106
institutların tələblərini nəzərə almaqla təmin edə bilər. Beynəlxalq
qurumlar hər bir üzv
dövlətin daxili idarəçiliyinə, dövlət və vətəndaş münasibətlərinin qurulmasına, maliyyə
və büdcə siyasətinin istiqamətlərinə, qiymət, bölgü, istehsal və ticarət əlaqələrinə
birbaşa və dolayı yolla müdaxilə edirlər.
Müasir beynəlxalq münasibətlərin əsas tendensiyalarından biri də beynəlxalq
təhlükəsizlik tələblərinin, qlobal və lokal terrorizmə qarşı mübarizənin ümumdünya
siyasəti səviyyəsinə qaldırılması hesab oluna bilər. Bu prosesin əsas xarakterik
xüsusiyyəti ondan ibarətdir ki, dünyada başda ABŞ olmaqla, vahid anti-terror
koalisiyasının yaradılması prosesi həyata keçirilir və keçmişdə hansı hərbi və siyasi
blokda iştirak etməsindən asılı olmayaraq, dövlətlər iki meyara görə qruplaşır. Bir qrup
ABŞ-ın təsiri ilə terrorizmə qarşı mübarizə cəbhəsində yer tutursa, digərləri terroru
dəstəkləyən ölkələr sırasına aid edilirlər. Ən maraqlısı isə ondan ibarətdir ki, bu
ölkələrin hansı qrupa aid olmasını bəzən tam subyektiv amillərlə ABŞ və onun təsiri
altında fəaliyyət göstərən beynəlxalq təşkilatlar müəyyən edir. Odur ki, bəzən bu qrupa
bütün mövcudluğu dövründə terroru dövlət siyasəti səviyyəsində dəstəkləyən, öz
separatçı və digər məqsədlərini terror vasitəsilə reallaşdırmağa çalışan Ermənistan kimi
dövlətlər deyil, subyektivcəsinə hansısa müsəlman ölkəsi daxil edilir. Bu da dünya
ictimaiyyətinin nəzərində müvafiq olaraq terroru dəstəkləyənlərin və onun qurbanı
olanların əsl obyektiv qiymət almasına mane olur.
Beynəlxalq münasibətləri və müasir dünya siyasətini xarakterizə edən əsas
səciyyəvi cəhətlərdən biri də beynəlxalq siyasi proseslərin yeni subyektlərinin –
hökumətlərarası beynəlxalq və qeyri-hökumət təşkilatlarının dünya siyasətində rolunun
artması hesab olunur. Vaxtilə milli dövlətlərin suveren hüququ hesab olunan prinsiplər
dövlət suverenliyi, daxili siyasət, dövlət və vətəndaş münasibətləri, demokratiya,
vətəndaş cəmiyyəti maraqları, insan hüquq və azadlıqlarının qorunması və s. adı altında
getdikcə daha çox beynəlxalq qurumların və qeyri-hökumət təşkilatlarının tələbləri və
məsləhətləri ilə tənzimlənir. Ümumiyyətlə, bu prinsiplərin qorunması və onlara hərtərəfli
əməl olunması beynəlxalq hüquq normaları səviyyəsində milli dövlətlərdən tələb olunur.
Müasir beynəlxalq münasibətlərin yeni təzahür formalarından biri də dövlətlərlə
yanaşı ayrı-ayrı regionların, ölkələrin daxili subyektlərinin beynəlxalq aləmə çıxması,
beynəlxalq əlaqələrə qatılması, əməkdaşlıqda iştirakı hesab oluna bilər. Bu tendensiya
son zamanlar Avropada, Cənub-Şərqi Asiyada çox geniş yayılmış və bəzi hallarda ayrı-
ayrı dövlətləri təmsil edən regionların əlaqələri, həmin dövlətlərin əlaqələrindən çox-çox
intensiv xarakter almışdır.
107
Beynəlxalq münasibətlərin müasir vəziyyətinə təsir göstərən əsas amillərdən biri
də son zamanlar dünyada mərkəzdənqaçma proseslərinin güclənməsi fonunda
(keçmişdə vahid tərkibdə yaşayan xalqlar öz müstəqil dövlətlərini yaratmaq
istiqamətində fəaliyyət göstərirlər) Avropada getdikcə güclənən inteqrasiya hesab oluna
bilər.
Avropada İkinci dünya müharibəsindən sonra başlanan inteqrasiya prosesləri son
on ildə yüksək sürətlə dövlətlərarası sədləri aradan qaldırmış və bu məkanda vahid
daxili və xarici siyasət strategiyası formalaşdırılmışdır. Lakin mərkəzdənqaçma meylləri,
etnik separatizm, davakar millətçilik və dini ayrıseçkilik hisslərinin son illərdə bir qədər
yüksəlişi də müasir dünya siyasətinin reallığı hesab olunur.
Bəzi tədqiqatçılar sosializm və kapitalizm sistemlərini təmsil edən bloklararası
soyuq müharibənin bitməsini dünyada konfliktlərin də azalmasına əhəmiyyətli təsir
göstərəcəyini iddia etsə də, bu proqnoz özünü doğrultmadı. “Konfliktsiz dünya” arzusu
ilə yaşayan iri dövlətlər, əsasən ABŞ və Avropa İttifaqı ölkələri qloballaşma prosesini
rahat həyata keçirmək məqsədilə konfliktləri həll etmək üçün müəyyən səylər
göstərirlər. Lakin bu konfliktlərin əsas səbəbləri, onu doğuran subyektiv amillər,
beynəlxalq hüquq normalarının tətbiqindəki ikili yanaşmalar dövlətlərə həmin
münaqişələrin qarşısını almaqda mane olur.
Hazırda zorakılıqla müşayiət olunan münaqişələrin sayı 1993-cü ilə nisbətən 34-
dən 2003-cü ildə 19-a düşsə də, ümumən baş verən münaqişələr hələ də dünya siyasi
proseslərinin aparıcı tendensiyalarından birini təşkil edir. (Bax: Stokholm Beynəlxalq
Sülh Tədqiqatları Mərkəzinin məlumatları. www.sipri.se.) Hansı səbəbdən
yaranmasından asılı olmayaraq, müasir münaqişələr bəşəriyyət üçün böyük təhlükə
yaradır, daha geniş əraziləri əhatə edir, ekoloji, humanitar və sosial fəlakətlərə səbəb
olur. Səbəblər isə müxtəlifdir. Bunların sırasında ayrı-ayrı dövlətlərin ərazi iddiaları, etnik
separatizm, sənaye dövlətləri ilə xammal ölkələri arasındakı ziddiyyətlər, nəzarətsiz
silahlanma, miqrasiya, qloballaşma, qloballaşmaya müqavimət üzərində yaranmış
millətçilik və dini müqavimət daha tez-tez rast gəlinən səbəblərdəndir.
Beynəlxalq münaqişələr ideoloji və blok qarşıdurması dövründə əsasən
nəzarətdə saxlanılır, məqsədli şəkildə istifadə edilir və onun qloballaşmasının qarşısı
alınırdısa, müasir dövrdə bu münaqişələrin qarşısını alan mexanizmlər zəifləmişdir.
Bundan başqa, dünyanın siyasi sistemində baş verən dəyişikliklər, İkinci dünya
müharibəsindən sonra formalaşmış milli-dövlət sərhədlərinin pozulması da
münaqişələrin beynəlxalq hüquq normalarına uyğun tənzimlənməsini çətinləşdirmişdir.