126
olan köhnə dostlarının bəziləri bolşeviklərə işləməyə razı ol-
muşdular: Ağahüseyn Kazımov xalq səhiyyə komissarı olub,
Cəmil bəy Ləmbəranskini və Əmir bəy Aslanovu da yanına
aparmışdı; Cəmil bəy Vəzirov Xalq Poçt-Teleqraf və Rabitə
Yolları Komissarlığına başçılıq eləyirdi; Firuz bəy Ordubads-
ki Xalq Ərzaq Komissarlığında sığınacaq tapmışdı; bolşeviklər
- Bahadur Vəlibəyov Naxçıvanda, Mustafa Quliyev Lənkə-
randa İnqilab Komitəsinin sədriydilər; Möhsün İsrafilbəyli
Xalq Hərbi Dəniz İşləri Komissarlığı xüsusi idarəsinin
rəisiydi. Amma, əlbəttə, ən böyük məsuliyyəti daşıyanlardan
biri Müvəqqəti Hərbi-İnqilabi Şuranın üzvü Qəzənfər
Musabəyov idi...
Yeni quruluş altı ay ərzində əlli minə yaxın adamı qətlə
yetirib, müqavimət ocaqlarını amansızcasına söndürüb yerini
bərkidəndən sonra o aldanmış biçarələri bir-bir aradan
götürəcəkdi...
...Noyabrda xəbər tutdu ki, Stalin Bakıya gəlib, Lahıcda
həbs olunub həbsxanaya salınmış Məmməd Əmini azad etdi-
rib, özüylə Moskvaya aparıb, guya orda böyük vəzifəyə təyin
eləyəcək. Bu səbrini daşdıran son damlalardan oldu. Bundan
sonra öz həyatı barədə düşünməliydi...
***
Səbir kasasının lap sonuncu damlası da dekabrda doldu.
Qarlı bir qış günündə Xəlil bəy səfarətdə peyda oldu...
“Əlimərdan bəyin təyinatıyla mən Cümhuriyyətimizin İs-
tanbuldakı səfiri təyin olunmuşam”, – onun sifətində inamlı,
bir qədər də özündənrazı ifadə vardı.
Yusif Vəzir heyrətləndi: Sülh heyətinin başçısı olan şəxsin
bu cür təyinat verməsi görünməmiş iş idi. Əlimərdan bəy
parlamentin sədri olsa belə, xariciyyə nazirinin və nazirlər ka-
bineti sədrinin səlahiyyətinə aid olan məsələləri həll eləmək
fikrinə düşməzdi. Burda nəsə başqa mətləb vardı.
127
“Amma fikrimiz budur ki, siz vəzifənizə davam eləyəsiniz,
mənsə Əlimərdan bəyin İstanbuldakı nümayəndəsi kimi çalı-
şım”.
Sükut çökdü. Yusif Vəzir Zeynal bəylə baxışdı, bir-birini
sözsüz-sovsuz başa düşdülər.
“Möhtərəm Xəlil bəy, bilmək olarmı ki, bu səfarətxana
hansı vəsaitlə fəaliyyətinə davam eləyəcək?” – Onun səsində
maraqdan çox istehza vardı.
“Əlimərdan bəy Gürcüstan heyətindən borc pul alıb, sizin
maaşlarınız, səfarətxananın kirayə haqqı ödənəcək, bunları
mən öhdəmə götürürəm”, – Xəlil bəy nəzərlərini ondan
çəkmədən cavab gözlədi.
Sükut bu dəfə daha uzun sürdü. Yusif Vəzir masasının
arxasından qalxıb pəncərənin qarşısına getdi, papiros yandı-
rıb sümürə-sümürə pərdələrin arasından kədərli qış
mənzərəsinə baxdı. Əlində iri bağlama olan qadın küçəni ke-
çirdi, asta-asta addımlayıb yüngül dumanda yox oldu.
“Belə isə, – sağ əlini jiletinin yaxasından çəkmədən dönüb
Xəlil bəyin gözlərinin içinə baxdı, – mən siyasətdən getdiyimi
bəyan eləyirəm. Bu gündən səfir deyiləm, səfarətin işlərini də
cənabınıza təhvil verirəm”.
Xəlil bəyin sifətində təəccüb peyda oldu, göz bəbəkləri bö-
yüdü, nəsə demək istədi, amma udqunub susdu.
“Bu qərarımı tezliklə xariciyyə nazirinə də, Sədrəzəm
həzrətlərinə də çatdıracağam, sonrası sizin səlahiyyətinizdədi,
necə məsləhət bilirsiniz, o cür də eləyin”.
“Bu mübarizə meydanından qaçmaqdı”, – Xəlil bəyin
səsində tənə vardı.
“Olsun, – Yusif Vəzir istehzayla gülümsədi, – mən onsuz
da siyasət adamı deyildim, amma bacardığımı da əsirgə-
mədim, üç ildə nələr çəkdiyimi bir Allah bilir. Artıq otuz dörd
yaşındayam, başqa cür yaşamaq istəyirəm”.
Söhbət, əslində, bitmişdi. Xəlil bəy qalxdı, təəssüflə başını
bulaya-bulaya, sağollaşmadan qapıya doğru getdi.
128
“Hər şey bitdi, – Yusif Vəzir yeriyib Zeynal bəylə üz-üzə
dayandı. – Sən də, Mirzə Qədir də qərar verməkdə sərbəstsiniz.
Mən bundan sonra neyləyəcəyimi fikirləşməliyəm”.
Sultanəhməd camisində ucalan azan səsi, elə bil, olub-
keçənlərə son nöqtəni qoyurdu. Axşamın toranında səs
həmişəkindən kədərliydi...
129
VIII FƏSİL
QIZILBUYNUZDA İKİ QƏRİB
Leo Nusaimbaum
İstanbul
Yanvar-may 1921-ci il
Leo özünü bəxtli adam sayırdı. Fikrincə, buna yetərincə
haqqı vardı.
Kiyevdə doğulmuşdu, körpəliyini Tiflisdə, uşaqlığını və
yeniyetməliyini Bakıda keçirmişdi, gəncliyini Avropada yaşa-
yacaqdı; həkimin uşaq vaxtı qoyduğu ürək çatışmazlığı diaq-
nozu əsassız çıxmışdı, son illərdə kifayət qədər gəzib görmək
imkanı qazanmışdı; atasının, guya, xilas yolu kimi çıxdığı
Türküstan, Buxara, İran səfərindən sağ-salamat dönmüşdü;
qırmızı terrordan sağ-salamat qurtarmışdı (əlbəttə, ona yaşına
görə bəlkə də toxunmazdılar, amma atasını həbsxanaya salsaydılar,
ya da güllələsəydilər, taleyi necə olardı?); körpəliyinin keçdiyi
şəhəri doyunca gəzmişdi, indi də zəmanənin ən gözəl pa-
roxodlarının birinin birinci dərəcəli kayutunda dünyanın
paytaxtına – Konstantinopola gedirdi.
Bunu ancaq bəxtin gətirməyi saymaq olardı...
130
Düzü, atası son vaxtlar xüsusilə Bakıdan çıxandan sonra
özünü o qədər də yaxşı hiss eləmirdi, daim halsızlıqdan
şikayətlənir, gözlərinin qabağındaca qocalırdı. Dediyinə görə,
Tiflisdə həkimə getmişdi, elə ciddi xəstəliyi də yox idi, görü-
nür, nəyinsə xiffəti ona rahatlıq vermirdi. Bu Leonu o qədər
də narahat eləmirdi, bilirdi ki, Abram çox sevdiyi yeganə oğ-
lunu son nəfəsinəcən himayə eləyəcək, həyatda yolunu tap-
ması üçün özünü oda-közə vuracaqdı.
Mdivaninin əsil-nəcabətli knyaz olduğuna zərrə qədər də
şübhə eləmirdi. Yoxsa Batumdakı bu cəhənnəmdən baş çıxa-
rıb Gürcüstan pasportu və möhtəşəm paroxoda bileti tapmaq
elə-belə adamın işi ola bilməzdi. İndi göyərtədə hava soyuq
olduğundan, yanaşı kayutda əla gürcü çaxırı içib İstanbulda
neyləyəcəkləri barədə plan tökə-tökə günlərini yola verirdilər.
Leosa Aleksiylə gur işığa bələnmiş dəhlizlərdən keçir, salon-
larda, kayutlarda yığılmış cürbəcür geyimli, müxtəlif dilli
mühacirlərə, barlara, restorana, daim nəsə çalan ağ geyimli
orkestrə, eynilə ağ formalı xidmətçilərə heyran-heyran baxır-
dı: Avropaya ancaq bu cür adamlar gedə bilərdilər! Avropa
səliqə-sahmanın, təmizliyin, əzəmətin simvoludu!
Amma paroxodda ikinci dərəcəli kayutların yerləşdiyi
hissə də vardı. Burda o şıxlıq, dəbdəbə, əzəmət hiss olunmasa
da, az-çox imkanlı adamların yerləşdikləri duyulurdu.
Leo miskin kütlənin yığışdığı, ümumi kayutlar yerləşən
üçüncü dərəcəli sərnişinlərin məkanını da gördü: yalnız bur-
da zamanənin gerçək izləri – binəsiblik, ümidsizlik, əlacsızlıq
hiss olunurdu. Olan-qalan pullarını verib birtəhər paroxoda
minmiş bu bir qarnı ac-bir qarnı tox gün keçirən bədbəxtlər
Konstantinopolda, yaxud Avropada nə axtarırdılar?
Frau Şultenin ağır gövdəsi kayutda, elə bil, hərəkət eləmir,
gəmiylə bərabər üzürdü:
“Başa düşürsən, Leo, – deyirdi, – bu qarmaqarışıqlıqdan
qurtarıb Avropaya getmək nə qədər böyük xoşbəxtlikdi!
Xüsusilə səndən ötrü! Ömrün irəlidədi, oxuyub həyatda
özünə bir mövqe qazanarsan”.
Dostları ilə paylaş: |