Hilmi Ziya Ülkən ibn Sinanın yaradıcılıq irsi haqqında
277
HİLMİ ZİYA ÜLKƏN İBN SİNANIN YARADICILIQ İRSİ HAQQINDA
Aytək Zakirqızı (Məmmədova)
AMEA Fəlsəfə İnstitutunun
“İslam fəlsəfəsi” söbəsinin elmi
işçisi, fəlsəfə üzrə fəlsəfə doktoru
Ensiklopedik alim İbn Sinanın (980-1037)
vəfatının 980 illiyi münasibətilə
Açar sözlər: İbn Sina, Hilmi Ziya Ülken, tarix, Şərq peripatetizmi, fəlsəfə.
Keywords: Ibn Sina, Hilmi Ziya Ulken, history, Eastern peripateticism,
philosophy.
Ключевые слова: Ибн Сина, Хильмы Зия Улькен, история, восточный
перипатетизм, философия.
Türkiyənin görkəmli mütəfəkkiri Hilmi Ziya Ülkənin (1901-1974) fəlsəfə
tarixinə həsr edilmiş əsərlərində orta əsr Şərq fəlsəfəsi tarixi məsələləri, bu dövrdə
yaşamış Şərq filosoflarının təlimləri geniş şəkildə işıqlandırılır.
Hilmi Ziya Ülkən İslam aləmində yaranan elmin, mədəniyyətin və fəlsəfi fikrin
özünəməxsusluğunu, dünya elm və mədəniyyəti tarixindəki
yerini hərtərəfli şəkildə
göstərmişdir: “İslam fəlsəfəsi IX-XII əsrlər arasında başlıca əsərlərini vermişdir.
Fəlsəfə tarixində Yunan fəlsəfəsi ilə Avropa fəlsəfəsi arasında körpü vəzifəsini gör-
müş, Yunan (qismən Hind-İran) təsirləri ilə yaranaraq orta əsr qərb fəlsəfəsinə təsir
etmişdi. Bunun üçün onu təkcə götürməyib qaynaqları və təsirlərilə birlikdə nəzərdən
keçirmək daha doğrudur. Qərbə görə, Şərq sayılsa da Yunandan çağdaş düşüncəyə
qədər fikir tarixinin inkişafında oynadığı bu rola
görə onu əsl Şərq fəlsəfəsi, məsələn,
Hind və ya Çin düşüncəsi kimi qəbul etmirik. Hətta bu baxımdan onu bir qədər Qərb
fəlsəfəsi tarixinə bir halqa kimi görmək doğru olar” [1, 1].
Mütəfəkkir İslam aləminin fəlsəfəsinin Yunan fəlsəfəsi ilə Avropa fəlsəfəsi
arasında körpü vəzifəsini daşıdığını bildirərkən ilk öncə İslam fəlsəfəsinin Yunan
düşüncəsinin bəsit bir davamı olmadığını, tərcümələr və açıqlamalarla (şərhlərlə)
yanaşı orijinal əsərlər də qələmə alındığını yazmışdır. Sonrakı mərhələlər haqqında
Hilmi Ziya Ülkən bildirmişdir ki, filosoflar (əl-fəlasifə) deyə tanınanların xaricində
kəlamçılar, sufilər, hətta hüquqşünaslar (füqəha) arasında da filosof sayılanlar vardır
ki, bunların bir çoxu Qərb dünyasında tanınmamışdır; əsl fəlsəfə cığırları içində də
bəziləri latıncaya çevrilməmiş və yaxın illərə qədər Qərbdə tanınmamışdır.
Bu qeydlər
nəzərə alındıqda İslam fəlsəfəsinin bütövünü yunanla müasir Avropa düşüncəsi
arasında körpü vəzifəsini görmədiyi anlaşılır [1, 1].
Aytək Zakirqızı (Məmmədova)
278
İslam aləmində klassik şəkil alan bir rasionalist fəlsəfənin başladığını bildirən
türkiyəli alim bunun bir tərəfdən İslam peripatetikləri, digər tərəfdən daha sonrakı
əsrlərdə atomistika və skeptisizmdən qurtulan fəlsəfi kəlam hərəkəti olduğunu
yazmışdır.
Hilmi Ziya Ülkən Aristotelin məşşai məktəbinin (peripateticiens) gəzişənlər deyə
tanındığını, Şərqdə “məşşai” deyilincə yalnız
Aristotel deyil, Platonunda da onunla
birlikdə qəbul edildiyini xatırlatmışdır. Alim orta əsr Şərq filosoflarından,
peripatetizmin məşhur nümayəndələrindən – Kindi, Farabi, İbn Sina, Bəhmənyar və
başqalarının irsini hərtərəfli şəkildə araşdırmışdır.
Mütəfəkkir İbn Sinanı belə təqdim etmişdir: “Əbu Əli Hüseyn ibn Abdulla İbn
Sina (980-1037) qərbdə Avicenna deyə məşhur olub fəlsəfə və tibb sahəsində islam
aləmi qədər qərb orta əsrlərində əsrlərlə hökm sürmüşdür. Fəlsəfədə avicennizm cə-
rəyanı bir çox böyük filosoflara təsirlər etdiyi kimi
averrozm və tomizm ilə də
mücadilə etmişdir. Fəqət tibb sahəsində rəqibsiz bir ustad olaraq yeni dövrə qədər
davam etmişdir… “Qanun”, “Şəfa”, “Nicat”, “Kitab ən-nəfs” kimi bəzi əsərləri bir
çox düzəltmələr və tənqidlərlə yenidən tərcümə və şərh edilmiş, bununla onun qərb
üzərindəki təsiri olduqca uzun bir müddət sürmüşdür” [2, 301-302].
Hilmi Ziya Ülkən İbn Sinanın zamanının alimləri və filosofları ilə mübahisələr
etdiyini, onlara
hücum etdiyini, bəzən də onların hücumuna məruz qalması faktını
yazmışdır. Bunlardan biri İbn Sinanın müasiri, Klavdi Qalen, Aristotel və Hippokratın
bəzi kitablarını şərh etmiş, Bağdadın çox məşhur həkimi və fəlsəfi əsərləriylə tanınmış
Əbülfərəc Abdulla İbn Tayyib Bağdadidir. Filosof onun tibbdəki dərin biliyini təsdiq
etsə də, fəlsəfi əsərlərini tənqid etmişdi. İbn Sinanın daha böyük mübahisəsi Əbu
Reyhan Biruni ilə olandır. Bu böyük alim əksinə İbn Sinaya hücum etmişdi. Həmin
münaqişələr iki və üç risalə halında toplanmışdı. Filosof münaqişədən təsirlənmiş,
nəhayət cavab vermə işini çox sevdiyi tələbələrindən hakim və fəqih kimi tanınmış
Əbu
Abdulla Məsumiyə həvalə etmiş, Məsumi Biruniyə qarşı təkzib qələmə almaqla
İbn Sinanı müdafiə etmişdi [3, 101].
Ensiklopedik alim İbn Sinanın ömrünün son çağlarında qələmə aldığı “İşarələr
və qeydlər” (“əl-İşarat va-t-tənbihat”) kitabından bəhs edərkən Hilmi Ziya Ülkən
yazmışdır: “Çox kiçik yaşda yazmağa başlayan İbn Sinanın olduqca çox əsəri vardır.
Bir qismi bütün sistemini ehtiva edən ensiklopedik əsərləridir. Bir qismi də fəlsəfənin
müxtəlif məsələlərinə aid yazmış olduğu dağınıq kitablardır. Birincilərin ən başında
“Şəfa” gəlir. “Şəfa” Məşşai fəlsəfəsinin sistematik əsəridir. Burada məntiq və
riyaziyyatdan başlayaraq bütün təbiət elmlərindən metafizikaya qədər çıxılır. İbn Sina
bu ən müfəssəl əsərini sonradan qısaldaraq üç kiçik cild halında “Nicat”ı yazdı. Daha
sonra “Nicat”ı da qısaldaraq və zamanla inkişaf edən fikirlərində bəzi düzəlişlər
edərək “əl-İşarat va-t-tənbihat”ı yazdı. “İşarat” ən
müxtəsər, fəqət ən sistemli və
mükəmməl əsəridir. həyatının son əsərlərindəndir. Burada əsas fikirlərini xülasə etdiyi
kimi etirazlara cavab vermiş və əski fikirlərindən nə nöqtələrdə ayrıldığını
göstərmişdir” [4, 191].