24
1.4. Dünya təsərrüfatı inkişafının əsas göstəriciləri
_____________________________________________________
Məcmu Dünya Məhsulu
Dünyada iqtisadi vəziyyətin təhlili üçün dünya iqtisadiyyatının
dinamikasını və durumunu xarakterizə edən bir sıra göstəricilərdən istifadə
olunur. Bunlardan ən əsası Məcmu Dünya Məhsuludur(MDM).
MDM milli mənsubiyyətindən asılı olmayaraq, dünyanın bütün
ölkələrində fəaliyyət göstərən müəssisələrin müəyyən dövr ərzində istehsal
etdiyi son malların və xidmətlərin ümumi həcmini əks etdirir.
Son məhsulun uçotu istehsal prosesində istifadə olunmuş xammalın,
yarımfabrikatların, elektrik enerjisinin və xidmətlərin (aralıq istehlak)
təkrarən hesablanmasının istisna edilməsini nəzərdə tutur.
Ayrıca götürülən hər bir ölkədə ÜDM iqtisadi fəaliyyətin uçotunun
beynəlxalq aləmdə tanınılmış qaydaları məcmusundan ibarət olan, milli
təsərrüfatın daxili və xarici sektorlarının əsas iqtisadi əlaqələrini əks etdirən
milli hesablar sistemi əsasında müəyyənləşdirilir. Bu sistem fəaliyyətin
bütün növlərinin məhsuldar xarakter daşıması konsepsiyası əsasında
qurulmuşdur. BMT-nin 1993-cü il milli hesablar sistemi fəaliyyətin bütün
növlərini, o cümlədən gizli və qeyri-qanuni istehsalı iqtisadi fəaliyyətə aid
edir. Burada yalnız ev təsərrüfatlarının öz istehlakı üçün xidmətlər
göstərməsi (yemək hazırlanması, otaqların yığışdırılması, xəstələrə qulluq
olunması, uşaqlara tərbiyə verilməsi və s.) istisna olunur. Sahibkarlıq
fəaliyyətinin nəticələri üç prinsip: istehsal, istifadə və gəlirlər - əsasında
hesablanır.
1. İstifadə prinsipinə görə, ÜDM-ə müvafiq olaraq ümumi kapital
qoyuluşlarının, malların və xidmətlərin fərdi qaydada və dövlət tərəfindən
istehlakının dəyəri daxil edilir. Ümumi kapital qoyuluşlarına əsas kapitala,
ehtiyatlara və bitməmiş istehsala investisiyalar aid olunur. Bu zaman
müəyyən tarixlərə mal-material qalıqlarının (xammal və hazır məmulatlar)
dəyəri arasındakı fərq ehtiyatlara yönəldilən investisiyalara daxil edilir.
Beləliklə, dayanıqlı iqtisadiyyatda ÜDM (Y) fərdi istehlaka (C),
kapital qoyuluşlarına (I), dövlət istehlakına (G), ixraca (X) çəkilən xərclərin
cəmi ilə malların və xidmətlərin idxalına (ID) çəkilən xərclər arasındakı
fərqə bərabərdir:
Y = C + I + G + X - ID
Dünyada istehsal həcmi milli təsərrüfatların istehsalının məcmusu
kimi hesablandığına görə, onu aşağıdakı düsturla ifadə etmək olar:
25
Y = ∑(C + I + G + X - IM)
2.
Gəlirlər prinsipi əsasında hesablanarkən, ÜDM istehsal
amillərindən asılı olaraq üç hissəyə bölünür. Muzdlu əməklə məşğul olan
şəxslərin gəlirlərinə tutduğu mövqedən asılı olmayaraq, fəhlə və
qulluqçuların əmək haqqı daxil edilir. Sonra özəl və dövlət şirkətlərinin
gəlirləri hesablanır. Renta gəlirləri və müstəqil fəaliyyət göstərən şəxslərin
(sənətkarların, həkimlərin və s.) gəlirləri ayrıca hesablanır.
Gəlirlər baxımından ÜDM əmək haqlarının (W), əsas kapitalın
istehlakı (amortizasiya) daxil olmaqla əməliyyat xərclərini (OS), xalis gəliri,
rentanı, faizi və subsidiyalar çıxılmaqla, dolayı vergilərin (ITS) ümumi
məbləği kimi hesablanır:
Y = W + OS + ITS
ÜDM-dən amortizasiyanın çıxılması (xalis ÜDM), dolayı vergilərin
çıxılması və subsidiyaların əlavə olunması kimi hesablanan
milli gəlir
göstəricisi ÜDM ilə bağlıdır. Vergilərin məbləği böyükdür. Onlar malların
və xidmətlərin qiymətlərinə daxil edilir və son istehlakçı tərəfindən ödənilir.
Subsidiya qiymətlərə əks təsir göstərərək, onları özü məbləğində aşağı salır.
Milli gəlir göstəricisi müvafiq ərazidə istehsal olunan milli gəlir anlayışına
təqribən uyğundur. Qeyd olunmalıdır ki, istənilən milli təsərrüfat üçün onun
sərəncamına daxil olan gəlir daha mühüm əhəmiyyət kəsb edir.
Müəyyən ölkənin sərəncamında qalan gəlirlərin məbləği (UMG)
onun xalis daxili məhsulunun, müəssisələrinin və vətəndaşlarının xaricdəki
gəlirlərinin saldosunun və əcnəbilərin bu ölkədəki gəlirlərinin cəmi kimi
hesablanır. Sərəncamda olan milli gəlir cari istehlakın və yığımların
məbləğinə müvafiqdir:
GNI = GDI + NY
Burada NY - rezidentlərin xalis faktor gəliridir.
İstehsal olunmuş ÜDM ilə milli gəlir arasındakı fərq kəmiyyətcə
kifayət qədər böyükdür və amortizasiya ayırmalarının həcminə bərabər
olmaqla, təqribən 8-11% təşkil edir. Amortizasiya ayırmalarının (əsas
kapitalın istehlakının) məbləği əsas fondlarının miqdarından asılı olduğuna
görə, ölkələr üzrə bu fərq müxtəlifdir. Amortizasiya ayırmalarının xüsusi
çəkisi inkişafın səngiməsi zamanı artır, yüksəliş dövründə isə azalır.
İstehsal olunmuş milli gəlirin dinamikası uzunmüddətli dövr
baxımından ÜDM-in dinamikası ilə üst-üstə düşdüyünə görə, təhlillər
aparılarkən əsasən ÜDM və MDM göstəricilərindən istifadə olunur.