74
kəndli əməyindən geniş istifadə olunurdu. Kəndli feodaldan asılı
vəziyyətdə idi, çünki o, feodalın torpağını becərməli, məhsulun müəyyən
hissəsini torpaq sahibinə verməli idi. Bununla yanaşı, kəndli təsərrüfata
(evi, həyətyanı torpağı, mal-qarası, əmək alətləri) malik idi. Lakin onun
əsas gəliri icarəyə götürdüyü feodal torpağı ilə bağlı idi. Torpaqsız
kəndlilər hüquqi cəhətdən feodaldan tam asılı olmaqla, onun torpağa
təhkim edilməsi prosesi artıq bərqərar olurdu.
Azərbaycan istila edildikdən sonra Xilafətin vergi siyasəti burada da
tətbiq olunmağa başladı. Çoxsaylı ağır vergilər torpaq sahiblərini tezliklə
iflasa uğratdığına görə onlar məcbur olurdular ki, öz torpaqlarını ərəb
tayfasının iri torpaq sahiblərinin və dövlət qulluqçularının hamiliyinə
versinlər. Bu torpaqlar hami və ya ilca kateqoriyasına daxil edilib qeydə
alınırdı. Torpağın əsl sahibləri məhsulun bir hissəsini hamilərə verirdilər
ki, onlar torpaq sahibini məmurların zülmündən qorusunlar, torpağın özü
isə sahibinin adına qeydə alınırdı.
Kəndli kütlələrini istismar etmək formaları arasında yarıdarlıq icarəsi
xüsusi yer tuturdu. Torpaq sahibləri torpağı xırda sahələrə bölür və
bunları yarıdarlıq icarə şərtləri-müzariə, müstəqil, qəbalə və i.a. əsasında
yarıdarlara verirdilər. Yarıdarlara akkar, şərik, amil, münasif və s.
deyirdilər. Torpaq məhsulun altıda bir və yeddi də bir hissəsinə müqabil
icarəyə götürülürdü.
Müsəlman hüququ torpaq üzərində mülkiyyət formalarına və ya onun
əldə edilmə üsullarına dair geniş olmayan müddəalar həsr etmişdir. Bu
hüquq yalnız sahibsiz və istifadəsiz torpaqları əldə etməyin
xüsusiyyətlərini və qaydalarını normalaşdırır. Torpaq üzərində
mülkiyyətin əldə edilməsi formaları müsəlman hüququnun obyektinə o
zaman çevrilir ki, o, qanunla nəzərdə tutulan hər hansı bir ictimai
münasibətin yaranması, dəyişməsi və ya xitam edilməsinə səbəb olsun və
bundan sonra mülki hüququn obyekti olsun.
Müsəlman hüquqşünasları torpaq üzərində mülkiyyəti özlərindən
əvvəl mövcud olmuş şəkildə qəbul edir və mülkiyyətin dəyişildiyi zaman
hüququn tənzimləmə obyektinə çevirir. Başqa halda mülkiyyət müsəlman
hüququnun tənzimləmə obyekti deyildir. Yeni torpaqlar işğal edildiyi
zaman belə torpağın mülkiyyətçisi aradan çıxmış olarsa, həmin torpağa
yeni sahibkarlıqdan söhbət gedə bilər.
Azərbaycanda istifadəsiz, bataqlıqlar altında qalmış, şoranlaşmış
torpaqlar mülkiyyətin heç bir kateqoriyasına daxil deyildi. Müəyyən əmək
75
sərf olunduğu halda “Ölü torpaq”lardan istifadə etmək mümkün idi. Ölü
torpaqlar iki yerə bölünürdü: birincisi, uzun müddət istifadə olunduqdan
sonra sahibinin köçməsi və ya müharibələr nəticəsində əhalinin qırılması
ilə boş qalan, lakin suvarma sistemi yolu və başqa əkinçilik imkanları
mövcud olan istifadəyə yararlı torpaqlardır. İkincisi isə heç zaman istifadə
olunmamış, təsərrüfatçılıq imkanları son dərəcə məhdud olan, böyük
əmək və sərmayə qoyuluşu tələb edən torpaqlardır.
Fiqhə görə ölü torpaqlara yiyələnmək üçün dini rəhbərin razılığı
olmalı idi. Lakin torpaq üzərində mülkiyyət hüququ tədricən dövlətə
keçmiş, dövlətin torpaq idarəçiliyinə baxan orqanları olmuşdur.
Xilafətdəki torpaqlar beş əsas kateqoriyaya bölünürdü: 1) Sultan (xəlifə)
mülkləri (diya əssultaniyyə); 2) iqta (icarə) torpaqları; 3) mülk torpaqları;
4) vəqf torpaqları; 5) icma torpaqları.
Sultan torpaqları Əməvilərdən Abbasilərə keçmişdi. Bu torpaqlar alqı
yolu ilə və ya ölənin, yaxud vəzifədən kənar edilən məmurların mülklərini
müsadirə etmək yolu ilə tədricən artırdı. Sultan torpaqları çox geniş idi və
böyük gəlir verirdi. Bu torpaqları idarə etmək üçün bir neçə divan
yaradılmışdı.
Yararlı torpaqların əksəriyyəti iqta torpaqlarına daxil idi. Xəlifə
(Sultan) belə torpaqları müəyyən şəxslərə verir və həmin torpaq üzərində
nəzarəti ona tapşırırdı, yəni torpaq iqta sahibinin mülkü olurdu. Lakin
torpaq sahibliyi hüququna həmişə riayət olunmurdu və iqta geri alınıb
yenidən xüsusi divana verilə bilərdi. Formal olaraq təkcə xassə
torpaqlarından iqta bağışlaya bilməzdi, lakin çox vaxt buna riayət
edilmirdi. İqta sahibləri hərbi mükəlləfiyyət daşımırdılar, lakin bunun
əvəzinə vergi verirdilər. Onlar öz torpaqlarında olan kanal, yol və
körpüləri təmir etməyi öhdələrinə götürmüşdülər. İqta torpaqları nəzəri
cəhətdən iki kateqoriyaya bölünürdü ki, bu da iqta torpağına hansı hüquqa
görə sahib olmaqdan asılı idi.
Bağışlanan iqta şəxsin tam sahibliyinə çevrilirdi və irs olaraq keçirdi.
Bu iqta sahibi üşr verirdi. Bu növ iqta, adətən, becərilməyən torpaqlardan,
ya da sahibi ölmüş və vərəsəsi olmayan torpaqlardan verilirdi.
İcarə edilən iqta (icarə) irsən keçmirdi, adətən, hərbçilərə verilirdi.
Xərac torpaqları da bu kateqoriyaya daxil idi. Şəxsin cəmiyyətdəki
mövqeyindən asılı olaraq ona verilən iqtaların aşağıdakı növləri mövcud
idi: 1) mülki (şəxsi) iqta; 2) xüsusi (xassə) iqta; 3) hərbi iqta; 4) xəlifə
iqtası.
76
Mülki iqta çox geniş yayılmışdı və məmurların tutduqları vəzi-
fələrdən asılı olaraq verilirdi. Yüksək vəzifələrə təyin olunduqdan sonra
məmura iqta verilirdi, lakin o, vəzifədən çıxarıldıqda iqta ondan geri alınır
və onun yerinə keçən şəxsə verilirdi.
Xüsusi iqta şairlərdən başqa, xüsusi bir xidməti və ya xüsusi istedadı
olan şəxslərə də verilirdi. Onun sahibləri torpağın tam sahibi olub, onu irs
olaraq verə bilərdi. Abbasilər xilafətində bütöv vilayətlərin bağışlandığı
müşahidə olunurdu. Babək üsyanı darmadağın edildikdən sonra xəlifə
Mötəsim belə bir iqta adı ilə Azərbaycan, Arran və İrəvanı Afşinə
vermişdi. Digər belə bir iqta, Bab əl-Əbvab (Dərbənd) şəhəri və ətraf
vilayətləri ilə birlikdə iqta kimi Yəzid ibn Məzyədə verilmişdi. Həmçinin,
Gəncə şəhərində “Xaldiyye” adlanan məşhur malikanələr də ona bəxş
edilmişdir. Herik (dinc) saxlanan torpaq bu növ iqtaya daxil idi. Torpaq
sahibi onu becərmək üçün kəndlilərə icarəyə verir, onları toxum, kənd
təsərrüfatı alətləri və suvarmaq vasitələri ilə təchiz edirdi. Şəxsən özü hər
il xəzinəyə müəyyən məbləğ pul verirdi, əvəzində isə torpağa nəzarət
etmək və onu irs olaraq vermək hüququna malik idi. Belə iqta sahibləri
başqa vergilərdən azad idilər.
Hərbi iqta başqa torpaq növləri-xassə iqta, xəlifə malikanələri və
xəzinə torpaqları hesabına verilirdi. Hərbi iqta irsən də həmişəlik
verilmirdi, bu iqta sahibinin mülkiyyəti deyildi. Hüquqşünas Əbu Yusif
iqtanı satın alına bilən, satıla bilən və irs olaraq verilən bir əmlak kimi
başa düşürdü. İqta torpağını irs olaraq və ya pul ilə əldə etmiş olan
şəxsdən geri almağa heç bir kəsin ixtiyarı yox idi.
Torpaq üzərində müxtəlif növ ayrıca sahiblik var idi. Onlardan biri
müxtəlif şəxslərə və icmalara bağışlanan xəlifə iqtası idi. İşğal altında
olan torpaqların canlanması, mərkəzi hökumətin həvəsləndirməsi və
köməyi ilə bataqlıqların qurudulması və bu torpaqların əkilməsi həmin
torpaq sahiblərinə tam sahiblik hüququ verirdi. Mülk torpaqlarının
əmələgəlmə mənbələrindən biri də məhz belə torpaqlar idi. Həmin
kateqoriyadan olan torpaqların digər mənbəyi dövlət torpaqlarının satın
alınması idi. Məmurlar və vəsaiti olan digər şəxslər özləri üçün xəlifə
mülklərini (dövlət torpaqlarını) əldə edir və torpaqların daimi sahibi
olaraq ondan nisbətən sabit gəlir götürürdülər. Həmin kateqoriyadan olan
torpaqların sahibləri əlavə vergi verməli və öz torpaqlarından keçən
kanalları bərpa etmək xərcini də öz üzərinə götürməli idilər.
Mülkiyyətçinin sahibliyində olan daimi mülk torpaqları da mövcud idi.
Dostları ilə paylaş: |