10
diqqətı çəkməkdə və nəzəri-estetik fikri məşğul etməkdədir. Bu mənada Əzizə
Cəfərzadənin Füzuli sehrinə düşməsi tamamilə təbiidir.
"Eşq sultanı" Əzizə Cəfərzadə yaradıcılığının son məhsulu kimi maraq doğurur.
Bu romanı yazıçının zəngin və çoxcəhətli yaradıcılığının təsadüfi bir örnəyi hesab
etmək doğru deyildir.
Əzizə xanım bütün ömrü boyu gərgin işləsə də, onun həyatının son illəri daha
səmərəli və məhsuldar olmuşdur. Belə ki, yazıçı ilə yaxın ünsiyyətdə olanlar ədibin
daim vaxt azlığından şikayətləndiyini xatırlayırlar.
Onu da qeyd edək ki, Füzuli mövzusu Əzizə Cəfərzadənin yaradıcılığı üçün
gözlənilməz deyildir. O, uzun illər boyu bu mövzu ilə maraqlanmış, nə zamansa
yazacağını düşündüyü roman üçün fakt və materialları daha erkən illərdən
toplamağa baslamışdı. Yazıçının Fuzuliyə həsr olunmuş elmi tədqiqatları da
diqqətə layiqdir. Habelə xatırlatmağa ehtiyac vardır ki, Şamaxı rayonunda yerləşən
xaraba Bayat kəndində abidə qoyulması təsəbbüsü də Əzizə xanıma məxsusdur.
Təsadüfi deyil ki, romanda yazıçı Füzulinin Şirvandan köçüb getməsi, əslən
Şamaxının qədim Bayat kəndindən olması versiyasını əsas götürmüş və hadisələri
bu məcrada təsvir etmişdir. Ona görə də roman boyu Füzulinin yaşadığı vətən
həsrəti, qürbət duyğuları qabarıq ifadəsini tapmışdır.
"Eşq sultanı" romanında, həmçinin "Söhbətül-əsmar" və "Bəngü-Badə" əsərinin
yaranması ilə bağlı təsvir olunan epizodlar özünəməxsusluğu ilə yadda qalır.
Yazıçının əsərdə yaratmış olduğu tarixi şəxsiyyətlər orijinallığı, bənzərsizliyi ilə
diqqəti çəkməkdədir.
Daha bir səciyyəvi detal romanda yazıçının öz yaradıcılıq üslubuna sadiq
qalaraq dövrün etnoqrafiyasını canlandırması ilə bağlıdır.
Romanda diqqət çəkən məqamlardan biri də burada Füzulinin və onunla həm
əsr digər sairlərin yaradıcılığından gətirilmiş poetik parçaların təsvir olunan hadisə
və əhvalatların məzmununa uyğun verilməsidir. Bu poetik örnəklər bir tərəfdən
tarixin cizgilərini canlandırmağa imkan vermiş, digər tərəfdən əsərin poetik
ovqatını və ruhunu təmin etmişdir.
Romanın üslubuna dərin, axıcı bir lirizm hakimdir. Bu lirizmi bir yandan əsərin
mövzusu, digər yandan yazıçının özünəməxsus üslubu diqtə etməkdədir. Əsərin
bölmələri süjetin bütövlüyünü təmin etdiyi kimi bu bölmələrin hər birinin müəyyən
mənada bitkin məzmuna malik olduğu da diqqətdən qaçırılmamalıdır.
İnanırıq ki, müəllifin yalnız öz dövrünə deyil, gələcəyə ünvanlanmış əsərləri
geniş oxucu kütləsinin diqqət və marağına səbəb olacaq, sevilə-sevilə oxunacaqdır.
Vaqif Sultanlı
11
ŞAMAXI YOLLARDAN BAŞLAYIR
Şamaxı yollardan başlayır... Yollar... Sonsuz, nəhayətsiz yollar... Şirvana gedən
yol az qala bütün dünyanın ticarət aləminə məlumdur. Şərqin bir sıra şəhərlərində
hələ uzun illər "Şirvana gedən karvan yolu", "Şamaxı yolu", "Şirvan şahlığı",
"Şamaxı sultanlığı" ifadəsi qalacaq... Bu yollardan gələn karvanlar Şirvan gözəlləri
üçün Benaresdə toxunmuş incə, zəngin və gözəl bənarə örpəklər, hind gəlinlərinin
örtdüyü sarı kimi zərif çarşablar, Bakıdan neft, duz, zəfəran, Şəkidən ipək,
Dağıstandan şal, Qafandan misgərlər üçün mis külçələri, Qəbələdən qoz, fındıq və
şabalıd, Məkərə və Moskvadan, İrandan, Türkiyədən, Ərəb ölkələrindən müxtəlif
matahlar gətirir. Qapan meydanı səhərdən axşamacan, axşam namazından sübh
azanınacan aramsız işləyir. Burada baş qapançı Ağa Rəsulun köməkçiləri və
şagirdləri yükləri qapana vurur. Mirzə Səftər isə hesabat dəftərinə salır. Sonra
möhkəm yaddaşlı Ağa Rəsul dəstəmazını sındırmadan oturub, gələn malları
hesablayır. Şamaxının dörd mindən ziyadə sənətkarına, yeddi yüz toxucu
dəzgahına, iki qanovuz karxanasına, bəzzaz, baqqal, misgər, başmaqçı cərgələrmə
lazım olan malları, tacir və sənətkarların tələb etdiyi qədər bölüşdürüb paylaşdırır,
qalanını sarbanlar üçün hazırlatdırır. Ağa Rəsul bütün bu ağır hesabatı Mirzə
Səttardan yaxşı yadda saxlayır, heç kəsin sifarişini, sifarişin qədərini unutmur.
Hesab dəftərindən düşənləri də Mirzə Səttarın yadına özü salır.
Şirvanın aləm vaxtında giririk bazara. Hələ nə 1859, nə 1872, nə də 1902-ci
illərdə bu yerləri xərabəzara çevirən, onun görkəmli adamlarını, adlı tacirlərini
diyarbədiyar salan, gözəl binalarını, daş döşənmiş dürüst küçələrini alt-üst edən
zəlzələlər baş verməyib, az qala yüz əlli minə çatan əhalisinin çoxu didərgin
düşməyib, hələ hər bir evdən, hər ağac dibindən bir toy, bir şənlik məclisinin səsi
gəlir, Şirvan xanəndələrinin, rəqqasələrinin şöhrəti dünyaya yayılıb, şən-şatir
adamlar “əhli-kef”, bəxtiyar camaat kimi, dövlətli-varlı, gülərüz, qonaqsevər xalq
kimi tanınır. Zeynalabdin Şirvaninin Hindistan, Ərəb ölkələri, İran, Əfqanıstan
səfərləri haqqında əfsanələrə, nağıllara bənzəyən hekayələri bitib qurtarmayıb.
Cavan tacirlər onun izilə, onun gəzib, görüb gəldiyi ölkələrə getmək həvəsindədi.
Tək bir Şamaxıda qanovuz, kəlağayı,