__________________Milli Kitabxana_________________
357
Yerdəki ot qurşağa dəyirdi. Qızılgül kollarının üstündə lap açıq çəhrayı güllər
topa-topa açılmışdı. Elə bil hər budağın üstündə bir çıraq, yox bir günəş yanır,
bahar öz töhfələrini tabaq-tabaq təqdim edir... elə bir lütf ilə, elə bir nəvazişlə ki...
Şair gözlərini göylərə çevirdi. Səma çox uzaq, çox dərindi. Firuzəyi qübbədə
bir dənə də bulud, bircə parça ləkə, kölgə yox idi... Göylər uzaq-uzaq, xəfif-xəfif,
mehriban-mehriban gülümsəyir, göylərin bu nəvazişkar təbəssümündən yerlərə elə
bil bahar səadəti səpələnirdi. Şairin ürəyi telləndi: "İlahi! Hardasan, kimsən,
nəçisən -bilmirəm... Qoy səni ərəb - Allah, erməni - Astvats, urus - Boq, türk
-Tanrı adlandırsın... Kimliyini, bu əngin, füsunkar fəzanın hansı yerindədirsə,
mövqeyini bilmirəm. Amma bu mütəbəssüm aləmi yaradan ulu qüvvət- sənə səcdə
eləyirəm, sənə inanıram... Mənim də mənliyim hürufilər demişkən eynən sənin öz
təşbehində xəlq olunub",- deyə özü də öz xəyallarına gülümsədi. "Qəribə aləmdir,
bir tərəfdən sənə, yaratdığın bu böyük, gözəl və möhtəşəm dünyamız, nemətlərimiz
üçün təşəkkür edirəm, ahunun nəfəsində ətri, arının yuvasındakı lətif balı, qurdun
qarnındakı zərif ipək tellərini sən xəlq eyləmisən,amma Molla Qurbanqulunu da,
əqrəbi də, naməşdi Alışı da, birəni də sən yaratmışsan... Necə olub ki, bir insan,
mənim kimi ətdən, qandan gəmikdən yaranan bir insan yer üzərində Allahın, bu
böyük intəhasız göyləri,ərzü səmavatı, ayı, ulduzları, aləmməfruz günəşi yaradan
böyük xaliqin vəsisi olsun? Ona peyğəmbərlik, buna imamlıq, o birinə də seyidlik,
molla və dərvişlik verilsin (Seyid ha!!! Unutdunmu, şairim, məgər sən özün də o
silkə mənsub edilmirsən?). Axı bu adamlar da mənim kimi,Cavad kimi, Şirin
Abdulla təki, Qırmızı Məşədi Qulam kimi adicə adamlardır. Ətdən, damardan,
sümük və dəridən ibarətdilər. Onları da xəncərlə öldürmək, bıçaqla yaralamaq
mümkündür. O da mənim kimi dərdlərə, bəlalara mübtəladır. Özünü düşmən
öldürür, balalarını da əsir aparır. Onun nəyi məndən artıqdır. Böyük Yaradan,
məgər özünə daha başqa qüdrətli, sitayiş və hörmətə layiq ayrı bir vəsi yarada
bilmirdi?
Dünən qapımızı birisi kəsdirib:
-Ya Cədda!!! - bəli, məlum olur ki, bu, yer üzünün xaliqi olan Allahın
rəsulunun nəslindəndir və biz qara camaat da gərək həmişə, ömrümüz uzunu bunun
qarnını doyuraq. Deyirəm:
-Qardaş, sən seyidlik naminə necə dilənə bilərsən, axı? Axı sən şahzadəsən,
peyğəmbər adına sual etmək, dilənmək olmaz... Peyğəmbər övladı, Hüseyn övladı
şah nəsli sayılır...
__________________Milli Kitabxana_________________
358
Yandan kimsə qayıtdı ki:
-Aadə, bu sənin öz əmin oğlu, seyiddi...
-Bə sən neynən dolanırsan, xalqdan dolanmırsan bəyəm?
-Mən heç olmasa, cəddim naminə heç kəsi allatmıram. Elə-belə yeri düşəndə
həmvətəninizəm, şairinizəm, balalarınız üçün yuxusuz gecələrimin məhsulu olan
kitablar, əşar təlif eləyirəm, külfətim möhtacdır deyirəm; mən aldatmıram, açıq
dilənirəm... (Seyyidin bu düşüncələrində elə bir acı kədər, dərin iztirab var idi ki,
indi üzündə əks olunduğu kimi, o zaman da əks olunmuş və müsahibini belə
dəhşətə gətirmişdi, indi onda olduğu kimi bu böyük kədərə, dərin yaraya
toxunduğu üçün yenidən ağrındı).
...Ağa bu düşüncələrin ağır yükünü yüngülləşdirmək üçün təpədən endi. "Eh,
lənət şeytana, bir enim Bəzzazbazara, görüm Cavad nə fənddədi?" - deyə düşündü.
...Bazara enən yolu indi artıq ot basmışdı, il yağıntılı keçdiyindən çayır o qədər
çox idi ki, səhərdən axşamacan təpik döyən yollar belə göyərmişdi. Şair düşünə-
düşünə irəliləyir, bazara tərəf enirdi. O, bazara çatanda uzaqdan Yetim Hüseyn
avazla oxuya-oxuya tabaq gəzdirirdi:
Halva dadlı, təmlidi,
Satan da məlhəmlidi.
Tut ağacının altı qələbəlik idi. Cin Cavad yenə də öz məşhur yerində, - "Cavad
daşının" üstündə oturmuşdu. Başına da xeyli adam yığılmışdı. Ağanı hələ ki,
görmürdülər. Üzü Cavada durub onu dediyi hansı bir lətifəni və ya şeri isə maraqla
dinləyirdilər. Aralıda Şirvanda təzəcə çıxmış cigir-cigir havasında oxuya-oxuya
gedən bir kasamasçı gözünə sataşdı. Kişi bir-birindən kiçik qatıq dolu üç cürdeyi
üst-üstə qoyub başında gəzdirir və qatıq satırdı. Əlində abgərdən var idi. İstəyənə
qatığı bu abgərdənlə cürdəklərin birindən götürüb verirdi. Yeridikcə çigir-çigirin
ahənginə uyğun olaraq, elə məvazinət saxlayır və dingildəyirdi ki,elə bil cürdəklər
onun başına yapışqanla yapışdırılmışdı:
Tiflisin bürcü mənəm,
Dil bilməz gürcü mənəm,
__________________Milli Kitabxana_________________
359
Baş qoyum dizin üstə,
İl yatsam incimərəm.
Cigir-cigir, cigir-cigir.
Sənə qurban yazıq canım...
Mahnının incə, eyni zamanda oynaq ahəngi ürəyə yatımlı, kasamasçının səsi də
xoş idi. Odur ki, bir neçə nəfər dayanıb kişiyə tamaşa edir, uşaqlar da dalınca
düşüb gedirdilər.
Ağa xoş avazla oxunan təzə mahnıya bir xeyli qulaq verdi və cavanın ahəngdar
hərəkətlərini, rəqqas yerişini xeyli izlədi, sonra da Cin Cavadın dəstəsinə
yaxınlaşdı. Dostunun səsini hələ heç onun üzünü görməmişdən əvvəl eşitdi. Cavad
deyirdi:
Gəldik cahana ləzzət alaq molla qoymadı,
İçdi, yedi... yenə də qarnı doymadı...
-Ha... ha... ha...
-Ə,
yavaş gülün, eşidən olar...
-Cavadı qoyasan elə mollaya, dərvişə sataşa... Amma heç bir demir ki,
onlardakı vardan, dövlətdən bir mənim də olaydı...
-Yəqin paxıllıqdan sataşır olara, əlinə düşmür, deyir iylənib...
-Sö-ləsən, meyitüvü görüm, kəlləpaçanın da dili-ağzı var, Allahın lal heyvanı
da ac qalmaz. Cavadın əlinə keçsə, yeməz?..
-Lap lüm-lüm udar...
-Budu ha... Ağa gəldi... Seyid adamdı, onda olar, Ağa, əlim aşağıdı, üç-dörd
günlüyə mənə bir beş manat əlborcu ver... - deyə Cavad Ağanı qarşıladı.
Şair, Cavadın onu qəsdən dilləndirmək istədiyini anlayırdı. Nə Cavada pul
lazım idi, nə də lazım olsaydı da onu Ağadan istəməzdi, varidatına bələd idi. Odur
ki, Seyid Əzim onu görən kimi zarafatlaşmalarını yarımçıq kəsib cəld, böyük bir
ədəb və hörmətlə salam verənlərin salamını aldı. "Cavad daşının" bir tərəfındə
onun üçün hazırlanan yerə keçdi. Cavanlardan birisi nimdaş çuxasını çıxarıb Seyid
Əzimin altına salmaq istədisə də şair, razılıq vermədi:
-Yox, sağ ol, oğul, yaza, günə baxma, hava hələm soyuqdu, soyuqlarsan...
-Sən də soyuq daş üstündə oturub və basir qazanarsan.
-Canın sağ olsun, gedərəm, əttarın yanına, deyər get bir çimdik kükürdü kərə
yağında ərit, yax göy çadraya, yapışdır yaraya...