215
(hüquqi şəxs olduqda- tam adı, hüquqi ünvanı);
–
Reyestr Xidmətinin müvafiq ərazi idarəsinin möhür yeri, rəisinin
adı, soyadı, atasının adı, plan və ölçünü tərtib etmiş icraçının adı, atasının
adı və soyadı;
–
plan və ölçünün tərtib edilmə tarixi;
–
torpaq sahəsinin təyinatı (kateqoriyası) və məqsədli istifadə növü
(uqodiyası);
–
torpaq sahəsinin mülkiyyət növü (dövlət, bələdiyyə və xüsusi);
–
torpaq sahəsi üzərində daşınmaz əmlakın dövlət reyestrində
qeydiyyata alınan hüququn növü;
–
torpaq sahəsinin müvafiq hüquqmüəyyənedici sənədlərdə öz əksini
tapmış sahəsi (ha);
–
torpaq sahəsinin inventarlaşdırma (çölölçmə) işləri nəticəsində
müəyyən edilmiş faktiki sahəsi (ha);
–
plan və ölçünün tərtib edilməsi üçün əsas olan qanunvericiliklə
nəzərdə tutulmuş sənədlərin rekvizitləri;
–
torpaq sahəsində mövcud olan servitutlar barədə məlumat;
–
ilkin torpaqayırma sənədlərində müəyyənləşdirilən torpaq
sahəsinin əsas göstəriciləri (o cümlədən, torpaq sahəsinin normativ
qiyməti);
–
torpaq sahəsinin döngə nöqtələrinin koordinatları və onlar
arasındakı məsafələr;
–
torpaq sahəsinin ölçüsünə müvafiq miqyasda tərtib olunmuş torpaq
sahəsinin planı (cizgisi);
–
torpaq sahəsinin yerləşdiyi ərazini əhatə edən “Daşınmaz əmlakın
rəqəmli kadastr xəritəsi”ndən çıxarış;
–
şərti işarələr (“Daşınmaz əmlakın rəqəmli kadastr xəritəsi”ndən
çıxarışda göstərilən işarələrin təsviri).
Plan və ölçü Reyestr Xidmətinin müvafiq rayon (şəhər) ərazi
idarəsinin rəisi və həmin plan və ölçünü tərtib etmiş icraçı tərəfindən
imzalanır, möhürlə təsdiq olunur.
Plan və ölçü itirildikdə, məhv olduqda və ya yararsız hala düşdükdə
qanunvericiliklə müəyyən edilmiş qaydada dublikat verilir. Bu halda plan
və ölçünün yuxarı sağ tərəfində iri hərflərlə ‘‘DUBLİKAT’’ ştampı
vurulur və plan və ölçünü verən Reyestr Xidmətinin müvafiq rayon
(şəhər) ərazi idarəsinin rəisi tərəfindən imzalanır və möhürlə təsdiq
216
olunur.
Dövlət reyestrindən çıxarışın forması və tərtibi qaydası müvafiq icra
hakimiyyəti orqanı tərəfindən müəyyən edilir.
Daşınmaz əmlak üzərində qeydiyyata alınmış hüquq yalnız məhkəmə
qaydasında etibarsız hesab edilə bilər.
Qanunçuluğa görə dövlət qeydiyyatı ilə bağlı mübahisələr yalnız
məhkəmə qaydasında həll edilir.
5.3. Xarici ölkələrdə yerquruluşu sistemi
Xarici ölkələrdə yerquruluşu sisteminin müasir vəziyyətinə ekskurs,
bu dövlətlərdə yerquruluşu təhsilinin təşkilinin xüsusiyyətləri ilə tanışlıq
respublikamızın iqtisadiyyatının dünya iqtisadi sisteminə inteqrasiyası
şəraitində böyük maraq doğurur. Bu tanışlığa isə keçmiş Sovetlər
İttifaqına daxil olmuş ölkələrdən başlamaq daha məqsədəuyğundur. Uzaq
xaricdə yerquruluşu sisteminin və təhsilinin təşkili ilə əlaqədar
məlumatların hazırlanmasında akademik S.N.Volkovun araşdırmalarından
istifadə edilmişdir.
Bizim anlamımızda yerquruluşu torpaq ehtiyatlarından səmərəli
istifadənin və onların mühafizəsinin təşkilinə dair kompleks tədbirlər
sistemidir. Təbii ehtiyatlardan, o cümlədən torpaqlardan tam, dolğun və
səmərəli istifadə edilməsi, təbiətin mühafizəsi, ekoloji landşaft
quruculuğu tədbirləri xarici ölkələrin hər bir vətəndaşının, bütövlükdə
dövlətin bir saylı vəzifəsi və borcu olsa da, bəzi ölkələrdə “yerquruluşu”
anlamına analoq sözü yoxdur. Onu müxtəlif dillərə müxtəlif cür tərcümə
edirlər. İngilis dilində “Land Use Planning” – torpaqdan istifadənin
planlaşdırılması; “Land Management” – torpaq idarəetməsi; “Land
Survey” – sərhədlərin müəyyənləşdirilməsi, ərazi planaalması və s.
Mütəxəssislər bu anlayışlar altında konkret yerquruluşu əməliyyatlarını
başa düşürlər. Yerquruluşu məfhumuna bərabər tutulmayan, amma ona
yaxın olan ifadə fransız dilində “Amenagement Foncir”, alman dilində –
“die Flurbereinigung” ifadələridir.
XVIII əsrin ikinci yarısının ortalarından başlayaraq Rusiyada
mərzçəkmə işlərinə böyük əhəmiyyət verilirdi. Burada məqsəd torpaq
hüququna riayətin yoxlanmasından, zəbt edilmiş dövlət torpaqlarının
müəyyənləşdirilməsindən, sahibkar torpaqlarının və torpaqdanistifadələrin
217
sərhədlərinin dəqiqləşdirilməsindən, torpaq münasibətlərindəki anlaşıl-
mazlıqların, xaosun ləğvindən, torpaqdanistifadələrdəki məkan yerləş-
məsindəki satışmazlıqların aradan qaldırılmasından ibarət olub.
Yerölçən kadrların çatışmazlığı, mərzçəkmənin dövlət əhəmiyyəti
Rusiyada belə mütəxəssislərin hazırlanması üçün xüsusi məktəbin
təşkilini tələb edirdi.
Məhz buna görə də, hələ 200 ildən artıq müddət bundan əvvəl, 25
may 1779-cu ildə Moskvada yerölçmə məktəbinin açılması barədə
sərəncam verilmişdir. Bu məktəb həmin ildə II Yekaterinanın dünyaya
gəlmiş nəvəsi, Knyaz Konstantin Pavloviçin şərəfinə Konstantinovka
məktəbi adlandırılırdı. Çar dövləti bu təhsil ocağına həmişə himayədarlıq
edir, yerölçmə təhsilinə xüsusi əhəmiyyət verirdi. 1835-ci ildən bu məktəb
bazasında Konstantinovsk Mərzçəkmə İnstitutu təşkil edildi və bu sahədə
ali təhsilli mütəxəssis hazırlığına başlanıldı.
Rusiyada bolşeviklərin hakimiyyətə gəlişindən sonra-1917-ci ildən
bu İnstitut Moskva Mərzçəkmə İnstitutu, 1945-ci ildən isə Moskva
Yerquruluşu Mühəndisləri İnstitutu adlandırılmışdır. 1992-ci ildən
MYMİ-nin bazasında torpaq hüququ, yerquruluşu, torpaqşünaslıq,
geobotanika, geodeziya, memarlıq və kənd yaşayış məntəqələrinin
planlaşdırılması ixtisasları üzrə mütəxəssis hazırlayan Dövlət Yerquruluşu
Universiteti yaradılmışdır. Hal-hazırda Dövlət Yerquruluşu Universitetinə
akademik, Rusiyanın Əməkdar elm xadimi, iqtisad elmləri doktoru,
professor Volkov Sergey Nikolayeviç rəhbərlik edir. Universitet Rusiyada
yerquruluşu, torpaq və şəhər kadastrı sahəsində mütəxəssislər hazırlayan
ixtisaslaşmış və ən böyük ali təhsil müəssisəsidir. Burada torpaq
ehtiyatlarının və torpaq bazarının idarə edilməsi, torpaqların və daşınmaz
əmlakların qiymətləndirilməsi sahəsində çalışacaq mühəndis-yer-
quruluşçuları ilə yanaşı, həm də geodeziyaçılar, memarlar, hüquqşünaslar,
iqtisadçı menecerlər hazırlanır. Dövlət Yerquruluşu Universiteti MDB
ölkələrində yerquruluşu təhsilinə koordinasiya edən Tədris-Metodiki
Birlik kimi də fəaliyyət göstərir.
Yerquruluşunun təşkili bir çox xarici ölkələrdə özünəməxsus
xüsusiyyətləri ilə xarakterizə olunur.
Birincisi, yerquruluşuna dair sifarişçilərin böyük hissəsi, əsasən də
dövlət sifarişlərinin dövlət və özəl şirkətlər arasında bölgüsü müsabiqə
əsasında aparılır. Bunun üçün tenderlər, sövdələşmələr, müsabiqələr və s.
218
həyata keçirilir.
İkincisi, yerquruluşunun istehsalat prosesinə böyük ərazilər və
çoxsaylı torpaqistifadəçiləri, sahibkar torpaqları cəlb edildiyi hallarda
yerquruluşu işləri təsisçilərin, sahibkarların-başqa sözlə torpaq bazarı
iştirakçılarının cəlb edilməsi ilə aparılır.
Üçüncüsü, yerquruluşu layihələri daha çox dövlət və yerli
hakimiyyət orqanlarının iştirakı və nəzarəti altında həyata keçirilir. Bu
zaman əsas şüar “ilk növbədə ictimai maraqlara qulluq edilməlidir” olur.
Bunun nəticəsində ilk öncə torpaq mülkiyyətçilərinin həyata keçirilməsi
zəruri olan maraqları öyrənilir, torpaqlardan istifadənin dövlət, regional və
yerli planlaşdırılması, ərazinin zonalaşdırılması aparılır, iqtisadi, hüquqi
və təşkilati tədbirlər vasitəsi ilə torpaq münasibətlərinin dövlət
nizamlanması həyata keçirilir.
Dördüncüsü, yerquruluşuna dair bütün proseslərdə öndəmə gələn
prioritet məsələnin təbiəti mühafizə məsələsinin olmasıdır. Məhz buna
görə də, bu ölkələrdə bütün yerquruluşu layihələrinin müstəqil
ekspertizası aparılır.
Rusiya Federasiyasında yerquruluşunun və torpaq ehtiyatlarının idarə
edilməsi ilə bağlı funksiyaların yerinə yetirilməsini həyata keçirən xüsusi
yerquruluşu orqanları mövcuddur.
Yerquruluşu xidməti-yerquruluşunun inzibati-idarəetmə strukturudur.
Bu xidmətə torpaq ehtiyatlarının dövlət idarəedilməsi üzrə icra
hakimiyyətinin federal orqanı rəhbərlik edir. 2001-ci il tarixdən RF-də
icra hakimiyyətinin federal orqanı kimi Rusiya Torpaq Kadastrı
Federal Xidməti bu funksiyanı yerinə yetirir. Bu orqan ona verilmiş
səlahiyyətlər çərçivəsində dövlət torpaq kadastrının və torpaq sahələrində
yerləşən və torpaqla bilavasitə bağlı olan daşınmaz əmlak obyektlərinin
dövlət uçotunu, yerquruluşunu, torpaqların dövlət kadastr
qiymətləndirilməsini, torpaqlardan istifadə və onların mühafizəsi üzərində
dövlət nəzarətini həyata keçirir.
Yerquruluşuna dair layihə-axtarış işlərinin aparılması Rusiya Torpaq
Kadastrı Federal Xidmətinin tabeçiliyində olan Rusiya Elmi-Tədqiqat və
Layihə-Axtarış Torpaq Ehtiyatları İnstitutuna həvalə edilmişdir.
Yerquruluşuna dair bu baş layihə-axtarış institutu RF-nin paytaxtı Moskva
şəhərində yerləşir. RF-nin iqtisadi regionlarında Rusiya Elmi-Tədqiqat və
Layihə-Axtarış Torpaq Ehtiyatları İnstitutunun 10-dan artıq zonal filiallari
219
vardır.
Yerquruluşuna dair irihəcmli işlərin bir qismi (aerofotogeodezik,
topoqrafik və s. bu səpgidən olan işlər) Rusiya Elmi-Tədqiqat Torpaq-
Kadastr Planaalmaları İnstitutu tərəfindən yerinə yetirilir.
Bunlardan əlavə Rusiya Torpaq Kadastr Federal Xidmətinin
tabeçiliyində Rusiya Torpaq Monitorinqi və Ekosistem İnstitutu
fəaliyyət göstərir. Federal Xidmətin tərkibində həmçinin torpaq kadastrı,
torpaq monitorinqi və yerquruluşu məqsədləri üçün cihaz və
texnologiyanın hazırlanması və istehsalı ilə məşğul olan dövlət
müəssisələri – “Hesablama mərkəzi” və “Yerölçən” mərkəzləri fəaliyyət
göstərirlər.
Rusiyada yerquruluşu istehsalatı üçün, habelə elmi-pedaqoji fəaliyyət
göstərmək üçün kadrların hazırlanması ilə 70-dən artıq ali və orta ixtisas
təhsil müəssisəsi məşğul olur.
Hal-hazırda Rusiyada yerquruluşu üzrə ali təhsilli mütəxəssis
hazırlığı ilə məşğul olan təhsil müəssisələri arasında Dövlət Yerquruluşu
Universitetini (Moskva ş.), Voronej Dövlət Aqrar Universitetini, Omsk
Dövlət Aqrar Universitetini, Sankt-Peterburq Dövlət Aqrar Universitetini,
Novoçervask Dövlət Meliorasiya Akademiyasını, Kuban Dövlət Aqrar
Universitetini, Krasnoyarsk Dövlət Aqrar Universitetini, Perm Dövlət
Kənd Təsərrüfatı Akademiyasını göstərmək olar.
Qazaxıstanda yerquruluşu təhsili və elmi Astana Aqrar Univer-
sitetində təşkil edilmişdir.
Ukrayna Respublikasında yerquruluşu təhsilinin və elminin mərkəzi
Kiyev şəhərində yerləşən Ukrayna Milli Aqrar Universitetidir. Xarkov
Dövlət Aqrar Universitetində, Lvov Dövlət Aqrar Universitetində də
yerquruluşçuları hazırlanır.
Belarusiyada yerquruluşu kadrları Qorki şəhərində yerləşən
Belarusiya Dövlət Kənd Təsərrüfatı Akademiyasında hazırlanırlar.
Baltikyanı dövlətlərdə yerquruluşu təhsili Latviya Aqrar
Universitetində (Yelqava ş), Estoniya Kənd Təsərrüfatı Universitetində
(Tartu ş), Litva Aqrar Universitetində (Kaunas ş) həyata keçirilir.
Özbəkistanda yerquruluşçuları Daşkənd Kənd Təsərrüfatının
Irriqasiyası və Meliorasiyası İnstitutunda hazırlanır.
Qərbi Avropada, ABŞ-da, Kanadada yerquruluşu əməliyyatları
tarixən torpaq kadastrı ilə əlaqədə olub. Bu aşağıdakı səbəblərlə izah
220
olunur:
–
torpaq kadastrı məlumatları torpaq sahələrinin bölgüsünə, yenidən
bölgüsünə, birləşdirilməsinə dair torpaq əqdləri prosesində bilavasitə
istifadə edilir, bunların əsasında da torpaq üzərində mülkiyyət (istifadə)
hüququnu təsdiqləyən sənədlər verilir;
–
torpaqdan müxtəlif səviyyəli hakimiyyət orqanları tərəfindən
istifadənin planlaşdırılması, torpaq quruculuğuna nəzarət edilməsi və s.
məsələlərlə bağlı idarəetmə qərarlarının qəbul edilməsi üçün torpaq
kadastrı məlumatları istifadə edilir ;
–
torpaq kadastrı məlumatları əsasında torpaqların və digər torpaqla
bağlı olan daşınmaz əmlakların uçotu və qiymətləndirilməsi aparılır ki,
bunlar da vergitutma üçün informasiya mənbəyi kimi istifadə olunur;
–
torpaq kadastrı materialları torpaq sahibkarları üçün alət rolu
oynamış, müxtəlif obyektlərin tikintisini koordinasiya etməyə, torpaq
əqdlərini həyata keçirməyə imkan vermişdir.
Beləliklə, xaricdə torpaq kadastrı özündə təkcə texniki əməliyyatlar
deyil, həm də torpaq sahələrinin və digər daşınmaz əmlakların qeydiyyata
alınması və onlarla bağlı əqdlərin həyata keçirilməsi ilə əlaqədar torpaq-
kadastr prosesini özündə birləşdirmiş, yerquruluşu işlərinin böyük bir
hissəsini tarixən akkumulyasiya etmişdir.
Bir çox ölkələrdə ərazinin planaalınması xəritələrinin tərtibi, ölçmə
istehsalatı ilə bağlı yerquruluşu əməliyyatları torpaq kadastrı, geodeziya,
kartoqrafiya işləri ilə məşğul olan xidmətlərdə mərkəzləşdirilmişdir. Bu
zaman yerquruluşu öz kompetensiyaları (səlahiyyətləri) çərçivəsində
müxtəlif səviyyəli icra hakimiyyəti orqanları (dövlət, regional, yerli)
tərəfindən təşkil edilir. Akademik S.N.Volkov xarici ölkələrdə yerinə
yetirilən yerquruluşu işlərinə aşağıdakı tədbirləri aid edir.
Müxtəlif inzibati-ərazi vahidlərində torpaqdanistifadənin
planlaşdırılması (land Use Planing). Bu işlər vaxtı ilə sovet ölkələrində
müxtəlif ərazi vahidləri üçün hazırlanan yerquruluşu sxemlərinin tərtibinə
dair işlər ilə analoji mahiyyət daşıyır. Belə planlar Fransada, İsveçdə,
İsveçrədə müxtəlif ərazi vahidləri və müxtəlif müddətlər üçün tərtib
olunur: regionlar üçün 20-25 ilə nəzərdə tutulan baş planlar, yerli
(bələdiyyə) inzibati ərazi vahidləri üçün isə qısa müddətə – 5-15 ilə torpaq
ehtiyatlarından istifadəyə dair proqnoz təkliflər verilir. İctimaiyyətin
müzakirəsinə verilən belə planlar yalnız camaat tərəfindən bəyənildikdən
221
sonra onlar müvafiq qurumlar tərəfindən təsdiq olunur və icra üçün
hüquqi qüvvə qazanır.
Dövlət, regional, yerli proqramlar və torpaq ehtiyatlarının dövlət
idarəetməsi üsulları əsasında torpaqlardan istifadənin və onların
mühafizəsinin təşkili (Land Management). Bir sıra ölkələrdə torpaq
ehtiyatlarından istifadənin və onların mühafizəsinin təşkilinə dair əsas
tədbirlərin həyata keçirilməsini dövlət ətraf mühitin mühafizəsi, fermer
torpaqlarının konservasiyası, mühafizəsi və s. xüsusi proqramlarla həyata
keçirir. Dünya ölkələrinə bu sahədə ABŞ nümunə ola bilər. Bu ölkə
Daxili İşlər Nazirliyi, Kənd Təsərrüfatı Nazirliyi, Ətraf Mühitin
Mühafizəsi Agentliyi kimi qurumları vasitəsi ilə bu proqramları
maliyyələşdirir. ABŞ-da Kənd Təsərrüfatı Nazirliyi sistemində xüsusi
Torpaq Mühafizəsi Xidməti (Soil Survey) fəaliyyət göstərir ki, onların da
fəaliyyəti bizim yerquruluşu xidmətinin fəaliyyəti ilə üst-üstə düşür.
Proqramlar əsasən aşağıdakı istiqamətlərdə fəaliyyət göstərir:
–
yerquruluşu layihələrinin (torpaqların meliorasiyası, mənimsə-
nilməsi, konservasiyası, su təchizatı) birbaşa maliyyələşdirilməsi;
–
fermerlərə təbiəti mühafizə texnologiyalarının tətbiqinə görə,
həmçinin torpaq sahiblərinə torpaqların istehsal prosesindən çıxması ilə
əlaqədar olaraq dəymiş zərərin ödənilməsi üçün subsidiyaların
ödənilməsi;
–
elmi-texniki informasiya və məsləhət işlərinin aparılması.
Bu proqramlardan əlavə ABŞ-da ştat büdcələrindən də yuxarıdakılara
oxşar proqramların həyata keçirilməsi üçün maliyyə vəsaitləri ayrılır.
ABŞ-da ştat və yerli səviyyələrdə torpaq-resurs siyasətində
mərkəzi yeri torpaqlardan istifadəyə nəzarət tutur. Torpaqdan
istifadənin nizamlanması üçün hakimiyyət aşağıdakı üsullardan
istifadə edir:
–
regionların inkişaf planı çərçivəsində ətraf mühitin çirklənmə
səviyyəsinin maksimal həddinin müəyyənləşdirilməsi;
–
qanunvericilik qaydasında torpaqlardan istifadənin xarakterini
müəyyənləşdirmək məqsədilə ərazinin zonalaşdırılması; təcili kon-
servasiyası tələb olunan torpaqların ştatların mülkiyyətinə alınması və
onların yerli rekreasiya resursları kimi istifadəsi; istehsalat və nəqliyyat
obyektlərinin yerləşdirilməsinin nizamlanması.
Torpaqların mərzləşdirilməsinə dair işlərin aparılması (Land
222
Survey). Xarici ölkələrdə bu işlərin həyata keçirilməsinin kökündə torpaq
kadastr planaalmaları (sərhədlərin planaalması) durur. Bu işlər iki halda
yerinə yetirilir: birinci halda, ərazi üçün torpaq-kadastr planları,
ümumiyyətlə mövcud deyildir və ya yeni qanunçuluqla
müəyyənləşdirilmiş texniki şərtlərə görə mövcud planların təzələnməsi
tələb olunur; ikinci hal-sahələrin dəyişməsi, yerquruluşu işləri aparılan
ərazilərdə torpaq münasibətlərində hüquqi rejimin dəyişməsi ilə əlaqədar
olaraq mövcud torpaq kadastr planlarının dəyişdirilməsi zərurətinin ortaya
çıxması.
Torpaq-kadastr planaalmalarının yeniləşməsi bizim anlamımızda yeni
torpaqdanistifadələrin yaranması və ya mövcudlarının təkmilləşdirilməsi,
habelə müxtəlif məqsədlər üçün torpaqayırmaları, torpaqların
mərzləşdirilməsi məqsədilə aparılan təsərrüfatlararası yerquruluşuna dair
kompleks işlərin məcmusudur.
Uzaq xarici ölkələrdə həmçinin yerquruluşuna dair aşağıdakı
işlər aparılır:
–
sahibkar torpaqlarının və torpaqdanistifadələrin təkmilləşdirilməsi;
–
torpaqların birləşdirilməsi (Land Jonsolidation);
–
əmlakın bölgüsü (Subdivision);
–
əmlakın yenidən formalaşdırılması (Transformation);
–
torpaq sahələrinin yenidən təşkili (Reallotment).
–
torpaq mülkiyyətinin formalaşdırılması (Real Property Formation);
–
sərhədlərin müəyyənləşdirilməsi (delimitation);
–
sərhədlərin naturaya (yerə) köçürülməsi (demarjation);
–
torpaq sahələrinin alınması ilə əlaqədar yerquruluşu (land
Acquisition) və s..
Yuxarıda göstərilən yerquruluşu işləri torpaq sahələri ilə bağlı
əqdlərin həyata keçirilməsi zamanı (mülkiyyətin alqı-satqısı, torpaqların
bağışlanması, irsən keçməsi, sahənin bir qisminin girov qoyulması və s.)
öndəmə gəlir. Bu işlər, əgər dövlət bu sahədə torpaq münasibətlərinin
nizamlanmasına müdaxilə etmirsə, torpaq mülkiyyətçilərinin hesabına
yerinə yetirilir.
Kənd təsərrüfatı təyinatlı torpaqlarda yerquruluşu (təsər-
rüfatdaxili yerquruluşu). Hal-hazırda uzaq xarici ölkələrdə bu işlər
ayrıca bir sahibkar torpağı üçün görülmür. Yerquruluşu sənədləri bu halda
özündə bir neçə fermer təsərrüfatının arealını birləşdirən müəyyən
223
ekoloji-landşaft strukturu üçün hazırlanır. Almaniyada, Avstriyada,
Macarıstanda, Çexiyada, Slovakiyada və digər Qərb ölkələrində
hazırlanan yerquruluşu layihələrinin əsas məqsədi-təbiəti mühafizə,
ərazinin təşkilinin mühəndis-təsərrüfat elementlərinin yerləşdirilməsinə
qoyulan aqroekoloji tələblər əsasında torpaqdan istifadənin optimal və
səmərəli növbəli əkin sistemlərinin müəyyənləşdirilməsindən ibarətdir.
Yerquruluşu layihələrinin ikinci hissəsi kəndli (fermer) təsər-
rüfatlarında eroziyaya qarşı tədbirlər sisteminin, mühəndis hesablamaları
əsasında terraslaşma işlərinin, torpaqların konservasiyasına dair
tövsiyələrin hazırlanmasına həsr olunur. Türkiyə, ABŞ, Fransa kimi
ölkələrdə bu işlərin yerinə yetirilməsilə təkcə yerquruluşçuları deyil, eyni
zamanda kənd təsərrüfatının müxtəlif sahələrinin bilicilərini özündə
cəmləşdirən xüsusi birləşmələr məşğul olurlar.
Uzaq xarici ölkələrdə yerquruluşu təhsilinin təşkili də maraq doğurur.
Yerquruluşu kadrları Çexiya və Slovakiyada Politexnik İnstitut-
larında, Bolqarıstanda-Ali Memarlıq və Landşaft Universitetində,
Macarıstanda-Meşə Təsərrüfatı və Ağac Emalı Sənayesi Universitetində
hazırlanırlar.
Çin Xalq Respublikasında yerquruluşu təhsili Pekin, Uxan, Nankin
şəhərlərində yerləşən Aqrar Universitetlərdə, Monqolustanda – ali aqrar
təhsil ocaqlarında, Vyetnamda isə-Hanoy Kənd Təsərrüfatı İnstitutunda
təşkil edilmişdir.
ABŞ və Kanadada torpaq ehtiyatlarından səmərəli istifadənin və
onların mühafizəsinin təşkilinə dair mütəxəssislər torpaqlardan istifadənin
planlaşdırılması, landşaft memarlığı, daşınmaz əmlakın iqtisadiyyatı, kənd
torpaqlarının təşkili bölmələrində hazırlanırlar.
224
Ramiz Mirmahmud oğlu Quliyev. Yerquruluşu. Yerquruluşunun
elmi əsasları. I cild. –Bakı, “MBM”, 2007. – 224 səh. (ali təhsil
müəssisələrinin tələbələri üçün dərslik və dərs vəsaitləri)
____________________________________
Йыьылмаьа верилмишдир: 15.06.2007
Чапа имзаланмышдыр: 09.07.2007
Тираъ 300; шярти чап вяряги 14
«МБМ» мятбяясиндя
чап олунмушдур
Dostları ilə paylaş: |