işlərin KQB tərəfindən törədildiyini bilir, lakin bu barədə danışmağa cəsarət edən çox az
tapılırdı.
Əbülfəz bəyin dedikləri artıq öz bəhrəsini verməyə başlamışdı. KQB-nin dəhşətli xofuna
baxmayaraq, bizim adamlardan bir çoxu (Dilsuz Mustafayev, Zabil İsayev, Vaqif Cəbrayılzadə
və başqaları) buradan da alnı açıq çıxa bilmişdilər.
MƏHKƏMƏ BÖLÜMÜNDƏN ƏVVƏL
Belə bir əhvalat danışırlar: ikinci dünya müharibəsi vaxtı yazıçı Əbülhəsəni həbs edirlər.
Məhkəmənin nəticəsinin onun üçün ağır olacağı gözlənilir. Onun dostları, qohumları, yazıçılar
Səməd Vurğunun yanına gedirlər və xahiş edirlər ki, məhkəmədə Əbülhəsənin ictimai vəkili
olsun. Səməd Vurğun razılaşır.
Məhkəmə başlayır və Səməd Vurğun məhkəmədə çox parlaq bir çıxış edir. Nəticədə
Əbülhəsənin birbaşa məhkəmə zalından buraxılmasına nail olunur.
Məhkəmənin uğurlu nəticələndiyini görən dost-tanış onların hər ikisini götürüb şadyanalıq
keçirmək üçün bir yerə getmək istəyirlər. Bu zaman baxıb görürlər ki, hamı bu hadisəyə
sevinir, təkcə Əbülhəsən qaş-qabağını sallayıb.
Ondan soruşurlar ki, hamı sənə görə sevinir, sən niyə qaş-qabağını sallamısan?
O, Səməd Vurğunu göstərərək deyir ki, siz elə bilirsiniz ki, o məni qurtarmaq isləyirdi və ya
vecinə idi ki, ora məhkəmədir? O, sadəcə orada çoxlu adam görüb ideyalarını təbliğ etməklə
məşğul idi.
MƏHKƏMƏ
Əbülfəz bəyin məhkəmə prosesi 1975-ci ilin may ayının ortalarında başladı. Proses təxminən
20-25 gün davam etdi. Məhkəmə prosesi Ali Məhkəmənin binasında 3-cü mərtəbədə yerləşən
kiçik bir zalda gedirdi. Zal cəmi 25-30 adam tuturdu və ona görə də ardıcıl olaraq məhkəməni
izləmək mümkün olmurdu. İclaslar gündə iki dəfə səhər saat 10.00-da və günortadan sonra
saat 15.00-da başlayırdı. İçəri girmək istəyən gərək çox əvvəlcədən qapının ağzında özünə
yer tutaydı ki, qapı açılan kimi içəri girə bilsin.
Mənim iş yerim çox yaxında olduğuna görə, daima orada olurdum və bir neçə dəfə zala girə
bildim. İçəri girə bilməyən ən azı 150-200 nəfər bayırda, Səməd Vurğun küçəsində Ali
Məhkəmə binasının qarşısında olan kiçik bağa toplaşır və məhkəmə iclasının sonuna qədər
gözləyirdilər.
Məhkəmə prosesində mənə təsir etmiş və ola bilsin ki, başqa heç kimin də diqqətini cəlb
etməmiş bir neçə epizod haqqında yazmaq istəyirəm.
Uzun və ensiz bir zalda gedən məhkəmə iclaslarında yuxarı başda hakim (prosesə Ali
Məhkəmənin o zamankı sədr müavini Həsən Əliyev çıxmışdı) və iki iclasçı (35-40 yaşlarında
bir qadın və bir kişi) otururdu. Hakimlərdən sağ tərəfdə prokuror
Yəmən Yusifov
otururdu.
Sol tərəfdə vəkil və vəkildən sonra müttəhimlər kürsüsündə Bəy otururdu Bəydən sonra zalda
kiçik bir boş sahə var idi ki, orada əsgərlər dururdu. Zalın qalan hissəsində içəri girməyi
bacaran adamlar otururdular. Bəy elə otururdu ki, üzü məhkəmə üzvləri ilə prokurorun
arasındakı boşluğa tərəf olurdu. Və məhkəmə zalının adamlar oturan hissəsini, demək olar ki,
görmürdü.
Mən bir neçə dəfə zaldan çıxan zaman Bəyin yanına çatanda ayaq saxladım ki, ona salam
verim. Lakin bu mümkün olmadı. Çünki o mənə baxmadı, əsgərlər də məni tələsdirib zaldan
çıxartdılar.
Sonralar mən Bəydən bu oturuşunun səbəbini soruşdum. O dedi ki, qəsdən elə otururdum.
Qorxurdum ki, zalda oturan tanış-bilişi, qohumları görüb kövrələm və ifadələrimi yumşaldam.
Amma zaldan çıxanda hamını, hətta sənin dayandığını, nə isə demək istədiyini belə çox yaxşı
görürdüm.
Diqqəti cəlb edən bir başqa məsələ də bu idi ki, bütün məhkəmə prosesi ərzində
(ittihamnamənin oxunması, prokurorun çıxışı və hökmün oxunuşu xaric) prokuror, hakim,
iclasçılar və vəkil Əbülfəz bəyə müraciət edəndə, yaxud hər hansı bir sual ilə əlaqədar Bəyin
adını çəkməli olanda, heç vaxt "müttəhim" (məhkəmələrdə məcburi qəbul olunmuş termin)
kəlməsini işlətmirdilər. Onlar Əbülfəz bəyin adını çəkməli olanda ona ya müəllim, ya da Əliyev
deyə müraciət edirdilər. O dövr üçün ən qəribəsi də bu idi ki, həm prokuror, həm də
məhkəmə heyəti elə bil özlərini Bəyin qarşısında günahkar sayırdılar. Onların bu prosesdə
əzab çəkdikləri, vicdanları ilə mübarizə apardıqları açıq-aydın hiss olunurdu.
Hətta bir dəfə prokuror Yəmən Yusifov özünü saxlaya bilmədi. Şahid qismində dindirilən
Universitetin Şərqşünaslıq fakültəsinin müəllimi Ağadadaş (soyadı yadımda deyil) ifadə
verirdi. O, ibtidai istintaq zamanı KQB-də verdiyi ifadəni tam təsdiq edərək Bəyi, tələbələrin
beynini pozmaq və digər bu kimi məsələlərdə günahlandırdı. Sonra prokuror ona bir sual
verərək soruşdu ki, Ağadadaş müəllim, Sizin cavablarınızdan bu nəticəyə gəlmək olar ki, Siz
Əliyevi tam günahkar hesab edirsiniz və onun cəzalandırılmasını istəyirsiniz.
O, cavab verdi ki, bəli mən belə hesab edirəm ki, Əbülfəz müəllim günahkardır və mütləq
cəzasını çəkməlidir.
Prokuror qəflətən çox əsəbi şəkildə ona dedi ki, "Müəllimin günahı ondadır ki, sənin kimi
adamlarla yoldaşlıq edib" və bir anlıq pauza verdi. Sözün həqiqi mənada deyildiyini hiss edən
zalda o dəqiqə xoş bir uğultu əmələ gəldi. Əgər bu pauza bir qədər də davam etsə idi, yəqin
ki, zal prokuroru alqışlamağa başlayacaqdı. Amma prokuror çox təcrübəli adam idi. O, zalda
KQB-dən adamlar olduğunu və prosesin diqqətlə izləndiyini çox gözəl bilirdi. Ona görə də bir
az da dayandıqdan sonra cümləsini tamamladı və dedi ki, əgər sənin kimi adamlarla deyil,
daha vicdanlı adamlarla yoldaşlıq etsə idi, onlar vaxtında onu bu yoldan döndərərdilər və o bu
gün bu qara kürsüdə oturmazdı. Bu gün Müəllimi bu qara kürsüdə oturdan sən və sənin kimi
adamlardır.