Cavablardan aydın oldu ki, bu vəzifəyə iki nəfərin (Qabil Məmmədovun və Ənvər
Əhmədovun) namizədliyi var.
Elçibəy dedi ki, bir namizəd də mən verirəm. Yanımızda oturan Oktay bəyin də namizədliyi
haqqında fikirləşin.
Bu zaman İ.Həmidov dedi ki, Qabil Məmmədovu mənə verin, o mənə lazımdır.
Yüngül müzakirədən sonra mənim Mühafizə İdarəsinə rəis təyin olunmağımı məqsədə daha
uyğun gördülər. Pənah Hüseynov isə hüquq məsələləri üzrə dövlət müşaviri İxtiyar Şirinovu
yanına çağırdı və ona dedi ki, biz Oktay bəyin Mühafizə İdarəsinə rəis təyin olunması qərarına
gəldik. İndi onunla danış, işin texniki tərəfıni həll etmək üçün nə lazımdırsa, onu elə.
İ.Şirinovla bizim uzun müddət idi ki, yaxın münasibətimiz var idi. O da bu məsələyə müsbət
münasibətini bildirərək dedi ki, mən də Oktay bəyi çox yaxşı tanıyıram və belə hesab edirəm
ki, onun Mühafizə İdarəsinə rəis təyin olunması çox düzgün qərardır.
Sonra mənə dedi ki, sabah saat 10.00-da mənim yanımda ol, sənin təyin olunma məsələnlə
məşgul olaq.
Bu sözlərdən sonra orada bugünlük mənə aid bir iş olmadığını görüb, icazə alaraq, hamı ilə
xudahafizləşib çıxdım. Səhərisi gün saat 10-da mən İ.Şirinovun kabinetində idim. O, mənim
təyinim haqqında olan fərmanı hazırladı və lazımi imzaları topladıqdan sonra mənə dedi ki,
səni artıq təbrik etmək olar. İndi sən burada gözlə, aparım İsa bəy də fərmana qol çəksin,
get işə başla.
Həmin dövrdə İsa Qəmbər Azərbaycan Ali Sovetinin sədri idi və prezident səlahiyyətlərini icra
edirdi.
İxtiyar Şirinovun qayıtmağı bir saatdan çox çəkdi. O, içəri girən kimi gördüm ki, əhvalı bir
qədər korlanıb. Mənə dedi ki, sənin məsələn bir qədər ləngiyir. Get gözlə, mən özüm səni
çağıracağam.
Bu hadisədən on gün sonra iş yerinə mənim yanıma Kamil Vəliyevlə Vaqif Hüseynov gəldilər
və Kamil bəy mənə dedi ki, Bəy xəbər göndərib, yaxın dostları evə çağırıb. Deyib ki, ola bilər
sonra bu cür imkanlarımız olmasın. O zaman Elçibəyin seçkidə qalib gələcəyi artıq kimsədə
şübhə doğurmurdu.
Axşamüstü idi və biz birlikdə Elçibəyin yaşadığı evə getdik. Orada bizdən başqa da qonaqlar
var idi.
Biz təxminən on nəfər idik və səhərə qədər oturub söhbət etdik. Əski günləri yada saldıq və
hansı məsələdən söhbət düşürdüsə, orada mütləq yada rəhmətlik Vidadi Məmmədov
düşürdü. İlk yada düşən əhvalatlardan biri də aşağıdakı idi:
70-ci illərin axırlarında bir yay günü idi. Gəcə saat üçə qalmışdı. Kamil Vəliyev, Vidadi
Məmmədov və mən bulvarda çayxanada oturmuşduq. O zaman səhərə qədər işləyən
çayxanalar var idi. Vidadi dedi ki, gedək bir Bəyə baş çəkək. Kamil dedi ki, bu saat yatmış
olar. Mən dedim ki, çətin yatsın. O bütün yazı-pozu işlərini gəcəyə saxlayır.
Biz maşına minib Bəyin yaşadığı evə gəldik. Qapını döydük. Qapını açan Bəyi biz gecə vaxtı
üçün çox qeyri-adi vəziyyətdə gördük. Yuxarıda qeyd etdiyim kimi, gecə saat üç idi. Bəyin
əynində həmişəki kimi qara kostyum, ağ köynək və qalstuk var idi. Rəhmətlik Vidadi hamıyla
zarafat edərdi və o yeganə adam idi ki, zarafatları hamı tərəfindən qəbul olunardı. Bəyin
geyimini görən Vidadi ona dedi ki, Bəy, belə görürəm prezident olmağa hazırlaşırsınız.
Həmin gecə, yəni 1992-ci ilin iyun ayının 12-dən 13-nə keçən gecə sabaha qədər biz keçmiş
günləri yada saldıq, güldük, əyləndik.
Səhər təzdən xudahafizləşib hərə öz işinə getdi. Bir neçə saat sonra Azərbaycan Dövlət Seçki
Komissiyasınm sədri Cəfər Vəliyev televiziyada çıxış edərək, Əbülfəz bəyin Azərbaycan
Respublikasının Prezidenti seçilməsi haqqında Seçki Komissiyasının məlumatını əhaliyə
çatdırdı.
İyun ayının 17-də Elçibəy Milli Məclisdə düzənlənən rəsmi andiçmə mərasimindən sonra,
Azərbaycan Respublikasının Prezidenti kimi fəaliyyətə başladı.
İyun ayının 28-də Yasamal rayon polis idarəsinin rəis müavini Çingiz Məmmədov mənə zəng
edib dedi ki, sabah saat 10-da Prezident Aparatında İxtiyar Şirinovun yanında olmalısan.
Ayın 29-u saat 10-da İ.Şirinov məni qəbul edib dedi ki, sən hələlik mühafizə idarəsində rəis
müavini kimi işə başlamalısan. Prezident bu cür qərara gəlib. Sənin fikrin nədir?
Mən dedim ki, Prezident necə məsləhət bilir, elə olsun.
Bu qısa söhbətdən sonra İ.Şirinov mənim təyin olunmam üçün lazım olan sənədləri və
imzaları toplamağa başladı. Sərəncam hazırlandı və təxminən saat üçü bir az keçmiş
Prezident tərəfindən imzalandı. İ.Şirinov idarənin rəisi general Vaqif Axundovu yanına çağırıb
məni təqdim etdi. Mən həmin gündən işə başladım. İlk öncə idarənin əsasnaməsi, strukturu
və vəzifə bölgüsü ilə tanış oldum. Mənə aydın oldu ki, təyin olunduğum vəzifə bölgüyə görə,
ancaq inzibati binaları, evləri, istirahət yerlərini və qarajları mühafizə edən polis nəfərlərinə
nəzarət etməlidir. Ona görə də Prezidentin yaxın mühafizəsi ilə bağlı məsələlər və səfər
zamanı Prezidenti müşayiət etmək mənim vəzifəmə aid deyildi.
Mən də təyin olunduğum vəzifəyə uyğun olaraq, sakitcə öz işimlə məşgul olur, inzibati
binaları, qarajları, istirahət evlərini gəzir, mühafizə nöqteyi-nəzərindən müayinə edir və
çatışmamazlıqları aradan qaldırmaq üçün tədbirləri görürdüm.
Təxminən bir ay mənim işim bu şəkildə davam etdi və bir şənbə günü Prezidentin köməkçisi
rəhmətlik Gülşad Zərbəliyev mənə zəng etdi və dedi ki, Prezident səni çağırır, tez iqamətgaha
gəl. Mən cəld iqamətgaha getdim.