____________________________________________
49
Üzr istəyirəm, vaxtı bir az çox alıram, amma bunları burada
demək istəyirəm. Vaxtilə hakim bir ideologiya var idi. Bu hakim
ideologiya xüsusən 30-cu illərdə, elə sonrakı dövrlərdə də
istedadlı olub-olmamağından asılı olmayaraq, insanları istedadlı
yazıçı vəzifəsinə təyin edirdi. Məsələn, deyirdi ki, sən
dünənəcən tramvay sürəndin, bu gün təyin olunmusan istedadlı
Azərbaycan yazıçısı vəzifəsinə. Yaxud, bir pyes yazmısan, xalq
düşmənlərini ifşa eləmisən, onda sən təyin olunursan görkəmli
Azərbaycan yazıçısı vəzifəsinə. O xalq düşmənini necə, hansı
bədii estetik səviyyədə ifşa eləmisən, yaxud nə üçün ifşa
eləmisən, bunun prokuroru, vəkili kimdir ki, bundan söhbət
getmirdi.
Yaxud Sov.İKP Mərkəzi Komitəsi, deyək ki, camışçılığın
inkişafı haqqında qərar qəbul edirdi. Artıq bunun ədəbiyyat
nöqteyi-nəzərindən 50-ci illərə də, 60-cı illərə də, hətta bəzən
sonrakı illərə də dəxli var. Sov.İKP Mərkəzi Komitəsi Nazirlər
Soveti ilə birlikdə camışçılığın inkişafı haqqında qərar qəbul
edirdi. Azərbaycan ədəbi tənqidi və yaxud Sovet ədəbi tənqidi
nə edirdi? Sovet ədəbi tənqidi partiyanın qərarının bədii
ədəbiyyatdakı təcəssümünü tələb edirdi. Bu zaman ədəbiyyata
heç bir dəxli olmayan əsərlər meydana çıxırdı. Mən onların
üzərində dayanmaq istəmirəm, hamınız bunu çox gözəl
bilirsiniz. O əsərlərin qəhrəmanları, misal üçün, bir camışdan üç
bala alırdısa, olurdu müsbət qəhrəman, gözəl, yüksək səviyyəli
bir qəhrəman, yazıçının böyük nailiyyəti. Amma bu, hansı bədii-
estetik səviyyədə idi - bunun fərqinə varan yox idi.
Şübhəsiz ki, o dövrdə eyni zamanda istedadlı ədəbiyyat da
yaranırdı. O istedadlı ədəbiyyatın yaranması prosesi Azər-
baycanda 70-ci illərdə özünü çox parlaq şəkildə büruzə verdi.
Dissident ədəbiyyatından çox danışırlar. Düzdür, Azərbaycanda
xüsusi demək olmaz ki, filan bir dissident roman yazdı, xaricdə
çap olundu. Azərbaycanda çap olunmadı və yaxud
____________________________________________
50
bir poema yazdı, xaricdə çap olundu, Azərbaycanda olunmadı.
Amma mən bunun şahidiyəm, dostlarım da bilir, - Anar, Yusif,
Əkrəm burada əyləşiblər, - hamısı şahiddir ki, biz o vaxt tez-tez
Moskvaya, başqa respublikalara gedirdik, orada bizə deyirdilər
ki, Azər Moskvada işləyirdi, bunu təsdiq edə bilər, - siz nə
edirsiniz, Azərbaycanda nə baş verir? Yəni, o əsərlər ki,
Moskvada dissident ədəbiyyatı nümunələri sayılırdı, o əsərlər
Azərbaycanda, adlarını da bilirsiniz, kifayət qədər də həcmi olan
əsərlər idi, həm şerdə, həm nəsrdə, hətta dramaturgiyada olan
əsərlər idi, - həmin "Azər-baycan", "Ulduz" jurnallarında,
"Ədəbiyyat" qəzetində çap olunur, Əzizbəyov adına teatrda
tamaşaya qoyulurdu və s. Doğrudan da bu, olan bir şeydir və
bunun üstündən keçmək olmaz. Ona görə keçmək olmaz ki,
mümkün də deyildir. Çünki Azərbaycanın bugünkü
özünüifadəsində bunun çox böyük rolu var.
Amma indi necə vəziyyət əmələ gəlib? İndi elə bil ki, qələm
dostlarım da, - bu gün söhbət ədəbiyyatdan gedir, - ədəbiyyat
adamları arasında, bəlkə səhv edirəm, elə bil ki, bir az özlərini
itiriblər. Şübhəsiz ki, bunun böyük səbəbləri var. Həm də maddi
səbəbi var.
Dünənə qədər əsərlər çap olunurdu, qonorarları alınırdı. Buna
görə də yazıçıların heç bir vəzifədə və başqa yerdə işləməyinə
ehtiyac yox idi. Bu qonorarlar onların ailələrini, özlərini
yaşatmaq üçün kifayət idi.
Bu gün həm maddi, həm də mənəvi çətinliklər ortaya çıxıb.
Hətta ən istedadlı, görkəmli yazıçı özünü axtarmağa başlayıbdır.
Məsələn, Əkrəm Əylislinin çıxışı barədə bu gün burada söhbət
açdılar. Əkrəm Əylislinin bu son altı ildə, hətta ondan əvvəlki
illərdə - Yazıçılar İttifaqında işlədiyi dövrdən bugünkü günə
qədər gəldiyi yolu nəzərə alaraq mən deyə bilərəm ki, bu yol
tamamilə ziqzaqdan ibarət bir yoldur. Mən bunu pis mənada
yox, yaxşı mənada deyirəm. Mən
____________________________________________
51
bunu qələm dostumun özünü axtarışı kimi hesab edirəm. O,
özünü, həqiqəti axtarır. Bu nöqteyi-nəzərdən elə bil yazıçılar
özlərini itiriblər. Həm maddi cəhətdən böyük çətinliklərə, həm
də dediyim həmin o altı ilin içərisinə sığmayan böyük
problematika ilə, əgər belə demək mümkünsə, həmin altı ilin
ehtivasına sığışmayan 60 ilin, bəlkə də 100 ilin problematikası
ilə qarşılaşıblar. Əlbəttə, bu nöqteyi-nəzərdən Azərbaycan ədəbi
prosesinin bugünkü zəifliyinin, hətta mən deyərdim ki, bugünkü
ölgün vəziyyətin səbəbləri vardır. Şübhəsiz ki, burada Yazıçılar
Birliyi, Nizami adına Ədəbiyyat İnstitutu daha artıq dərəcədə
fəal olmalıdırlar. Amma ilk növbədə, mən özüm də daxil
olmaqla, bizim hər birimiz fəal olmalıyıq.
Heydər Əliyeviç, mən Sizə deyim, bu gün ədəbi meyarlar,
demək olar ki, itib, yəni bu gün ədəbiyyatda elə bir deqradasiya
prosesi gedir ki, onun qarşısını almaq inzibati nöqteyi-nəzərdən
mümkün deyildir. Onun qarşısını qərarlarla almaq mümkün
deyil. Bunun qarşısını ancaq əsl ədəbiyyatın təəssübünü
çəkməklə almaq mümkündür.
Məsələn, Siz də dediniz, bu gün bir nəfər prokuror haqqında
kitab çıxır. Məlum olur ki, belə böyük-böyük kitabların Mətbuat
və İnformasiya Nazirliyinə dəxli yoxdur. Kiminsə pulu var,
gedib hansısa bir şəxsi nəşriyyatda çap etdirir. Məlum olur ki,
bir yazıçı var imiş, sən demə, onun 10 romanı var imiş, Sovet
İttifaqı, Sovet Azərbaycanı vaxtında bunu sıxışdırıblar,
kitablarını çap etməyiblər. O bunları indi çap elətdirir, cildləri
çıxır. Digər tərəfdən, şer naminə heç bir şey olmayan cild-cild,
ensiklopediya boyda kitablar çap olunub. Təkrar edirəm,
bunların qarşısını nə ilə almaq olar? Sovet dövrü deyil ki, qərar
çıxarasan və yaxud digər işlər görəsən. İnzibati yolla buna nə
deyəsən? Deyəsən, get onu tut ki, nə üçün bu kitabı çap
etmisən? Burada nə etmək olar? Ancaq və ancaq ədəbiyyatın
təəssübünü çəkmək.
Dostları ilə paylaş: |