45
suya düşdü, yarımçıq qaldı, qızından gördüyü
qayğıdan, həkim köməyindən məhrum oldu.
Xalqın yas mərasimləri ilə bağlı illərin
sınağından çıxmış adət və ənənələri vardır. Yası qırx
gün uzadırlar ki, əzizini itirən insanlar baş verən
hadisəyə qismən də olsa alışa bilsinlər,
uyğunlaşsınlar. Firudin müəllimi də dostları,
yaxınları, həmkarları həmin ağrılı günlərdə tək
qoymadılar. Keçirilən yas mərasimi, oxunan quran
ayələri, dostları və yaxınların duaları, söhbətləri dərdə
dərman olmadı. Kəmalənin gözəl surəti, işıqlı çöhrəsi
gözünün qarşısından getmədi. Hara getdisə, kimi
gördüsə gözləri övladını aradı, gördüklərini onunla
qarşılaşdırdı. Yaşadığı iztirablar, keçirdiyi anlar
kövrək duyğulara döndü. Övlad acısının atəşi sönmək
bilmədi. Bağrında qövr edən acının atəşini söndürmək
cəhdindən kövrək şeirlər yarandı.
Yaranan
şeirlər mövzu, janr baxımından
müxtəlif olsa da o fikirlərin hamısı Kəmalə xanımla
bağlıdır. Övladının qəfil ölümü ilə dünya başına dar
olan ata, qızının gözəlliyini, nəcib xarakterini,
peşəsinə vurğunluğunu, ailəsi və övladlarına olan
sevgisini həzin duyğularla dilə gətirir. Firudin
müəllim öz qəm-qüssəsini gah pıçıltı şəklində özü ilə
bölüşür, gah da onun cilovlanmayan dərdi “balam
vay”-deyib, dünyaya haray salır.
Firudin
müəllimlə görüşəndə uğurlarımızdan
daha çox ailədən, uşaqlardan, nəvələrdən hal-əhval
tuturuq, səhhətimizdəki problemləri dilə gətiririk.
46
“Şirinliyimizlə” mübarizə apardığımızdan həmişə
fikir mübadiləsi edirdik ki, mən filan dərmanı atıram,
pəhrizi tam gözləyə bilmirəm, “sən nə edirsən” və
ilaxır.
Bu
söhbətlər əsnasında mən Firudin müəllimin
qızı Kəmalə xanımla sanki qiyabi tanış olmuşdum.
Onun təbabətin bir çox sahələrinə dərindən bələd olan
yüksək ixtisaslı göz həkimi olduğunu bilirdim.
İnsanların gözünün nurunu qoruyan bu həkim qızımız
həkimlərə xas məsuliyyət, nəciblik, xəstələrə diqqət,
şəfqət və s. keyfiyyətlərə malik idi. Kəmalə xanımın
valideynlərinə hörməti və qayğısı da qibtə olunacaq
qədər yüksək idi. Firudun müəllimin söhbətlərindən
anlaşılırdı ki, əvvəllər də, xüsusilə yaşının indiki
dövründə Kəmalə xanım onun üçün əvəzsiz idi. Bir
övlad zəngin daxili aləmi, bir dünya gözəlliyi olan
Kəmalə xanım həyatda gözünə görünən, xəyalına
gələn gözəl, şirin, mənalı nə varsa, hamısını insana
xatırladırdı.
Firudun
müəllimin qızına həsr etdiyi kitabı
oxuyanda məndə onun şəklini görmək arzusu yarandı.
Müəllim dostumuz qızının müxtəlif yaş dövrlərinə aid
fərqli şəkillərini gətirdi. Mənə elə gəldi ki, bu məsum
qızcığazı, şirin və yaraşıqlı qızı, ciddi və təmkinli
xanımı sanki çoxdan tanıyıram. Hər yaşda yaşından
daha böyük, ciddi və qayğılı görünür. Qəribədir,
özünə inamlı, ürəkli və kifayət qədər dəyanətli adam
təsiri bağışlayan bu xanımın ən şad günlərində belə,
təbəssümlü çöhrəsində bir qədər yorğunluq,
47
anlaşılmaz kədər izləri sezilir. Gülən gözlərində belə
sevinci ilə kədəri, şadlığı ilə qayğısı sanki bir-birinə
qarışıb. Kim bilir, bəlkə ailəsinin, övladlarının,
valideynlərinin, işinin-gücünün qayğıları Kəmalə
xanımı rahat buraxmayıb. Bəlkə də şüuraltı duyub ki,
haqqın dərgahına səfəri yaxındır...
Firudun
müəllim elə əzəldən təbinə, ilhamına
könül verən qələm əhlidir. Onun şeirləri və nəsr
əsərlərinin bir qismi ilə tanışam. Vətənin təbiəti və
insanlarından ən müxtəlif səpgilərdə əsərlər yaradan
Firudun müəllim yenə şeirlər yazır. Amma bu dəfə
tematika ya Kəmalə xanımla, ya da onunla əlaqədar
hadisələr və insanlar məkan və zamanla bağlıdır.
O,
şeirlərində günün müxtılif vaxtlarında gözəl
qızı ilə bağlı xatirələri canlandırmağa çalışır, övlad
acısından xilas ola bilmədiyini təsvir edir. İndi
xəyallarında qızı ilə baş-başa qalan dərdli ata axtardığı
suallara cavab tapa bilmir.
İnsanların gözünün nurunu, işığını qoruyan
insanın qəfildən, heç kimin gözləmədiyi anda, evində,
övladlarının bir addımığında, hamıdan xəbərsiz,
sakitcə həyata gözlərini yummasını necə başa
düşəsən, necə anlayasan? Ata üzülərək “... görmədin
qızım, Nəcəfin, Orxanın toy libasını, bahar təravətli
ey gözəl qızım, geydirdyin atana vay
libasını”,
dərdini poetik şəkildə ifadə edir.
Başqa bir şeirində Firudun müəllim övladının
dəfn mərasimini təsvir edərək, torpağa təslim edilən
qızının “... qapısız, pəncərəsiz bir evə mehman
48
olduğunu” qeyd edir. Belə kövrək misralara digər
şeirlərdə də rast gəlmək mümkündür:”... kol dibindən
bənövşələr boylanır, bəs mənim Kəmaləm niyə
boylanmır?”, yaxud “... bilirəm hər quşa yuvası şirin,
itirsə çırpınar balasın birin”. Bəzən də üz tutub Allaha
təvəqqə eləyib ki, “təqvimdən siləydilər o günü,
sinəmə çəkilən dağı, düyünü”.
Bilmirsən nədir insan: gəlişi bir aləm sevinc,
gedişi bir dünya fəlakət... Bu söhbəti uzatmaq da
olardı, məncə bəsdir. Həyat imtahanlarla doludur.
Övlad acısı da bir imtahandır. Hamıya qismət olmaz,
olmasın da.
Ulduz dolu Kəhkəşandan biri axdı... Kəmalə
ulduzu. Yaxınlarına gözəlliyini və istisini xatırlamaq
qaldı. Amma həyat davam edəcək, neçə-neçə ulduzlar
doğacaq, onların şəfəqi Yer üzünü bəzəyəcək,
könüllərdə yeni ümidlərin, arzuların cücərməsinə,
çiçək açmasına səbəb olacaqdır.
Allah Kəmalə xanıma rəhmət eləsin!
Allah valideynlərinə, övladlarına və yaxınlarına
rəhm eləsin, səbr versin!
Pedaqoji elmlər üzrə fəlsəfə doktoru
dosent Xəlil Padarov
Dostları ilə paylaş: |