379
Prof. Dr. Vidadi MURADOV / Naxçıvan Diyarında Xalçaçılıq Sənətinin İnkişafına Dair
əhali onu "qızıl qoyun" adlandırırdı. Mazıx qoyunlardan fərqli olaraq, balbas cinsli qoyunların yunu ağ
rəngdə olub xalça toxuculuğu üçün daha yararlı hesab edilirdi. Hər iki cinsdən olan qoyunlar Naxçıvanla
yanaşı, İrəvan qəzasında, habelə qonşu İranda və Türkiyədə də yayılmışdı [1,s.246;10,s.21].
V.Qriqoryevin verdiyi məlumatdan aydın olur ki, XIX əsrin 30-cu illərində Naxçıvan diyarında məhz bu
qoyun cinsləri saxlanılırdı. Onun yazdığından məlum olur ki, buradakı "qoyun və qoçların hamısı
quyruqludur, onların yunu orta keyfiyyətlidir və daha çox evlərdə kobud mahud, xalça, kilim və at çulu
hazırlanmasına sərf edilir" [14,s.93].
İ.Şopen yazırdı ki, İrəvan və Naxçıvan bölgələrində saxlanılan
qoyunların hər başından ildə 3,8 batman və yaxud 4,5 funt yun almaq mümkündür [23,s.794-795]. Bunu
əsas tutan tədqiqatçılardan biri XIX əsrin 30-40-cı illərində Naxçıvan diyarında saxlanılan 69.953 baş
qoyun və keçidən ildə 7772 pud yun əldə edilməsi fikrini irəli sürür [4,s.59].
Naxçıvan diyarında forma və təyinatına görə xovlu xalçalar xalı, xalça, gəbə, canamaz növlərinə,
xovsuz xalçalar isə kilim, palaz, vərni, sumax, ladı, şəddə, xovsuz xalça məmulatları isə çul, məfrəş,
çuval, xurcun, heybə və s. növlərə bölünürdü. XVIII-XX əsrin əvvəllərində Naxçıvan diyarında toxunub
bu günə qədər qalmış xalça məmulatları üzərində apardığmız tədqiqatlar göstərir ki, burada toxunan istər
xovlu, istərsə də xovsuz xalça məmulatları müxtəlif ölçülü (220x150, 160x90, 380x200, 500x90,
240x120, 400x100, 370x200, 120x90, 200x160, 600x500, 180x160) olub, evlərdə döşəmələrin
örtülməsində, otaqların isidilməsində və bəzədilməsində istifadə edilirdi [9,s,48].
Onu da göstərmək lazımdır ki, xalçaçılıq sənəti Naxçıvan diyarında XVIII-XX əsrin əvvəllərindəki
yüksək inkişaf səviyyəsinə gəlib çatana qədər 4 mərhələdən ibarət olan uzun və mürəkkəb bir inkişaf yolu
keçmişdir. Xalça sənətinin ibtidai dövrü hesab edilən birinci mərhələdə əsasən, bəzəksiz, saya yerli və
birrəngli palaz və cecimlər toxunurdu. Bu mərhələdə toxucular yalnız heyvan yunlarının təbii
rənglərindən istifadə etməklə öz məhsullarına bəzək vururdular [2,s.74].
İkinci dövr xalça sənətinin texniki və bədii cəhətdən inkişafının ilk mərhələsi hesab edilir. Bu
dövrdə sadə dolama texnikasının köməyindən istifadə edən toxucular öz məhsulları üzərində sadə naxışlar
salmağa başlamışdılar. Naxçıvanda bu üsulla toxunmuş palaz və kilimlərdən alaçıqlarda, dəyələrdə və
toyxanalarda həm daxili bəzək-döşəmə, həm də xarici örtük kimi istifadə edirdilər [2,s74].
Xalça sənətinin üçüncü mərhələsi mürəkkəb dolama texnikasından və müxtəlif ölçülü naxış
elementlərindən geniş istifadə edilməsi yolu ilə vərni, zili, şəddə, sumax və ladı kimi xalça məmulatları
istehsalının meydana gəlməsi dövrü kimi xarakterizə edilir. Aparılan tədqiqatlar belə bir ehtimal irəli
sürməyə imkan verir ki, şəddə və vərni istehsalı Naxçıvanda meydana gəlmişdir. Maldarlığın geniş
yayıldığı bölgələrdə daha çox istehsal edilən bu məmulatlar üzərində stilləşmiş heyvan təsvirlərinin, zili
bəzəklərində isə həm də bir sıra həndəsi elementlərin meydana gəlməsi özünü bu mərhələdə daha aydın
göstərir [2,s.74].
Xalça toxuma sənətinin dördüncü mərhələsi düyünləmə, yəni əvvəllər dolama ilmə, sonralar isə
qullabı ilmə texnikası ilə yaranan xovlu xalça toxuma üsullarının inkişaf etdiyi dövrdür. Bu mərhələ istər
texniki, istərsə də bədii cəhətdən xalça sənətinin yüksək inkişaf dövrü hesab edilir. Hələ çox qədimlərdən
istifadə edilən ilmə-düyün texnikasının bu mərhələdə daha geniş tətbiq edilməsi mürəkkəb naxış-bəzək
kompozisiyalarının yaranmasına imkan verdi. Bu texnikanın geniş tətbiq edilməsi ilə əlaqədar xalçaçılar
istər xovlu, istərsə də xovsuz xalça məmulatlarının istehsalı zamanı dəmir bıçaq və qayçı, həvə və kirkit
kimi yeni əmək alətlərindən istifadə etmişlər [2,s.75].
Daxili və xarici bazarlarda xalça məmulatlarına tələbatın kəskin şəkildə artması bu sənətin
xarakterinə də ciddi təsir göstərmişdi. Uzun müddət ev peşəsi səciyyəsi daşıyan xalçaçılıq, XIX əsrdən
etibarən Azərbaycanın əksər bölgələrində olduğu kimi, Naxçıvan diyarında da daha çox bazar üçün
işləyən sənətkarlıq sahəsinə çevrilmişdi. Maraqlıdır ki, kapitalist istehsalının sürətlə inkişaf etdiyi XIX
əsrin ikinci yarısında sənət istehsalının əksər sahələrinin dərin tənəzüllə uğradığı bir şəraitdə xalça
məmulatı istehsalında, az ala sıçrayış xarakteri daşıyan yüksəliş müşahidə edilirdi. Yaranmış bu
vəziyyətin səbəbləri həmin əsrin sonlarında Cənubi Qafqazda xalçaçılıq sənətinin vəziyyətini öyrənmiş
K.Xatisovun hesabatında aydın şəkildə əks olunmuşdur. Hesabat müəllifi bildirir ki, qoyunçuluğun
inkişaf etdiyi kəndlərin iqtisadi həyatında xalça və palaz məmulatı istehsalının çox böyük əhəmiyyəti
vardır. Fikrini davam etdirən müəllif yazır ki, xalça məmulatı kəndlərin məişətində mebel, yataq dəsti və
pərdə rolu oynamaqla yanaşı, həm də onların mühüm gəlir mənbəyini təşkil edir" [21,s.284].
Statistik
məmulatlar da göstərir ki, bu dövrdə xalçaçılar istehsal etdikləri məhsulun xeyli hissəsini bazara çıxarıb
satırdılar. 1845-ci ildə Naxçıvan qəzasında istehsal edilmiş 1050 ədəd xalçanın 400, 3000 ədəd çuvalın
1500, 5000 çuvalın 2000, 10.000 yun corabın 5000 ədədi satılmışdı [19,s.44].