Mehman Süleymanov
174
Feldmarşal Qudoviçin yeni vəzifəsinin icrasına hazırlaşması, bölgəyə
gəlib çıxması xeyli vaxt apardı. Onun 1806-cı il iyun ayının 2-ci
yarısında Sankt-Peterburqdan yola düşdüyü ehtimal olunur. Həmin
günlərdə Qacar qoşunları artıq Araz çayının şimalına adlamış,
Azərbaycan xanlıqlarında isə Rusiya işğalına qarşı çıxışlar baş
qaldırmışdı. İ.Qudoviç bir də iyulun 27-də Georgoyevskə gəlib çatdı.
Burada da o çox gözləməli oldu. Məlumdur ki, onun Tiflisə yetişməsi
1806-cı il oktyabr ayının əvvəllərinə təsadüf edir. Qudoviçin baş
komandan vəzifəsinə təyin olunduğu vaxtdan Tiflisə gəlib çıxdığı vaxta
qədər Cənubi Qafqazda və o cümlədən Azərbaycan xanlıqları ərazisində
ciddi proseslər baş verdi. Bu prosesləri İ.Qudoviç kənardan izləmək
məcburiyyətində qaldı.
1806-cı ilin yayında Rusiyanın işğalına düşmüş Azərbaycan
xanlıqlarının Rusiya işğalından qurtarılması üçün fəallaşması bölgənin
hərbi-siyasi şəraitinə təsir göstərən əsas amillərdən biri idi. Digər bir amil
isə heç şübhəsiz ki, Arazı adlayan Qacar qoşunlarının fəallaşması idi.
Qacar sarayı bu çox istiqamətli yürüşü ilə rus qoşunlarını bölgədən
sıxışdırmaq niyyətində olduğu kimi, həm də Azərbaycan xanlıqlarını öz
nəzarəti altına almaq istəyirdi.
Qacar sarayı bir sıra istiqamətə qoşun dəstəsi göndərməklə bütün
Azərbaycan xanlıqlarını, Dağıstanı və Gürcüstanı əhatə etmək istəyirdi.
Bu yürüş zamanı gürcü şahzadəsi Aleksandr da Azərbaycan ərazilərindən
keçməklə Tiflisə doğru irəliləməyi planlaşdırırdı. Nəzərdə tutulmuşdu ki,
şahzadə Aleksandrın rəhbərliyi altında olan qoşun dəstəsi Akstafa çayı
ətrafına toplaşsın, buradan Dağıstan hakimləri ilə əlaqəyə girsin və sonra
da Abbas Mirzə ilə birlikdə Tiflisə doğru yürüşünü davam etdirsin. Şah-
zadə Aleksandr yürüşə başlamazdan əvvəl Qazax əhalisinə xəbər
göndərdi ki, yürüşü ilə onlara heç bir ziyan yetirməyəcək. Abbas
Mirzənin isə dəstəsi ilə əvvəlcə Qarabağa və oradan da Gəncəyə
yollanacağı ehtimal edilirdi. Fətəli şahın özünün də Arazdan şimala
həyata keçirilən yürüşdə iştirak edəcəyi haqqında məlumatlar alınmışdı.
Onun qoşun dəstəsi ilə Göyçə gölü ətrafına gələcəyi gözlənilirdi (10).
Qacar qoşunlarının hücuma hazırlaşması xəbəri rus qoşunları
komandanlığında təşvişlə qarşılansa da, işğalın qorunub saxlanması üçün
müəyyən addımlar atıldı. Müdafiənin daha yaxşı qurulması üçün
qüvvələrin bölüşdürülməsinə və onların daha mühüm məntəqələrdə
yerləşdirilməsinə dair qərarlar qəbul edildi. General-mayor Nebolsinin
rəhbərliyi altında Troitski muşketyor alayının 2 taboru Kürəkçay ətrafına
göndərildi. Bu dəstə döyüşə hazır vəziyyət almalı və göstəriş verilən kimi
Gülüstan müqaviləsi
175
Qarabağa daxil olmalı idi. Troitski muşketyor alayının
üçüncü taborunun
iki bölüyü polkovnik Simanoviçin və Pəmbək və Şuragöldə dayanmış
dəstəsinin gücləndirilməsinə göndərildi. Polkovnik Simanoviçin
tabeliyində adları çəkilən mahallarda Saratov muşketyor alayı və Qafqaz
qrenadyor alayının bir taboru var idi. Bu mahallar ruslar tərəfindən yaxşı
qorunmaqla bərabər, polkovnik Simanoviç bu bölgədə şah qoşunlarının
Gürcüstan üzərinə geniş hücumunun qarşısını ala bilərdi. Bunun üçün
polkovnik Simanoviç əvvəlcə bu mahalların sərhəddə olan kəndlərinin
əhalisini başqa yerə köçürtdü. Sonra Gümrü və Hamamlı kəndlərinə qo-
şun bölmələri yerləşdirdi. Gürcüstanla əlaqələrin daha yaxşı qurulması
üçün Qazax və Şəmşəddil ətrafına da əlavə qoşun bölmələri göndərildi.
Toplarla müşayiət olunan həmin bölmə bölgədəki qüvvələri
möhkəmləndirməklə Gəncə-Tiflis yoluna nəzarəti təmin etməli idi (11).
Məlum olduğu kimi, 1806-cı il iyul ayının əvvəllərində Qacar
qoşunları yenidən Azərbaycan xanlıqları üzərinə yürüş etdilər.
Qoşunların bir dəstəsi Qarabağ xanlığı ərazisində ruslarla qarşılaşmalı
oldu. Başqa bir dəstə isə Hüseynqulu xan Urmiyəlinin rəhbərliyi altında
Gəncə istiqamətində irəlilədi və iyul ayının 16-da bu dəstə Gəncədən 60
verst məsafədə, Qaramurad adlanan məntəqədə düşərgə saldı. Cavad
xanın oğlu Uğurlu ağanın da qoşulduğu bu dəstənin tərkibi 4 min nəfərlik
döyüşçüdən ibarət idi. Bu məntəqədə dayanarkən Car-Balakənə məktub
göndərildi və Car-Balakən əhalisi ruslara qarşı mübarizəyə çağırıldı.
Bütünlükdə, yerli əhaliyə Fətəli şahın müraciəti gətirilmişdi. Bundan
başqa Uğurlu ağa özü də yerli əhaliyə məktubla müraciət etdi (12).
Uğurlu ağanın Gəncənin xristian əhalisinə müraciəti də mövcuddur
və həmin müraciət rus tarixi ədəbiyyatında da çap olunmuşdur. Həmin
müraciətdə deyilirdi: “Siz həmişə bizim çalışqan təbəələrimiz
olmuşsunuz və heç vaxt bizə xidmətdən imtina etməmişsiniz. Əgər siz
xristian olduğunuza görə ehtiyat edirsinizsə ki, biz gəlib ölkəni alandan
sonra azərbaycanlılara üstünlük verəcəyik və sizi sıxışdıracağıq, Allaha
və rəhmətlik atamın ruhuna and olsun ki, sizi azərbaycanlılardan
fərqləndirməyərək hörmətinizi saxlayacağıq. Əgər siz güman edirsinizsə
ki, indiki yürüşümüz əvvəlki yürüşlərimizin oxşarı olacaq, bu belə deyil.
Biz bu il burada qalacağıq və şahzadə də (Abbas Mirzə nəzərdə tutulur -
M.S.) buradakı əyalətlərdə olacaq və əmin olun ki, farslar bu niyyətindən
geri çəkilməyəcəklər. Əksinə, hökmdar özü (Fətəli şah nəzərdə tutulur –
M.S.) çoxsaylı və məğlubedilməz qoşunlarla Təbrizdən yola düşmüş və
Sofiyandadır. Əgər siz öz çalışqanlığınızı göstərsəniz mərhəmətlə
qarşılanacaqsınız. Əgər etməsəniz, onda əbəs yerə talanlarla
qarşılaşacaqsınız ” (13).