132
DİVANƏ
Cavan qız sinni-şəbabətə yetişmişdi.
Zahir və batinində
çocuqluq əsərləri məhv olub gedirdi. Boy ucalıb, köksü
dolğunub, simasında da ayrı məlahət görünürdü. Sitarənin
könlü daha əyləncələr diləməzdi, fikrindən də uşaqlarla
laqeydanə oynamaq keçmirdi. Axşamadək Sitarə pəncərənin
önündə oturub, xəyalatda idi. Bu xəyalat həyata və məişətə
doğru idi. Sitarə pəncərədən bağçaya baxırdı. Çiçəklər, otlar,
güllər bahar günəşinin ilıq şüası altında ruhlanıb, təravətlənib,
gözəl qoxuyurdular. Quşların hərəsi bir nəğmə oxuyub,
insana
ləzzət verirdi...
Sitarə bunlara baxırdı, şad olurdu, durub həyətə gedirdi və
hər çiçəkdən birini dərib, hər güldən bir yarpaq üzüb,
hərəsindən də bir həzz aparıb, bir lətafət anlayırdı. Sitarə
bağçanı dolanırdı, fırlanırdı. Güldən çox gül, çiçəkdən çox
çiçək, lakin ürəkdə bir aramlıq, ruhda bir sakitlik yox idi. Sitarə
ixtiyarsız çiçəkləri əlindən yerə töküb,
yenə pəncərənin önünə
çəkilirdi və başını çiyninə qoyub, fikrə gedirdi. Sitarənin
xəyalında bir cavan oğlanın əksi nəqş bağlamışdı. Bu oğlan
Sitarə kimi zərif, lətif bir cavan idi; gecə-gündüz Sitarə ilə
gəzib dolanırdı. Bunlar bir-birinə eşq yetirib, bir can, bir cəsəd
olmuşdular. Dadlı-dadlı söhbətlər, səfalı göz yaşları bunların
həyatını səadət nuru ilə işıqlandırırdı. Qız xoşbəxt, oğlan
xoşbəxt–ikisi də əl-ələ verib, şad və xürrəm, diriliyin geniş
bağında ömür sürürdülər. Gül yığıb,
çiçəklər dərib, qoxusundan
ruhpərvər olurdular. Onda Sitarənin ürəyi aram tapıb, ruhu sakit
olurdu. Sitarə tamam xəyalat aləminə qərq olub, dünyadan
xəbəri yox idi. Evdə bir söhbət olurdumu, yeni bir iş ittifaq
düşürdümü, bunların heç birindən Sitarə agah olmazdı. Bəlkə
arvad qonaqları gəldikdə onlara görünüb çaydan, xörəkdən
verib, yenə o biri otaqda pəncərənin önünə keçirdi.
Bir
gün Sitarə gördü ki, evə iki-üç arvad gəlib. Anası onu
yuyundurub, geyindirib, qonaqların qabağına göndərir.
133
Qonaqlar isə qıza zənn ilə baxıb, sonra anası ilə pıç-pıç
danışdılar. Üç gün keçmiş haman arvadlar yenə bir ayrı
arvadlar ilə dübarə gəlib, danışıb getdilər. Üçüncü dəfə gəlib
yenə danışıb, gülüşüb, bir tirmə şal da qoyub yola düşdülər.
Birdən Sitarə hamamda eşitdi ki, onu ərə veriblərmiş.
O gündən cavan qız toyu aramsız gözləyirdi. Şirin xəyalata
meydan verib, Sitarə yenə məşuqu ilə ömür bağçasında gəzib
dolanırdılar, yenə gül-çiçək onlar üçün qoxuyurdu, yenə bülbül
xoş nəğməsi ilə onların səadətli günlərini alqışlayırdı. Dünya
bir cənnətə dönmüşdü, hər şey mənbəi-həzz idi. Zəhmətdən,
məşəqqətdən xəbər yox idi.
Axşamadək gözəl imarətdə, göyçək
bağçada, zərif çiçəklər arasında bir-birinə lətafətlər bəxş edib,
kamyab olurdular. Dadlı cavanlıq şərabından içirdilər,
içirdilərsə də, şərab qurtarıb axıra çıxmaq bilmirdi...
***
Sitarə xəyalatdan ayıldı. Yengələr ona gəlin otağında
«təlim» verirdilər. Bir də dışarıda şıqqıltı gəldi, sonra otağın
qapıları açıldı, içəri bir kişi itələyib saldılar...
Sitarə ilk dəfə dünyaya həqiqət nəzəri ilə baxdı; cavan qızın
qarşısında xəyali məşuqu əvəzində doğruçu əri durmuşdu və bu
«ər» deyilən o qədər çirkin, musinn və zəriflikdən uzaq idi ki,
Sitarə üzünü ondan döndərib, gözlərinin yaşlarını saxlaya
bilmədi...
Gecənin bir yarısı idi. Sitarə ərini yuxuya verib, otaqdan
çıxdı və bir
dəqiqə çəkmədi ki, küçədə ayaqyalın və başıaçıq
qaçmağa üz qoydu. Sitarənin daldalanmağa bir yeri yox idi;
atası evinə də getməyə qorxurdu. Bunun üçün qarşısına gələn
xərabə bir daxmaya soxuldu. Təklik, xərabənin vahiməsi,
qaranlıq gecə... bunların heç biri ərindən qaçmış cavan gəlinə
əsər edə bilmirdi, ancaq ümidin aldanmağı, arzunun puç olması
odlu göz yaşlarına səbəb olurdu...
İki gün sonra acından taqətdən düşüb bət-bənizi qaçmış
qızı xərabədən tapdılar. Sitarə ata-anasını görcək qəhqəhə
çəkib, uca səslə gülüb deyirdi:
134
– Bilirsiniz? Nişanlıma gül yığmağa getmişdim. Bağça-
mızda nə qədər gül var, çiçək var, hamısı nişanlımındır. Özgəyə
verməyəcəyəm!
Ata-anası onun
sözünü kəsib, acıqlı deyirdilər:
– Kəs səsini, bihəya! Namusumuzu yerə soxdun!
Sitarə bunların cavabında yenə qəhqəhəsində davam edib
deyirdi:
– Siz allah, o çiçəkləri dərməyin! Qoyun qalsın nişanlıma!
Axır mən nişanlımı çox istəyirəm!
Atası bir ağac götürüb, qızını döyməyə başladı. Bu halda
arvad ağlaya-ağlaya ərini tutdu:
– Allah bunu götürməz ki, sən onu döyürsən, görmürsənmi
nə dərdə düşüb... Sitarə divanə olub!.. Evimiz yıxıldı, ay kişi!..
Arvad sözünü qurtarmamış Sitarəni qucaqlayıb, hönkürdü.
Kişi də qızına zənn ilə baxıb, ağacı əlindən salıb, hönkürtmə ilə
ağlamağa başladı.
1911
135
DƏRDLİ ZÜLEYXA
Yarımişıq bir otaqda çarpayıdan on altı - on yeddi yaşla-
rında bir arvad qalxdı. Zarıldaya-zarıldaya çırağa doğru gedib,
işığını çoxaltdı və sonra həyətə tərəf pəncərədən zəif və sızıltılı
bir səslə çağırdı:
– Sənəm bacı, ay Sənəm bacı. Ay qız, vallah, ölürəm, bircə
gəl!
Qonşu Məşədi Həsənin arvadı səsə oyanıb, durdu:
– Yenə nə olub, ay Züleyxa, başına dönüm, yoxsa azarın
qalxıb.
– Ay qız vallah, sancıdan ölürəm! Sənəm söylənə-söylənə
gəldi:
– Pis oğul əkənin atası zirbəzir olsun! Degilən, köpək oğlu,
arvadı azara salandan sonra yalnızdamların altında atıb gedəcək
idin, niyə evlənirdin?
Züleyxa dolmuş gözlərini Sənəmə döndərib yenə:
– Ay qız, axır ölürəm. Vallah, bax, ölürəm, nəfəs ala
bilmirəm.
Sənəm Zuleyxanı bu halda görüb, doluxsundu və
ağlamağını bildirməmək
üçün üzünü divara döndərib, əlinin
dalı ilə göz yaşlarını sildi.
– Ay başına dönüm, mən nə qayırım, a tifil, axır mən
başıma nə kül töküm... Yenə gətir dalını ovum, görüm nə təhər
olur.
Sənəm Züleyxanın dalını ovmağa başladı. Sonra çəkib,
başını dəsmal ilə bağladı. İkisi də pəncərənin qarşısında durub,
sükuta daldılar. Bir az keçmiş Züleyxa zarıldaya-zarıldaya:
– Ay qız, Sənəm bacı, vallah, ölürəm, sancı öldürür.
– Başına dönüm, mənim əlimdən nə gələr? Azarı həkimə
göstərərlər, hər dərdin bir davası olar, mənim, bacı, əlimdən nə
gələr?
Yenə bir az sükuta getdilər, yenə Züleyxanın zarıltısı yeni
bir söhbətə səbəb oldu: