Mehman Süleymanov
178
Gilan hakiminin arzuladığı kimi yox, Rusiyanın imperiya maraqlarına
cavab verən bir vəziyyət kimi görmək istəyirdi. Onun fikrincə, Qacar
dövləti ilə Rusiya arasında sülhün bərqərar edilməsi iki dövlət arasındakı
sərhəd xəttinin Kür və Araz çaylarından keçəcəyi təqdirdə mümkün ola
bilərdi. Ona görə bəyan edirdi ki, Qacar dövləti sərhəd xəttinin adları çə-
kilən çaylar boyunca keçməsinə razıdırsa, onda məsələni Rusiya im-
peratoruna çatdırar və ondan sülh danışıqlarının aparılmasına razılıq
alınar. Feldmarşal İ.Qudoviç başqa bir məktubu da Rusiyanın xarici işlər
naziri Budberqə göndərdi və sülh danışıqları barəsində onun təlimatını
istədi (17).
Qacar sarayının sülh danışıqlarına getmək təklifi Rusiya sarayında
maraqla qarşılandı. Rusiyanın beynəlxalq vəziyyəti də Qacar sarayı ilə
sülh danışıqlarına gedilməsini zəruri edirdi. Ona görə həm Rusiya
imperatoru I Aleksandr, həm də Rusiya xarici işlər naziri baron Budberq
bu məsələyə öz münasibətlərini bildirdilər. Rusiya imperatoru Qacar
sarayı ilə sülh danışıqlarının başlanmasının, habelə iki dövlət arasında
sərhəd xəttinin Kür və Araz çayları üzrə müəyyənləşdirilməsi ideyasını
təqdir edirdi. Bununla belə, o, sülh danışıqları zamanı sərhəd xəttinin
müzakirəyə çıxarılmasını hələ tez sayırdı və tövsiyə edirdi ki, sülh danı-
şıqları aşağıdakı şərtlər ətrafında aparılsın: 1) Hər iki tərəfdən hərbi
əməliyyatlar dayandırılsın; 2) Tərəflərin qoşunları sülh danışıqlarının
aparıldığı vaxt qərar tutduqları mövqelərdə dayansınlar; 3) Sülh
müqaviləsi imzalanana kimi və ya danışıqlar prosesi dayandırılana qədər
təmas xəttində baş verən hadisələr iki tərəfin heyətlərinin sərhəd
xəttindəki məntəqələrdən birində keçirdikləri görüşdə araşdırılsın; 4) Bu
ilkin şərtlər əsasında razılıq imzalanandan sonra Fətəli şahın
nümayəndəsi sülh müqaviləsinin imzalanması üçün Sankt-Peterburqa
göndərilsin (18).
Rusiyanın xarici işlər naziri baron Budberq feldmarşal Qudoviçə
yazırdı ki, hazırkı vəziyyətdə Qacar dövlətinin Osmanlı dövləti ilə
yaxınlaşmasına imkan vermək olmaz. Onun fikrincə, Gilan hakiminin
müraciəti bu istiqamətdə yaxşı bir şans idi. Baron Budberq feldmarşal
İ.Qudoviçin göndərdiyi təkliflərin Qacar sarayı tərəfindən qəbul
olunacağına inanmadığını bildirdi. O, danışıqların Rusiya imperatoru
tərəfindən irəli sürülən ilkin şərtlər üzərində aparılmasını tövsiyə edirdi.
Rusiyanın xarici işlər naziri istisna etmirdi ki, danışıqlar çox uzun çəkə
bilər. Ona görə lazım bilirdi ki, ilk növbədə ilkin barışıq əldə edilsin və
tərəflərin qoşunları hazırda dayanmış olduqları ərazilərdə saxlanılsın.
Qacar sarayının tərəflər arasındakı sərhəd xəttinin Kür və Araz çayları
boyunca keçməsinə razı olduğu halda, ilkin danışıqlarda irəli sürülən
Gülüstan müqaviləsi
179
şərtlərdən biri belə ifadə oluna bilərdi - Rusiya ilə İran arasında sərhəd
xətti dəqiqləşdirilənə kimi sərhəd xətti Kür çayının mənsəbindən Cavada,
Araz çayının Kürə qovuşan nöqtəsinə qədər, oradan isə Araz çayı
boyunca Türkiyə yaxınlığında Arpaçayın Araza qovuşan nöqtəsinə qədər
qəbul edilə bilərdi. Rusiya qoşunları və ya Qacar qoşunlarının bu xətti
keçmələri sülh danışıqlarının pozulması sayılmalı idi. Mülki əhalinin bu
xətti keçməsi isə qanun pozğunluğu kimi qəbul edilməməli idi. Yalnız
hərbi qüvvələrin sərhədi keçməsinə qadağa qoyulmalı idi (19).
Rusiya sarayı ilə İ.Qudoviç arasında yazışmanın aparılması Bakının
Rusiya qoşunları tərəfindən işğal edildiyi günlərə təsadüf edirdi. Buna
qədər isə Quba xanlığı işğal edilmişdi. Şəki xanlığı ərazisində Səlim
xanın Rusiya işğalına qarşı qiyamının yatırılmasına hazırlıq aparılırdı.
İ.Qudoviç inanırdı ki, bütün bu hadisələr Qacar sarayını güzəştə getməyə
məcbur edəcəkdir. Ona görə İ.Qudoviç Rusiya imperatoruna göndərdiyi
məktubunda danışıqlar zamanı sərhəd xəttinin Kür və Araz çaylarından
keçməsi üzərində təkid göstərilməsini təklif edirdi (20).
General Qudoviç Gilan hakiminə ünvanladığı məktubın çatdırılması
xeyli ləngiməli oldu. Çünki Xəzər dənizində fırtınaların uzun müddət
davam etməsi Gilan hakiminin nümayəndəsi Mirzə Musanın Həştərxanda
oktyabr ayının 24-nə qədər dayanıb gözləməsinə səbəb oldu. Onun Gilan
hakiminə çatdıracağı məktuba nə vaxt cavab alınacağı isə məlum deyildi.
Rusiya sarayı mövcud şəraitdə yaranmış fürsəti əldən buraxmaq
istəmirdi. Ona görə Rusiya sarayı general Qudoviçi sülh danışıqlarına
başlaması üçün tələsdirirdi.
2. Azərbaycan xanlıqları ətrafında İ.Qudoviçin Qacar sarayı
ilə danışıqlar aparması
Rusiya Xarici İşlər Nazirliyi Qacar sarayı ilə Rusiya dövlətinin
maraqlarına cavab verən danışıqların başlanması üçün general
İ.Qudoviçə konkret tapşırıqlar verdi. Xarici İşlər Nazirliyindən alınan
məktubda bildirilirdi ki, sülhün əldə edilməsi üçün mümkün olan bütün
vasitələrdən istifadə edilsin. Həmin məktubda qeyd olunurdu ki, Dağıstan
və Azərbaycanın bir hissəsi Rusiya işğalı altında olduğu halda,
Qudoviçin sülh təklifi ilə şah sarayına müraciət etməsi Rusiyanın şərəfinə
heç bir xələl gətirməz. Xarici İşlər Nazirliyinin mövqeyi belə idi ki, sülh
danışıqlarına gedilməsini Fətəli şah heç də Rusiyanın təslimçiliyi kimi
qəbul etməz. Çünki Cənubi Qafqazın xeyli hissəsinin Rusiyanın nəzarıti
altında olması şah sarayını belə bir fikirdən çəkindirərdi.