Əbülfəz bəy məni çox mehribanlıqla qarşıladı. İqamətgahın həyətində bir neçə çox yüksək
vəzifəli şəxs olmasına baxmayaraq, o mənimlə qucaqlaşıb öpüşdü və hamıya elan etdi ki,
Oktay bəy mənim 30 illik dostumdur.
Sonra kənara çəkilib bir qədər söhbət etdik. O, soruşdu ki, bəs sən hardasan, niyə heç
görünmürsən?
Cavab verdim ki, vəzifə bölgüsünə görə hərəkət edirəm və inzibati binalara, evlərə və bu kimi
yerlərə nəzarət edirəm.
O dedi: səni ona görə buraya gətirmişəm ki, daima mənim yanımda olasan. Gedin sənədlərdə
lazımi dəyişiklikləri edin. Bundan sonra sən, daima mənim yanımda olmalısan.
Bizim aramızda keçən bu söhbəti Mühafizə İdarəsinin rəisi Vaqif Axundova da dedim və biz işi
Prezidentin istədiyi kimi planlaşdırdıq.
Oktyabr ayının 9-da Bakı şəhərində Azərbaycan Ordusunun yaranmasının ildönümü
münasibəti ilə hərbi parad keçirildi. O zaman Rəhim Qazıyev sürətlə Müdafiə Nazirliyini vaxtilə
xalq hərəkatının əleyhinə Moskvanın tərəfində olmuş adamlarla doldurmağa başlamışdı.
Paradın hazırlanması və keçirilməsində yaxından iştirak edən bu şəxslərdən hər şey gözləmək
olardı. Hər cür gözlənilməz hadisənin qarşısını almaq üçün, biz, lazımi profilaktik tədbirlər
hazırlamışdıq.
Bəzi xarici dövlətlərin nümayəndələrinin də iştirak etdiyi hərbi parad çox yüksək səviyyədə
keçdi.
Paraddan sonra Elçibəy qonaqları aşağıda hazırlanmış çay masasına dəvət etdi. Cəld çölə
çıxanda gördüm ki, mühafizə işçilərindən biri sürətlə mənə tərəf gəlir. Mənə çatan kimi dedi
ki, meydan adamla dolub, prezidenti tələb edirlər. Mən tez tribunaya qalxdım və anlaşılmaz
bir vəziyyət gördüm. Beş dəqiqə əvvəl bom-boş olan meydan tam əvvəlki illərin mitinqləri
kimi ağzına qədər dolu idi.
Sonra məlum oldu ki, adamlar paradı izləmək üçün meydanın hər tərəfinə yığılmış və parad
bitən kimi meydana dolmuşlar.
Mən aşağı düşüb vəziyyət haqqında Prezidentə məruzə etdim. O, cəld ayağa qalxaraq,
qonaqlardan beş dəqiqəlik üzr istəyib yuxarı qalxdı. Meydanı doldurmuş xalq onu çox böyük,
sevinclə qarşıladı.
Elçibəy bir neçə dəqiqə çıxış edəndən sonra meydana yığılmış adamlardan üzr istəyib aşağı,
qonaqların yanına endi.
Mən ilk dəfə idi ki, xalqın öz rəhbərinə olan böyük sevgisinin şahidi olurdum. Sanki şoka
düşmüşdüm. Sonralar uzun müddət bu səhnənin təsiri altında oldum.
1992-ci il sentyabr ayının 2-ci yarısında dünyanın böyük siyasətçilərindən biri olan Marqaret
Tetçer Bakıya iki günlük səfərə gəldi. Prezident bu səfərə çox ciddi yanaşdı. Dəmir Ledinin bu
səfərinin Azərbaycan üçün çox əhəmiyyətli olacağını deyirdi. Azərbaycan prezidenti Elçibəylə
Tetçerin təkbətək görüşü üçün 40 dəqiqə vaxt nəzərdə tutulmuşdu. Ancaq görüş bir saat əlli
dəqiqə çəkdi. Səhərisi gün saat 12-də xanım Tetçeri iqamətgahından yola saldıq. O, əvvəl
Bakı Şəhəri İcra Hakimiyyətində olan görüşdə iştirak edib, sonra hava limanına gedəcəkdi.
İqamətgahdan yola salmazdan əvvəl mən Marqaret Tetçerin mühafizə rəisindən soruşdum ki,
xanım Tetçer bizim ölkə və adamları haqqında nə fikirdədir?
Cavab verdi ki, aramızda çox geniş söhbət olmayıb. Ancaq bir onu dedi ki, bunların
prezidentləri çox ağıllı adamdır.
Tetçerin iqamətgahdan yola salınma mərasimini izləmək üçün gələn jurnalistlərin içində ANS-
in nümayəndələri Mirşahin və Vahid Naxış da vardı. Dəmir Ledi yola salındıqdan sonra onlar
Prezidentdən qısa bir müsahibə üçün icazə istədilər. Prezident razılaşdı. Müsahibənin
mövzusu rəhmətlik Çingiz Mustafayevə Milli Qəhrəman adının verilməsi məsələsi ilə bağlı idi.
Müsahibə bitdikdən sonra, Elçibəy onlara dedi ki, indi də mənim sizinlə söhbətim var.
Kameranı bağlayın, mənə qulaq asın. Mən bu söhbəti bir prezident kimi yox, sizdən daha
yaşlı və təcrübəli bir vətəndaş kimi etmək istəyirəm və istəyirəm ki, mənim məsləhətlərim
haqqında fıkirləşəsiniz. Mənə dəfələrlə sizdən şikayət ediblər. Hətta sizin kanalın bağlanması
haqqında da məsələ qaldırıblar. Mən buna razı olmamışam və heç vaxt da imkan vermərəm
ki, sizin kanal bağlansın. Çünki mən sizi Azərbaycanda demokratik jurnalistikanın təməlini
qoyan adamlardan sayıram və sizə gələcək Azərbaycanda jurnalistikanın inkişafının təməlini
qoyacaq adamlar kimi baxıram. İndi gələk sizə olan məsləhətimə. Öz verilişlərinizdə məni
tənqid edirsiniz və elə adamları ekrana çıxardırsınız ki, o adamın özünün səviyyəsi,
Azərbaycan xalqının ümumi səviyyəsindən çox aşağıdır (Burada Elçibəy konkret adamın adını
çəkdi). Söhbət konkret məndən getmir. Siz həmişə
fikirləşməlisiniz ki, biz Azərbaycan
prezidentini tənqid edən material hazırlayırıq. Bu tənqid diqqət mərkəzində olacaq. Bunu
vətəndaşlar izlədiyi kimi, xarici dövlət nümayəndələri və xarici qonaqlar da izləyirlər.
Respublika rəhbərini tənqid edən o adamın səviyyəsinə, danışığına baxan hər hansı bir şəxs
bu respublikanın özü haqqında nə fıkirləşə bilər? Bu məsələlərə diqqət etməyi sizə məsləhət
görürəm.
Əgər məni tənqid etməyi çox istəyirsinizsə, mənim düşmənlərim var, gedin onlardan
müsahibə götürün. Məsələn, Ayaz Mütəllibova mən heç vaxt düşmən kimi baxmamışam, onu
həmişə bu xalqın oğlu kimi saymış və hörmətlə yanaşmışam. Lakin o mənə özünün düşməni
kimi baxır. Gedin Moskvaya, ondan neçə saatlıq istəyirsinizsə müsahibə götürün. O, nə
istəyirsə, qoyun mənim haqqımda danışsın və siz də gətirin öz proqramlarınızda verin.
Məsləhətimi sizə bir daha təkrar edirəm. Səviyyəsiz adamları ekrana çıxardıb Azərbaycan
dövləti və onun rəhbərliyi haqda danışdırmayın.
Onların hər ikisi Elçibəyin fikri ilə razılaşdılar və xudahafizləşib getdilər.