin yanına balıq ovuna gələn qız və
oğlanın sahilə qayıda bilməməsi xəbəri ildırım sürətilə bütün
şəhərə yayılmışdı. Xilasedici gəmilər onları saatlarla axtarıb
tapa bilməmişdi. Axşamın dəniz üzərinə çökən qaranlığı
«ovçuları» öz qoynuna alıb görünməz etmişdi. Maxaçkalanın
yerli şimali-qərb küləyi onların qayığını açıq dənizin Dərbənd
rayonuna sarı qovmuşdu. Bu hadisə dənizdə olan bütün gəmilərə
radioqramla xəbər verilmişdi. Təyyar da radioqramı bir az
bundan qabaq, yəni Qəzənfər göyərtədə gəzişən zaman almış,
lakatoru işə salmış, növbətçi matrosun birini bayıra göndərib
qulağının səs-səmirdə olmasını tapşırmışdı. Lakator qızana,
ekranı işıqlanıb ətrafı göstərənəcən Qəzənfər rubqaya qaçmışdı.
– Səs eşitdim, səs!
– Hayanda? Bu yanda. Gəminin sağ burun tərəfində.
Təyyar eşiyə atıldı. Səs borusunu ağzına yapışdırıb qışqırdı:
– Ehey, ehe. e. ey... Dalğaların yürüşü gəminin burnundan
idi. Külək Təyyarın səsini geri apardı.
– Xaric işıqları da, projektorları da yandırın, tez! Təyyar
tələsə-tələsə rubqadan dürbini götürüb boynundan asdı.
Teleqrafla gəminin sürətini azaltmağı maşın şöbəsinə əmr verdi.
Projektorun gur işığını dənizə yönəltdi, dənizin üzərində
gəzdirdi. – Qışqırın, haraylayın, göz-gözdən iti olar, yaxşı baxın.
Növbətçi şturman da, matros da, Qəzənfər də durbin
götürmüşdü. Projektorun işığını səkkiz diqqətli nəzər izləyirdi.
Qəzənfər bağırdı. – Odur, gördüm. – Harada, harada? – İşığın
axırına bax, axırına. Görürsənmi? – Gördüm. Təyyar gəminin
burnunu o səmtə döndərməyi əmr etdi. İşığı yaxınlaşmaqda olan
qayığın üstünə saldı. Dalğaların başından enib-qalxan qayıqdan
dörd əl göyə qalxmışdı. Onların başları güclə görünürdü. Qızı
uzaqdan da tanımaq olurdu. Onun qətran kimi gur saçı ağ,
97
solğun üzünə səpələnmişdi. 13. Xilas edilənlərin vəziyyəti yaxşı
deyildi. Oğlanın halı nisbətən babət idi. Qızı isə səkkiz saatlıq
dalğalar döyüşü, tamamilə, əldən salmışdı. O, ölü kimi solğun
idi; qızdırması qırxı keçirdi. Təyyarın dərmanları onun
hərarətinin aşağı düşməsinə kömək etmirdi. Hərarəti yüksək
olan xəstənin yanaqları allanar, dodaqları quruyub qaysaqlanar,
özü inildəyər, anasını çağırar, sayıqlayıb parpılayar, bu qız elə
bil kürədən çıxarılmış qızmar, dilsiz-ağızsız bir daş parçası idi;
nə tərpənir, nə fəryad qoparırdı. Oğlanla qızı bir kayutda
rahatlamışdılar. Təyyar gəmidə xəstəyə şəfa verəcək bütün
imkanlardan istifadə etsə də bunların faydası yox idi. Xəstələrin
vəziyyəti get-gedə ağırlaşırdı. Oğlanın da hərarəti qalxmağa
başlamışdı. O bəzən sayıqlayır, qışqırır, qasırğa onları apararkən
dediyi sözləri təkrar edirdi: «Valya qorxma, qorxma, qayıqdan
möhkəm yapış! Qışqırma, biz ölməyəcəyik, ölməyəcəyik! Bu
yerli küləkdir, açıq dənizdə bu cür böyük dalğalar, güclü külək
olmayacaq.» Valya oğlanın sayıqlamalarında öz adını eşidərkən
gözlərini zorla, zülümlə açıb, bir birinə möhkəm qısılmış
dodaqlarını aralayıb, çətinliklə «da» dedikdən sonra kirpiklərini
yenidən qovuşdururdu. Aliyə qıza, Qəzənfər isə oğlana qaşıq-
qaşıq şirin südlü sıyıq içirirdi. Qızın çənəsi çox çətin açılırdı.
Aliyə, iştahsız uşağın nazı ilə oynayan ana kimi on dəqiqə
iltifatlı dil töküb sıyıqdan bir qaşıq güc-bəla ilə ona yedizdirirdi.
Qəzənfərin xəstəsi isə şıltaq deyildi, sözə tez baxırdı. Təyyar
radioqram verib vertolyot çağırmışdı. Xəbər veriləndən bir saat
sonra vertolyot gəldi. O gəminin üzərində guruldayaraq dövrə
vuranda gecə keçmişdi, artıq səhər idi. Odlu yay günəşi üfüqə
toplaşan bəyaz buludların arasından səma səyahətinə tələsir,
əldən uçan şar kimi göyə yüksəlirdi. Vertolyot yavaş-yavaş
aşağa enib lövbər atmış gəminin yüz metr hündürlüyündə öz
müvazinətini saxladı. Qarnının altından qoşa bağırsaq kimi
uzanan kəndir nərdivan salladı. Nərdivanın ayaq yerləri də
kəndirdən idi. Onun ucuna xərək də bərkidilmişdi. Hamı
göyərtəyə toplaşmışdı. Xəstələri göyərtəyə çıxarıb göyə baxır,
Dostları ilə paylaş: |