də olması lazımdır. Vəzifədən başqa həm də onunla olan şəxsi münasibətin imkan verir ki,
sən keçib orada oturasan.
Mən V.Axundovun bu fikri ilə razılaşaraq prezident salonuna keçib oturdum. Bizə təzəcə çay
gətirmişdilər. Hiss elədim ki, uçaq enməyə başladı.
Nəcəf Prezidentdən soruşdu ki, sizə elə gəlmirmi ki, uçaq enməyə başlayıb?
O cavab verdi ki, bu təzliklə olmaz.
Mən durub pilotların kabinəsinə doğru getdim və qapının ağzında dayanmış polkovnik-
leytenant Ələkbərov İsmayıldan soruşdum ki, vəziyyət nə yerdədir?
O dedi ki, hər şey qaydasındadır və artıq təyyarə enişə gedir.
Mən soruşdum ki, enmək üçün hələ tez deyilmi?
Cavab verdi ki, çox sürətlə gəlmişik.
Təxminən iyirmi beş-otuz dəqiqdən sonra bizim təyyarə Bakı hava limanında yerə endi.
Təyyarədən birinci rnən çıxdım və çöldə qeyri-adi bir mənzərənin şahidi oldum. Təyyarə
limanının deputat zalı deyilən yerinin qarşısı adamla dolu idi. Demək olar ki, Respublikanın
Bakı şəhərində olan bütün rəhbər vəzifəli şəxsləri burada idi. Mən aşağı düşdüm və trapın düz
yanında İsgəndər Həmidovla görüşdüm. O hərbi səhra geyimində idi.
Mən ondan soruşdum ki, nə olub, bu adamlar niyə buraya yığılıb?
Cavab verdi ki, necə nə olub, ora bir bax, əgər siz on beş dəqiqə də gəlməsəydiniz, mən
Gəncəyə uçurdum.
Onun göstərdiyi səmtə baxanda gördüm ki, iki təyyarə və onlara yerləşə bilən qədər polis
işçisi hazır vəziyyətdə dayanıb, göstəriş gözləyirlər.
Biz maşınlara minib Prezident Aparatına tərəf yola düşdük.
Təyyarə limanından Prezident Aparatına qədər yol boyu polis nəfərləri düzülmüşdü. Mən çox
təəccübləndim ki, qısa bir zamanda bu qədər polisi bura neçə yığıblar. Bir az keçmiş
öyrəndim ki, Prezident Aparatı, Milli Məclis binası və Radio-Televiziya Şirkəti Daxili İşlər
Nazirliyi tərəfindən əlavə mühafizəyə götürülüb.
Bu faktın araşdırılması xüsusi orqanların vəzifəsinə daxil idi. Lakin Vəliyev Cavanşirlə mən bu
qərara gəldik ki, biz də öz araşdırmamızı aparaq.
İlk məqsədimiz anonim telefon zəngi etmiş adamı müəyyənləşdirmək idi. Buna nail ola
bilmədik, lakin bizə bir neçə əlavə fakt məlum oldu. Hakimiyyət dəyişikliyindən sonra mən
daha bir neçə məlumat da öyrənə bildim.
Bütün bu faktları indi acıqlamaq fikrim yoxdur, çünkü bu bildiklərim əlavə sübutlarla
təsdiqlənməlidir. Bu məlumatları məndən başqa da bilənlər var. O adamların bildikləri faktları
bir yerə toplayaraq, bu hadisəni və hadisə ilə birlikdə dövlət çevrilişi etməyi planlaşdıran
adamları da ortaya çıxartmaq olar.
Bir məsələ təkzibedilməzdir ki, həqiqətən o gün, yəni fevral ayının 10-da Elçibəyi Gəncədən
Bakıya gətirən uçaq vurulmalı və dövlət çevrilişi həyata keçirilməli idi.
Elçibəyi və onu müşayiət edən şəxsləri həmin gün ancaq təsadüf xilas edib.
1993-cü ilin əvvəllərində cəbhənin Füzuli bölgəsində vəziyyət çox gərgin idi. Ermənilərin hər
an Füzulini ələ keçirəcəyi barədə məlumatlar gəlirdi. Prezidentin göstərişi ilə Azərbaycan Milli
Məclisinin sədri İsa Qəmbər və Dövlət müşaviri Arif Hacıyev təcili olaraq Füzuliyə yola
düşdülər. Bir gün sonra Prezident yol hazırlığı barədə göstəriş verdi və səhər saat 9.30-da biz
Cəbrayıl rayonuna tərəf yola düşdük. Təxminən saat birin yarısında Cəbrayıla çatdıq. Elçibəy
İcra Hakimiyyətində oldu. Sonra rayon Mədəniyyət Evində, xəbər tutub oraya yığılmış olan
rayon camaatı ilə Elçibəyin görüşü oldu. Təxminən saat ikidə biz Cəbrayıldan ayrılaraq, Füzuli
rayonuna tərəf yola düşdük və saat üçün yarısında Füzuli şəhərinə daxil olduq.
O gün gördüyüm Füzulini mən heç vaxt yaddan çıxartmayacağam. Şəhərə girən kimi ətim
ürpəşdi. Nə bir insan səsi, nə də bir hənirti var idi. Bir evin bacasından da tüstü çıxmırdı.
Əhali şəhəri tərk etmişdi.
Bizim maşın karvanı Füzuli rayon İcra Hakimiyyəti yerləşən binanın gabağında dayandı. Bizi
İcra başçısı Nofəl bəylə bir grup cəbhəçi, Bakıdan Qadın Hüquqları Müdafiə Cəmiyyətindən
gəlmiş üç qadın və Azərbaycan Pedaqoji Universitetinin professoru Sərdar Əliyev və bir
tanımadığım adam qarşıladı.
Elçibəy həyətdə olan adamlarla görüşüb qısa bir söhbət etdikdən sonra İcra başçısından İsa
Qənbərin harada olduğunu soruşdu və Qonaq Evində olduğunu öyrəndi. O, həyətdəki
adamlarla vidalaşaraq Qonaq Evinə getmək barədə göstəriş verdi. İcra başçısı dedi ki, cənab
Prezident, Qonaq Evi Füzuli şəhərinin o tərəfindədir və döyüş xəttinə çox yaxındır. Ora
getmək təhlükəlidir. Biz bu dəqiqə İsa bəyə məlumat verərik, o bura gələr. Elçibəy ona heç
bir şey demədən maşına mindi və Qonaq Evinə getmək haqqında göstəriş verdi.
Qonaq Evinin qarşısında Prezidenti İsa Qəmbər və Arif Hacıyev qarşıladılar. Hiss olunurdu ki,
Prezidentin qəfil gəlişi onları da çaşdırıb. Onlar birlikdə içəri keçdilər. Bir qədər keçmiş Milli
Qvardiyanın komandiri rəhmətlik Tahir Məmmədov və Milli Təhlükəsizlik nazirinin birinci
müavini Sülhəddin Əkbərov da Qonaq Evinə gəldilər. Döyüş xətti Qonaq Evindən təxminən
üç-dörd kilometr aralıda idi. Qrad səslərindən qulaq tutulurdu. Tahir Məmmədov və Sülhəddin
Əkbərovun gətirdiyi əlavə qüvvələr də döyüşdə iştirak etməyə başladılar. Təxminən axşam
saat yeddidə döyüş dayandı və Prezidentə məlumat verildi ki, döyüş yerində altmışa qədər
itki verən ermənilər Füzulidən 12 km geri çəkilməyə məcbur oldular. Bu məlumatı
almamışdan saat yarım əvvəl Dövlət müşaviri Arif Hacıyev çölə çıxaraq mənə yaxınlaşdı və
dedi ki, Prezidenti buradan aparmaq lazımdır. Bura çox təhlükəlidir və ermənilər Füzuliyə girə
bilərlər. Dövlət başçısının burada ölməyi və ya əsir düşməyi böyük biabırçılıq olar.