_______________ Milli Kitabxana______________
76
Xalq yaradıcılığı çox zəngin və geniş əhatəlidir.
Əfsanələr, əsatirlər, lətifələr, xalq mərasim və adətləri, nağıllar,
dastanlar, bayatılar, laylalar, oxşamalar, sayaçı sözləri,
holavarlar, atalar sözləri, məsəllər, tapmacalar və s. bir tərəfdən
xalqın ictimai həyat tərzini, onların sosial zülmə və yadellilərə
qarşı mübarizə motivlərini əks etdirmiş, digər tərəfdən ailə-
məişət məsələlərini, Vətənə, elə-obaya, əməyə dərin məhəbbət
hissini əks etdirmişdir.
Qədim Azərbaycan nəğmələri xüsusi əhəmiyyətlidir. Bu
nəğmələrdə əhalinin təsərrüfat və məişət həyatı xüsusi ilə öz
əksini tapmışdır.
Xalq milli bayramlarda öz adət-ənənəsini daha yaxşı
biruzə verir. Novruz bayramı ərəfəsində həyət-baca təmizlənir,
ev silinib-süpürülür, hamı təzə və şux geyinib bayram əhval-
ruhiyyəsində olur. İnama görə, həmin gün bütün küsülülər
barışmalı, düşmənçilik aradan qaldırılmalıdır.
Xalq yaradıcılığında səhnələşdirilmiş oyunların,
tamaşaların böyük rolu olmuşdur. Açıq havada keçirilən və
böyük tərbiyəvi əhəmiyyət daşıyan bu oyunlara böyük
tamaşaçı kütləsi baxır. “Kos-kosa”, “xan-xan”, “maral oyunu”,
“kosa və gəlin”, “kilim arası” kimi xalq oyunları öz mənşə
kökləri ilə qədim Şərq xalqlarının mədəniyyətləri ilə səsləşir.
Vaxtilə Azərbaycanın Bakı, Şuşa, Şamaxı, Gəncə və Ordubad
şəhərlərində geniş şöhrət qazanmış “zorxana” yarışlarını da
xalq oyunlarına aid etmək olar. Burada pəhləvanlar xüsusi
libaslar geyərək bir-birilə yarışır, qurşaq tutur, güləşir, daş
qaldırır, öz güclərini sınayırdılar.
Azərbaycanın ayrı-ayrı bölgələrində bu günə qədər də bəzi
yerlərdə qorunub saxlanılmış xalq oyunları qədim tariximizin
bir hissəsi olmaqla insanların mənəvi aləminin
formalaşmasında mühüm əhəmiyyətə malikdir. Odur ki,
onların bütöv Azərbaycanın ayrı-ayrı bölgələri üzrə tədqiqi
həm də mənəvi irsin qorunub saxlanılması baxımından
qiymətlidir.
www.behruzmelikov.com
_______________ Milli Kitabxana______________
77
Azərbaycanda, əsasən də Gəncə-Qarabağ bölgəsində
yayılmış qədim xalq oyunları içərisində canbaz (akrobat), şatır
(qaçışla məşğul olan adam), ipatdı, sədağ (ox), qolça, kaman,
dozu mərə, beş daş, duvaqtapma, mil oynatmaq, daş qaldırmaq
və s. geniş yayılmışdır. Xüsusilə, Novruz bayramı günlərində
Gəncə-Qarabağ bölgəsinin dağ kəndlərində cıdır, müxtəlif
idman oyunları, güləş, nizə tullamaq, oxatma, tonqal üstündən
hoppanmaq, papaq oyunu və s. yarışlar keçirilir.
Gəncə-Qarabağ bölgəsində çovkan oyunu da geniş
yayılmışdır. Çovkan uzunluğu 1 – 1,25 metrə qədər olan, başı
əyri çömçəvari əl ağacıdır. Bu oyun zamanı oyunçular iki
qrupa ayrılıb əllərinə çomaq götürürlər. Çomaqların ucu qövs
şəklində əyilmiş və nadir ipək torlarla hörülmüş olur.
Meydanın ortasında top yuxarı atılır, oynayanlar qışqıra-qışqıra
topun üstünə atılıb, onu ələ keçirməyə və rəqibin qapısı
(çuxuru) tərəfə aparmağa çalışırlar. Bu oyun meydançada ya at
üstündə, ya da piyada keçirilir. Meydançanın qarşı tərəfində
bir-birindən müəyyən məsafədə aralı oyunçuların topu atması
üçün iki çuxur qazılırdı. Top ağacdan, yaxud içərisinə at tükü
doldurulmuş materialdan hazırlanırdı. Oyunda atla iştirak
edənlər bütün oyun ərzində at üstündə olmalı idilər.
Adətən, yoxsullar, atı olmayanlar piyada oyun keçirirdilər.
Gəncə-Qarabağ bölgəsində piyada oyun daha geniş
yayılmışdır.
Gəncədə yaşayıb yaratmış Nizami Gəncəvinin “çovkan”
oyununu öz əsərində təsvir etməsi bu oyunun Azərbaycanda
geniş yayıldığını təsdiq edir. Bu haqda şair “Xosrov və Şirin”
poemasında yazır:
Dişi aslan kimi yetmiş nəfər qız,
Şirinin yanına gəldi qayğısız.
… Çovkan oynamaqda çox çevikdilər
Göydən qapırdılar topu müxtəsər [30, s.121].
www.behruzmelikov.com
_______________ Milli Kitabxana______________
78
Nizami Gəncəvi “Şərəfnamə” əsərində çovkan
oyununun hələ qədimlərdən təşəkkül tapdığını, Əhəmənilər
dövründə isə daha geniş şöhrət tapdığını yazmışdır.
Çovkan oyunu haqqında Dədə Qorqud dastanında,
Əvhədi Marağayi, Qətran Təbrizi, Xaqani Şirvani, Zülfüqar
Şirvaninin, eləcə də səyyah Övliya Çələbinin, “Siyasətnamə”
əsərinin müəllifi Xacə Nizamülmülkün, Nəsiminin,
M.P.Vaqifin, M.V.Vidadinin və başqalarının əsərlərində geniş
məlumatlar vardır.
Məmməd Səid Ordubadinin “Qılınc və qələm” romanında
da XII əsrdə Bağdadda “Top və çovkan” oyunu üzrə yarışlar
təşkil edildiyi göstərilmişdir. Bu yarışda dünyanın bir çox
ölkələrindən 200-dən artıq atçapan iştirak etdiyi göstərilmişdir.
Ermitajda saxlanılan və üzərində “çovkan” oyunu təsvir edilən
vaza bu oyunun Azərbaycanın Qərb bölgəsində geniş
yayılmasından xəbər verir. A.Yakubovski “Musiqiçilər təsvir
edilmiş vaza və Polo oyunu” adlı məqaləsində qeyd edir ki, bu
gözəl abidənin Asiyanın hansı vilayətində yaradılmasını demək
çətindir. Ancaq bu XII əsrə aid vaza olduğuna görə üzərində
çomaqla “çovkan” oynayan 6 atlının və oyun zamanı topu
götürən nökərin piyada fiqurunun təsviri Nizami Gəncəvinin
təsvir etdiyi çovkan oyununa yaxın olması belə güman etməyə
əsas verir ki, vaza Gəncə-Qarabağ bölgəsində hazırlanmışdır.
Gəncə-Qarabağ bölgəsində də geniş yayılmış çovkan
oyunu sonradan Azərbaycandan Hindistana və İngiltərəyə
keçmişdir. Elə Avropada da bu oyunu sevən ilk ölkə İngiltərə
olmuşdur. XIX əsrin ortalarında ingilislər Hindistanda çovkan
oynayan atlıları görmüşdülər. Oyun ingilisləri maraqlandırmış,
onlar hindlilərdən oyun qaydalarını öyrənmişdilər. Sonralar
ingilislərin özləri bu oyunla məşğul olmuş və onu “Polo”
adlandırmışdılar. Hətta 1908-1920-ci illərdə keçirilən
olimpiadalarda ingilislər, 1924-1936-cı illərdə keçirilən
oyunlarda isə argentinalılar qalib gəldilər.
www.behruzmelikov.com
Dostları ilə paylaş: |